1, 2. ¿Tleka techpanoua ijkon ken Lot?

 TIMOMACHILIAJ ijkon ken Lot ijkuak tikitaj ken monauatiaj oksekimej. Lot se tlakatl tlen yiuejkika okatka uan okichiuaya tlen kuali. Ye okimatiaya toTajtsin Dios amo kipaktia matikchiuakan tlen amo kuali. Ikinon sapanoua omotekipachouaya “porke okimitaya kenijki otlajtlakolchijtinemiah n tlakah” (2 Ped. 2:7, 8). Noijki Lot okitlasojtlaya uan okitlakaitaya ikinon Jehová amo okipaktiaya ijkuak oksekimej oauilnemiayaj. Axkan tejuan noijki ijkon techpanoua porque miakej amo kitlakaitaj toTajtsin Dios uan amo kichiuaj tlen ye technauatia. Tla tiktlasojtlaj toTajtsin Dios uan tiktlakaitaj, tikchiuaskej tlen kuali maski san tlen panos (Prov. 14:2).

² Jehová techpaleuia matikchiuakan tlen kuali ikinon techyolchikaua ika tlen kijtoua amochtli Proverbios. Tlen kijtoua non amochtli kinpaleuia nochtin akinmej kichiuaj ken Cristo. Kinpaleuia tlakamej, siuamej, telpochmej uan akinmej yikipiaj miak xiuitl.

3. ¿Ken techpaleuia Proverbios 17:3 matikmaluikan toyolo? (Noijki xikinmita fotos).

³ Jehová kita tlen tikpiaj itech toyolo ikinon moneki tikmaluiskej. Ye kita nochi tlen tikpiaj toijtik pero tejuan amo tikitaj nion oksekimej uelij kitaj (xiktlajtolti Proverbios 17:3). Jehová techtlasojtla ijkuak kita amo tikilkauaj tlen ye techmachtia. Non techpaleuis matiyetokan tiixtlamatkej uan uelis nochipa tiyoltoskej. Noijki amo tikkauiliskej Satanás matechkajkayaua nion akinmej ye kinyekana (Juan 4:14; 1 Juan 5:18, 19). Tejuan okachi tiktlasojtlaskej Jehová uan tiktlakaitaskej tla inauak timotokiaj.  Ijkon amo tikyolkokoskej nion amo timokuayejyekoskej titlajtlakolchiuaskej. Ijkuak itlaj techyoltilanas san niman matimotlajtlanikan: “¿Tleka nikyolkokos akin nechtlasojtla uan nechpaleuia?” (1 Juan 4:9, 10).

4. ¿Tlen okipaleui se tokni amo matlajtlakolchiua?

⁴ Se tokni tlen itoka Marta b uan chanti Croacia okinekiaya tlajtlakolchiuas. Ye okijkuilo: “Amo kuali onimokuayejyekouaya. Onikitaya oui amo nitlajtlakolchiuas porque onechyoltilanaya tlen amo kuali. Pero ne niktlakaita Jehová uan non onechpaleui”. Marta okijto okitlakaitaya Jehová ikinon omokuayejyeko ken tlajyouiskia tla kichiuaskia tlen amo kuali. Tejuan noijki uelis ijkon tikchiuaskej ijkuak itlaj techyoltilanas. Matikilnamiktokan tla titlajtlakolchiuaskej, tikyolkokoskej Jehová uan amo uelis nochipa tikueyichiuaskej (Gén. 6:5, 6).

5. ¿Tlen techmachtia tlen okipanok Leo?

⁵ Akin kitlakaita Jehová amo mokuayejyekoua amitlaj panos tla tlajtlakolchiuas. Noijki amo mokuayejyekoua amitlaj panos tla mouikas inmiuan akinmej amo kitekichiuiliaj Jehová. Ijkon okipanok se tokni tlen itoka Leo uan chanti República Democrática del Congo. Naui xiuitl satepan ijkuak omoapolakti opejki mouika inmiuan akinmej amo kitekichiuiliaj Jehová. Ye omokuayejyekouaya amo otlajtlakolchijtoka ixpan Jehová porque amo okichijtoka tlen yejuan okichiuayaj. Pero san niman opejki tlauana uan auilnemi porque iyolikniuan ijkon okichiuayaj. Satepan Leo omokuayejyeko tlen okimachtijkej itatajuan uan ken achto oyolpakiaya. Ye opejki oksepa kichiua tlen kuali uan tlayekankej okipaleuijkej oksepa mamouika  iuan Jehová. Axkan Leo tlayekanki uan precursor especial.

6. ¿Tlen kineskayotiaj ome siuamej?

⁶ Axkan tikitaskej Proverbios capítulo 9, tlen timomachtiskej techpaleuis maski tiyetoskej titlakamej noso tisiuamej. Ompa moneskayotia ome siuamej, se siuatl tlen ixtlamatki uan okse siuatl tlen amo ixtlamatki. c Ijkuak timomachtijtiaskej nin tlamachtil, matikilnamiktokan akinmej kinyekana Satanás san kinekij auilnemiskej uan kitaj pornografía (Efes. 4:19). Ikinon matimochijchikauakan nochipa matiktlakaitakan Jehová uan amo matikchiuakan tlen amo kuali (Prov. 16:6). Ome siuamej tlen timomachtiskej itech nin tlamachtil kintlapouiaj “akinmej amo ixtlamatkej”. Yetoskia ken yejuan kinnotsaj matlakuatij inkalijtik (Prov. 9:1, 5, 6, 13, 16, 17). Pero matikitakan tlen panoua ijkuak yauij ikalijtik sejse siuatl.

7. Ijkon ken kijtoua Proverbios 9:13-18, ¿tlen kinpanoua akinmej yauij ikalijtik “siuatl tlen amo ixtlamatki”? (Noijki xikita dibujo).

⁷ Achto matikitakan tlen kichiua “siuatl tlen amo ixtlamatki” (xiktlajtolti Proverbios 9:13-18). Non siuatl amo pinaua uan chikauak kijtoua: “Akin amo ixtlamatki mauiki nikan”. Ye ijkon kinnotsa akinmej amo ixtlamatkej para iuan matlakuatij. Pero ¿tlen kinpanoua akinmej yauij ikalijtik? Biblia kijtoua: “Akinmej okinyole katej uejkatlan kanin toktokej akinmej yoixpolikej”. Pero capítulos tlen achto kipia Proverbios noijki techiluiaj tlen kichiua siuatl tlen amo tetlakamati uan siuatl tlen auilnemi. Ompa kijtoua: “Ijkuak yauij ikalijtik yetoskia ken yauij kanin onka mikilistli” (Prov. 2:11-19). Proverbios 5:3-10 noijki techiluia matimomaluikan para amo tikchiuaskej tlen kichiua siuatl tlen amo tetlakamati. Ompa kijtoua non siuatl “ikxiuan yauij kanin onka mikilistli”.

8. ¿Tlen moneki kichiuaskej nochtin akinmej kinnotsa “siuatl tlen amo ixtlamatki”?

⁸ Nochtin akinmej kinmiluia “siuatl tlen amo ixtlamatki” mayakan ikalijtik moneki kipejpenaskej kox yaskej noso amo. Xamo ijkon techpanos ijkuak techyoltilana tlen amo kuali uan tiknekij tiauilnemiskej noso ijkuak tikajsij se foto tlen kipia pornografía. ¿Tlen tikchiuaskej tla ijkon techpanos?

9, 10. ¿Tleka moneki amo matiauilnemikan?

⁹ Miak ipati amo matiauilnemikan. Itech  amochtli Proverbios ijkuilitok “siuatl tlen amo ixtlamatki” kijtoua: “Tsopelik atl tlen kichtekij”. ¿Tlen kineskayotia “atl tlen kichtekij”? Biblia kijtoua ijkuak akinmej yomonamiktijkej san sekan motekaj yetoskia ken atl tlen kinyolpaktiaj (Prov. 5:15-18). Se tlakatl uan se siuatl amo tlajtlakolchiuaj ijkuak san sekan motekaj tla yomonamiktijkej. Pero tlajtoli “atl tlen kichtekij” kijtosneki okse tlamantli. Xamo kijtosneki ijkuak sekimej auilnemij uan amo kintlakamatij itlanauatiluan toTajtsin Dios. Nochtin akinmej auilnemij kichiuaj san ichtaka ijkon ken ijkuak ikaj tlachteki. Akinmej amo kinextiaj tlen kichiuaj yetoskia ken non “atl tlen kichtekij” uan kimachiliaj tsopelik. Pero san yejuan mokajkayauaj porque Jehová kita nochi uan amo uelis kikajkayauaskej. Akinmej ijkon kichiuaj, Jehová ayakmo kinselia uan non yetoskia ken itlaj chichik (1 Cor. 6:9, 10).

¹⁰ Akinmej auilnemij xamo pinauaj, kimachiliaj ayakmo itlaj inpati, kinpiaj inkoneuan maski amo okinekiayaj uan kinyolkokouaj infamilias. Okachi kuali matiyetokan tiixtlamatkej uan amo matikchiuakan tlen kineki “siuatl tlen amo ixtlamatki”. Akinmej auilnemij ayakmo mouikaj iuan Jehová pero noijki mokokouaj uan hasta ixpoliuij (Prov. 7:23, 26). Proverbios capítulo 9 versículo 18 kijtoua: “Akinmej okinyole katej uejkatlan kanin toktokej akinmej yoixpolikej”. Pero ¿tleka miakej kichiuaj tlen amo kuali maski tlajyouiaj? (Prov. 9:13-18).

11. ¿Tleka sapanoua amo kuali matikitakan pornografía?

¹¹ Miakej uelis kitaskej pornografía maski san kanin yetoskej. Sekimej mokuayejyekouaj amitlaj panos tla kitaskej pornografía pero non amo melauak. Akinmej kitaj pornografía amo kuali momachiliaj, mokuayejyekouaj amitlaj inpati uan amo ueli kikauaj. Yejuan amo san niman kilkauaj tlen okitakej. Akinmej kitaj pornografía okachi kinekij auilnemiskej (Col. 3:5; Sant. 1:14, 15). Miakej tlen kitaj pornografía satepan auilnemij.

12. ¿Tlen moneki tikchiuaskej tla tikajsiskej fotos tlen uelis kichiuas matimokuayejyekokan tiauilnemiskej?

¹² ¿Tlen moneki tikchiuaskej tla itech tocelular, totableta noso tocomputadora kisa se foto tlen kipia pornografía? San niman oksekan matitlachiakan uan amo matikitakan. Tla tikilnamiktokej okachi ipati timouikaskej iuan Jehová, non techpaleuis amo matikitakan pornografía. Pero katej seki fotos tlen xamo amo kipiaj pornografía pero uelis kichiuas matimokuayejyekokan tiauilnemiskej. Tejuan amo moneki tikinmitaskej nonmej fotos porque amo tiknekij titlajtlakolchiuaskej itech toyolo (Mat. 5:28, 29). Se tokni tlayekanki tlen chanti Tailandia uan itoka David okijto: “Nochipa nimotlajtlania: ‘¿Kipaktis Jehová tla nikinmitas fotos maski nikijtos amo kipiaj pornografía?’. Ijkuak ijkon nimokuayejyekoua, nechpaleuia manikchiua tlen kuali”.

13. ¿Tlen techpaleuis matikchiuakan tlen kuali?

¹³ Amo oui tikchiuaskej tlen kuali tla tiktlakaitaj Jehová. Proverbios 9:10 kijtoua: “Tipeuaj timochiuaj tiixtlamatkej ijkuak tiktlakaitaj Jehová”. Kanin peua Proverbios capítulo 9 kiteititia melauak tlen kijtoua non versículo. Ompa kijtoua se siuatl tlen kineskayotia ijkuak ikaj ixtlamatki.

14. ¿Tlen okse tlamantli techiluia matikchiuakan Proverbios 9:1-6?

¹⁴ (Xiktlajtolti Proverbios 9:1-6). Itech ninmej versículos Jehová techyoleua  itlaj matikchiuakan, ye akin otlachijchi uan ixtlamatki (Prov. 2:6; Rom. 16:27). Axkan tikitaskej Proverbios noijki kijtoua kajki se kali ueyi tlen kinpia chikome tlaketsalmej. Non techpaleuia matimokuayejyekokan Jehová kipaktia kitemakas tlen kipia. Porque ye nochtin kinselia akinmej kichiuaj tlen ye techiluia.

15. ¿Tlen techiluia toTajtsin Dios matikchiuakan?

¹⁵ Jehová kipaktia kitemakas tlen kipia ikinon techmaka miak tlamantli. Proverbios capítulo 9 ijkon kiteititia porque tlen ompa kijtoua yetoskia ken se siuatl tlen ixtlamatki. Ye yotlakualchi para matlakuakan uan yokiyektlali vino (Prov. 9:2, achto nota). Noijki versículos 4 uan 5 kijtouaj siuatl tlen ixtlamatki kinmiluia “akinmej amo ixtlamatkej”: “Xiualakan, xikuakan nopan”. ¿Tleka moneki matikchiuakan tlen kijtoua non siuatl? Porque Jehová kineki kinmaluis ikoneuan uan kineki kinpaleuis mayetokan ixtlamatkej. Ye amo kineki matitlajtlakolchiuakan nion nochipa matimoyolkokojtokan ika tlen otikchijkej. Ikinon “ye kinmaka ixtlamatilistli akinmej yolmelauakej” (Prov. 2:7). Tla tiktlakaitaj Jehová, tikyolpaktiskej uan tikchiuaskej tlen techiluia. Non techpaleuis nochipa matiyolpakikan (Sant. 1:25).

16. ¿Tlen okichi Alain uan tlen opanok?

¹⁶ Matimomachtikan tlen okichi tokni Alain uan non techititis tla tiktlakaitaj Jehová techpaleuis matikchiuakan tlen kuali. Ye tlayekanki uan noijki tlamachtia itech se escuela. Alain okijto: “Miakej tlen noijki tlamachtiaj mokuayejyekouaj películas tlen kipiaj pornografía uelis kinpaleuis ika matlamachtikan”. Pero ye kimati tla ijkon mokuayejyekos san mokajkayauas. Ye okijto: “Ne amo oniknek nikinmitas nonmej películas porque niktlakaita Jehová. Noijki onikinmilui oksekimej tlen otlamachtiayaj tleka amo oniknek nikinmitas nonmej películas”. Ye okichi tlen nikan kijtoua: “Xinejnemikan itech ojtli tlen namechpaleuis xiyetokan nanixtlamatkej” (Prov. 9:6). Sekimej tlen inmiuan otlamachtiaya sapanoua okintlajtlachialti tlen okichi ikinon opejkej momachtiaj Biblia uan monechikouaj.

17, 18. ¿Ken katej akinmej kikakij siuatl tlen ixtlamatki uan ken kinpaleuis satepan? (Noijki xikita dibujo).

¹⁷ Jehová techmachtia ika ome siuamej tlen katej itech Proverbios. Ijkon techpaleuia matikmatikan tlen tikchiuaskej para uelis tiyolpakiskej satepan. Akinmej kichiuaj tlen kinmiluia “siuatl tlen amo ixtlamatki” san moyolpaktiaj ijkuak auilnemij  uan kimachiliaj ken itlaj tsopelik. Yejuan san kinekij moyolpaktiskej uan amo mokuayejyekouaj tlen kichiuaj uelis kinmijtlakos satepan. Yejuan kinpanos tlen kijtoua Biblia. Ajsiskej “uejkatlan kanin toktokej akinmej yoixpolikej” (Prov. 9:13, 17, 18).

¹⁸ Pero kuali katej akinmej kichiuaj tlen kinmiluia siuatl tlen ixtlamatki. Yejuan yolpakij porque kipiaj tlen kinpaleuia mamouikakan iuan Jehová. Yetoskia ken kipiaj miak tlakuali uelik (Is. 65:13). Profeta Isaías okijto tlen Jehová okilui. Ye okijto: “Kuali techkakikan uan xikkuakan tlen kuali uan nanyolpakiskej ika tlen melauak uelik” (Is. 55:1, 2). Tejuan tikpatioitaj tlen Jehová kipatioita uan tikkokoliaj tlen ye kikokolia (Sal. 97:10). Tiyolpakij tikinyoleuaj oksekimej noijki mayetokan ixtlamatkej. Tejuan tikchiuaj ken tlakeualmej tlen kijtoua Proverbios capítulo 9. Yejuan chikauak mokakij “uejkapan kanin kajki altepetl”. Tejuan noijki tikijtouaj: “Akin amo ixtlamatki mauiki nikan”. Nochtin akinmej kichiuaj tlen kijtoua siuatl tlen ixtlamatki kinpaleuis axkan uan satepan. Uelis nochipa tiyoltoskej tla ‘tinejnemij itech ojtli tlen techpaleuis matiyetokan tiixtlamatkej’ (Prov. 9:3, 4, 6).

19. ¿Tlen moneki tikchiuaskej ijkon ken kijtoua Eclesiastés 12:13, 14? (Noijki xikita recuadro “ ¿Ken techpaleuia ijkuak tiktlakamatij toTajtsin Dios?”).

¹⁹ (Xiktlajtolti Eclesiastés 12:13, 14). Tejuan tiknekij nochipa tiktlakaitaskej Jehová maski axkan onka miak tlamantli tlen amo kuali. Tla ijkon tikchiuaj, tikmaluiskej toyolo, amo titlajtlakolchiuaskej uan nochipa timouikaskej iuan Jehová. Tejuan tiktlasojtlaj Jehová uan sapanoua tiktlakaitaj ikinon tiknekij tikinpaleuiskej oksekimej mayetokan ixtlamatkej.