Onineski 22 de diciembre 1929 ompa Noville itech se altepetsintli tlen san okipiaya chiknaui granjas. Amo uejka omokauaya Bastoña tlen kajki Bélgica ik ompa kanin miakej okixmatiayaj ken Ardenas. Niyolpaki ijkuak nikilnamiki onikatka nichokotsin uan onimoskalti inuan nopapanuan. Nokni Raymond tlen okachi tsikitsin uan ne mojmostla otikintlapatskiayaj vacas. Noijki otitlapaleuiayaj ijkuak opixkayaj. Itech altepetl kanin otichantiayaj tinochtin otimopaleuiayaj ijkuak omonekiaya.

Nopapanuan intoka Emile uan Alice. Yejuan okatkaj católicos uan chichikometika oyayaj misa. Pero 1939 omopatlak seki tlamantli porque oajsikoj sekimej precursores tlen oualayaj Inglaterra. Yejuan okiluijkej nopapa kox kipaktiskia kiselis revista Consolación tlen axkan tikixmatij ¡Ma titlachixtokan! Nopapa san niman okitak otlamachtiayaj tlen melauak uan opejki momachtia Biblia. Akinmej ik ompa ochantiayaj touan omouikayaj, pero opejki techkokoliaj ijkuak okitakej nopapa ayakmo oyaya misa. Okinekiayaj oksepa mamonechikoti teopan ikinon miak uelta omokualanijkej.

Onechyolkokouaya ijkuak onikitaya ijkon okitoktiayaj nopapa. Ikinon oniktlatlaujti toTajtsin Dios manechpaleui ijkon ken onikijto ijkuak opejki namechtlapouia tlen onikchi. Onimoyolseui porque satepan ayakmo ijkon okichijkej. Non onechpaleui manikneltoka Jehová techkaki ijkuak tiktlatlaujtiaj.

10 de mayo 1940, soldados alemanes okimoaxkatijkej altepetl Bélgica ikinon ocholojkej akinmej ompa ochantiayaj. Ne uan nofamilia otiajkej ik  sur ompa Francia. Ijkuak otiayaj, otipanokej ik kanin soldados alemanes omoteuiayaj inuan soldados franceses.

Ijkuak otimokopkej tokalijtik ayakmo miak tlamantli otikajsikej. San otikajsitoj totskui tlen itoka Bobbie. Ijkuak onikitaya tlen opanouaya onimotlajtlaniaya tleka onka guerras uan tleka panoua tlen amo kuali.

Tokni Emile Schrantz a miak uelta otechtlajpaloto uan otechyolchikauaya. Ye okatka precursor uan tlayekanki. Otechyekilui ika iTlajtol toTajtsin Dios tleka titlajyouiaj. Noijki onechnankili seki tlamantli tlen oniktlajtlani. Non onechpaleui okachi manimouika iuan Jehová uan manikneltoka ye tetlasojtla.

Ijkuakon opejki okachi timouikaj inuan tokniuan maski opanotoka guerra. Agosto 1943 tokni José-Nicolas Minet otechtlajpaloto kanin otichantiayaj uan okipanolti se tlamachtil. Ijkuak otlanki okitemakak tlamachtil otechtlajtlani: “¿Akin kineki moapolaktis?”. Ne uan nopapa otikajkokuikej toma uan otimoapolaktijkej itech se aueyatl tlen amo uejka omokauaya.

Diciembre 1944 soldados alemanes saiktlami okimomakakej ompa Europa occidental tlen miakej kixmatij ken batalla de las Ardenas. Tejuan amo uejka otichantiayaj ik kanin omomakakej, ikinon se metstli otimokajkej itlampa se kali. Se tonal, ijkuak onikiski onikintlamakato noyolkauan, ouetskej bombas ipan granja uan oxixinki ikuapak kali kanin otiktlatiayaj tlen otiktokayaj. Ik kanin omokauayaj yolkamej okatka se soldado americano uan onechnauati manimotlamotla ipan tlali. Onimotlalo inauak, onimotlamotlak ipan tlali uan ye onechtlalili icasco para amitlaj manechpano.

Satepan ijkuak otlanki guerra, otimonechikouayaj ik ompa Lieja. Non altepetl omokauaya kanaj 90 kilómetros ik norte kanin otichantiayaj. Satepan otitlapaleuijkej mamochiua se grupo ompa Bastoña. Opejki nitekipanoua kanin otlatlaxtlauayaj uan onimomachtiaya para niyetos abogado. Satepan onitekipano inuan tekiuajkej itech noaltepe. 1951 otikchijkej se ueyi nechikol  de circuito ompa Bastoña uan otimonechikojkej kanaj 100. Ompa noijki omonechiko se tokni itoka Elly Reuter. Ye okatka se precursora uan oyajki kanaj 50 kilómetros ipan bicicleta para ompa ajsiti. San niman otimotlasojtlakej uan otikijtojkej timonamiktiskej. Ijkuakon Elly okiluijkej mauia mamomachtiti Galaad ompa Estados Unidos. Pero ye okintlajkuilili tokniuan uan okinmilui tleka amo uelis yaskia momachtiti. Ijkuakon tokni Nathan Knorr tlen okiyekanaya tekitl tlen kichiuaj iTlaixpantijkauan Jehová, okinankili xamo satepan uelis yaskia Galaad iuan inamik. Otimonamiktijkej febrero 1953.

Non xiuitl, Elly uan ne otiajkej ueyi nechikol tlen omotokayoti “Sociedad del Nuevo Mundo”. Non omochi ompa Estadio de los Yankees ompa Nueva York. Ompa onikixmatki se tokni tlen onechilui iuan manitekipano uan maniuia Estados Unidos. Otiktlatlaujtijkej Jehová uan satepan otikiluijkej tokni amo uelis tiaskiaj. Ijkon otikiluijkej porque timokopaskiaj Bélgica uan tikinpaleuiskiaj majtlaktli tlen yotetlapouiayaj ompa Bastoña. Opanok se xiuitl uan otikpixkej se tokonetsin tlen otiktokayotijkej Serge. Pero omokoko uan oixpoliuik ijkuak okipiaya chikome metstli. Otikiluijkej Jehová ken otimoyolkokouayaj uan ye otechyolchika porque kijtoua oksepa kinyolitis akinmej yoixpolikej.

Octubre 1961 onikajsik se tekitl kanin nitekipanoskia san kanaj keski tonal uan ijkon uelis nitlapaleuiskia ken precursor. Pero non tonal onechnotski se tokni tlen okiyekanaya tekitl ompa Betel tlen kajki Bélgica. Onechtlajtlani kox uelis nitlapaleuiskia ken siervo de circuito tlen axkan moixmati ken tlayekanki itech circuito. Ne onikilui kox uelis achto titlapaleuiskej ken precursores uan satepan titlapaleuiskej itech circuito. Onechiluijkej uelis ijkon titlapaleuiskiaj. Otitlapaleuijkej chikueyi metstli ken precursores uan septiembre 1962 opejki nitlapaleuia ken tlayekanki itech circuito.

Opanok ome xiuitl uan otechyolejkej matitlapaleuitij Betel tlen kajki Bruselas. Octubre 1964 opejki ompa titlapaleuiaj. Ompa otikitakej Jehová otechteochijtoka. 1965 tokni Knorr otechtlajpaloto Betel uan satepan onechiluijkej manikyekana tekitl tlen ompa mochiua. Satepan Elly uan ne otechiluijkej matimomachtitij clase 41 ompa Galaad. Yopanoka 13 xiuitl ijkuak tokni Knorr okiluijka Elly mamomachtiti Galaad. Satepan ijkuak otlanki otimomachtijkej otimokopkej Betel ompa Bélgica.

Ne onimomachti niyetos abogado ikinon miak xiuitl onikinpaleui tokniuan kanin amo okinkauiliayaj matetlapouikan. Ijkon okinpanouaya tokniuan tlen okatkaj Europa uan okseki altepemej (Filip. 1:7). Ikinon onimotlapoui inuan miakej tekiuajkej kanaj itech 55 altepemej kanin amo otechkauiliayaj matitetlapouikan. Ijkuak onimotlapouiaya inuan tekiuajkej amo onikinmiluiaya yimiak  xiuitl onikatka abogado uan san onikinmiluiaya “oniktekichiuiliaya toTajtsin Dios”. Nochipa oniktlatlaujtiaya Jehová manechpaleui. Ne onikmatiaya “iyolo se tekiua yetoskia ken atl tlen kajki imak Jehová, ye kiyekana kanin ye kineki” (Prov. 21:1).

Nikilnamiki ijkuak onimotlapoui iuan se tlakatl tlen poui inuan akinmej kintlaliaj tlanauatilmej ompa Europa. Oniktlajtlanki miak uelta manechkauilikan iuan nimotlapouis. Ijkuak onechseli onechilui san makuili minutos nechkakiskia. Onimokuatolo uan opejki nimotlatlaujtia. Ye onechtlajtlani tlen onikchijtoka uan ne onikilui oniktlasojkamatili toTajtsin Dios porque ye kuali tlapaleuia. Ye onechtlajtlani tleka ijkon onikijto ikinon onikititi tlen kijtoua Romanos 13:4. Okipakti tlen oniktlajtoltili porque ye noijki okipaktiaya tlen kijtoua Biblia. Kanaj tlajko hora kuali otimotlapouijkej. Okijto kipatioita titetlapouiaj.

TiiTlaixpantijkauan Jehová yimiak xiuitl timopaleuiaj inmixpan tekiuajkej ompa Europa porque amo timokajkalakiaj itech política. Noijki ompa mopaleuiaj tetajmej porque kitaj akin kinmokauis konemej uan noijki ijkuak tlatlaxtlauaj. Yimiak uelta onitlapaleui ken abogado uan yonikitak ken yotechpaleui Jehová. Hasta axkan tiiTlaixpantijkauan Jehová yotitlatlankej 140 veces ixpan Tribunal Europeo de Derechos Humanos.

Satepan onitekipano iuan tokni Philip Brumley tlen tlapaleuia Betel uan tokni Valter Farneti tlen ualeua Italia. San sekan otitekipanojkej para makinkauilikan tokniuan matetlapouikan ompa Cuba. Onikinmijkuilili se carta akinmej tlapaleuiaj Cuba tlen okatkaj Bélgica. Satepan onimotlapoui iuan se tekiua tlen nikiluiskia matechkauilikan matitetlapouikan. Otiknekiayaj tikyekiluiskej tleka amo otechkauiliayaj matitetlapouikan. Miak uelta iuan otimotlapouijkej pero amo san niman otechkauilijkej matitetlapouikan.

Otiktlatlaujtijkej Jehová uan otechkauilijkej matikintitlanikan 5,000 biblias ompa Cuba. Otikitakej Jehová okiteochi tlen otikchijkej porque tokniuan okiselijkej inbiblia. Ikinon oksepa otikinmiluijkej matechkauilikan matikintitlanikan 27,500 (veintisiete mil quinientos) biblias. Sapanoua oniyolpakik porque onikinpaleui tokniuan makipiakan inbiblia.

Yimiak uelta onia ompa Cuba para nikinpaleuis tokniuan ixpan tekiuajkej, ikinon kuali nimouika inuan sekimej tekiuajkej.

1994 ompa Ruanda sapanoua miakej okinmiktijkej. Okinmiktijkej kanaj se millón tlen kinmixmatij ken tutsis. Noijki okinmiktijkej sekimej tokniuan. TiiTlaixpantijkauan Jehová san niman otimoyektlalijkej uan otiajkej otikinpaleuitoj.

Ijkuak otiajsitoj altepetl Kigali, otikitakej otlatojtoponijkej kanin okatka kali kanin tlajtolkopaj uan kanin otikintlatiayaj amochmej. Otechiluijkej miakej tokniuan okintsojtsontekej uan okinmiktijkej pero miakej tokniuan omopaleuijkej maski amo omoixmatiayaj. Se tokni tlen okixmatiayaj ken tutsi otechtlapoui ken okipaleuijkej sekimej tokniuan tlen okinmixmatiayaj ken hutus. Yejuan okitlatijkej itech se koyoktli kanaj se metstli. Ompa Kigali noijki otimonechikojkej uan otikinyolchikajkej kanaj 900 tokniuan.

Satepan otiajkej ik kanin monamikij altepemej uan otiajsitoj Zaire tlen axkan moixmati ken República Democrática del Congo. Ompa otikintemotoj tokniuan tlen okiskej Ruanda uan oyajkej omopaleuitoj altepetl Goma. Amo otikinmajsiayaj tokniuan ikinon otiktlatlaujtijkej Jehová matechpaleui matikinmajsikan. San niman otiknamikej se tlakatl uan otiktlajtlanijkej kox okixmatiaya se iTlaixpantijka Jehová. Ye otechilui okatka iTlaixpantijka Jehová uan techuikaskia kanin okatkaj tokniuan. Otimotlapouijkej inuan tokniuan tlen ompa otlapaleuijtokaj. Satepan otimonechikojkej inuan tokniuan. Okatkaj kanaj 1,600 tlen ompa omopaleuitoj uan otikinyolchikajkej. Noijki otikintlajtoltilijkej se carta tlen okititlankej tokniuan tlen pouij itech Cuerpo Gobernante. Okinyolchika tlen okikakej porque non carta okijtouaya: “Nochipa namopatka timotlatlaujtiaj. Tikmatij Jehová amo keman namechkauas”. Melauak otikitakej Jehová amo keman otechka toselti. Axkan katej kanaj 30,000 (treinta mil) tokniuan ompa Ruanda uan pakij kitekichiuiliaj Jehová.

2011 oixpoliuik nosiua uan yotikpiayaj kanaj 58 xiuitl otimonamiktijkej. Nochipa niktlatlaujtia Jehová uan nikiluia nochi tlen nikmachilia uan ye nechyolchikaua. Noijki nechyolchikaua ijkuak nikintlapouia oksekimej kuali tlajtoli tlen kijtoua tlen kichiuas iTekiuajkayo toTajtsin Dios.

Axkan yinikpia kanaj 90 xiuitl pero ok nimochijchikaua nitetlapouis chichikometika. Niyolpaki porque nikinpaleuia tokniuan tlen techpaleuiaj ixpan tekiuajkej ompa Betel tlen kajki Bélgica. Noijki niyolpaki porque nikinmiluia oksekimej tlen yonechpanok uan nikinpaleuia telpochmej tlen tlapaleuiaj Betel kuali mamouikakan iuan Jehová.

Yopanok kanaj 84 xiuitl ijkuak opejki niktlatlaujtia Jehová. Ijkuakon opejki nimouika iuan Jehová uan axkan nikmachilia okachi inauak nika. Niktlasojkamatilia Jehová porque nochipa kikaki ijkuak niktlatlaujtia (Sal. 66:19). b