1. ¿Tlen uelis techmomojtis?

 MA TIKITAKAN tlen okinpanok sekimej tokniuan. Néstor uan isiua tlen itoka María, okinekiayaj tetlapouitiuij kanin okachi moneki. * Pero omonekiaya kikauaskej seki tlamantli uan non okinmojtiaya. Omokuayejyekouayaj amo yolpakiskiaj tla amo kipiaskiaj miak tlamantli. Se tokni tlen itoka Biniam chanti kanin amo kinekij ma kintlapouikan. Ijkuak omochi iTlaixpantijka Jehová, okajsikamatki noijki kitlajyouiltiskiaj. Pero okachi okimojtiaya tlen mokuayejyekoskia ifamilia ijkuak kimatiskiaj okipatlak ireligión. Noijki tikitaskej tlen okipanok tokni Valeria, tepajtijkej okiluijkej okipiaya cáncer. Ye okijto kitlakamatis tlen kijtoua Biblia, ik non, amo okinek ma kitlalilikan estli uan oui okajsik se tepajti tlen okijto amo kitlalilis. Ye amo okinekiaya ixpoliuis.

2. ¿Tleka moneki timochijchikauaskej para amo san timomojtijtoskej?

² ¿Yotimomachili ken tokniuan tlen yotikinmijtojkej? Miakej kema ijkon yotechpanok. Tla san timomojtiaj uelis tikchiuaskej itlaj amo kuali uan ayakmo timouikaskej iuan Jehová. Ijkon kineki Satanás ma tikchiuakan. Ye kineki ma timomojtikan para amo ma tiktlakamatikan Jehová uan ayakmo ma titetlapouikan (Apoc. 12:17). Maski Satanás chikauak uan amo teiknomati, ¿tlen techpaleuis para amo ma timomojtikan?

3. ¿Tlen techpaleuis para amo ma timomojtikan?

³ Satanás amo techmomojtis tla tikneltokaj Jehová  techtlasojtla uan kineki techpaleuis (Sal. 118:6). Akin okijkuilo Salmo 118 sapanoua otlajyoui. Sekimej tlen okikokoliayaj okipiayaj se tekitl miak ipati (versículos 9 uan 10). Ualeua okichiuiliayaj tlen amo kuali (versículo 13). Noijki Jehová okiyektlali (versículo 18). Maski nochi non okipanok, ijkuak otlakuikak okijto amo momojtiskia. ¿Tleka ijkon okineltokaya? Porque okimatiaya maski Jehová okiyektlali, ok okitlasojtlaya. Salmista okineltokaya maski san tlen kipanoskia Jehová kipaleuiskia (Sal. 118:29).

4. ¿Tlen amo techmomojtis tla tikneltokaj Jehová techtlasojtla?

⁴ Moneki tikneltokaskej Jehová techtlasojtla. Tla ijkon tikneltokaj amo techmomojtis nin eyi tlamantli: Se, timomojtiaj porque xamo amo uelis tikinmakaskej tlen ika mopanoltiskej tofamilia. Ome, ijkuak techmomojtiaj oksekimej. Eyi, timomojtiaj tiixpoliuiskej. Tokniuan tlen achto yotikijtojkej, okineltokakej Jehová kintlasojtla, ik non, ayakmo okinmojti tlen okinpanok.

5. ¿Tlen uelis kintekipachos tetajmej? (Xikita dibujo itech página 1).

⁵ Tokniuan tlen kipiaj infamilia kitaj moneki kinmakaskej tlen ika mopanoltiskej (1 Tim. 5:8). Tla yitikpia mofamilia xamo sapanoua otimotekipacho ijkuak miakej omokokojtokaj ika COVID-19 porque miakej okipolojkej inteki. Xamo omitstekipacho tlen ika tikinpanoltis mofamilia noso tiktlaxtlauas kanin tichanti. Xamo noijki otimokuayejyeko tla tikpoloskia moteki ayakmo tikajsiskia okse. Noso noijki otimokuayejyeko amo kuali tikauaskia seki tlamantli ijkon ken tokniuan Néstor uan María tlen yotikijtojkej itech párrafo se. Ika nochi non Satanás kichiua ma timomojtikan uan ma tikkauakan Jehová.

6. ¿Tlen kineki Satanás ma tikneltokakan?

⁶ Satanás kineki ma tikneltokakan Jehová amo kitekipachoua tlen techpanoua uan amo techpaleuis ijkuak amo tikpiaskej tlen ika timopanoltiskej. Tla tikneltokiliaj, non uelis kichiuas ma timokuayejyekokan okachi moneki titekipanoskej uan amo moneki tikchiuaskej tlen kijtouaj principios bíblicos.

7. ¿Tlen okijto Jesús?

⁷ San Jesús kuali kixmati iTajtsin, ik non, okijto: “Totajtsi Dios ya kimatok tlan nomechpoloa achto de nonkitlajtlaniliskeh” (Mat. 6:8). Noijki kimati iTajtsin techmakas tlen ika timopanoltiskej. Tejuan tipouij itech ifamilia Jehová uan ye techyekana, ik non, tikneltokaj kichiuas tlen kinmiluia akinmej kiyekanaj infamilia itech 1 Timoteo 5:8.

8. (1) ¿Tlen techpaleuis tla tikitaj oui tikmakaskej tofamilia tlen ika mopanoltis? (Mateo 6:31-33). (2) ¿Ken uelis tikchiuaskej ken tokniuan tlen motaj itech foto?

⁸ Tla tikneltokaj Jehová techtlasojtla uan kitlasojtla tofamilia, tikneltokaskej techmakas tlen moneki para ika timopanoltiskej (xiktlajtolti Mateo 6:31-33). Jehová techtlasojtla uan kineki techmakas nochi tlen techpoloua. Ijkuak okichijchi tlaltikpak amo san okichijchi seki tlamantli tlen techpaleuis ma tiyoltokan, ye otechmakak miak tlamantli para ma tiyolpakikan (Gén. 2:9). Moneki ma tiktlasojkamatilikan Jehová  maski ualeua xamo san tikpiaskej tlen ika timopanoltiskej se tonal. Jehová amo techilkaua porque techmaka “tlan tikmomajsewiskeh” (Mat. 6:11). Maski ualeua amo tikpiaj miak tlamantli moneki ma tikilnamikikan Jehová techmakas satepan tlen okachi kuali, kichiuas ma tiyoltokan nochipa. Ijkon kijtouaj tokniuan Néstor uan María (Is. 65:21, 22).

9. ¿Tlen mitsmachtia tlen okinpanok Néstor uan María?

⁹ Néstor uan María chantij Colombia uan amitlaj okinpolouaya. Yejuan okijtojkej: “Ayakmo otiktemojkej tikpiaskej miak tlamantli porque otiknekiayaj okachi tiktekichiuiliskiaj Jehová pero otimokuayejyekouayaj xamo amo tiyolpakiskiaj tla amo tikpiaskiaj miak tomin”. ¿Tlen okinpaleui tokniuan? Omokuayejyekojkej Jehová kinpaleuiskia ijkon ken yokinpaleuijka, ik non, maski kanin otekipanouayaj kuali okintlaxtlauiayaj ayakmo ompa otekipanojkej. Okinemakakej inkal uan otlapaleuitoj itech okse altepetl kanin okachi moneki ma tetlapouikan. Axkan ¿ken momachiliaj Néstor uan María? Néstor okijto: “Yotikitakej melauak mochiua tlen kijtoua Mateo 6:33. Amitlaj techpoloua uan axkan okachi tiyolpakij”.

10. ¿Tleka techmomojtiaj oksekimej?

¹⁰ Ijkuak Adán uan Eva otlajtlakolchijkej, opejki nochtin kimochiuiliaj tlen amo kuali (Ecl. 8:9). Ualeua akinmej tlanauatiaj kintlajyouiltiaj oksekimej, akinmej amo yolkualmej kichiuaj tlen amo kuali, akinmej momachtiaj escuela kinuijuikaltiaj akinmej inmiuan momachtiaj. Oksekimej kintlajyouiltiaj infamilia. ¡Ik non, techmomojtiaj oksekimej! ¿Ken kichiua Satanás para techmomojtis?

11, 12. ¿Ken kichiua Satanás para techmomojtis?

¹¹ Satanás kichiua ma techmomojtikan oksekimej para ayakmo ma titetlapouikan nion ma tikchiuakan okseki tlamantli tlen Jehová techiluia. Satanás kichiua sekimej tekiuajkej ma techtlajyouiltikan uan amo ma techkauilikan ma titetlapouikan (Luc. 21:12; Apoc. 2:10). Ye tlanauatia, ik non, miakej tlakajkayauaj  uan kijtouaj iTlaixpantijkauan Jehová kichiuaj tlen amo kuali. Akinmej kinneltokiliaj, techpinauiaj noso hasta techteuiaj (Mat. 10:36). Pero amo techtlajtlachialtia tlen kichiua Satanás porque yiuejkika ijkon okinchiuili tokniuan (Hech. 5:27, 28, 40).

¹² Satanás amo san kichiua ma timomojtikan ijkuak techtlajyouiltiaj tekiuajkej. Ye noijki kichiua sekimej ma momojtikan porque amo kimatij tlen mokuayejyekoskej infamiliares tla mochiuaskej iTlaixpantijkauan Jehová. Non okachi kinmomojtia uan amo tla kinteuiaj. Sapanoua kintlasojtlaj infamiliares uan kinekiskiaj noijki ma kixmatikan uan ma kitlasojtlakan Jehová. Kinyolkokoua ijkuak kiteneuaj Jehová uan kinteneuaj tokniuan. Pero akinmej ijkon kichiuaj ualeua satepan peua momachtiaj. Tla se tofamiliar amo kineki kimatis tlen titetlapouiaj, ¿tlen tikchiuaskej?

13. ¿Tleka moneki tikneltokaskej Jehová techtlasojtla? (Salmo 27:10).

¹³ ¡Sapanoua techyolchikaua tlen kijtoua Salmo 27:10! (Xiktlajtolti). Tla tikilnamiktokej Jehová techtlasojtla, techpaleuis kuali ma tiyetokan maski tofamiliares amo techtlasojtlaskej uan tikmatij ye techteochiuas tla titlaxikouaj. San Jehová uelis techmakas tlen techpoloua, techyolchikajtos uan techpaleuijtos kuali iuan ma timouikakan. Non okajsikamatki tokni Biniam, tlen yotikijtojkej itech párrafo se.

14. ¿Tlen mitsmachtia tlen okipanok Biniam?

¹⁴ Maski Biniam okimatiaya tekiuajkej kitlajyouiltiskiaj ye omochi iTlaixpantijka Jehová. Ye okijto: “Amo onimokuayejyekouaya ken sapanoua nechtlajyouiltiskiaj tekiuajkej. Pero okachi onechmojtiaya tlen mokuayejyekoskia notajtsin uan ayakmo nechtlakaitaskia nofamilia porque nimochiuaskia iTlaixpantijka Jehová”. ¿Tlen okipaleui ayakmo ma momojti? Okilnamikiaya Jehová okitlasojtlaya uan ye kinmaluia akinmej kitlasojtlaj. Biniam okijto: “Onimokuayejyeko tlen kichiua Jehová para kinpaleuis oksekimej ma tlaxikokan ijkuak itlaj kinpoloua, kinchikoitaj uan kinteuiaj. Onikmatiaya tla nikneltoka Jehová, ye nechteochiuas. Miak uelta onechkitskijkej uan sapanoua  onechteuijkej. Ijkuakon onikitak tla nochipa tiktlakamatij Jehová, ye techpaleuia”. Biniam okitak Jehová ken iTajtsin uan tokniuan ken ifamilia.

15. ¿Tleka timomojtiaj tiixpoliuiskej?

¹⁵ Biblia kijtoua mikilistli tokokolikni (1 Cor. 15:25, 26). Pero timotekipachouaj ijkuak timokuayejyekouaj xamo tiixpoliuiskej tla timokokouaj noso tla mokokoua ikaj akin tiktlasojtlaj. ¿Tleka timomojtiaj ijkuak timokuayejyekouaj tiixpoliuiskej? Porque Jehová otechchijchi para nochipa ma tiknekikan tiyoltoskej (Ecl. 3:11). Ik non, tla timomojtiaj tiixpoliuiskej timomaluiskej uan tikkuaskej tlen techpaleuia, tikchiuaskej ejercicio, tikitatiuij tepajti uan timopajtiskej ijkuak monekis.

16. ¿Tlen kichiua Satanás para techmomojtis?

¹⁶ Satanás kuali kimati tejuan tikpatioitaj tonemilis, ik non, kijtoua uelis ayakmo timouikaskej iuan Jehová tla tiknekij tiyoltoskej (Job 2:4, 5). ¡Pero amo melauak tlen kijtoua! Ye ‘amokualitlakatl non kinmiktia n tlaltikpaktlakah’ kineki techmomojtis uan ayakmo ma tiktekichiuilikan Jehová (Heb. 2:14, 15). Ualeua Satanás kichiua sekimej ma techiluikan tla amo tikkauaskej Jehová, techmiktiskej. Noso ijkuak timokokouaj ye kineki amo ma tiktlakamatikan Jehová. Xamo akinmej tlapajtiaj noso tofamiliares tlen amo kitekichiuiliaj, techiluiskej ma techtlalilikan estli uan ijkon amo ma tiktlakamatikan Jehová. Noso xamo ikaj techiluis ma timopajtikan pero ika tlen kixnamiki principios bíblicos.

17. Ijkon ken kijtoua Romanos 8:37-39, ¿tleka amo moneki ma timomojtikan tiixpoliuiskej?

¹⁷ Tejuan amo tiknekij tiixpoliuiskej pero tla tiixpoliuij Jehová ok techtlasojtlas (xiktlajtolti Romanos 8:37-39). Ijkuak ixpoliuij iyolikniuan ok kinmilnamiktok ken yetoskia ok yoltokej (Luc. 20:37, 38). Ye kinektok kinyolitis (Job 14:15). Jehová okichi itlaj sapanoua ipati para uelis tiyoltoskej nochipa (Juan 3:16). Kuali tikmatij Jehová sapanoua techtlasojtla, ik non, ijkuak timokokouaj noso techiluiaj techmiktiskej amo tikkauaj. Tikneltokaj ye techyolseuis, techpaleuis ma titlaxikokan uan techpaleuis ma tiyetokan tiixtlamatkej. Non tlen okichijkej Valeria uan inamik (Sal. 41:3).

18. ¿Tlen techmachtia tlen okipanok Valeria?

¹⁸ Ijkuak Valeria okipiaya 35 xiuitl okiluijkej okipiaya cáncer, tlen amo miakej okixmatiayaj uan sapanoua tetlajyouiltia. Ye okajsikamatki Jehová kitlasojtla uan non okipaleui. Ye okijto: “Ijkuak onechiluijkej onikpiaya cáncer, nonamik uan ne amo otikneltokayaj. Omonekiaya ma nechchiuilikan se operación. Onikinmitato miakej tlapajtijkej pero nochtin okinekiayaj nechtlaliliskej estli. Onimomojtiaya pero oniknekiaya niktlakamatis Jehová, ik non, ¡amo onikka ma nechtlalilikan estli! Axkan omonekiaya ma nikititi Jehová niktlasojtla porque yonikitak ye nochipa nechtlasojtla. Ijkuak tlapajtijkej onechiluiayaj amo nipajtis okachi oniknekiaya nikyolpaktis Jehová uan amo Satanás. Satepan onechchiuilijkej operación pero amo onechtlalilijkej estli. Ok nimokokoua pero Jehová nochipa techmaka tlen moneki. Itlamian  semana ijkuak ayamo onechiluiayaj kox nikpia cáncer. Ijkuakon otimonechikojkej uan ompa otimomachtijkej ‘Afrontemos con valentía los golpes de la vida’. * Sapanoua otechyolchika, ik non, nonamik uan ne miak uelta otiktlajtoltijkej. Timoyolseuiaj porque techpaleuia tlen otimomachtijkej, titetlapouiaj uan timonechikouaj, ijkon kuali tikpejpenaj tlen tikchiuaskej”.

19. ¿Tlen panos satepan?

¹⁹ Itech nochi tlaltikpak akinmej kitekichiuiliaj Jehová, kinpaleuia ma tlaxikokan ijkuak tlajyouiaj uan amo kichiuaj tlen kipaktia Satanás (1 Ped. 5:8, 9). Te noijki uelis titlaxikos. Ayakmo miak poliui Jehová kinmiluis Jesús uan akinmej iuan tlanauatiskej yoajsik tonal para “kipojpolos nochi tlan kichiwa n diablo” (1 Juan 3:8). Satepan, akinmej kitekichiuiliaj Jehová chantiskej nikan tlaltikpak uan kitaskej ken mochiua tlen ye okijto: “Amitlaj mitsmomojtis uan amo yetos itlaj tlen kichiuas ximomojti” (Is. 54:14; Miq. 4:4). Ken ayamo ajsi non tonal, ma timochijchikauakan para amo okachi ma timomojtikan.

20. ¿Tlen techpaleuis amo okachi ma timomojtikan?

²⁰ Para amo okachi timomojtiskej, moneki tikneltokaskej Jehová kintlasojtla uan kinmaluia akinmej kitekichiuiliaj. ¿Tlen techpaleuis? Ma timokuayejyekokan uan ma tikinmiluikan oksekimej ken Jehová yokinmalui akinmej kitekichiuiliaj. Noijki ma tikilnamikikan ken Jehová otechmalui ijkuak otechpanok tlen amo kuali. Jehová techpaleuis para amo ma timomojtikan (Sal. 34:4).