1. (1) ¿Tlen techiluia Jehová tikseliskej satepan? (2) ¿Ken tikteititiaj tikneltokaj melauak tikseliskej? (Xikita nota).

 JEHOVÁ techiluia tlen kichiuas satepan. Ayakmo ikaj mokokos, ayakmo ikaj moyolkokos nion ixpoliuis (Apoc. 21:3, 4). Kinpaleuis akinmej yolkualmej ma kichiuakan tlaltikpak se xochitlali (Sal. 37:9-11). Noijki techpaleuis para okachi kuali iuan ma timouikakan. ¡Melauak kualtsin tlen techiluia kichiuas! ¿Tleka moneki tikneltokaskej mochiuas tlen ye techiluia? Porque Jehová nochipa kichiua tlen kijtoua, ik non, uelis tikneltokiliskej (Sal. 27:14). * ¿Ken tikteititiaj ijkon tikchiuaj? Ma timochiakan uan ma tiyolpakikan hasta ijkuak Jehová kichiuas nochi tlen yokijto (Is. 55:10, 11).

2. ¿Tlen yokichi Jehová?

² Jehová yokiteititi kichiua tlen kijtoua. Ma tikitakan ken yokichi. Ye okijto itech amochtli Apocalipsis axkan kinnechikoskia miakej tlen tlatlamantli inmialtepe uan tlen kipiaj okse intlajtol para ma kiueyichiuakan. Non grupo tiktokayotiaj “senmiaktikeh tlaltikpaktlakah” (Apoc. 7:9, 10). Maski tlakamej, siuamej  uan konemej tlatlamantli inmialtepe uan tlatlamantli intlajtol, nochtin kuali mouikaj (Sal. 133:1; Juan 10:16). Yejuan yolpakij nochipa kintlapouiskej oksekimej tlen kichiuas toTajtsin Dios (Mat. 28:19, 20; Apoc. 14:6, 7; 22:17). Tla tipouij inmiuan “senmiaktikeh tlaltikpaktlakah”, tikpatioitaj tlen tikseliskej satepan.

3. ¿Tlen kineki kichiuas Satanás?

³ Diablo ayakmo kineki ma tikchiakan tlen toTajtsin Dios techiluia tikseliskej. Ye kineki ma tikneltokakan Jehová amo techtlasojtla uan amo kichiuas tlen yokijto. Tla Satanás kichiuas ayakmo ma tikchiakan tlen Jehová yotechilui, ayakmo tiyolchikajtoskej uan xamo noijki ayakmo tiktekichiuiliskej. Diablo okinekiaya Job ayakmo ma tlaneltoka para ijkon ayakmo ma kitekichiuili Jehová.

4. ¿Tlen tikitaskej? (Job 1:9-12).

⁴ Axkan tikitaskej tlen okichi Satanás para ijkon Job ma kikaua Jehová uan ayakmo ma kipia iyolo ajsitok (xiktlajtolti Job 1:9-12). Noijki tikitaskej ken uelis tikchiuaskej ken Job uan tleka moneki tikilnamikiskej Jehová techtlasojtla uan kichiuas tlen yotechilui.

5, 6. ¿Tlen okipanok Job?

⁵ Job kuali okatka: omouikaya iuan Jehová, okipiaya isiua uan miakej ikoneuan, kuali omouikaya iuan ifamilia uan noijki okipiaya miak tlamantli (Job 1:1-5). Pero san itech se tonal okipolo nochi tlen okipiaya (Job 1:13-17). Noijki oixpolikej nochtin ikoneuan. Ma timokuayejyekokan ken omomachili. Tetajmej sapanoua moyolkokouaj ijkuak ixpoliui se inkone. Pero ma timokuayejyekokan ken sapanoua omoyolkokojkej Job uan isiua ijkuak okimatkej majtlaktli inkoneuan oixpolikej. Ik non, ¡Job okitsayanki itlaken uan ouetski ipan tlali! (Job 1:18-20).

⁶ Satanás noijki okichi ma mokoko Job uan ijkon amo kuali ma momachili (Job 2:6-8; 7:5). Oksekimej okitlakaitayaj uan hasta okiluiayaj ma kinpaleui (Job 31:18). Pero satepan ayakmo okitlakaitakej. Ikniuan, iyolikniuan uan hasta itlakeualuan ayakmo okitlasojtlayaj (Job 19:13, 14, 16).

7. (1) ¿Tleka okineltokaya Job otlajyouijtoka uan tlen amo okichi? (2) Ijkon ken mota itech dibujo, ¿tlen noijki uelis techpanos?

⁷ Satanás okinekiaya Job ma kineltoka otlajyouijtoka porque Jehová ayakmo okitlasojtlaya. Ik non, okichi sapanoua ma ejeka uan ma uetsi kali kanin omoyolpaktijtokaj majtlaktli ikoneuan (Job 1:18, 19). Noijki okichi ma uetsi tlitl, okinmikti iyolkauan uan itlakeualuan (Job 1:16). Job omokuayejyeko okichi itlaj tlen amo okipakti Jehová, ik non, okiualtitlanki ejekatl uan tlitl. Maski Job okipanok tlen amo kuali, amo okiuijuikalti Jehová. Okilnamikiaya ye okimakaya tlen kuali uan omonekiaya kiselis tlen amo kuali. Ik non, okijto ma kiueyichiuakan itoka Jehová (Job 1:20, 21; 2:10). Maski okipolo miak tlamantli uan sapanoua otlajyoui, nochipa okitlakamatki Jehová. Pero Satanás ok itlaj okichiuili.

8. ¿Tlen okse tlamantli Satanás okichiuili Job?

 ⁸ Satanás noijki okse tlamantli okichiuili Job. Eyi tlakamej tlen okijtouayaj iyolikniuan, okichijkej amo kuali ma momachili. Okijtojkej otlajyouiaya porque okichi tlen amo kuali (Job 22:5-9). Noijki okinekiayaj ma kineltoka amo kiyolpaktiskia toTajtsin Dios maski amo kichiuaskia tlen amo kuali (Job 4:18; 22:2, 3; 25:4). Amo okinekiayaj ma kineltoka toTajtsin Dios okitlasojtlaya, kimaluiskia uan ipati kitekichiuiliskia. Nochi tlen okiluijkej xamo omokuayejyeko ayakmo kuali yetoskia.

9. ¿Ken okichi Job para moyolchikajtos?

⁹ Ma timokuayejyekokan: Job okatka kanin onka tlikonextli uan tonal uan youak otlajyouijtoka (Job 2:8). Nonmej tlakamej san okiluijtokaj tlen amo kuali uan okinekiayaj kiteititiskej amo yolkuali. Miak tlamantli okipanotoka Job uan oixpolikej ikoneuan, ik non, sapanoua omoyolkokouaya. Uan ye amitlaj okijtouaya (Job 2:13-3:1). Xamo nonmej tlakamej omokuayejyekojkej Job ayakmo kitlakamatiskia toTajtsin Dios pero amo ijkon opanok. Ye okinmilui: “¡Hasta ijkuak nimikis nikpias noyolo ajsitok!” (Job 27:5). ¿Ken okichi Job para moyolchikajtos maski sapanoua otlajyouijtoka? Ye okineltokaya toTajtsin Dios kipaleuiskia. Noijki okimatiaya tla ixpoliuiskia Jehová kiyolitiskia (Job 14:13-15).

10. ¿Tlen techmachtia tlen okipanok Job?

¹⁰ Tlen okipanok Job, techmachtia Satanás amo uelis techchiualtis ma tikkauakan Jehová porque ye kimati nochi tlen techpanoua. Tlen okipanok  uan tlen okichi Job techmachtia okseki tlamantli miak ipati. Ma tikitakan ken uelis tikchiuaskej ken Job.

11. ¿Tlen panos tla tikneltokaj Jehová? (Santiago 4:7).

¹¹ Job okiteititi tla nochipa tikneltokaj Jehová, tikxikoskej nochi tlen techpanos uan amo tikchiuaskej tlen Satanás kineki. Tla ijkon tikchiuaj Biblia kijtoua Diablo cholos (xiktlajtolti Santiago 4:7).

12. ¿Ken okipaleui Job okineltokaya toTajtsin Dios kiyolitis?

¹² Moneki tikneltokaskej toTajtsin Dios techyolitis. Itech okse tlamachtil otimomachtijkej Satanás kineki ma timomojtikan tiixpoliuiskej, para ma tikkauakan Jehová. Ma timokuayejyekokan tlen okipanok Job. Satanás okijto kichiuaskia miak tlamantli, para amo ixpoliuiskia hasta okijto ayakmo kitekichiuiliskia Jehová. ¡Non amo melauak! Maski Job omokuayejyekouaya ixpoliuiskia, nochipa okitlakamatki Jehová. ¿Ken otlaxiko? Okineltokaya Jehová yolkuali uan ye kipaleuiskia. Okimatiaya tla amo ijkon kichiuaskia ijkuak oyoltoka, satepan kiyolitiskia. Job okineltokaya melauak ijkon panoskia. Tla tejuan ijkon tikneltokaj, maski kijtoskej techmiktiskej tikpiaskej toyolo ajsitok ixpan Jehová.

13. ¿Ken techpaleuia tikajsikamatiskej tlen Satanás okichiuili Job?

¹³ Tla tikitaj tlen Satanás okichiuili Job, tikitaskej axkan noijki ijkon kichiua. Tlen okilui Job, tinochtin otechilui. Ye okijto: “Akin kineki momakixtis kitemakas nochi tlen kipia” (Job 2:4, 5). Satanás okijto amo melauak tiktlasojtlaj Jehová uan tla tiknekij timomakixtiskej hasta tikkauaskej. Noijki okijto ye amo techtlasojtla uan amo kipatioita tlen tikchiuaj para tikyolpaktiskej. Tla timochiaj Jehová techpaleuis, Satanás amo techkajkayauas porque yitikmatij tlen techchiuilis.

14. ¿Tlen uelis panos ijkuak titlajyouiaj? Xikyekijto.

¹⁴ Tla itlaj techpanoua, ma tikitakan ken uelis techpaleuis para tikpiaskej okachi kuali tonemilis. Ijkuak Job otlajyoui, okipaleui ma kita omonekiaya kipatlas seki tlamantli. Okitak omonekiaya yetos okachi yolyamanki (Job 42:3). Tejuan noijki uelis tikitaskej moneki tikpatlaskej seki tlamantli ijkuak titlajyouiaj. Ijkon okipanok Nikolái, * okitsakuatoj maski sapanoua omokokouaya. Ye okijto: “Ijkuak onechtsakuatoj yetoskia ken onechkixtilijkej se radiografía porque onikitak okachi kuali omonekiaya nikpias nonemilis”. Ijkuak tikitaj itlaj tikpatlaskej itech tonemilis, moneki ijkon tikchiuaskej.

15. ¿Akin moneki tikkakiskej uan tleka?

¹⁵ Moneki tikkakiskej Jehová uan amo akinmej techkokoliaj. Job kuali okikak Jehová ijkuak okitlapoui para ma mokuayejyeko ken moneki. Yetoskia ken okilui: “¿Yotikitak nochikaualis itech nochi tlamantli tlen yonikchijchi? Ne kuali nikmati nochi tlen yomitspanok. ¿Tikneltoka amo uelis nimitsmaluis? Job okiteititi yolyamanki uan sapanoua okitlasojkamatili Jehová, ik non, okilui: “San  onikkakiaya tlen motech okijtouayaj pero axkan melauak nimitsita” (Job 42:5). Ijkuak Job ijkon okijto, xamo ok okatka itech tlikonextli, ok omokokouaya uan ok ochokaya porque oixpolikej ikoneuan. Maski non okipanotoka, Jehová okititi okitlasojtlaya uan okiseliaya (Job 42:7, 8).

16. Ijkon ken kijtoua Isaías 49:15, 16, ¿tlen moneki tikilnamiktoskej ijkuak titlajyouiskej?

¹⁶ Axkan sekimej xamo techuijuikaltiskej noso techitaskej amitlaj topati. Tlakajkayauaskej ijkuak kijtoskej tejuan uan ialtepe Jehová tikchiuaj tlen amo kuali (Mat. 5:11). Tlen okipanok Job, techmachtia Jehová kineltoka tejuan noijki uelis tiktlakamatiskej maski titlajyouiaj. Ye techtlasojtla uan amo techilkauas, tikneltokaj techmakas tlen yotechilui (xiktlajtolti Isaías 49:15, 16). Amo ma tikinkakikan akinmej kikokoliaj toTajtsin Dios. Ma tikitakan tlen okijto se tokni tlen chanti Turquía uan itoka James. Ye iuan ifamilia sapanoua otlajyouijkej, ye okijto: “Otikitakej tla tikinkakiskiaj akinmej okiteneuayaj ialtepe toTajtsin Dios, amo tiyolpakiskiaj. Ik non, otimokuayejyekojkej tlen kichiuas iTekiuajkayo toTajtsin Dios uan otimochijchikajkej otiktekichiuilijkej Jehová uan ijkon nochipa otiyolpakej”. Ma tikchiuakan ken Job uan ma tikkakikan Jehová. ¡Amo ma tikinkakikan akinmej techkokoliaj  uan ijkon nochipa tikneltokaskej tlen Jehová yotechilui techmakas!

17. ¿Tlen techmachtia tlen ijkuilitok itech Hebreos capítulo 11?

¹⁷ Amo san Job otlaxiko ijkuak otlajyoui. Apóstol Pablo okinmijkuilili se carta tokniuan hebreos, ompa okijto: “Miakeh tokniwah non kuali yokiteititijkeh intlaneltokalis” (Heb. 12:1). Maski sapanoua otlajyouijkej, nochtin nochipa okitlasojtlakej Jehová (Heb. 11:36-40). ¿Okinpaleui otlaxikojkej? Kema. Maski amo okitakej nochi tlen toTajtsin Dios okinmilui, nochipa omochixkej porque okineltokayaj Jehová okinseliaya, ik non, kuali okimatiayaj mochiuaskia tlen ye okinmilui (Heb. 11:4, 5). Tla timokuayejyekouaj tlen okichijkej, techpaleuis ‘ma timochiakan itech Jehová’.

18. ¿Tlen moneki tikchiuaskej maski san tlen techpanos? (Hebreos 11:6).

¹⁸ Axkan miakej okachi kichiuaj tlen amo kuali (2 Tim. 3:13). Satanás kichiua miak tlamantli para amo ma tiktlakamatikan Jehová. Maski san tlen techpanos ma tiktekichiuilijtokan Jehová ika nochi toyolo porque “timochixtokeh itech Totajtsi Dios non yolitok” (1 Tim. 4:10). Ma tikilnamikikan tlen saiktlami okipanok Job, kiteititia Jehová “satlawel tetlasojtlak iwa teiknoma” (Sant. 5:11). Ijkon ken okichi Job, nochipa ma tiktlasojtlakan Jehová uan ijkon techteochiuas ‘akimeh tiktemoah’ (xiktlajtolti Hebreos 11:6).