1, 2. (1) ¿Tlen motlajtlaniaj sekimej tetajmej ijkuak inkoneuan kijtoaj kinekij moapolaktiskej? (2) ¿Tleka kintlajtlaniaj akinmej moapolaktiskej kox yomotemakakej ixpan Jehová? (Xikita tlaixkopinal tlen ika peua tlamachtil).

SE ICHPOKATSIN itoka María okatka iuan nochtin tlen moapolaktiskiaj. Itatajuan okitakej ijkuak otlanankili tlen okintlajtlani tokni tlen okitemakak tlapoualistli. Ijkuakon, ichpokatsin omoapolakti.

² Itatajuan María oyolpakej porque omotemakak ixpan Jehová uan omoapolakti. Pero achto inantsin omotekipachoaya uan omotlajtlaniaya: “¿Xamo ok tsikitsin para moapolaktis? ¿Kajsikamati miak ipati tlen kichiuas? ¿Noso ok moneki mochias?”. Miakej tetajmej ijkon motlajtlaniaj ijkuak inkoneuan kijtoaj kinekij moapolaktiskej (Ecl. 5:5). Amo tlajtlakoli tla ijkon motlajtlaniaj porque miak ipati ijkuak ikaj motemaka ixpan Jehová uan moapolaktia (xikita  recuadro “ ¿Yotimotemakak ixpan Jehová?”.

3. ¿Tlen itech otlajto Pedro para kiteititis miak ipati timoapolaktiskej?

³ Tlatitlanil Pedro otlajto itech akali tlen Noé okichijchi uan okijto: “Nin kineskayotia apolaktilistli tlen axkan noijki namechmakixtia” (xiktlajtolti 1 Pedro 3:20, 21, TNM). Ijkuak Noé okichijchi akali nochtin okitakej ye okitekichiuiliaya toTajtsin Dios. Noé otlaneltokaya uan okichi tlen okinauati Jehová. Uan porque ye okichijchi akali omomakixti ye uan ikalchanejkauan. ¿Tlen okinekiaya techmachtis Pedro?

4. ¿Ika tlen okineskayoti Pedro apolaktilistli?

⁴ Ijkuak oksekimej okitayaj akali, okimatiayaj Noé otlaneltokaya itech toTajtsin Dios. Noijki ijkuak kitaj ikaj moapolaktia, kimatij kichiuas ken Cristo uan yomotemakak ixpan Jehová porque tlaneltoka itech Cristo akin okiyolitijkej. Ijkon ken Noé, imachtijkauan Jesús kitlakamatij toTajtsin Dios uan kichiuaj tlen okinnauati. Jehová okimakixti Noé ijkuak tlaltikpak oatemik. Noijki ijkon kinmakixtis itekipanojkauan tlen yomoapolaktijkej ijkuak tlamis tlen amo kuali (Mar. 13:10; Apoc. 7:9, 10). Ik non, miak ipati timotemakaskej ixpan Jehová uan timoapolaktiskej. Tla ikaj kijtoa satepan moapolaktis, uelis amo kipias yolilistli tlen amo keman tlamis.

5. ¿Tlen timomachtiskej?

⁵ Yotikitakej miak ipati timoapolaktiskej, ik non, moneki tikinnankiliskej eyi tlajtlanilmej. ¿Tlen kijtoa Biblia itech apolaktilistli? ¿Tlen moneki tikchiuaskej achto timoapolaktiskej? ¿Tleka ma tikinmilnamiktikan  tokoneuan uan akinmej tikinmachtiaj miak ipati ma moapolaktikan?

6, 7. (1) ¿Tlen okijtosnekiaya ijkuak Juan oteapolaktiaya? (2) ¿Tleka omoapolakti Jesús?

⁶ Biblia kijtoa akin achto opejki teapolaktia ye Juan (Mat. 3:1-6). ¿Tleka miakej oyayaj kitatiuij Juan ma kinapolakti? Okiluiayaj ma kinapolakti para kiteititiskej yomoyolkuepkej uan noijki omoyolkokoayaj porque amo okitlakamatiayaj Tlanauatil tlen okijkuilo Moisés. Ijkuak Juan oteapolaktiaya okipiaya miak ipati, okachi ijkuak okiapolakti Jesús, iKone toTajtsin Dios (Mat. 3:13-17, TNM). Jesús amo okipiaya tlajtlakoli, ik non, amo omonekiaya moyolkuepas (1 Ped. 2:22). Pero ¿tleka omoapolakti Jesús? Para kiteititiskia yiuelis kichiuas tlen kineki toTajtsin Dios (Heb. 10:7).

⁷ Ijkuak Jesús otetlapouiaya, imachtijkauan noijki oteapolaktiayaj (Juan 3:22; 4:1, 2, TNM). Ken amo okitlakamatiayaj Tlanauatil tlen okijkuilo Moisés, omoyolkuepkej uan omoapolaktijkej. Pero satepan ijkuak Jesús omikik uan okiyolitijkej, okse tlamantli kijtosnekiskia ijkuak moapolaktiskiaj imachtijkauan.

8. (1) ¿Tlen otlanauati Jesús? (2) ¿Tleka moneki moapolaktiskej akinmej kinekij kichiuaskej ken Cristo?

⁸ Itech xiuitl 33 satepan ijkuak Jesús okiyolitijkej, okinmonextili kanaj quinientos tlakamej, siuamej uan xamo noijki konemej. Xamo itech nonmej tonalmej Jesús okijto: “Ik non, xiakan xitlamachtikan itech nochi altepemej, xikinapolaktikan ika itoka toTajtsin, iKone uan ika espíritu santo, xikinmachtikan ma kichiuakan nochi tlen onamechnauati” (Mat. 28:19, 20, TNM; 1 Cor. 15:6). Xamo ompa okatkaj miakej imachtijkauan Jesús ijkuak ijkon otlanauati. Noijki okijto akin okinekiaya yetos imachtijka omonekiaya ‘kiwikas itlamamal’ uan moapolaktiskia (Mat. 11:29, 30). Ik non, tla okinekiayaj kiyolpaktiskej toTajtsin Dios, omonekiaya kineltokaskej Jehová kitekitiltia Jesús para kichiuas tlen ye kineki. San ijkon moapolaktiskiaj uan kinseliskia toTajtsin Dios. Biblia kijtoa itech achto siglo imachtijkauan Jesús okajsikamatiayaj tlen okijtosnekiaya moapolaktiskej uan san niman omoapolaktiayaj (Hech. 2:41, TNM; 9:18, TNM; 16:14, 15, 32, 33, TNM).

9, 10. ¿Tlen techmachtia tlen okichi se tlakatl tlen ochantiaya Etiopía uan tlatitlanil Pablo?

⁹ (Xiktlajtolti Hechos 8:35, 36, TNM). Ma tikitakan tlen okichi se tlakatl tlen ochantiaya Etiopía uan omochi judío ijkuak omokuepato Jerusalén okiueyichiuato toTajtsin Dios. Se ángel okilui Felipe ma kitlapoui non tlakatl itech Jesús. ¿Tlen okichi non tlakatl? Okajsikamatki omonekiaya kiselis Jesús ken iteko. Noijki okijto okinekiaya kichiuas tlen Jehová kintlajtlanilia akinmej kinekij kichiuaskej ken Cristo uan san niman omoapolakti.

¹⁰ Axkan ma timotlapouikan itech se tlakatl tlen okatka judío tlen omotokayotiaya Saulo. Maski judíos okiueyichiuayaj toTajtsin Dios, ayakmo okinseliaya porque amo okitlakamatiayaj. Uan Saulo  ok okineltokaya judíos okitekichiuiliayaj toTajtsin Dios, ik non, okintlajyouiltiaya akinmej okichiuayaj ken Cristo. Pero se tonal Jesús okiualtlapoui. Ik non, Saulo okiseli ma kipaleui Ananías tlen noijki okichiuaya ken Cristo uan omoapolakti (Hech. 9:17, 18, TNM; Gál. 1:14). Nin judío satepan okixmatkej ken tlatitlanil Pablo. Ye san niman omoapolakti ijkuak okajsikamatki Jehová kitekitiltia Jesús para kichiuas itlanekilis (xiktlajtolti Hechos 22:12-16, TNM).

11. (1) ¿Tleka miakej moapolaktiaj? (2) ¿Ken timomachiliaj ijkuak moapolaktiaj akinmej yomotemakakej ixpan Jehová?

¹¹ Axkan akinmej momachtiaj Biblia tlen yikipiaj miak xiuitl noso amo, kipatioitaj tlen tlamachtia Biblia uan itech tlaneltokaj, kinekij motemakaskej ixpan Jehová uan moapolaktiskej. Uan miak ipati tlapoualistli tlen kinmakaj akinmej moapolaktiaj itech uejueyij nechikolmej. TiiTlaixpantijkauan Jehová sapanoa tiyolpakij ijkuak ikaj moapolaktia. Uan noijki tetajmej yolpakij ijkuak kitaj inkoneuan moapolaktiaj. Itech 2017 kanaj 284,000 (doscientos ochenta y cuatro mil) omoapolaktijkej uan ijkon okiteititijkej omotemakakej ixpan Jehová (Hech. 13:48). Okajsikamatkej moneki moapolaktiskej nochtin tlen kinekij kichiuaskej ken Cristo. ¿Pero tlen omonekiaya achto kichiuaskej?

12. ¿Tlen moneki kichiuaskej akinmej kinekij moapolaktiskej?

¹² Pero akinmej kinekij moapolaktiskej, achto moneki momachtiskej tlen melauak itech toTajtsin Dios, tlen kineki kichiuas uan tlen yokichi para techmakixtis (1 Tim. 2:3-6). Noijki moneki kipiaskej chikauak intlaneltokilis uan ijkon kintlakamatiskej itlanauatiluan Jehová uan kixtopeuaskej tlen ye kikokolia (Hech. 3:19). Ijkon moneki kichiuaskej porque amo uelis motemakaskej ixpan Jehová uan ok kichiuaskej tlen amo kuali (1 Cor. 6:9, 10). Uan amo san moneki kintlakamatiskej itlanauatiluan Jehová akinmej kinekij moapolaktiskej. Moneki monechikoskej, tetlapouiskej uan tlamachtiskej. Porque Jesús okijto imachtijkauan ijkon kichiuaskiaj (Hech. 1:8). Ijkuak yokichijkej nochi nin tlamantli, ma kitlatlaujtikan Jehová para ixpan motemakaskej uan satepan moapolaktiskej inmixpan tokniuan.

13. ¿Tlen moneki tikinmilnamiktiskej akinmej tikinmachtiaj?

¹³ Ijkuak tikinpaleuiaj tokoneuan uan akinmej tikinmachtiaj, ma tikinmilnamiktikan moneki moapolaktiskej para kichiuaskej ken Cristo. Ma tikinmiluikan miak ipati motemakaskej ixpan Jehová uan moapolaktiskej. Tiknekij ma kipiakan chikauak intlaneltokilis uan ma moapolaktikan.

14. ¿Tleka amo ikaj tikchiualtiaj ma moapolakti?

¹⁴ Tetajmej uan tokniuan amo ma kinchiualtikan ma moapolaktikan akinmej momachtijtokej. Porque Jehová amo ikaj kichiualtia ma moapolakti (1 Juan 4:8). Ijkuak tikinmachtiaj oksekimej ma tikinpaleuikan ma kajsikamatikan miak ipati mouikaskej iuan Jehová. Akinmej tikinmachtiaj uelis moapolaktiskej tla kipatioitaj  tlen melauak itech toTajtsin Dios uan kinekij kichiuaskej ken akinmej kichiuaj ken Cristo (2 Cor. 5:14, 15, TNM).

15. ¿Uelis tikijtoskej keski xiuitl moneki kipias akin kineki moapolaktis?

¹⁵ Amo uelis tikijtoskej keski xiuitl moneki kipias akin kineki moapolaktis. Sekimej okachi totoka peuaj kitekichiuiliaj Jehová uan oksekimej satepan kichiuaj. Miakej moapolaktiaj ijkuak ok telpokamej noso ichpokamej uan nochipa kitekichiuiliaj Jehová. Oksekimej peuaj momachtiaj Biblia ijkuak yikipiaj miak xiuitl uan ijkuakon kajsikamatij moneki moapolaktiskej.

16. Maski ikaj yomokuateki itech tlaneltokalistli kanin achto oyaya, ¿tleka moneki moapolaktis ken iTlaixpantijka Jehová?

¹⁶ Akinmej momachtiaj Biblia moneki moapolaktiskej maski yomokuatekijkej itech tlaneltokalistli kanin achto oyayaj. Jehová kinselis akinmej moapolaktiaj tla kuali kimatij tlen ye kineki kichiuas. Ijkon okipanok se siuatl tlen yokipiaya kanaj 80 xiuitl. Ken yomokuatekijka itech miakej tlaneltokalismej, okitlajtlani akin okimachtiaya kox omonekiaya moapolaktis. Tokni okinmititi seki textos. Uan siuatl okajsikamatki tlen tlamachtia Biblia itech apolaktilistli uan satepan omoapolakti (xiktlajtolti Hechos 19:3-5, TNM).

17. ¿Tlen moneki ma mokuayejyeko akin moapolaktia?

¹⁷ Ijkuak ikaj moapolaktia miak ipati non tonal uan sapanoa yolpaki. Pero noijki ma mokuayejyeko moneki mochijchikauas kichiuas tlen okilui toTajtsin Dios. Imachtijkauan Jesús “ayakmó san yejwah mamonawatikah, yej makichiwakah tlan Cristo kimonekiltia, Akin omikki iwa omoyoliti por yejwah” (2 Cor. 5:15; Mat. 16:24, TNM).

18. ¿Tlen timomachtiskej chikome?

¹⁸ Axkan otimomachtijkej amo san ajauili ijkuak ikaj kineki moapolaktis. Ik non, inantsin María, akin itech yotimotlapouijkej, omotlajtlani tlen axkan otimomachtijkej. Tla tikinpia mokoneuan, xamo timotlajtlania: “¿Yiuelis moapolaktis nokone? ¿Yomomachti tlen moneki para kiselis Jehová ijkuak ixpan motemakas? ¿Moneki achto momachtis escuela uan kipias se kuali tekitl uan satepan uelis moapolaktis? ¿Uan tla tlajtlakolchiuas ijkuak yomoapolakti?”. Chikome timomachtiskej ninmej tlajtlanilmej. Noijki timomachtiskej ken moneki kitaskej tetajmej apolaktilistli.