TLAMACHTIL 24
Jehová melauak techtlapojpoluia
“Te, oh Jehová, tiyolkuali uan tikneki titetlapojpoluis uan tikinmititia motlasojtlalis yolmelajki nochtin akinmej mitstlatlaujtiaj” (SAL. 86:5).
TLAKUIKALI 42 Nikiluia Jehová tlen nikmachilia
XIKILNAMIKTO *
1. ¿Tlen okijto Salomón itech Eclesiastés 7:20?
TEKIUA Salomón okijto: “Itech tlaltikpak amo onka se tlakatl yolmelauak tlen nochipa kichiua tlen kuali uan amo tlajtlakolchiua” (Ecl. 7:20). ¡Melauak tlen okijto! Tinochtin titlajtlakolejkej (1 Juan 1:8). Ik non, moneki toTajtsin Dios uan noijki oksekimej ma techtlapojpoluikan.
2. ¿Ken timomachiliaj ijkuak se toyolikni techtlapojpoluia?
2 ¿Otikyolkokojkej se toyolikni? Tinochtin ijkon yotechpanok pero tiknekij iuan timouikaskej, ik non, otikiluijkej ma techtlapojpolui. ¿Ken otimomachilijkej ijkuak otechtlapojpolui? Kuali otimomachilijkej uan otiyolpakej.
3. ¿Tlen tikitaskej?
3 Tinochtin tiknekij Jehová ma yeto toyolikni pero ualeua tikchiuaj uan tikijtouaj tlen amo kipaktia. Ik non, ¿tleka uelis tikneltokaskej ye kineki techtlapojpoluis? ¿Tleka tikijtouaj ijkuak Jehová techtlapojpoluia amo ijkon ken tejuan tikintlapojpoluiaj oksekimej? ¿Akinmej kintlapojpoluia Jehová?
JEHOVÁ MELAUAK KINEKI TECHTLAPOJPOLUIS
4. ¿Tleka moneki ma tikneltokakan Jehová kineki techtlapojpoluis?
4 Biblia kijtoua Jehová kineki techtlapojpoluis. Ijkuak ye omotlapoui iuan Moisés itech tepetl Sinaí, okilui ika se ángel: “Jehová, Jehová, se Dios tlen teiknomati uan teajsikamati, amo san niman kualani uan sapanoua tetlasojtla uan kijtoua tlen melauak, ye miakej kintlasojtla, kintlapojpoluia akinmej motlapololtiaj uan ijkuak tlajtlakolchiuaj” (Éx. 34:6, 7). Jehová tetlasojtla uan teknomati, ik non, kineki kintlapojpoluis akinmej tlajtlakolchiuaj tla melauak moyolkopaj (Neh. 9:17; Sal. 86:15).
Jehová kimati tlatlamantli otimoskaltijkej, ik non, tikchiuaj seki tlamantli. (Xikita párrafo 5).
5. Ijkon ken kijtoua Salmo 103:13, 14, ¿tlen kichiua Jehová porque kuali techixmati?
5 Jehová kuali techixmati porque ye otechchijchi. ¡Ye kuali kinmixmati nochtin akinmej chantij nikan tlaltikpak! (Sal. 139:15-17). Ye kita nochi tlen totatajuan otechpanoltilijkej uan noijki kimati ken otimoskaltijkej, ik non, kajsikamati tleka tikchiuaj seki tlamantli uan ¿tlen kichiua Jehová? Ye kuali techixmati, ik non, techiknomati (Sal. 78:39; xiktlajtolti Salmo 103:13, 14).
6. ¿Ken yokiteititi Jehová kineki techtlapojpoluis?
6 Jehová yokiteititi kineki techtlapojpoluis. Ye kimati titlajtlakolejkej uan tiixpoliuij porque Adán otlajtlakolchi (Rom. 5:12). Uan amo uelis itlaj tikchiuaskej para timomakixtiskej noso tikinmakixtiskej oksekimej (Sal. 49:7-9). Pero toTajtsin Dios otechiknomatki uan itlaj okichi para techmakixtis. Juan 3:16 kijtoua Jehová sapanoua techtlasojtla, ik non, okiualtitlanki iKone ma techmakixtiki (Mat. 20:28; Rom. 5:19). Jesús topatka oixpoliuik uan ijkon uelis momakixtiskej nochtin akinmej kineltokaj (Heb. 2:9). ¿Ken timokuayejyekouaj omomachili Jehová ijkuak okitlajyouiltijkej uan okimiktijkej iKone? Tla Jehová amo kinekiskia techtlapojpoluis, ¿tleka okitekauili ma kitlajyouiltikan iKone?
7. ¿Akinmej okintlapojpolui Jehová?
7 Biblia kijtoua Jehová miakej okintlapojpolui ika nochi iyolo (Efes. 4:32). ¿Tikilnamiki akinmej okintlapojpolui? Xamo tikilnamiki tlen okipanok Manasés. Ye okatka amo yolkuali uan sapanoua otlajtlakolchi ixpan Jehová. Okinueyichiuaya teotsitsintin uan okinmiluiaya oksekimej noijki ijkon ma kichiuakan uan okintlatiaya ikoneuan inmixpan teotsitsintin. Hasta okitlali se teotsin itech iteokal Jehová. Biblia kijtoua: “Sapanoua okichi tlen amo kuali ixpan Jehová para kikualanis” (2 Crón. 33:2-7). Pero ijkuak Manasés melauak omoyolkopki, Jehová okitlapojpolui ika nochi iyolo uan okika oksepa ma yeto tekiua (2 Crón. 33:12, 13). Xamo noijki tikilnamikij ijkuak David oauilnenki uan otemikti pero ijkuak okajsikamatki otlajtlakolchi, melauak omoyolkopki uan Jehová okitlapojpolui (2 Sam. 12:9, 10, 13, 14). Ik non, ma tikneltokakan Jehová melauak kineki techtlapojpoluis. Axkan timomachtiskej ijkuak Jehová techtlapojpoluia amo ijkon ken tejuan tikintlapojpoluiaj oksekimej.
JEHOVÁ MELAUAK TECHTLAPOJPOLUIA
8. ¿Ken techpaleuia Jehová ma yeto se kuali Juez?
8 Jehová “akin Juez itech nochi tlaltikpak” (Gén. 18:25). Se kuali juez moneki kixmatis nochi tlanauatilmej. Jehová kixmati tlanauatilmej uan noijki kintlalia (Is. 33:22). San Jehová kimati tlen kuali uan tlen amo kuali. ¿Tlen okseki tlamantli moneki kichiuas se kuali juez? Para uelis tlaixkomakas, moneki kimatis nochi tlen opanok. Ik non, san Jehová kinamiki tlaixkomakas porque ye nochi kimati.
9. ¿Tlen kipaleuia Jehová ma kimati kox techtlapojpoluis?
9 Jehová amo ijkon ken jueces tlen katej nikan tlaltikpak, ye kema kimati nochi tlen panoua (Gén. 18:20, 21; Sal. 90:8). Ye amo techixkomaka san ika tlen kikaki uan kita. Kajsikamati tleka tikchiuaj seki tlamantli, porque ye kimati tlatlamantli otechiskaltijkej, otechmachtijkej, kanin tichantij, ken timomachiliaj uan noijki kimati ualeua tikchiuaj ken totatajuan. Noijki Jehová kixmati toyolo, kimati tleka tikchiuaj seki tlamantli. Ye nochi kimati uan nochi kita (Heb. 4:13). Ijkuak Jehová techtlapojpoluia kita nochi tlen panoua.
Jehová amo techchikoita uan yolkuali, amo uelis tiktlaxtlauiliskej para ma techpaleui. (Xikita párrafo 10).
10. ¿Tleka Jehová nochipa kichiua tlen kuali? (Deuteronomio 32:4).
10 Jehová kichiua nochipa tlen kuali. Ye amo techchikoita, ijkuak ikaj kitlapojpoluia ye amo kita kox kualtsin mota, kox kipia tomin, kox miakej kixmatij noso kimati kichiuas seki tlamantli (1 Sam. 16:7; Sant. 2:1-4). Jehová amo uelis tiktlaxtlauiskej noso tikchiualtiskej para ma techtlapojpolui (2 Crón. 19:7). Ye amo kikaua ma kinauati tlen kimachilia (Éx. 34:7). San Jehová Juez tlen techajsikamati uan kimati nochi tlen techpanoua (xiktlajtolti Deuteronomio 32:4).
11. ¿Tleka ijkuak Jehová techtlapojpoluia amo kichiua ijkon ken tejuan?
11 Akinmej okijkuilojkej Escrituras Hebreas noso Antiguo Testamento okimatiayaj Jehová amo tetlapojpoluia ijkon ken tejuan. Se amochtli kijtoua ualeua okijkuilouayaj se tlajtoli ika hebreo tlen kiteititia ken toTajtsin Dios kitlapojpoluia akin tlajtlakolchiua. Non amochtli noijki kijtoua tejuan amo technamiki tikijtoskej non tlajtoli, ijkuak tikintlapojpoluiskej oksekimej porque san toTajtsin Dios kinamiki. (Sinónimos del Antiguo Testamento, traducción y adaptación de Santiago Escuain). San Jehová kinamiki kitlapojpoluis akin otlajtlakolchi. ¿Ken timomachiliaj ijkuak Jehová techtlapojpoluia?
12, 13. (1) ¿Ken timomachiliaj ijkuak Jehová techtlapojpoluia? (2) ¿Ok techilnamiktilia Jehová ijkuak techtlapojpoluia?
12 Timoyolseuiaj ijkuak tikajsikamatij Jehová techtlapojpoluia. Kuali timomachiliaj uan ayakmo techkuejsoua totlalnamikilis. Ijkon timomachiliaj porque Jehová techtlapojpoluia uan amo se tlakatl (Hech. 3:19). Ijkuak techtlapojpoluia oksepa uelis iuan timouikaskej, yetoskia ken amo otitlajtlakolchijkej.
13 Ijkuak Jehová techtlapojpoluia ayakmo techilnamiktilia tlen otikchijkej uan amo techtlajyouiltia (Is. 43:25; Jer. 31:34). Biblia kijtoua: “Ijkon ken uejka kajki kanin kisa tonaltsin uan kanin poliuiti”, ijkon Jehová uejka kintlalia totlajtlakoluan * (Sal. 103:12). Ijkuak tikajsikamatij ken Jehová techtlapojpoluia tiktlasojkamatiliaj uan tiknekij tikueyichiuaskej (Sal. 130:4). Pero ¿akinmej kintlapojpoluia Jehová?
¿AKINMEJ KINTLAPOJPOLUIA JEHOVÁ?
14. ¿Tlen yotimomachtijkej?
14 Ken yotimomachtijkej ijkuak Jehová techtlapojpoluia amo kita kox sapanoua otitlajtlakolchijkej noso amo. Noijki yotikitakej Jehová otechchijchi, kintlalia tlanauatilmej uan kuali Juez, non kipaleuia ma kita kox techtlapojpoluis. ¿Tlen kipaleuia Jehová ma kimati kox techtlapojpoluis?
15. Ijkon ken kijtoua Lucas 12:47, 48, ¿tlen kita Jehová para kimatis kox kitlapojpoluis akin otlajtlakolchi?
15 Para kimatis Jehová kox kitlapojpoluis akin otlajtlakolchi, kita kox okimatiaya amo kuali tlen okichijtoka. Jesús ijkon okijto itech Lucas 12:47, 48 (xiktlajtolti). Ijkuak ikaj kimati Jehová itlaj kikokolia uan ok kichiua, sapanoua tlajtlakolchiua uan ye kimati Jehová amo uelis kitlapojpoluis (Mar. 3:29; Juan 9:41). Pero ijkuak tikitaj amo kuali tlen otikchijkej¿uelis Jehová techtlapojpoluis? Kema techtlapojpoluis. Pero onka okse tlamantli tlen Jehová kipaleuia ma kimati kox techtlapojpoluis.
Ma tikneltokakan Jehová techtlapojpoluis tla melauak timoyolkopaj. (Xikinmita párrafos 16 uan 17).
16. ¿Tlen kijtosneki ijkuak ikaj melauak moyolkopa uan tleka moneki ijkon kichiuas?
16 Jehová noijki kita tla akin otlajtlakolchi, melauak omoyolkopki. ¿Tlen kijtosneki ijkuak ikaj melauak moyolkopa? Kijtosneki kipatla ken mokuayejyekoua uan tlen kichiua. Akin melauak moyolkopa kikuejsoua itlalnamikilis uan moyolkokoua porque otlajtlakolchi uan amo okitlakamatki toTajtsin Dios. Noijki moyolkokoua porque ayakmo iuan omouikaya. Maski Manasés uan David sapanoua otlajtlakolchijkej Jehová okintlapojpolui porque melauak omoyolkopkej (1 Rey. 14:8). Jehová kitlapojpoluia san akin kiteititia melauak moyolkopa. Amo san moneki moyolkokos porque otlajtlakolchi, moneki itlaj kichiuas. * Pero ma tikitakan okse tlamantli tlen Jehová kipaleuia ma kimati kox tetlapojpoluis.
17. ¿Ken uelis kichiuas ikaj tlen Jehová kineki uan ken kipaleuis ayakmo ma tlajtlakolchiua? (Isaías 55:7).
17 ¿Ken uelis kichiuas ikaj tlen Jehová kineki? Ye noijki kita ijkuak ikaj ayakmo kichiua tlen amo kuali uan peua kichiuaj tlen kineki (xiktlajtolti Isaías 55:7). Moneki kipatlas ken mokuayejyekoua uan mochijchikauas mokuayejyekos ken Jehová (Rom. 12:2; Efes. 4:23). Moneki ayakmo kichiuas nion mokuayejyekos tlen amo kuali (Col. 3:7-10). Pero moneki kilnamiktos Jehová kitlapojpoluia porque kineltoka Jesús topatka omotemakak. Ijkuak Jehová kita mochijchikaua ayakmo kichiua tlen okichiuaya, ye kitlapojpoluia porque kilnamiki iKone topatka omotemakak (1 Juan 1:7).
MA TIKNELTOKAKAN JEHOVÁ KINEKI TECHTLAPOJPOLUIS
18. Ijkon ken yotimomachtijkej, ¿tleka techtlapojpoluia Jehová?
18 Axkan ma tikojpauikan seki tlamantli tlen yotimomachtijkej. Amikaj techtlapojpoluia ijkon ken Jehová. ¿Tleka ijkon tikijtouaj? Se, porque ye kineki techtlapojpoluis. Ome, ye nochi kimati porque kuali techixmati uan kitaj kox melauak timoyolkopaj. Eyi, ijkuak Jehová techtlapojpoluia ayakmo techilnamiktilia tlen otikchijkej, ijkon ayakmo techkuejsoua totlalnamikilis uan ok techselia.
19. ¿Tleka uelis tiyolpakiskej maski ok titlajtlakolchiuaj?
19 Axkan ok titlajtlakolchiuaj porque titlajtlakolejkej. Techyolchikaua tlen kijtoua amochtli Perspicacia para comprender las Escrituras, volumen 1, página 209: “Jehová kinmiknomati itekipanojkauan ijkuak tlajtlakolchiuaj porque kimati tlajtlakolejkej uan ijkon yejuan amo nochipa san kinkuejsojtok intlalnamikilis (Sal. 103:8-14; 130:3). Tla amo keman kikauaj Jehová, uelis yolpakiskej (Filip. 4:4-6; 1 Juan 3:19-22)”. ¡Non melauak techyolchikaua!
20. ¿Tlen tikitaskej itech okse tlamachtil?
20 Sapanoua tiktlasojkamatiliaj Jehová porque techtlajpojpoluia tla melauak timoyolkopaj. Pero ¿ken uelis titetlapojpoluiskej ijkon ken ye? ¿Ken tetlapojpoluia Jehová uan ken tikchiuaj tejuan? ¿Tleka moneki ma tikajsikamatikan nin tlamantli? Itech okse tlamachtil non timomachtiskej.
TLAKUIKALI 45 Chipauak yetos nokuayejyekol
^ Biblia kijtoua Jehová kineki kintlapojpoluis akinmej melauak moyolkopaj. Pero ualeua xamo timokuayejyekouaj amo technamiki ma techtlapojpolui. Axkan tikitaskej tleka moneki ma tikneltokakan Jehová kineki techtlapojpoluis tla melauak timoyolkopaj.
^ Para okachi tikmatis xikita amochtli Acerquémonos a Jehová capítulo 26, párrafo 9.
^ TLEN OKACHI IPATI: Ijkuak ikaj melauak moyolkopa kijtosneki kipatla ken mokuayejyekoua porque okichi itlaj tlen amo kuali noso moyolkokoua porque amo okichi tlen omonekiaya. Akin melauak moyolkopa ayakmo kichiua tlen achto okichiuaya.
