1, 2. ¿Tlen timomachtiskej itech naui tekiuajkej tlen otlanauatijkej itech Judá?

TLA tikitaskiaj ikaj nejnenti kanin tlasiauak uan uetsi, ¿amo timomaluiskej ijkuak ik ompa tipanoskej? Timomachtiskej itech akinmej amo kuali itlaj okichijkej techpaleuis para tejuan noijki amo ijkon tikchiuaskej. Se neskayotl, uelis timomachtiskej itech sekimej tlen amo kuali okichijkej tlen moijtoa itech Biblia.

² Naui tekiuajkej tlen intech otimomachtijkej yichikome okitekichiuilijkej Jehová ika nochi inyolo. Pero noijki okichijkej tlen amo kuali. Tlen okichijkej omoijkuilo itech Biblia para itech ma timokuayejyekokan uan ma techmachti tlen miak ipati. ¿Tlen techmachtia? Uan ¿tlen tikchiuaskej para amo tikchiuaskej ken yejuan? (xiktlajtolti Romanos 15:4).

3, 4. Maski Asá okitekichiuili Jehová ika nochi iyolo, ¿tlen amo kuali okichi?

³ Ma tikitakan ineskayo Asá. Ye otlaneltokak itech Jehová ijkuak se millón soldados etíopes okiteuitoj Judá. Pero  amo otlaneltokak itech Jehová ijkuak omoteui iuan Baasá tlen okatka tekiua itech Israel. Asá amo okinekiaya Baasá ma kiyankuili Ramá, se altepetl tlen miak ipati itech Israel tlen amo uejka okatka itech Judá (2 Crónicas 16:1-3). Asá omokuayejyeko uelis itlaj kimakaskia ueyi tekiua tlen okatka itech Siria para ma kipaleui. Ijkuak sirios okinteuitoj altepemej tlen okatkaj itech Israel, Baasá san niman okika nin tekitl itech Ramá (2 Crónicas 16:5). Uelis Asá omokuayejyeko kuali tlen okichi.

⁴ ¿Ken omomachili Jehová ijkuak Asá amo itech otlaneltokak? Amo okipakti. Ik non, okititlanki teotlajtojki Hananí para ma kinojnotsa Asá (xiktlajtolti 2 Crónicas 16:7, 9). * Hananí okilui Asá: “Axkan nochipa mouan moteuiskej”. Asá okimoaxkati Ramá, pero ijkuak ye otlanauatijtoka nochipa omoteuijkej iuan okseki altepemej.

5. ¿Tleka Asá otlaneltokak itech oksekimej ijkuak omoteui iuan Baasá?

⁵ Yichikome otimomachtijkej Asá okiyolpakti Jehová. Totajtsin Dios okitak Asá okitekichiuili ika nochi iyolo, maski okatka tlajtlakole (1 Reyes 15:14). Pero Asá otlajyoui ika tlen okipejpenki kichiuas. ¿Tleka san ye itech otlaneltokak uan itech oksekimej uan amo itech Jehová? Uelis omokuayejyeko tlatlaniskia tla kitemoskia ken uelis moteuiskiaj. Noso uelis okichi tlen oksekimej okiluijkej.

6. ¿Tlen techmachtia ineskayo Asá? Xikijto se neskayotl.

⁶ ¿Tlen techmachtia tlen amo kuali okichi Asá? Moneki nochipa titlaneltokaskej itech Jehová uan amo totech ma titlaneltokakan. Moneki tikiluiskej ma techpaleui maski tikpiaskej se ueyi ouijkayotl noso amo. Miak ipati ma timotlajtlanikan tlen tikchiuaj ijkuak tikpiaj se ouijkayotl. ¿Totech titlaneltokaj uan tikyektlaliaj ken tejuan tiknekij? ¿Noso achto timokuayejyekoaj tlen kijtoa Biblia uan ijkon uelis tikpejpenaskej tlen tikchiuaskej? Se neskayotl, ma tikijtokan tokalchanejkauan amo techkauiliaj ma timonechikokan noso tiaskej itech ueyi nechikol. ¿Tiktlatlaujtiskej Jehová ma techpaleui? Noso ma tikijtokan yiuejkika tiktemojtokej tekitl uan tikajsij. ¿Tikiluiskej akin techtlakeua sejse semana moneki tiaskej nechikolmej maski uelis amo techtlakeuas? Maski san tlen ouijkayotl tikpiaskej, ma tikilnamikikan tlen okijkuilo se salmista: “Xikmaka Jehová moojui; itech xitlaneltoka, uan ye mitspaleuis” (Salmo 37:5).

7, 8. ¿Tlen amo kuali okichi Jehosafat uan tlen opanok? (Xikita tlaixkopinal tlen ika peua tlamachtil).

⁷ Axkan ma tikitakan tlen okipanok Jehosafat ikone Asá. Ye okipiaya kualtsin iyelis uan Jehová okipaktiaya. Jehosafat okichi miak tlamantli kuali ijkuak otlaneltokak itech Jehová. Pero noijki okichi tlen amo kuali. Se neskayotl, okichi ikone ma monamikti iuan ichpoch ueyi tekiua Acab. Satepan Jehosafat okipaleui Acab para moteuiskej iuan sirios, maski teotlajtojki Micaya okilui amo ma kichiua. Ijkuak omoteuijtokaj, soldados sirios okiteuijkej Jehosafat uan okinekiayaj kimiktiskej (2 Crónicas 18:1-32). Ijkuak Jehosafat oajsito Jerusalén, teotlajtojki Jehú okitlajtlani: “¿Moneki tikinpaleuis akinmej amo yolkualmej uan moneki tikintlasojtlas akinmej kikokoliaj Jehová? (xiktlajtolti 2 Crónicas 19:2, 3). *

⁸ ¿Okipaleui Jehosafat tlen okipanok uan tlen okilui teotlajtojki Micaya? Amo. Maski okitlasojtlaya Jehová uan okinekiaya kiyolpaktis, Jehosafat opejki mouika iuan se tlakatl tlen amo kiueyichiua Jehová. Nin tlakatl itoka Ocozías, ikone Acab. Jehosafat uan Ocozías okinchijchijkej barcos. Pero ninmej barcos okinpojpolojkej uan amo keman okintekitiltijkej (2 Crónicas 20:35-37).

9. ¿Tlen techpanos tla timouikaj iuan akinmej amo kitekichiuiliaj Jehová?

 ⁹ ¿Tlen techmachtia tlen okipanok Jehosafat? Ye okichi tlen kuali uan okitemo Jehová ika nochi iyolo (2 Crónicas 22:9). Pero opejki mouika iuan akinmej amo kitlasojtlaj Jehová, ik non, okipixki ouijkayotl uan noijki yomikiskiaya. Ma tikilnamikikan tlen kijtoa Biblia: “Akin nemi iuan akin ixtlamatki ye noijki yetos ixtlamatki, uan akin mouika iuan akinmej amo yolkualmej mochiuas amo yolkuali” (Proverbios 13:20). Tiknekij tikinpaleuiskej oksekimej ma kixmatikan Jehová. Pero timoouijtiliskej tla peuas sapanoa timouikaskej iuan akinmej amo kitekichiuiliaj Jehová.

10. (1) ¿Ken uelis techpaleuis ineskayo Jehosafat tla tiknekij timonamiktiskej? (2) ¿Tlen moneki ma tikilnamikikan?

¹⁰ ¿Ken uelis techpaleuis ineskayo Jehosafat tla tiknekij timonamiktiskej? Uelis peuas ikaj tiktlasojtlaskej tlen amo kitekichiuilia Jehová. Uelis timokuayejyekoskej itech ialtepe Jehová amo onka akin iuan timonamiktiskej. Noso tokalchanejkauan techiluiskej ma timonamiktikan, tlamo toselti timokauaskej. Jehová otechchijchi para ma techtlasojtlakan uan ma titetlasojtlakan. Pero ¿tlen tikchiuaskej tla amo tikajsij akin iuan timonamiktiskej? Techpaleuis tla timokuayejyekoskej itech tlen okipanok Jehosafat. Ye amo nochipa okiluiaya Jehová ma kiyekana (2 Crónicas 18:4-6). Pero amo okikak ijkuak okiluijkej amo ma mouika iuan Acab tlen amo okitlasojtlaya Jehová. Jehosafat omonekiaya kilnamikis “ixtololouan Jehová tlachixtokej itech nochi Tlaltikpak para kinpaleuis akinmej ixpan kipiaj ajsitok inyolo” (2 Crónicas 16:9). Tejuan noijki ma tikilnamikikan Jehová kineki techpaleuis. Uan ye techtlasojtla uan kajsikamati tlen techpanoa. ¿Tikneltokaj ye techmakas akin iuan timonamiktiskej? Ma tikilnamiktokan ye techmakas ijkuak monekis.

11. ¿Ken okiteititi Ezequías tlen okipiaya itech iyolo?

¹¹ ¿Tlen techmachtia ineskayo Ezequías? Se tonal, Jehová okipaleui ma kajsikamati tlen melauak okipiaya itech iyolo (xiktlajtolti 2 Crónicas 32:31). * Ijkuak sapanoa omokoko, Jehová okilui pajtiskia uan okititi melauak kipaleuiskia. Jehová okichi ekauitl tlen omotaya ma temo majtlaktli escalones. Satepan príncipes tlen okatkaj Babilonia okinekiayaj kimatiskej okachi itech tlen okitak Ezequías (2 Reyes 20:8-13; 2 Crónicas 32:24). Jehová amo okilui Ezequías ken omonekiaya kinchiuilis ninmej tlakamej. Biblia kijtoa Jehová okinekiaya kitas tlen kichiuaskia. Ezequías okinmititi  nochi tlen okipiaya. Ijkon okiteititi tlen okipiaya itech iyolo.

12. ¿Tleka Jehová okitlapojpolui Ezequías?

¹² Pero Ezequías yomoueyinekiaya. Ik non, amo ok okitlasojkamatiliaya Jehová nochi tlen okimakaya. Biblia amo kijtoa tlen tlamantli okipatlak inemilis. Uelis ijkuak okintlanili asirios noso ijkuak Jehová okipajti. Noso porque okipiaya miak tomin uan miakej okixmatiayaj. Maski Ezequías okitekichiuili Jehová ika nochi iyolo, satepan omoueyineki. Uan nin amo okipakti Jehová. Pero satepan Ezequías omochi yolyamanki uan toTajtsin Dios okitlapojpolui (2 Crónicas 32:25-27; Salmo 138:6).

13, 14. (1) ¿Keman uelis tikteititiskej tlen tikpiaj itech toyolo? (2) ¿Tlen uelis tikchiuaskej ijkuak oksekimej kijtoskej sapanoa kuali tlen tikchiuaj?

¹³ ¿Tlen techmachtia Ezequías uan tlen amo kuali okichi? Ma tikilnamikikan ye omoueyineki satepan ijkuak Jehová okipaleui ma kintlanili asirios uan satepan ijkuak okipajti. Nin techmachtia moneki timomaluiskej ijkuak nochi kuali kisa tlen tikchiuaj noso ijkuak techiluiaj kuali tlen tikchiuaj. ¿Tleka? Porque tlen tikchiuaskej noso tlen tikijtoskej kiteititis tlen tikpiaj itech toyolo. Se neskayotl, se tokni uelis kuali omoyektlali para kitemakas se tlapoualistli. Uelis miakej kiluiskej sapanoa kuali omoyektlali. ¿Tlen kichiuas noso tlen kijtos?

¹⁴ Ijkuak techiluiskej kuali tlen tikchiuaj, moneki tikilnamikiskej tlen okijto Jesús: “Ijkuak tlamis nonkichiwaskeh tlan Dios nomechnawatia, xikijtokah: ‘Tejwah mach itla topatih, porke sanwel otikchijkeh tlan omonekia tikchiwaskeh’” (Lucas 17:10). Ma tikilnamikikan ijkuak Ezequías omoueyineki, ayakmo okitlasojkamatiliaya Jehová nochi tlen okimakaya. Ik non, ¿tlen techpaleuis amo ma timoueyinekikan ijkuak techiluiskej sapanoa kuali otimoyektlalijkej para tiktemakaskej se tlapoualistli? Tla timokuayejyekoaj Jehová otechpaleui ye tiktlasojkamatiliskej. Uan ma tikilnamiktokan, Biblia techpaleuia para uelis tiktemakaskej se tlapoualistli uan iespíritu santo Jehová.

15, 16. ¿Tleka omikik Josías?

¹⁵ Saiktlami, ¿tlen techmachtia ineskayo Josías? Maski ye okatka se kuali tekiua noijki okichi tlen amo kuali uan omikik (xiktlajtolti 2 Crónicas 35:22). * ¿Tlen opanok? Josías okilui Nekó, akin okatka tekiua itech Egipto iuan moteuis maski amo itlaj okichiuili. Nekó okilui Josías amo okinekiaya iuan moteuis. Biblia kijtoa tlen okilui Nekó okijto toTajtsin Dios. Pero Josías  omoteuito uan ompa okimiktijkej. Ik non, ¿tleka omoteuito iuan Nekó? Biblia amo kijtoa.

¹⁶ Josías omonekiaya kitas tlen okijto Nekó kox melauak okijto toTajtsin Dios. Uelis kitlajtlaniskia Jeremías akin okatka iteotlajtojki Jehová (2 Crónicas 35:23, 25). Josías omonekiaya kuali mokuayejyekoskia itech tlen opanotoka. Nekó amo kiteuiskia Jerusalén. Ye oyaya Carquemis moteuiti iuan okse altepetl. Uan Nekó amo okinekiaya itlaj kichiuilis Jehová iuan ialtepe. Josías amo kuali omokuayejyeko ijkuak kipejpenaskia tlen kichiuaskia. ¿Tlen techmachtia? Ijkuak tikpiaskej ouijkayotl uan moneki tikpejpenaskej tlen tikchiuaskej, achto moneki timokuayejyekoskej tlen kipaktiskia Jehová ma tikchiuakan.

17. Ijkuak tikpejpenaj tlen tikchiuaskej, ¿tlen techpaleuis amo ma tikchiuakan ken Josías?

¹⁷ Achto ma timokuayejyekokan itech principios bíblicos tlen techpaleuiskej ma tikmatikan tlen tikchiuaskej. Noijki uelis titlatemoskej itech amatlajkuilolmej noso tikinmiluiskej tlayekankej ma techpaleuikan. Yejuan uelis techpaleuiskej ma timokuayejyekokan itech okseki principios bíblicos. Ma tikijtokan se tokni omonamikti iuan akin amo itlaixpantijka Jehová. Ye yokijto tlen tonal tetlapouiti (Hechos 4:20). Pero inamik kiluia amo ma tetlapouiti. Kiluia non tonal paxialotiuij porque kineki iuan yetos. Tokni peua mokuayejyekoa itech seki tlaxelolmej tlen kipaleuiskej kuali ma kipejpena tlen kichiuas. Ye kimatok moneki kitlakamatis toTajtsin Dios uan noijki Jesús otechnauatij ma titetlapouikan (Mateo 28:19, 20; Hechos 5:29). Pero noijki kilnamiki moneki kitlakamatis inamik uan iTlaixpantijkauan Jehová moneki teajsikamatiskej (Efesios 5:22-24; Filipenses 4:5). Tokni uelis motlajtlanis kox inamik ayakmo kineki ma tetlapouiti noso san kineki iuan yetos. TiiTlaixpantijkauan Jehová moneki kuali timokuayejyekoskej tlen tikpejpenaj tikchiuaskej ma kiyolpakti toTajtsin Dios.

18. ¿Tleka miak ipati ma timokuayejyekokan itech naui tekiuajkej tlen otlanauatijkej itech Judá?

¹⁸ Ualeua uelis techpanos tlen okichijkej ninmej naui tekiuajkej tlen otlanauatijkej itech Judá. Uelis san totech titlaneltokaskej, peuas timouikaskej iuan akinmej amo kitekichiuiliaj Jehová, uelis timoueyinekiskej noso itlaj tikpejpenaskej tlen amo kipaktia Jehová. Pero tla ijkon techpanoskia, amo ma timokuayejyekokan amo keman uelis tikyolpaktiskej. Ye kita ken toyelis, ijkon ken okichi iuan naui tekiuajkej tlen otlanauatijkej itech Judá. Jehová noijki kita ken sapanoa tiktlasojtlaj uan ken tiknekij tiktekichiuiliskej ika nochi toyolo. Ik non, okichi ma moijkuilokan neskayomej tlen techpaleuiskej amo ma tikchiuakan tlen amo kuali. Ma timokuayejyekokan itech ninmej tekiuajkej uan ma tiktlasojkamatilikan Jehová porque tlen okichijkej ijkuilitok itech Biblia.