1. ¿Tlen okichi Jehová?

JEHOVÁ otechyoltilanki para ma tipouikan itech ialtepe (Juan 6:44). Ye okitak itlaj kualtsin itech toyolo uan okitak uelis tiktlasojtlaskej (1 Crón. 28:9). Jehová kuali techixmati, techajsikamati uan techtlasojtla. ¡Non melauak techyolchikaua!

2. ¿Tlen okijto Jesús para ma tikajsikamatikan tinochtin techtlasojtla Jehová?

² Jehová mitstlasojtla uan noijki kintlasojtla nochtin tokniuan. Para tikajsikamatiskej ma tikitakan tlen okijto Jesús: “Tla se tlakatl kimpia se siento iichkawah, iwa kipoloa se, ¿amo kinkajtewa n nawi póali iwa n káxtoli iwa n nawi (99) ichkameh kan tepeyo iwa kontemoa non opoliwik?”. Ijkuak kajsi yolpaki, amo iuan kualani. ¿Non tlen techmachtia? Jehová ken se tlajpixki uan kintlasojtla nochtin ichkauan. Jesús okijto: “Amo kineki mapoliwi nion se de ninteh pípilteh” (Mat. 18:12-14).

3. ¿Tlen timomachtiskej?

³ Amo tiknekij tikchiuaskej nion tikijtoskej itlaj tlen uelis kinyolkokos tokniuan. Itech nin tlamachtil tikitaskej ninmej tlajtlanilmej: ¿Tlen uelis tikchiuaskej para amo tikinyolkokoskej tokniuan? ¿Tlen uelis tikchiuaskej tla ikaj techyolkokoua? Pero achto ma timotlapouikan itech “pípilteh” non ijkuilitok itech Mateo capítulo 18.

4. ¿Akinmej okatkaj ken “pípilteh”?

⁴ Nonmej “pípilteh” yejuan imachtijkauan Jesús. Maski san tlen xiuitl kipiaj, yetoskia ken konemej porque kikauiliaj ma kinmachti (Mat. 18:3). Maski tlatlamantli  kinpaktia itlaj kichiuaskej, tlatlamantli inmialtepe uan inyelis, nochtin tlaneltokaj itech Jesús, ik non, ye kintlasojtla (Mat. 18:6; Juan 1:12).

5. ¿Tlen kimachilia Jehová ijkuak kinchiuiliaj tlen amo kuali noso kinyolkokouaj itekipanojkauan?

⁵ Jehová kintlasojtla nonmej “pípilteh”. Tikajsikamatiskej tleka kintlasojtla tla timokuayejyekouaj ken timomachiliaj ijkuak tikatej iuan konemej. Tejuan tikintlasojtlaj, tiknekij tikinmaluiskej porque yejuan ayamo kimatij nion ueli momaluiaj noijki ayamo ixtlamatkej ken akinmej yiuejueyij. Amo techpaktia ijkuak ikaj kinchiuilia tlen amo kuali uan okachi tikualanij ijkuak se konetl itlaj kichiuiliaj. Jehová noijki ijkon momachilia. Ye kintlasojtla itekipanojkauan uan kineki kinmaluis, ik non, ijkuak ikaj kinchiuiliaj tlen amo kuali noso kinyolkokouaj, ye kualani (Is. 63:9; Mar. 9:42).

6. Ijkon ken kijtoua 1 Corintios 1:26-29, ¿ken kinmitaj akinmej kichiuaj ken Cristo?

⁶ ¿Tlen okse tlamantli kiteititia imachtijkauan Jesús katej ken “pípilteh”? ¿Axkan akinmej kinmitaj okachi ueyititokej? Akinmej kipiaj miak tomin, akinmej miakej kinmixmatij. Pero akinmej kichiuaj ken Cristo amo ijkon kinmitaj. Sekimej kinmitaj ken “pípilteh” ken amo okachi inpati (xiktlajtolti 1 Corintios 1:26-29). Pero Jehová kema kinpatioita.

7. ¿Ken kineki Jehová ma tikinmitakan tokniuan?

⁷ Jehová kintlasojtla nochtin itekipanojkauan, maski yimiak xiuitl kitekichiuiliaj noso amo. Ye kinpatioita nochtin tokniuan, ik non, tejuan noijki moneki tikinpatioitaskej. Moneki tikintlasojtlaskej nochtin tokniuan amo san sekimej (1 Ped. 2:17). Moneki tikinpaleuiskej uan tikinmaluiskej. Tla otikmatkej otikyolkokojkej se tokni, amo ma timokuayejyekokan san ika tepitsin moyolkokoua uan moneki techtlapojpoluis. ¿Tleka sekimej uelis moyolkokoskej? Xamo ken omoskaltijkej, mokuayejyekouaj amitlaj inpati noso xamo yikin peuaj touan monechikouaj uan kitaj oui kintlapojpoluiskej oksekimej. Maski ijkon panos moneki timochijchikauaskej para kuali timouikaskej iuan tokniuan. Uan tla ikaj san niman moyolkokoua moneki mochijchikauas para ayakmo ijkon ma kichiua. Ijkon yolpakis uan kuali mouikas iuan oksekimej.

8. ¿Tleka imachtijkauan Jesús omokuayejyekouayaj okse tlamantli?

⁸ ¿Tleka Jesús okijto “pípilteh”? Imachtijkauan okitlajtlanijkej: “¿Akin okachi weyi itech ilwikak kan Dios tlanawatia?” (Mat. 18:1). Miakej judíos okinekiayaj oksekimej ma kinmitakan ueyititokej. Se ixtlamatki okijto: “Tlakamej okipatioitayaj ma kintlakaitakan, ma kinselikan uan miakej ma kinmixmatikan”.

9. ¿Tlen omonekiaya kichiuaskej imachtijkauan Jesús?

⁹ Jesús okimatiaya judíos omokuayejyekouayaj okachi okimatiayaj uan amo oksekimej. Ik non, ye okinmilui imachtijkauan: “Akin weyijkatitok, amo mamoweyili; iwa akin teyakana, noiwa makimati matetlakita” (Luc. 22:26). Tejuan tikteititiaj amo ‘tiweyijkatitokejʼ ijkuak timokuayejyekouaj oksekimej okachi kimatij (Filip. 2:3). Tla timochijchikauaj ijkon timokuayejyekoskej, amo tikinyolkokoskej oksekimej.

10. ¿Tlen moneki tikchiuaskej ijkon ken okijto apóstol Pablo?

 ¹⁰ Nochtin tokniuan okachi itlaj kimatij uan non uelis tikitaskej tla tikitaj tlen kuali kichiuaj. Ma tikchiuakan tlen apóstol Pablo okinmilui tokniuan tlen ochantiayaj ompa Corinto: “¿Akin omitsili okachi miak timopati? ¿Mach amo Dios omitsmaktili nochi tlan tikpia? Iwa tla Ye omitsmaktili, ¿tleka timoweyilia kemi yaskia san te monewia otikmotlanili?” (1 Cor. 4:7). Ik non, amo ma tiknekikan oksekimej ma techitakan okachi topatij noso okachi tiueyititokej. Tla tokniuan tlakamej kuali tlamachtiaj ijkuak timonechikouaj noso tokniuan siuamej peuaj miakej kinmachtiaj, san moneki kiueyichiuaskej Jehová porque ye kinpaleuia ijkon ma kichiuakan.

11. ¿Tlen techmachtia tlen Jesús okijto?

¹¹ Ijkuak Jesús okinnejmachti imachtijkauan para amo ma kinyolkokokan oksekimej, itlaj okintlapoui; tlen okichi se tekiua iuan itlakeualuan. Tekiua okitlapojpolui se itlakeual tlen amo keman uelis kitlaxtlauiliskia tlen okiuikiliaya. Satepan non tlakeuali amo okitlapojpolui okse tlakeuali tlen amo miak okitlauikiliaya. Satepan tekiua otlatitlanki ma kitsakuatij itlakeual tlen amo oteiknomatki. ¿Non tlen techmachtia? Jesús okijto: “Notajtsi non kajki ilwikak, noiwa ijkó kitoktis akin amo kinekis kitlapojpolwis aka ikni ika nochi iyolo” (Mat. 18:21-35).

12. ¿Tlen uelis panos tla ikaj amo tiktlapojpoluiaj?

¹² Tlen okichi non tlakeuali amo san ye omotlajyouilti, noijki okintlajyouilti oksekimej. Amo kuali okichiuili okse tlakeuali “otlanawati makitsakuatih iwa makikajkawakah asta ijkuak nochi makitlaxtlawili”. Noijki okinyolkoko oksekimej tlen okitakej. Jesús okijto: “Ijkuak n oksikimeh tekitkeh okimatkeh, miak okinyolkoko”. Noijki ijkon tlen tejuan tikchiuaj noijki uelis kinyolkokos oksekimej. Tla ikaj itlaj amo kuali otechchiuili uan amo tiktlapojpoluiaj, ¿tlen uelis panos? Tikyolkokoskej, amo tikititiskej tiktlasojtlaj uan xamo hasta amo tiknotsaskej. Noijki tokniuan uelis amo kuali momachiliskej tla kitaj amo kuali timouikaj iuan se tokni.

13. ¿Tlen techmachtia tlen okipanok se precursora regular?

¹³ Tla tikintlapojpoluiaj tokniuan, kuali timomachiliskej uan noijki yejuan. Ijkon okipanok se tokni precursora tlen tiktokayotiskej Crystal. Ye kilnamiki amo kuali omomachiliaya porque se tokni amo kuali okichiuiliaya. Ye okijto: “Tlen onechiluiaya sapanoua onechyolkokouaya. Ijkuak otitetlapouiayaj amo oniknekiaya iuan nitetlapouiti, ik non, ayakmo oniyolpakiaya ijkuak onitetlapouiaya”. Crystal omokuayejyekouaya amo kuali okichiuiliayaj, ik non, omoyolkokouaya. Pero okijto kitlapojpoluiskia uan amo san itech motekipachoskia. Okatka yolyamanki uan okichi tlen kijtoua tlamachtil “Perdonemos de corazón” tlen kajki itech revista Akin Tetlapouijtok tlen okiski itech octubre 1999. Ik non, okitlapojpolui tokni. Crystal okijto: “Axkan nikajsikamati nochtin timochijchikajtokej tikpiaskej toyelis ijkon ken Jehová kineki uan ye mojmostla techtlapojpoluia. Kuali nimomachilia uan niyolpaki”.

14. (1) Ijkon ken kijtoua Mateo 18:21, 22, ¿xamo tlen okipanok Pedro uan tlen techmachtia tlen okijto Jesús? (2) ¿Tlen techpaleuis tla techpanos ijkon ken Pedro?

 ¹⁴ Tikmatij moneki titetlapojpoluiskej pero xamo tikitaj oui ijkon tikchiuaskej. Xamo apóstol Pedro ualeua ijkon okipanok (xiktlajtolti Mateo 18:21, 22). ¿Tlen uelis techpaleuis para ma titetlapojpoluikan? Achto ma timokuayejyekokan Jehová miak uelta yotechtlapojpolui (Mat. 18:32, 33). Amo technamiki ma techtlapojpolui pero ye techtlapojpoluia (Sal. 103:8-10). Biblia kijtoua: “Moneki matimosepantlasojtlakah”. Ik non, moneki tikintlapojpoluiskej tokniuan (1 Juan 4:11). Noijki ma timokuayejyekokan tlen panoua ijkuak titetlapojpoluiaj. Tikpaleuiaj akin otechyolkoko, kuali mouikaj nochtin tokniuan tlen inmiuan timonechikouaj, kuali timouikaj iuan Jehová uan kuali timomachiliaj (2 Cor. 2:7; Col. 3:14). Noijki tla tiktlatlaujtiaj Jehová, techpaleuis ma titetlapojpoluikan. Amo ma tikkauilikan Satanás ma kichiua amo ma timouikakan iuan tokniuan (Efes. 4:26, 27). Ma tikkauilikan Jehová ma techpaleui para amo tikchiuaskej tlen Satanás kineki.

15. Ijkon ken kijtoua Colosenses 3:13 TNM, ¿tlen uelis tikchiuaskej tla se tokni techkualania?

¹⁵ ¿Tlen uelis tikchiuaskej tla se tokni techkualania? Moneki timochijchikauaskej para kuali iuan timouikaskej. Ma tikiluikan Jehová ken timomachiliaj. Ma tikiluikan ma kiteochiua akin otechyolkoko uan ma techpaleui ma tikitakan tlen kuali kichiua uan ma tikitakan tokni ijkon ken ye kita (Luc. 6:28). Tla amo tikilkauaj tlen otechchiuili, ma timokuayejyekokan ken uelis tiktlapouiskej.  Ma timokuayejyekokan tokni amo okinek techyolkokos (Mat. 5:23, 24; 1 Cor. 13:7). Ijkuak iuan timotlapouiskej ma timokuayejyekokan ye yolkuali. ¿Uan tla amo kineki touan motlapouis? Biblia kijtoua: “Ximoxikojtokan uan sepa ximotlapojpoluikan”. Ma tikiknomatikan tokni (xiktlajtolti Colosenses 3:13, TNM). Amo ma tikkokolikan, tlamo Jehová ayakmo touan mouikas. Amitlaj ma techtsakuili tikchiuaskej tlen Jehová kineki, ijkon tikteititiskej tiktlasojtlaj (Sal. 119:165).

16. ¿Tlen moneki tikchiuaskej tinochtin?

¹⁶ Tiktlasojkamatiliaj Jehová porque tiktekichiuiliaj iuan tokniuan (Juan 10:16). Amochtli Organizados para hacer la voluntad de Jehová itech página 165 kijtoua: “Moneki timochijchikauaskej kuali timouikaskej iuan tokniuan”. Noijki kijtoua: “Kuali inmiuan timouikaskej tla tikinmitaj ijkon ken Jehová kinmita”. Ye tinochtin techita ken “pípilteh” uan sapanoua techtlasojtla. Ijkon moneki tikintlasojtlaskej tokniuan. Ye kita uan kipatioita ijkuak tikinpaleuiaj uan tikinmaluiaj (Mat. 10:42).

17. ¿Tlen yotikijtojkej tikchiuaskej?

¹⁷ Tikintlasojtlaj nochtin tokniuan. Ik non, Biblia kijtoua: “Yej ximoyekwikakah iwa amo xikchiwakah itla non makikxitlanwi [noso ma kitsakuili] nomokni” (Rom. 14:13). Ma timokuayejyekokan tokniuan okachi ‘weyijkatitokehʼ iuan moneki tikintlapojpoluiskej. Amitlaj ma techtsakuili para tikchiuaskej tlen Jehová kineki. Ma tikchiuakan tlen kijtoua Biblia: “Matiktemokah nochi tlan techmaka yolsewílistli, iwa matimosepampalewikah para okachi mamoskalti totlaneltokalis” (Rom. 14:19).