1. ¿Tlen kichiuaj tlayekankej ijkon ken kijtoua 1 Pedro 5:2?

 JEHOVÁ kinnauatia tlayekankej makinmaluikan tokniuan. Yejuan kipatioitaj kinpaleuiskej tokniuan uan mochijchikauaj kuali kinmaluiskej (Jer. 23:4; xiktlajtolti 1 Pedro 5:2). Tipakij porque tikinpiaj tokniuan tlen melauak techpaleuiaj.

2. ¿Tlen kinpanoua sekimej tlayekankej?

² Tlayekankej kinpanoua miak tlamantli ijkuak kichiuaj tlen Jehová kinnauatia. Yejuan moneki tekitiskej chikauak para kinmaluiskej tokniuan. Matikitakan tlen okipanok se tlayekanki tlen itoka Tony uan chanti Estados Unidos. Ye okitak omonekiaya yetos yolyamanki ijkuak kiseliskia se tekitl kanin timonechikouaj. Ye okijto: “Ijkuak opejki COVID-19 omonekiaya tikchiuaskej miak tekitl uan ne oniknekiaya nitlapaleuis. Omonekiaya tikitaskej ken timonechikoskej uan ken titetlapouiskej. Ne onikpiaya miak tekitl maski onimochijchikauaya niktlamis noteki. Pero satepan ayakmo onimajxiliaya okachi nimomachtis Biblia uan nimotlatlaujtis”. Okse tokni tlayekanki tlen itoka Ilir uan chanti Kosovo noijki okipanok se tlamantli. Ye ochantiaya kanin okatka guerra uan okitaya oui kichiuas tlen technauatia ialtepe Jehová. Ye okijto: “Ne onimomojtiaya ijkuak tokniuan tlen katej Betel onechiluijkej manikinpaleui tokniuan tlen ochantiayaj kanin okatka guerra. Omonekiaya niyetos niyolchikauak para nitlapaleuis uan onikitaya oui tlen onechnauatiayaj tokniuan”. Se misionero tlen chanti Asia uan itoka Tim okitaya oui kichiuas nochi tekitl tlen yokipiaya. Ye okijto: “Ualeua onimosotlauaya uan amo kuali onimomachiliaya”. ¿Tlen kinpaleuis tlayekankej para tlaxikoskej ijkuak ijkon kinpanoua?

3. ¿Tleka ipati tinochtin matimomachtikan tlen okichi Gedeón?

 ³ Tlayekankej uelis kinpaleuis tlen okichi Gedeón (Heb. 6:12; 11:32). Ye okiyekanaya ialtepe toTajtsin Dios uan okimaluiaya (Juec. 2:16; 1 Crón. 17:6). Axkan tlayekankej moneki kimaluiskej ialtepe toTajtsin Dios ijkon ken okichi Gedeón maski ualeua oui (Hech. 20:28; 2 Tim. 3:1). Gedeón okatka yolyamanki uan otetlakamatki. Tlen ye okichi uelis kinpaleuis tlayekankej. Tlen okipanok Gedeón uelis techpaleuis tinochtin matikpatioitakan tlen kichiuaj tlayekankej uan matikinpaleuikan ika nochi toyolo (Heb. 13:17).

4. ¿Ken okiteititi Gedeón okatka yolyamanki?

⁴ Gedeón okatka yolyamanki b uan ijkuak se ángel okilui, Jehová okipejpenki para makinmakixti israelitas tlen okinnauatiayaj madianitas, Gedeón okijto: “Tejuan tipouij iuan ifamilia Manasés, amo timiakej uan itech ifamilia notajtsin ne amo okachi nopati” (Juec. 6:15). Gedeón omokuayejyekouaya amo uelis kichiuaskia non tekitl. Pero Jehová okimatoka uelis kichiuaskia non tekitl uan ye okipaleui matlatlani.

5. ¿Ken kiteititiskej kox melauak yolyamankej tlayekankej?

⁵ Tlayekankej nochipa mochijchikauaj yetoskej yolyamankej (Miq. 6:8; Hech. 20:18, 19, TNM). Yejuan amo kijtojtinemij tlen kichiuaj. Noijki amo mokuayejyekouaj amitlaj inpati ijkuak motlapololtiaj. Pero uelis itlaj kinpanos tlen kiteititis kox melauak yolyamankej. Matikijtokan se tlayekanki kiselia miak tekitl pero satepan kita amo ueli nochi kichiua. Xamo sekimej tokniuan kiluiskej kuali tekitl kichiua noso amo kipatioitaskej tlen kichiua uan kiteneuaskej. ¿Ken kinpaleuis tlayekankej tlen okichi Gedeón tla ijkon kinpanos?

6. ¿Tlen kinpaleuis tlayekankej mayetokan yolyamankej ijkon ken Gedeón? (Noijki xikita foto).

⁶ Xikinmiluikan oksekimej manamechpaleuikan. Akin yolyamanki kilnamiktok amo uelis kichiuas nochi tekitl tlen kimakaj. Gedeón okinmilui oksekimej makipaleuikan porque okatka yolyamanki (Juec. 6:27, 35; 7:24). Tlayekankej tlen  yolyamankej noijki kichiuaj ijkon ken Gedeón. Tokni Tony tlen otikitakej itech párrafo 2 okijto: “Ne onikseliaya miak tekitl maski amo ueli nochi onikchiuaya porque ijkon onechmachtijkej. Ikinon se tonal onimomachti iuan nofamilia ken uelis tiyetoskej tiyolyamankej uan onikilui nosiua manechilui tlen omokuayejyekouaya. Noijki onikitak video tlen itoka Ijkon ken Cristo, ma tikinmachtikan oksekimej uan intech ma titlaneltokakan tlen kajki itech jw.org”. Satepan Tony okinmilui oksekimej makipaleuikan uan okijto tlen okipanok. Ye okijto: “Kanin timonechikouaj nochi kuali kajki uan okachi nimajxilia para nimomachtis uan ijkon kuali nimouikas iuan Jehová”.

7. ¿Ken uelis kichiuaskej tlayekankej ijkon ken Gedeón ijkuak ikaj kinteneua? (Santiago 3:13).

⁷ Amo xikualanikan tla namechteneuaj. Tla se tlayekanki kiteneuaj xamo uelis san niman kualanis, pero tlen okichi Gedeón kipaleuis. Ye okimatoka okatka tlajtlakole uan amo okualanki ijkuak okitenejkej tlakamej tlen opouiayaj itech altepetl Efraín (Juec. 8:1-3). Ye okinkak uan okinpaleui mamoyolseuikan. Tlayekankej tlen ixtlamatkej kichiuaj ken Gedeón. Tla ikaj kinteneua, yejuan achto kuali kikakij uan satepan kinankiliaj (xiktlajtolti Santiago 3:13). Ijkon kinpaleuiaj tokniuan kuali mayetokan.

8. Xikyekijto tlen moneki kichiuaskej tlayekankej ijkuak kinmiluiaj kuali tlen kichiuaj.

⁸ Xikueyichiuakan Jehová. Gedeón amo okinek moueyinekis ijkuak okintlanili madianitas uan okinmilui israelitas makiueyichiuakan Jehová (Juec. 8:22, 23). ¿Ken kiteititiskej tlayekankej kichiuaj ken Gedeón? Moneki kiueyichiuaskej Jehová ijkuak itlaj kuali kichiuaj (1 Cor. 4:6, 7). Matikijtokan tokniuan kiluiaj se tlayekanki kuali otlamachti. Ye uelis kinnankilis otlamachti tlen kijtoua iTlajtol toTajtsin Dios uan kuali titlamachtiaj porque ialtepe techmachtia. Miak ipati tlayekankej makitakan kox kiueyichiuaj Jehová ijkuak tlamachtiaj noso san yejuan moueyinekij. Matikitakan tlen okipanok se tokni tlen itoka Timothy. Ye okipaktiaya tlamachtis ijkuak okitlalijkej mayeto tlayekanki. Ye okijto: “Ne onechpaktiaya kualtsin nipeuas ijkuak onitlamachtiaya uan onikijtouaya ejemplos tlen sapanoua kuajkualtsitsintin. Ikinon tokniuan okijtouayaj sapanoua kualtsin onitlamachtiaya. Ijkuak ijkon okichiuayaj, onikitaya amo okiueyichiuayaj Jehová porque san okitayaj tlen ne onikchiuaya”. Tokni okitak omonekiaya kipatlas ken otlamachtiaya (Prov. 27:21). Ye okijto: “Axkan tokniuan nechiluiaj tlen nitlamachtia kinpaleuia matlaxikokan ijkuak tlajyouiaj uan kinpaleuia okachi mamouikakan iuan Jehová. Nipaki ijkuak ijkon nechiluiaj tokniuan uan amo ijkon ken achto onechiluiayaj”.

9. ¿Ken okiteititi Gedeón melauak otetlakamatiaya uan okatka yolchikauak? (Xikita dibujo tlen kajki itech página 1).

⁹ Ijkuak Jehová okipejpenki Gedeón mayeto juez, ye omonekiaya kiteititis melauak otetlakamatiaya uan okatka yolchikauak. Ye omonekiaya kichiuas itlaj tlen okatka oui. Omonekiaya kixajxamanis altar tlen okipiaya itajtsin kanin okiueyichiuayaj Baal (Juec. 6:25, 26). Satepan Gedeón okinnechiko miakej soldados pero Jehová ome uelta okilui makinmilui sekimej soldados mamokopakan inchan  (Juec. 7:2-7). Saiktlami Jehová okinauati Gedeón non youak makinteuitij akinmej okinkokoliayaj (Juec. 7:9-11).

10. ¿Ken kiteititiskej tlayekankej melauak tetlakamatij?

¹⁰ Tlayekankej moneki tetlakamatiskej (Sant. 3:17). Tlayekankej tlen tetlakamatij kichiuaj tlen kijtoua Biblia uan tlen kijtoua ialtepe toTajtsin Dios. Ijkon kinmachtiaj tokniuan noijki ijkon makichiuakan pero xamo oui tetlakamatiskej. Ualeua kitaj oui kichiuaskej nochi tlen kinnauatia ialtepe toTajtsin Dios. Uelis motlajtlaniskej kox kinpaleuis oksekimej tlen kinnauatiaj makichiuakan. Noijki xamo kinmiluiaj makichiuakan itlaj tlen uelis kichiuas matlajyouikan. ¿Ken uelis tetlakamatiskej tlayekankej ken okichi Gedeón ijkuak ijkon kinpanos?

11. ¿Tlen kinpaleuis tlayekankej matetlakamatikan?

¹¹ Xikchiuakan tlen namechiluiaj. Jehová okilui Gedeón ken kixajxamaniskia altar tlen okatka iaxka itajtsin. Noijki okilui kanin makichiuili se altar uan tlen kimaniliskia. Gedeón san niman okichi tlen Jehová okinauati. Axkan ialtepe Jehová kinmaka tlayekankej cartas uan okseki tlanauatilmej para kimatiskej tlen kichiuaskej. Nochi non techpaleuia kuali matiyetokan uan kuali matimouikakan iuan Jehová. Tejuan tikintlasojtlaj tlayekankej porque kichiuaj nochi tlen kijtoua ialtepe Jehová. Ikinon tinochtin kuali tikatej porque yejuan tetlakamatij (Sal. 119:112).

12. ¿Ken uelis kichiuaskej tlayekankej tlen kijtoua Hebreos 13:17 ijkuak ialtepe Jehová itlaj kipatla?

¹² San niman matikchiuakan tlen techiluia ialtepe Jehová. Matikilnamikikan Jehová okilui Gedeón ayakmo miakej soldados iuan mamokauakan uan oksekimej omonekiaya mokopaskej inchan (Juec. 7:8). Ye xamo omokuayejyeko: “¿Moneki ijkon nikchiuas? ¿Kuali kisas tlen nikchiuas?”. Pero ye okichi tlen Jehová okinauati. Tlayekankej kiteititiaj tetlakamatij ijkon ken okichi Gedeón ijkuak kichiuaj tlen kijtoua ialtepe Jehová (xiktlajtolti Hebreos 13:17). Itech 2014 Cuerpo Gobernante okipatlak ken kitlaxtlauaskej ijkuak kichijchiuaj se kali kanin timonechikouaj uan kanin mochiuaj uejueyij nechikolmej (2 Cor. 8:12-14). Achto okintlanetiayaj tomin tokniuan tlen okichijchiuayaj se kali para monechikoskej uan satepan oksepa okikopayaj non tomin. Pero axkan kitekitiltiaj tomin tlen kitemakaj tokniuan ipan nochi tlaltikpak. Ijkon kinchijchiuaj kalmej kanin timonechikouaj maski tokniuan tlen ompa monechikoskej amo ueli kitemakaj miak tomin. Se tokni tlen itoka José ijkuak okimatki okipatlakej non tlamantli omokuayejyeko: “Non kinpaleuis tokniuan  tlen katej itech okseki altepemej pero nikan amo techpaleuis. Amo uelis kichijchiuaskej nion se kali”. Pero okichi tlen okijto Cuerpo Gobernante. ¿Tlen okipaleui ijkon makichiua? Ye okijto: “Onikilnamik tlen kijtoua Proverbios 3:5, 6. Ompa kijtoua moneki nikneltokas Jehová techpaleuis. Yonikitak yomochijchijkej miakej kalmej kanin timonechikouaj. Noijki titlapaleuiaj makinchijchiuakan okseki kalmej”.

13. (1) ¿Tlen okineltokaya Gedeón? (2) ¿Ken uelis kichiuaskej tlayekankej ken Gedeón? (Noijki xikita foto).

¹³ Xiyetokan nanyolchikauakej uan xikchiuakan tlen Jehová kineki. Gedeón okitlakamatki Jehová maski okitak oui uan omomojtiaya (Juec. 9:17). Ye okineltokaya Jehová kipaleuiskia makimalui ialtepe. Tlayekankej tlen chantij kanin amo kinkauiliaj matetlapouikan nion mamonechikokan kichiuaj ijkon ken Gedeón. Yejuan yolchikauakej uan kinpaleuiaj tokniuan mamonechikokan uan matetlapouikan maski kimatij uelis kinkitskiskej, kipoloskej inteki noso kintlajyouiltiskej. c Tlayekankej moneki yetoskej yolchikauakej ijkuak peuas ueyi tlajyouilistli para uelis kichiuaskej tlen kinmiluis ialtepe toTajtsin Dios maski kitaskej oui. Xamo techiluiskej ken tikinmiluiskej oksekimej toTajtsin Dios yikinmixpolos akinmej amo yolkualmej uan non yetoskia ken uejueyij tesiuitl. Noijki xamo techiluiskej tlen tikchiuaskej para timomakixtiskej ijkuak Gog de Magog kinekis techpojpolos (Ezeq. 38:18; Apoc. 16:21).

14. ¿Ken otlaxiko Gedeón?

¹⁴ Gedeón sapanoua omochijchika para uelis yetoskia juez ompa Israel. Se youak ye okintokak madianitas ijkuak omoteuijtokaj desde Jezreel hasta kanin okatka aueyatl Jordán. Ompa xamo okatka tlauitsyo (Juec. 7:22). Pero Gedeón  amo omosotla. Maski ye uan 300 isoldados osotlajtokaj okipanouijkej aueyatl uan omoteuitoj. Yejuan okinmajsitoj madianitas uan okintlanilijkej (Juec. 8:4-12).

15. ¿Tleka moneki tlaxikoskej tlayekankej?

¹⁵ Tlayekankej moneki kinmaluiskej tokniuan uan noijki infamilia ikinon ualeua xamo mosotlauaskej noso amo kuali momachiliskej. ¿Ken uelis kichiuaskej tlayekankej ijkon ken Gedeón ijkuak ijkon momachiliaj?

16, 17. (1) ¿Tlen okipaleui Gedeón matlaxiko? (2) ¿Tlen uelis kineltokaskej tlayekankej? (Isaías 40:28-31; noijki xikita foto).

¹⁶ Xikneltokakan Jehová namechpaleuis. Jehová amo okika iselti Gedeón porque ye okineltokaya nochipa kipaleuis (Juec. 6:14, 34). Se tonal Gedeón uan isoldados okintokakej ome tekiuajkej madianitas tlen oyayaj inpan incamellos (Juec. 8:12, 21). Pero Jehová okinpaleui israelitas para makinmajsitij uan makintlanilikan. Axkan tlayekankej noijki uelis kineltokaskej Jehová nochipa kinpaleuis porque ye amo keman mosotlaua (xiktlajtolti Isaías 40:28-31).

¹⁷ Matikitakan tlen okipanok se tokni tlen itoka Matthew. Ye poui inmiuan tokniuan tlen motlapouiaj inmiuan akinmej tlapajtiaj. ¿Tlen kipaleuia matlaxiko? Ye okijto: “Yonikitak melauak tlen kijtoua Filipenses 4:13. Ijkuak nimosotlaua uan nikmachilia ayakmo ueli itlaj nikchiua, nimotlapouia iuan Jehová uan niktlatlaujtia manechpaleui para uelis nikinpaleuis tokniuan. Ijkuak ijkon nikchiua, nikita Jehová nechpaleuia ika iespíritu santo para manitlaxiko”. Tlayekankej kintlasojtlaj tokniuan uan kinmaluiaj maski oui ijkon kichiuaskej. Pero moneki yetoskej yolyamankej uan moneki kajsikamatiskej amo nochipa uelis kichiuaskej tlen kinekij. Tlayekankej kineltokaj Jehová kinkaki ijkuak kitlatlaujtiaj uan kinpaleuis matlaxikokan (Sal. 116:1; Filip. 2:13).

18. ¿Ken uelis tlayekankej kichiuaskej ijkon ken okichi Gedeón?

¹⁸ Yotimomachtijkej tlayekankej uelis kichiuaskej ijkon ken okichi Gedeón. Yejuan moneki yetoskej yolyamankej ijkuak kiseliaj tekitl kanin timonechikouaj, ijkuak kinmiluiaj kuali tlen kichiuaj noso ijkuak kinteneuaj. Noijki moneki tetlakamatiskej uan yetoskej yolchikauakej axkan itech itlamian tonalmej. Moneki kineltokaskej Jehová kinpaleuis matlaxikokan maski san tlen panos. Ikinon matikinpatioitakan uan matikintlasojkamatilikan tokniuan tlayekankej porque mochijchikauaj kuali techmaluiskej (Filip. 2:29).