Biblia amo kijtoua, pero kema techiluia seki tlamantli tlen techpaleuis tikmatiskej tleka ijkon okichijkej.

Se ángel okilui María kipiaskia se ikone. Ye iuan José ochantiayaj Nazaret, se altepetl tlen okatka Galilea (Luc. 1:26-31; 2:4). Satepan ijkuak okiskej Egipto oksepa omokopkej Nazaret. Jesús ompa omoskalti ikinon okatka nazareno (Mat. 2:19-23). Ijkuak moijtoua Nazaret uelis tikinmilnamikij José, María uan Jesús.

María kuali okixmatiaya altepetl Judá. ¿Tleka ijkon tikijtouaj? Porque María okipiaya ifamilia tlen ompa ochantiayaj. Ompa ochantiayaj Elisabet isiua teopixki Zacarías. Elisabet okatka inantsin Juan akin oteapolaktiayaj (Luc. 1:5, 9, 13, 36). Ijkuak María okitlajpaloto Elisabet iuan omoka eyi metstli uan satepan omokopki Nazaret (Luc. 1:39, 40, 56).

Satepan okiski se tlanauatil para nochtin makijkuilokan intoka itech se amochtli. José otetlakamatki ikinon okiski Nazaret uan oyajki Belén, “ompa otlákatki n rey David” uan noijki okijtojkej ompa nesiskia Mesías (Luc. 2:3, 4; 1 Sam. 17:15; 20:6; Miq. 5:2). Jesús oneski Belén ikinon José amo okilui María mokopaskiaj Nazaret porque uejka okatka uan yikin okipixki ikonetsin. Yejuan omokajkej Belén kanin amo uejka okatka altepetl Jerusalén, kanaj 9 kilómetros noso 6 millas. Non okinpaleui porque ijkon uelis kiuikaskiaj Jesús itech teokali ompa Jerusalén para kitemakaskiaj se tlamanali ijkon ken okijtouaya tlanauatil (Lev. 12:2, 6-8; Luc. 2:22-24).

Noijki se ángel okilui María, ikone yetoskia “Rey ijkó kemi otlanawati David”. ¿Okintlajtlachialtij José uan María ijkuak Jesús oneski itech ialtepe David? (Luc. 1:32, 33; 2:11, 17). Xamo yejuan okitakej okachi kuali mokauaskej Belén uan mochiaskia makinyekana toTajtsin Dios.

Nochi tlen otikitakej kiteititia ouejkajkej ompa Belén. Ijkuak okintlajpaloto sekimej tlakamej tlen omomachtiayaj ken katej sitlalimej, amo tikmatij keski xiuitl yejuan ompa ochantitokaj. Porque Jesús ayakmo okatka se konetl uan ifamilia yokipiaya se kali (Mat. 2:11). Ikinon ayakmo oyajkej Nazaret uan omokajkej Belén para ompa chantiskiaj.

Herodes “otlanawati makinmiktikah nochteh n kokoneh non sikin otlakatkeh iwa asta non ya kipiah ome xiwitl, nochteh non ochantitokah Belén” (Mat. 2:16). Ikinon se ángel okilui José macholokan, ye uan María okiuikakej Jesús Egipto. Ompa omokajkej hasta ijkuak oixpoliuik Herodes. Satepan José okinuikak ompa Nazaret. ¿Tleka amo oyajkej Belén? Porque se ikone Herodes tlen omotokayotiaya Arquelao otlanauatiaya ompa Judea uan ye otetlajyouiltiayaj. Ikinon se ángel okilui José makiuika ifamilia altepetl Nazaret. Ompa Jesús amitlaj kipanoskia, kuali kiskaltiskiaj uan kimachtiskiaj makitekichiuili toTajtsin Dios (Mat. 2:19-22; 13:55; Luc. 2:39, 52).

Xamo José yoixpolijka ijkuak Jesús omotemakak para sekimej uelis yaskej iluikak. Tla ijkon opanok, José kiyolitiskej nikan tlaltikpak. Miakej uelis kixmatiskej uan kitlajtlaniskej tleka okipejpenki mokauas Belén ijkuak Jesús oneski.