1. ¿Tlen moneki tikchiuaskej para timomakixtiskej?

 ITONAL Jehová itech Biblia kijtosneki ijkuak kinmixpoloua akinmej kikokoliaj uan kimakixtia ialtepe. Yiuejkika ijkon yokichi (Is. 13:1, 6; Ezeq. 13:5; Sof. 1:8). Itonal Jehová peuas ijkuak kipojpoloskej Ueyi Babilonia uan tlamis itech Armagedón. Para uelis timomakixtiskej non tonal moneki axkan timoyektlaliskej. Jesús okijto ‘matiijsatokah’ ijkuak peuas ueyi tlajyouilistli uan okijto moneki nochipa ijkon matikchijtokan (Luc. 12:40; Mat. 24:21).

2. ¿Tleka moneki matimomachtikan Primera Carta a los Tesalonicenses?

² Itech Primera Carta a los Tesalonicenses apóstol Pablo okijto seki tlamantli tlen kinpaleuiskia tokniuan. Ijkon kimatiskiaj tlen omonekiaya kichiuaskej achto ualaskia iueyi tonal Jehová. Ye okimatiaya ok opoliuiaya para ajsiki non tonal (2 Tes. 2:1-3). Pero Pablo okinmilui omonekiayaj mokuayejyekoskej iueyi tonal Jehová yiualaskia. Non kinpaleuiskia san niman mamoyektlalikan. Tejuan noijki moneki ijkon matikchiuakan. Matikitakan tlen okijto panoskia ijkuak ualaskia itonal Jehová, akinmej amo momakixtiskej uan tlen moneki tikchiuaskej para timoyektlaliskej.

3. ¿Tleka itonal Jehová ajsiki ken ijkuak ikaj tlachteki? (Noijki xikinmita dibujos).

³ “Kemi se yuali ijkuak se tlachtek walkalaki” (1 Tes. 5:2). Nin achto tlamantli tlen Pablo okijto para kiyekijtos ken ajsiki iueyi tonal Jehová. Ijkuak ikaj tlachteki san niman ijkon kichiua uan ijkuak yiyouak, ijkon amikaj kita. Ijkon panos ijkuak ajsiki itonal Jehová porque totoka panotikisas uan miakej motlajtlachialtiskej porque amo kichiaj ijkon mapano. Noijki akinmej tikchiuaj ken Cristo xamo timotlajtlachialtiskej porque san niman panotikisas nochi. Pero tejuan timomakixtiskej  uan akinmej amo yolkualmej kinmixpoloskej.

4. ¿Tleka ijkuak ajsiki iueyi tonal Jehová yetoskia ken ijkuak se siuatsintli yikipias ikone?

⁴ “Kemi ijkuak se siwatl pewa ijtikualo ijkuak ya kipiati ikone” (1 Tes. 5:3). Ijkuak se siuatsintli kipia ikone, amo kimati tlen tonal nesis. Pero kimatok ajsis non tonal, ijkuak ajsi tonal para nesis ikone san niman ijkon panotikisa uan sapanoua tlajyouia, amitlaj ueli kitsakuilia makipia ikone. Tejuan noijki amo tikmatij keman nion tlen hora ajsiki iueyi tonal Jehová pero kema tikmatokej ajsiki non tonal. Jehová san niman kinmixpolos akinmej amo yolkualmej uan amo uelis choloskej.

5. ¿Tleka tikijtouaj ueyi tlajyouilistli yetoskia ken ijkuak tlanesi?

⁵ Ken ijkuak tlanesi. Pablo noijki okijto okseki tlamantli tlen kichiuaj akinmej tlachtekij. Ye okijto ijkuak ajsiki itonal Jehová yetoskia ken ijkuak tlanesi (1 Tes. 5:4). Akinmej tlachtekij xamo nion amo kimachiliaj ken yitlanestiuits porque kitemouaj tlen kichtekiskej. Ikinon nion amo kitaj ijkuak yitlanesis uan uelis kinmajsitiuij ijkuak ijkon kichijtokej. Ijkon panos itech ueyi tlajyouilistli porque kinmitaskej akinmej kichijtokej tlen amo kuali. Tejuan amo tikchiuaj ken yejuan porque tejuan yitikchixtokej itonal Jehová. ¿Ken tikteititiaj yotimoyektlalijkej? Ijkuak amo tikchiuaj tlen Jehová amo kipaktia uan ijkuak timochijchikauaj ‘titetlasojtlah, tikijtoah tlan milák iwa [...] timilajkameh’ (Efes. 5:8-12). Satepan Pablo okijto ome tlamantli tlen techpaleuia matikajsikamatikan akinmej amo momakixtiskej.

6. ¿Tleka miakej yetoskia ken kochtokej? (1 Tesalonicenses 5:6, 7).

⁶ ‘Akimeh kochih’ (xiktlajtolti 1 Tesalonicenses 5:6, 7). Pablo okijto sekimej  yetoskia ken kochtokej, ikinon amo momakixtiskej. Ijkuak ikaj kochi amo kikaki tlen panotok nion amo kimachilia ken tlanesi. Noijki amo kimatij ijkuak itlaj miak ipati panotok nion ueli itlaj kichiuaj. Axkan miakej ijkon katej, yetoskia ken kochtokej (Rom. 11:8). Amo kitaj tlen kiteititia tikatej “iksemi tonatijmeh” uan noijki amo kimatij yiualajsitok ueyi tlajyouilistli. Ijkuak itlaj panoua itech nochi tlaltikpak, sekimej kinekij kimatiskej tlen kichiuas iTekiuajkayo toTajtsin Dios, yetoskia ken tepitsin ijsaj. Pero miakej san niman kilkauaj tlen okikakej ikinon yetoskia ken oksepa kochij. Sekimej kineltokaj se tonal kinmixkomakaskej pero mokuayejyekouaj ok poliui miak para ijkon panos (2 Ped. 3:3, 4). Pero tejuan tikmatokej yiualajsitok ueyi tlajyouilistli ikinon moneki matiijsatokan.

7. ¿Tleka akinmej kinmixpoloskej yetoskia ken akinmej tlauanaj?

⁷ “Akimeh tlawanah”. Apóstol Pablo okijto akinmej toTajtsin Dios kinmixpolos yetoskia ken akinmej tlauanaj. Ijkuak ikaj tlauana san niman tlapoloua, ikinon san tlen amo kichiua. Noijki ijkon kinpanoua akinmej amo yolkualmej, porque amo kikakij tlen toTajtsin Dios kinmiluia, san kichiuaj tlen amo kuali uan ikinon kinmixpoloskej. Apóstol Pablo okijto akinmej kichiuaj ken Cristo moneki kuali mamokuayejyekokan uan matlalnamiktokan, amo makichiuakan ken akinmej tlauanaj (1 Tes. 5:6). Se ixtlamatki okijto ijkuak ikaj tlalnamiktok moyolseuijtok uan kuali mokuayejyekoua, ijkon kuali kipejpena tlen kichiuas. ¿Tleka miak ipati ijkon matikchiuakan? Tla amo ijkon tikchiuaj, uelis timokajkalakiskej itech política uan tikchiuaskej tlen oksekimej kichiuaj. Noijki ijkuak okachi yiajsiki itonal Jehová sekimej okachi kinekiskej matikchiuakan tlen yejuan kichiuaj. Pero amo moneki matimotekipachokan porque iespíritu toTajtsin Dios techpaleuis matimoyolseuijtokan uan kuali matikpejpenakan tlen tikchiuaskej (Luc. 12:11, 12).

8. Ijkon ken kijtoua 1 Tesalonicenses 5:8, ¿tlen moneki tikchiuaskej para timotlachilijtoskej uan kuali timokuayejyekoskej? (Noijki xikita dibujo).

⁸ Matikmoelpantlalilikan tepostli uan casco. Pablo okijto tejuan tiyetoskiaj ken soldados tlen kimotlaliliaj tepostli tlen moneki uan moltlachilijtokej (xiktlajtolti 1 Tesalonicenses 5:8). Soldados moneki nochipa moyektlalijtoskej para moteuiskej ijkuak yetos se guerra. Tejuan noijki moneki axkan timoyektlaliskej para ijkuak ajsiki itonal Jehová. Matitlaneltokakan uan matitetlasojtlakan tla ijkon tikchiuaj yetoskia ken tikmoelpantlaliliaj tepostli. Noijki matikchiakan tlen tikseliskej satepan, ijkon yetoskia ken tikmotlaliliaj casco. Tla ijkon tikchiuaj, techpaleuis.

9. ¿Ken techpaleuia tla titlaneltokaj?

⁹ Soldados moelpantlaliliayaj se tepostli para amitlaj makinpano. Noijki tejuan moneki titlaneltokaskej uan titetlasojtlaskej para tikmaluiskej toyolo. Tla ijkon tikchiuaj, techpaleuis matiktekichiuilijtokan Jehová uan matikchiuakan tlen Jesús otechmachti. Noijki tikneltokaskej Jehová kinteochiua akinmej kitemouaj (Heb. 11:6). Tla titlaneltokaj, techpaleuis nochipa matiktlakamatikan Jesús maski titlajyouiskej porque ye techyekana. Matikitakan ken tokniuan tlaxikouaj maski kintlajyouiltiaj noso amo kipiaj tomin. Non techyolchikauas para okachi matitlaneltokakan, matitlaxikokan ijkuak titlajyouiaj uan amo matiknekikan tikpiaskej miak tlamantli. Uelis tikchiuaskej ken tokniuan  akinmej amo kipiaj miak tlamantli uan okachi kitekichiuiliaj Jehová. b

10. ¿Tlen tikchiuaskej tla tiktlasojtlaj Jehová uan akinmej amo kitekichiuiliaj?

¹⁰ Tla titetlasojtlaj, timotlachilijtoskej uan kuali timokuayejyekoskej (Mat. 22:37-39). Tla tiktlasojtlaj toTajtsin Dios, nochipa titetlapouiskej maski tikitaskej oui (2 Tim. 1:7, 8). Tejuan noijki tikintlasojtlaj akinmej amo iTlaixpantijkauan Jehová. Ikinon timochijchikauaj para tikintlapouiskej maski ika teléfono noso ika carta. Amo tikijtouaj amo keman kitekichiuiliskej Jehová porque timokuayejyekoua uelis se tonal ijkon kichiuaskej (Ezeq. 18:27, 28).

11. ¿Ken techpaleuis tla timotlasojtlaj inmiuan tokniuan? (1 Tesalonicenses 5:11).

¹¹ Tejuan tikintlasojtlaj tokniuan uan ijkon tikteititiaj ijkuak san sekan timoyolchikauaj (xiktlajtolti 1 Tesalonicenses 5: 11). Soldados san sekan moteuiaj uan ijkon mopaleuiaj. Pero uelis kikojkoskej akin kinpaleuijtok ijkuak moteuiaj inmiuan oksekimej soldados maski amo okinekiayaj ijkon kichiuaskej. Tejuan noijki amo tikinyolkokoskej tokniuan nion tikinchiuiliskej tlen amo kuali san porque tiknekij, ualeua ijkon tikchiuaj porque timotlapololtiaj (1 Tes. 5:13, 15). Noijki tikteititiaj tikintlasojtlaj tokniuan ijkuak tikintlakaitaj akinmej techyekanaj (1 Tes. 5:12). Matimokuayejyekokan tlen okinpanok tokniuan ompa Tesalónica. Yejuan ayamo okajxitiayaj se xiuitl omonechikojtokaj ijkuak Pablo okinmijkuilili achto carta. Xamo tokniuan akinmej okinyekanayaj omotlapololtiayaj porque amo okimatiayaj seki tlamantli pero omonekiaya kintlakaitaskej. Ijkuak yiajsiki ueyi tlajyouilistli okachi monekis timouikaskej inmiuan tokniuan akinmej techyekanaj. Porque xamo ayakmo uelis timotlapouiskej inmiuan tokniuan tlen katej kanin techyekanaj nion tokniuan tlen katej Betel. Uan xamo ayakmo uelis techiluiskej tlen moneki matikchiuakan. Ikinon axkan moneki okachi tikteititiskej tikintlasojtlaj uan tikintlakaitaj tokniuan  akinmej techyekanaj. Matimokuayejyekokan ken moneki maski san tlen panos uan amo san matikitakan ijkuak motlapololtiaj. Matikilnamiktokan Jehová okitlali iKone para makinyekana tokniuan akinmej techyekanaj.

12. ¿Ken techpaleuia tla tikilnamiktokej tlen tikseliskej satepan?

¹² Tlen tikchiaj panos satepan techpaleuia matimokuayejyekokan ken moneki ijkon ken soldados okinpaleuiaya incasco ijkuak okimotlaliliayaj. Tejuan tikmatokej amitlaj ipati tlen kichiuaj oksekimej porque tikilnamiktokej tlen tikseliskej satepan (Filip. 3:8). Noijki ijkuak tikilnamiktokej tlen tikseliskej techpaleuia kuali matimomachilikan uan kuali matiyetokan. Ijkon okinpanok tokniuan Wallace uan Laurinda tlen tlapaleuiaj África. Wallace oixpoliuik itajtsin uan opanok eyi semanas oixpoliuik inantsin Laurinda. Yejuan amo ueli okinmitatoj infamilias porque miakej okinmajsitoka COVID-19. Wallace okijkuilo: “Nimoyolchikaua porque nikmatok toTajtsin Dios kinyolitis akinmej yoixpolikej. Ne nimokuayejyekoua ken yetoskej ijkuak kinyolitiskej uan amo ken omomachiliayaj ijkuak yiixpoliuiskiaj. Non nechyolseuia uan nechpaleuia amo okachi manimoyolkoko”.

13. ¿Tlen moneki tikchiuaskej para Jehová matechmaka iespíritu santo?

¹³ “Amo xikseuikan itli espíritu” (1 Tes. 5:19, TNM). Pablo okijto espíritu santo yetoskia ken tlitl tlen tikpiaj toijtik. Non espíritu kichiua matiknekikan tikchiuaskej tlen kuali uan noijki techpaleuia matimochijchikauakan tiktekichiuiliskej Jehová (Rom. 12:11). ¿Tlen moneki tikchiuaskej para Jehová matechmaka iespíritu santo? Matiktlajtlanilikan, matimomachtikan iTlajtol uan nochipa matikpaleuikan ialtepe. Tla ijkon tikchiuaskej, techyekanas ika iespíritu santo (Gál. 5:22, 23).

14. ¿Tlen moneki tikchiuaskej tla tiknekij toTajtsin Dios matechmaka iespíritu santo? (Noijki xikinmita fotos).

¹⁴ Jehová techmaka iespíritu pero moneki timomaluiskej para amo tikseuiskej “itli espíritu”. Para Jehová techmakatos iespíritu  moneki tikchiuaskej uan timokuayejyekoskej tlen kuali. Pero ye ayakmo techmakas iespíritu tla timokuayejyekoskej tlen amo kuali uan tikkauiliskej makalaki ijtik toyolo (1 Tes. 4:7, 8). ¿Tlen okachi moneki tikchiuaskej? Pablo okijto: “Amo san xikajawilmatikah n tlajtóli non nomechmatiltiah n profetas.” (1 Tes. 5:20). Itech nin versículo ijkuak kijtoua “tlajtóli non nomechmatiltiah n profetas” kijtosneki tlen toTajtsin Dios kitematiltia ika iespíritu. Profetas noijki okitematiltijkej san niman uits itonal Jehová. Tejuan amo timokuayejyekouaj ok miak poliui para ajsiki non tonal noso amo timokuayejyekouaj amo tikitaskej Armagedón. Tikteititiaj tikchixtokej san niman maajsiki non tonal ikinon timochijchikauaj mojmostla tikchiuaj tlen kuali (2 Ped. 3:11, 12).

15. ¿Tlen moneki tikchiuaskej para amo techkajkayauaskej? (1 Tesalonicenses 5:21).

¹⁵ Akinmej amo kitekichiuiliaj toTajtsin Dios san niman kijtoskej: “Axa kema ya tikateh ika kuali, iwa ya tikpiah yolsewílistli” (1 Tes. 5:3). Ipan nochi tlaltikpak amo kuali ejekamej kitematiltiskej seki tlamantli uan miakej kinkajkayauaskej (Apoc. 16:13, 14). Pero tejuan amo techkajkayauaskej tla tikchiuaskej tlen kijtoua Biblia, ompa kijtoua: “Kuali xikkakikah tlan nomechmatiltiah” (xiktlajtolti 1 Tesalonicenses 5:21). Ika griego tlajtoli tlen motlajtolkopa “kuali xikkakikah” kijtosneki ijkuak ikaj kitaj kox melauak itlaj chijchitok ika oro noso plata. Tejuan noijki moneki kuali tikitaskej kox melauak tlen techiluiaj uan tlen tiktlajtoltiaj. Yiuejkika tokniuan tlen ochantiayaj Tesalónica omonekiaya ijkon kichiuaskej pero axkan tejuan moneki okachi ijkon tikchiuaskej porque yipeuas ueyi tlajyouilistli. Amo matikneltokakan nochi tlen techiluiaj. Okachi kuali matikitakan kox kajki itech Biblia tlen techiluiaj noso tlen tiktlajtoltiaj uan kox ijkon yokijto ialtepe Jehová. Tla ijkon tikchiuaskej, amo techkajkayauaskej amo kuali ejekamej (Prov. 14:15; 1 Tim. 4:1).

16. ¿Tlen tikseliskej uan tlen moneki tikchiuaskej?

¹⁶ Tejuan tikmatokej akinmej kitekichiuiliaj Jehová momakixtiskej ijkuak panos ueyi tlajyouilistli pero amo tikmatij tlen techpanos tisejse (Sant. 4:14). Tla amo keman tikkauaskej Jehová, ye kichiuas nochipa matiyoltokan maski timomakixtiskej ijkuak matlami ueyi tlajyouilistli noso tla achto tiixpoliui. Tlapejpenalmej yetoskej iluikak iuan Cristo uan akinmej mokauaskej nikan tlaltikpak chantiskej itech xochitlali. Axkan matikilnamiktokan tlen tikseliskej satepan uan matikchixtokan itonal Jehová.