1. ¿Tlen okijto David itech Salmo 18:46?

 IPAN nin tlaltikpak mopatlati miak tlamantli ikinon uelis mopatlas tonemilis. Pero timoyolseuiaj porque Jehová uelis techpaleuis. Yichikome otimomachtijkej Jehová yoltok uan ye nochipa techpaleuis. Ijkuak Jehová techpaleuia, okachi tikneltokaj ye yoltok ijkon ken okijto tekiua David (xiktlajtolti Salmo 18:46). David noijki okijto Jehová ‘yetoskia ken itepejxi’. ¿Tleka ijkon okijto tla tikmatij se tepejxitl amo yoltok?

2. ¿Tlen timomachtiskej?

² Axkan timomachtiskej tleka Jehová yetoskia ken se tepejxitl tlen techpaleuia uan tlen techmachtia. Noijki tikitaskej tlen uelis tikchiuaskej para tikitaskej Jehová ken yetoskia se tepejxitl kanin uelis timopaleuiskej. Saiktlami tikitaskej ken uelis tikpiaskej toyelis ijkon ken Jehová kipia iyelis.

¿TLEKA TIKIJTOUAJ JEHOVÁ YETOSKIA KEN SE TEPEJXITL KANIN UELIS TIMOPALEUISKEJ?

3. ¿Tlen textos kiteititiaj Jehová yetoskia ken se tepejxitl kanin uelis timopaleuiskej? (Xikita foto).

³ Biblia techpaleuia matikajsikamatikan ken iyelis Jehová ijkuak kijtoua yetoskia ken se tepejxitl kanin uelis timopaleuiskej. Miakej textos kiteititiaj sekimej itekipanojkauan Jehová okijtouayaj ye kajki ken se tepejxitl kanin uelis timopaleuiskej. Achto texto kanin kijtoua Jehová yetoskia ken se tepejxitl tlen techmaluia moajsi itech Deuteronomio 32:4. Noijki ijkuak Ana omotlatlaujti okijto san Jehová techpaleuia ken yetoskia  se tepejxitl (1 Sam. 2:2). Habacuc okijto Jehová yetoskia ken se tepejxitl (Hab. 1:12). Akin okijkuilo Salmo 73 noijki okijto Jehová kajki ken yetoskia se tepejxitl tlen kimaluia toyolo (Sal. 73:26). Noijki ineuian Jehová okijto ye kajki ken yetoskia se tepejxitl (Is. 44:8). Matikitakan eyi tlamantli tlen kiteititia Jehová yetoskia ken se tepejxitl kanin uelis timopaleuiskej. Noijki tikitaskej tlen tikchiuaskej para matikitakan Jehová ken yetoskia se tepejxitl kanin uelis timopaleuiskej (Deut. 32:31).

4. ¿Tleka tikijtouaj uelis timopaleuiskej inauak Jehová? (Salmo 94:22).

⁴ Jehová techpaleuia. Matikitakan tleka ijkon tikijtouaj. Ijkuak peua ejekakiaui uelis timokiajpaleuiskej itlampa se tepejxitl. Tejuan noijki uelis timopaleuiskej inauak Jehová ijkuak titlajyouiskej (xiktlajtolti Salmo 94:22). Jehová techmaluia uan amo kitekauilis itlaj matechpano. Noijki yokijto kipojpolos nochi tlen techtlajyouiltia (Ezeq. 34:​25, 26).

5. ¿Tlen tikchiuaskej para timopaleuiskej inauak Jehová?

⁵ Moneki tiktlatlaujtiskej Jehová tla tiknekij inauak timopaleuiskej. Ijkon “iyolseuilis toTajtsin Dios” kimaluis toyolo uan totlayejyekol (Filip. 4:​6, 7). Matikitakan tlen okipanok se tokni tlen itoka Artiom. Ye okitsakej porque tlaneltoka. Okitlajyouiltiayaj ijkuak okitlajtlaniayaj seki tlamantli uan okipinauiayaj. Ye okijto: “Onimomojtiaya ijkuak itlaj onechtlajtlaniayaj. Pero oniktlatlaujtiaya Jehová manechyolseui uan manechpaleui maniyeto niixtlamatki. Amo onikka Jehová maski onechtlajyouiltiaya akin onechtlajtlaniaya seki tlamantli. Ne onikitak Jehová nochipa onechpaleuiaya ken yetoskia se tepamitl”

6. ¿Tleka tikneltokaj Jehová amo keman techkauas? (Isaías 26:​3, 4).

⁶ Jehová amo keman techkauas. Se tepejxitl noso se tepetl amo ueli molinia. Ikinon tikijtouaj nochipa ompa yetos ijkuak monekis techpaleuis. Jehová amo keman techkauas toselti porque ye nochipa kajki (xiktlajtolti Isaías 26:​3, 4). Ye kichiuas tlen yokijto porque yoltok, techkaki ijkuak tiktlatlaujtiaj uan techpaleuis ijkuak monekis. Tikneltokaj Jehová techpaleuis porque ye amo keman kinkaua akinmej kitekichiuiliaj (2 Sam. 22:26). Amo keman kilkauas tlen tikchiuaj uan techteochiuas (Heb. 6:10; 11:6).

7. ¿Ken techpaleuia tikneltokaj Jehová? (Noijki xikita foto).

⁷ Nochipa matikneltokakan Jehová uan ijkon tikteititiskej tikitaj ken yetoskia se tepejxitl kanin uelis timopaleuiskej. Noijki ualeua tikitaj oui tiktlakamatiskej pero techpaleuis tla ijkon tikchiuaskej (Is. 48:​17, 18). Okachi tikneltokaj Jehová ijkuak tikitaj ken techpaleuia matitlaxikokan porque san toselti amo titlaxikoskej. Ualeua tikitaj san Jehová techpaleuia uan amo keman techkaua. Matikitakan tleka ijkon tikijtouaj. Se tokni itoka Vladímir okijto: “Okachi onimouikak iuan Jehová ijkuak onechtsakej. Okachi onikneltokak  Jehová porque onikatka san noselti uan amitlaj uelis nikchiuaskia”.

8. (1) ¿Tleka tikijtouaj Jehová amo kipapatla tlen kijtoua kichiuas? (2) ¿Ken techpaleuia tikitaskej Jehová ken yetoskia se tepejxitl kanin uelis timopaleuiskej? (Salmo 62:​6, 7).

⁸ Jehová amo kipapatla tlen kijtoua. Jehová yetoskia ken se tepejxitl tlen amo molinia. Ijkon moijtoua porque amo keman kipatla iyelis nion tlen yokijto kichiuas (Mal. 3:6). Jehová amo okipatlak tlen kineki kichiuas nikan tlaltikpak ijkuak Adán uan Eva okixnamikej. Apóstol Pablo okijto Jehová “amo uelis motlajtolnamikis” (2 Tim. 2:13). Nin kijtosneki amo keman kipatlas iyelis. Noijki amo keman kipatlas tlen yokijto kichiuas nion tlen kijtouaj itlanauatiluan maski oksekimej kichiuaskej okseki tlamantli. Techyolchikaua tikmatiskej Jehová nochipa techpaleuis ijkuak titlajyouiskej uan kichiuas tlen yokijto (xiktlajtolti Salmo 62:​6, 7).

9. ¿Tlen techmachtia tlen okipanok Tatiana?

⁹ Techpaleuis matikitakan Jehová ken yetoskia se tepejxitl kanin uelis timopaleuiskej tla nochipa tikilnamiktokej ken iyelis, tlen kineki kichiuas ipan tlaltikpak uan tlen kineki matikchiuakan. Non techpaleuis matimoyolseuikan uan kuali matimomachilikan maski san tlen tlamantli tikixnamikiskej (Sal. 16:8). Matikitakan tlen okipanok se tokni tlen itoka Tatiana. Ye okiluijkej mamokaua ikalijtik porque momachtia Biblia. Ye okijto: “Onechnauatijkej manimokaua noselti ompa nokalijtik. Opejki nimoyolkokoua porque onikaltsaktoka”. Pero satepan okijto: “Onikilnamik ijkon onechpanotoka porque niktlasojtla Jehová uan nikneki nikyolpaktis. Non onechpaleui amo san manimotekipacho”. Otlaxiko porque okajsikamatki ijkon okipanotoka porque kineltoka Jehová uan tlen kichiuas nikan tlaltikpak.

10. ¿Tlen tikchiuaskej para tikitaskej Jehová ken se tepejxitl kanin uelis timopaleuiskej?

¹⁰ Ayakmo miak poliui uan okachi titlajyouiskej. Ikinon axkan moneki tikneltokaskej Jehová nochipa techpaleuis matitlaxikokan uan matiktlakamatikan. ¿Tlen techpaleuis matitlaxikokan? Matiktlajtoltikan tlen okinpanok akinmej okitekichiuilijkej Jehová uan tlen yokinpanok tokniuan. Matimokuayejyekokan tlen okichijkej uan ken yokinpaleui Jehová porque yejuan okitakej yetoskia ken se tepejxitl kanin uelis mopaleuiskiaj. Non techpaleuis matikitakan Jehová ken se tepejxitl kanin uelis timopaleuiskej.

MATIKPIAKAN TOYELIS IJKON KEN JEHOVÁ KIPIA IYELIS

11. ¿Tleka moneki tikpiaskej toyelis ijkon ken Jehová kipia iyelis? (Noijki xikita recuadro “ Seki tlamantli tlen uelis kichiuaskej telpochmej”).

¹¹ Axkan yotikitakej iyelis Jehová techpaleuia matikitakan ken yetoskia se tepejxitl kanin uelis timopaleuiskej. Axkan tikitaskej ken noijki uelis ijkon tikchiuaskej. Okachi tikinpaleuiskej tokniuan tlen inuan timonechikouaj tla tikchiuaj ijkon ken Jehová kichiua. Matikitakan  tleka ijkon tikijtouaj. Se tonal, Jesús okitokayoti Simón Cefas tlen ika griego kijtosneki Pedro. Non kijtosneki se pedazo tepejxitl (Juan 1:42). Ijkon Jesús okiteititi Pedro kinyolseuiskia tokniuan uan kinpaleuiskia kuali mamomachilikan. Biblia kijtoua tlayekankej yetoskiaj ken“iekauil se tepejxitl kanin tlauaki”. Ijkon kijtoua porque yejuan kinmaluiaj tokniuan (Is. 32:2). Tinochtin uelis tikpiaskej toyelis ijkon ken Jehová kipia iyelis uan tiyetoskiaj ken se tepejxitl tlen tlapaleuia kuali mayetokan tokniuan (Efes. 5:1).

12. ¿Tlen uelis tikchiuaskej para tikinpaleuiskej tokniuan?

¹² Matikinpaleuikan tokniuan. Tinochtin uelis tikinpaleuiskej tokniuan kuali mamomachilikan uan kuali mamouikakan iuan Jehová. Porque tokniuan tlajyouiaj ijkuak tlaxixini ik kanin chantij. Noijki tokniuan tlajyouiaj porque onka guerra kanin chantij ikinon ualeua monekis tikinkalotiskej. Moneki okachi timopaleuiskej porque tikatej “itlamian tonalmej” (2 Tim. 3:1). Ikinon moneki kuali tikinseliskej tokniuan ijkuak timonechikouaj uan ijkon pakiskej uan kitaskej tikintlasojtlaj. Ijkon moneki tikchiuaskej porque axkan miakej ayakmo tetlasojtlaj uan tetlajyouiltiaj. Ikinon tiknekij kuali mamomachilikan tokniuan ijkuak monechikouaj uan makitakan tikintlasojtlaj.

13. ¿Ken uelis tlapaleuiskej tlayekankej? (Noijki xikita foto).

¹³ Tlayekankej uelis techpaleuiskej ijkuak titlajyouiaj. Noijki techpaleuiskej kuali matimouikakan iuan Jehová. Yejuan san niman kitaj ken tlapaleuiskej ijkuak kanaj tlaxixini noso ijkuak ikaj mokokoua. Tla tlayekankej tetlasojtlaj, teajsikamatij uan kimatij tlakakiskej, tokniuan okachi kinmiluiskej makinpaleuikan ijkuak itlaj kixnamikiskej. Noijki tokniuan amo kitaskej oui kintlakamatiskej  ijkuak kinmiluiskej makichiuakan tlen kijtoua Biblia porque yejuan kiteititiaj kintlasojtlaj (1 Tes. 2:​7, 8, 11).

14. ¿Ken uelis tikteititiskej uelis techneltokiliskej oksekimej?

¹⁴ Matikteititikan uelis techneltokiliskej oksekimej tlen tikijtouaj. Ijkuak oksekimej tlajyouiaj tiknekij makineltokakan uelis tikinpaleuiskej (Prov. 17:17). Oksekimej techneltokiliskej tla tikpiaj toyelis ijkon ken Jehová kipia iyelis. Matikitakan ken uelis tikchiuaskej. Matikchiuakan tlen otikijtojkej tikchiuaskej uan amo matiuejkauakan (Mat. 5:37). Matikinmiluikan tokniuan uelis tikinpaleuiskej ijkuak monekis. Noijki tla technauatiaj itlaj matikchiuakan, matimochijchikauakan tikchiuaskej ijkon ken otechnauatijkej.

15. ¿Ken timomachiliaj ijkuak tlayekankej kiteititiaj uelis tikinneltokiliskej tlen kijtouaj?

¹⁵ Ijkuak tlayekankej techpaleuiaj, tikitaj melauak techtlasojtlaj. Tejuan kuali timomachiliaj tla kiteititiaj uelis tikinneltokiliskej tlen kijtouaj. Matikitakan tleka ijkon tikijtouaj. Porque tla se tokni itlaj kipanoua,  amo momojtis kinotsas akin kiyekana igrupo. Noijki tokniuan okachi kinneltokiliaj, ijkuak tlayekankej kintlapouiaj ika tlen kijtoua Biblia uan amatlajkuilolmej. Noijki kinneltokiliskej tlayekankej tla amo kijtojtinemij tlen okinmiluijkej uan kichiuaj tlen okijtojkej.

16. ¿Ken techpaleuia ijkuak amo tikpapatlaj tlen tikijtouaj uan ken tikinpaleuiaj oksekimej?

¹⁶ Amo matikpapatlakan tlen tikijtouaj tikchiuaskej. Tla tiktlakamatij Jehová uan timoyekanaj ika principios bíblicos, oksekimej kitaskej amo tikpapatlaj tlen tikijtouaj tikchiuaskej. Okachi titlaneltokaskej tla timomachtiaj Biblia para tikpiaskej chikauak totlaneltokilis. Ijkon amo tikpapatlaskej tlen tikijtouaj uan tlen tikneltokaj. Noijki amo tikinkauiliskej oksekimej matechkajkayauakan ika tlen tlamachtiaj porque tlamo yetoskia ken techuiuika ejekatl (Efes. 4:14; Sant. 1:​6-8). Tla tikneltokaj Jehová uan tlen yokijto kichiuas, techpaleuis ijkuak itlaj tikixnamikiskej (Sal. 112:​7, 8). Noijki uelis tikinpaleuiskej akinmej tlajyouiaj (1 Tes. 3:​2, 3).

17. ¿Tlen kinpaleuis tlayekankej makichiuakan kuali inteki?

¹⁷ Tlayekankej moneki kichiuaskej nochi ken moneki, kuali mamokuayejyekokan uan mateajsikamatikan. Tokniuan kuali yetoskej uan moyolchikauaskej, tla tlayekankej kichiuaj tlen kijtoua Biblia (Tito 1:9; 1 Tim. 3:​1-3). Ijkuak tlayekankej kichiuaj kuali inteki uan kinmaluiaj tokniuan, kinpaleuia nochipa mamonechikokan, matetlapouikan uan mamomachtikan Biblia. Tlayekankej kinyolchikauaj tokniuan makilnamiktokan Jehová uan nochi tlen kichiuas ijkuak itlaj kixnamikij noso ijkuak itlaj kintekipachoua.

18. ¿Tleka tiknekij tikueyichiuaskej Jehová uan okachi iuan timouikaskej? (Noijki xikita recuadro “ Seki tlamantli tlen techpaleuis matimouikakan iuan Jehová”).

¹⁸ Axkan yotimomachtijkej ken iyelis Jehová. Timomachiliaj ijkon ken David ijkuak okijto okinekiaya kiueyichiuas Jehová porque okitaya ken se tepejxitl kanin uelis mopaleuiskia (Sal. 144:1). Nochipa uelis tikneltokaskej tlen kijtoua Jehová. Ye nochipa touan yetos maski tikpiaskej miak xiuitl. Ikinon uelis tikijtoskej: “Ye yetoskia ken notepejxi” (Sal. 92:​14, 15).