1, 2. (1) ¿Ken techtlapouia Jehová axkan? (2) ¿Tlen timomachtiskej?

JEHOVÁ kipaktia touan motlapouis. Techtlapouia porque kineki ma tikmatikan ken mokuayejyekoa uan tlen kipaktia kichiuas. Ik non, yiuejkika okintekitilti profetas, ángeles uan noijki iKone. Ijkon inmiuan omotlapouiaya sekimej (Amós 3:7; Gál. 3:19; Apoc. 1:1). Axkan techtlapouia ika Biblia.

² Jehová okiualtlapoui iKone eyi uelta ijkuak nikan okatka. Ma tikitakan tlen okilui iKone, tlen techmachtia uan ken techpaleuia tlen okilui.

3. Ijkon ken kijtoa Marcos 1:10, 11, ¿tlen okijto Jehová ijkuak Jesús omoapolakti uan tlen kijtosneki tlen okijto?

³ (Xiktlajtolti Marcos 1:10, 11). Nin tlen okijto Jehová ijkuak yikin achto okitlapoui iKone. Okijto: “Te Tinokone non niktlasojtla, iwa monawak niyolpaki”. Xamo sapanoa omoyolchika Jesús ijkuak iTajtsin okilui sapanoa kitlasojtla uan itech tlaneltoka. Ma tikitakan eyi tlamantli tlen Jehová okilui Jesús. Okilui ye iKone, kitlasojtla uan noijki kiyolpaktia.

4. ¿Tlen opanok ijkuak Jesús omoapolakti?

⁴ “Te Tinokone”. Ika ninmej tlajtolmej Jehová okiteititi okitlasojtlaya Jesús uan okachi kuali opejki iuan mouika. Jesús yokatka iKone toTajtsin Dios ijkuak  okatka iluikak. Pero ijkuak omoapolakti, toTajtsin Dios okipejpenki ika iespíritu santo. Ik non, uelis mokopaskia iluikak uan toTajtsin Dios kitlaliskia tekiua uan teopixki (Luc. 1:31-33; Heb. 1:8, 9; 2:17). Ik non, toTajtsin Dios okilui: “Te Tinokone” ijkuak omoapolakti (Luc. 3:22).

5. ¿Tlen moneki tikchiuaskej ijkon ken Jehová?

⁵ “Non niktlasojtla”. Jehová okilui iKone okitlasojtlaya uan noijki okiyolchika. Nin techmachtia moneki tikteititiskej tikintlasojtlaj oksekimej uan noijki ma tikinyolchikauakan (Juan 5:20). Tokniuan kiteititiaj techtlasojtlaj uan techiluiaj tlen kuali tikchiuaj. Non kichiua kuali ma timomachilikan. Noijki moneki ma tikintlasojtlakan uan ma tikinyolchikauakan tokniuan uan tokalchanejkauan. Tla ijkon tikchiuaskej, kinpaleuis ma kipiakan chikauak intlaneltokilis uan amo keman ma kikauakan Jehová. Tetajmej noijki moneki ma kinyolchikauakan inkoneuan uan ma kintlasojtlakan. Ijkon kinpaleuiskej ma mochijchikauakan kichiuaskej tlen kuali.

6. ¿Tleka uelis titlaneltokaskej itech Jesucristo?

⁶ “Monawak niyolpaki”. Ijkuak Jehová ijkon okijto, okineltokaya iKone kichiuaskia tlen ye kineki. Tejuan noijki ma tikneltokakan Jesús kichiuas tlen Jehová yokijto (2 Cor. 1:20). Ijkuak timokuayejyekoaj Jesús amo okika iTajtsin, okachi tiknekij tikixmatiskej uan tiknekij tikchiuaskej ken ye. Jehová noijki kineltoka itekipanojkauan kichiuaskej ken iKone (1 Ped. 2:21).

7. Ijkon ken kijtoa Mateo 17:1-5, ¿keman okiualtlapoui Jehová iKone uan tlen okilui?

⁷ (Xiktlajtolti Mateo 17:1-5). Jehová oksepa okiualtlapoui iKone ijkuak opetlanki. Jesús okilui Pedro, Santiago uan Juan iuan ma uian itech se tepetl uan ijkuakon ompa okitakej opetlanki. Ixko Jesús opetlanki uan noijki itlaken. Noijki okinmitakej ome tlakamej tlen okineskayotiayaj Moisés uan Elías. Yejuan opejkej tlajtoaj itech imikilis Jesús uan ijkuak okiyolitijkej. Maski eyi itlatitlaniluan “satlawel okochmikiah” san niman oijsakej uan okitakej Jesús opetlanki (Luc. 9:29-32). Satepan se mixtli okinyaualo uan oualtlajto toTajtsin Dios. Opanok ijkon ken ijkuak omoapolakti Jesús. Ijkuakon Jehová oksepa okiteititi okitlasojtlaya iKone uan okiyolpaktiaya. Ik non, okijto: “Ye ni Nokone non niktlasojtla, non Ne onikpejpenki”. Pero ijkuakon okijto: “Xikkakikah”.

8. ¿Ken okinpaleui imachtijkauan Jesús ijkuak opetlanki?

⁸ Ijkuak Jesús opetlanki, okiteititi kipiaskia chikaualistli ijkuak kiyekanaskia iTekiuajkayo toTajtsin Dios. Nin okiyolchika Jesús porque satepan kitlajyouiltiskia uan kimiktiskiaj. Noijki imachtijkauan Jesús okinpaleui ma kipiakan chikauak intlaneltokilis uan noijki kinpaleuiskia ma kipiakan inyolo ajsitok porque satepan kipiaskiaj miak tekitl. Opanok kanaj treinta xiuitl uan tlatitlanil Pedro oksepa otlajto ijkuak opetlanki Jesús. Nin okiteititi kuali okilnamiktoka tlen opanok (2 Ped. 1:16-18).

9. ¿Tlen okinmilui Jesús imachtijkauan?

⁹ “Xikkakikah”. Jehová okijto ma tikkakikan iKone uan ma tiktlakamatikan. Jesús okijto miak tlamantli miak ipati ijkuak okatka nikan tlaltikpak. Okinmachti imachtijkauan ma tetlapouikan kuali tlajtolmej itech Tekiuajkayotl uan noijki okinmilui ma ijsatokan (Mat. 24:42; 28:19, 20, TNM). Okinyolchika ma mochijchikauakan uan amo ma mosotlauakan (Luc. 13:24). Noijki okinmilui ma motlasojtlakan, san sekan ma yetokan uan ma kintlakamatikan itlanauatiluan (Juan 15:10, 12, 13). Melauak okinpaleui tlen okinmilui uan tejuan noijki ok techpaleuia.

10, 11. ¿Ken tikteititiaj tikkakij Jesús?

¹⁰ Jesús okijto: “Nochteh akimeh kixmatih iwa kijtoah tlan milák, weleti kikakih notlajtol” (Juan 18:37). Tikteititiaj tikkakij Jesús ijkuak tiktlakamatij nin tlanauatil: “Xitexikokah iwa ximotlapojpolwikah. Iwa tla se nomokni onomechchiwili itla amo kuali, xiktlapojpolwikah, ijkó kemi Cristo onomechtlapojpolwi” (Col. 3:13; Luc. 17:3, 4). Noijki tikteititiaj tikkakij Jesús ijkuak timochijchikauaj titetlapouiaj maski tikixnamikij ouijkayotl (2 Tim. 4:2).

¹¹ Jesús ineuian okijto ichkauan ‘kitenkakih’ (Juan 10:27). Tikteititiaj tikkakij Jesús ijkuak tikchiuaj tlen techiluia. Okijto: “Amo xikkawilikah manomechtekipacho tlan onka itech nin tlaltíkpaktli”. Ik non, tikixtopeuaj nochi non tlamantli (Luc. 21:34). Tejuan timochijchikauaj tiktlakamatiskej tlen otlanauati Jesús maski  ualeua tikixnamikij ouijkayotl. Miakej tokniuan sapanoa kintlajyouiltiaj, sekimej amitlaj kipiaj uan sekimej otlaxixinki kanin ochantiayaj. Pero yejuan katej yolmelajkej ixpan Jehová maski kipiaj ouijkayotl. Jesús okijto: “Akin kixmati notlanawatil, iwa kichiwa tlan kijtoa, non tlakatl nechtlasojtla. Iwa akin nechtlasojtla, Notajtsi kitlasojtlas” (Juan 14:21).

12. ¿Ken okachi uelis tikteititiskej tikkakij Jesús?

¹² Noijki tikkakij Jesús ijkuak tikintlakamatij tlayekankej tlen ye okintlali (Heb. 13:7, 17). Seki xiuitl tlen yopanok, ialtepe Jehová yokipatlak miak tlamantli. Axkan yotechmakakej okseki tlamantli tlen techpaleuia ma titetlapouikan. Axkan tlajko semana okse tlamantli timomachtiaj ijkuak timonechikoaj, okse tlamantli kinchijchiuaj kalmej kanin timonechikoaj, okse tlamantli kinyektlaliaj uan noijki kanin mochiuaj uejueyij nechikolmej. ¡Melauak tiktlasojkamatiliaj Jesús kuali techyekana uan techtlasojtla! Jehová techteochiuas tla timochijchikauaj tiktlakamatiskej tlen techiluia ialtepe.

13. ¿Ken techpaleuia tla tikkakij Jesús?

¹³ Techpaleuia ijkuak tikkakij Jesús. ¿Ken techpaleuia? Ye okijto kinyolchikauaskia imachtijkauan ika tlen ye tlamachtia. Okijto: “Iwa nonkajsiskeh yolsewílistli itech nomoyolo. Porke n tekitl non Ne nikneki xikchiwakah amo owi se kitlakitas, iwa tlan Ne nomechnawatia, noiwa amo tesotla” (Mat. 11:28-30). ITlajtol toTajtsin Dios techpaleuia ma tikpiakan chikauak totlaneltokilis uan ma tiyetokan tiixtlamatkej (Sal. 19:7; 23:3). Jesús okijto: “Okachi kuali yolpakilisojkeh akimeh kikakih itlajtol Dios iwa kitlakitah” (Luc. 11:28).

14, 15. (1) Ijkon ken kijtoa Juan 12:27, 28, ¿keman oksepa Jehová okiualtlapoui iKone? (2) ¿Tleka Jesús okiyolseui uan okiyolchika tlen okilui Jehová?

¹⁴ (Xiktlajtolti Juan 12:27, 28). Evangelio tlen okijkuilo Juan techiluia ijkuak oksepa Jehová okiualtlapoui iKone. Ijkuak yikimiktiskiaj Jesús okatka  Jerusalén para kichiuaskia Pascua. Ijkuak otlanki okijto tlen okitekipachoaya, okitlatlaujti iTajtsin: “Notajtsi, maweyijkachito Motoka”. Jehová okikak uan okijto: “Yonikweyijkachi iwa oksepa nikweyijkachiwas”.

¹⁵ Jesús okitekipachoaya kox kixikoskia yetos yolmelajki ixpan Jehová. Kuali okimatiaya kiuitekiskiaj uan kimiktiskiaj (Mat. 26:38). Ye okinekiaya kiueyichiuas itoka iTajtsin. Amo okinekiaya kisokiotis itoka toTajtsin Dios porque okiteluijkej okiuijuikalti toTajtsin Dios. Pero xamo tlen okilui iTajtsin okiyolchika porque moueyichiuaskia itoka. Nochi nin tlamantli okiyolseui uan okipaleui ma tlaxiko maski tlajyouiskia. Maski non okipaleui Jesús, Jehová okichi ma kijkuilokan uan ijkon noijki ika ma timopaleuikan (Juan 12:29, 30).

16. ¿Tleka ualeua techtekipachoa amo tiksokiotiskej itoka Jehová?

¹⁶ Jesús okitekipacho amo kisokiotis itoka iTajtsin. Tejuan xamo noijki techtekipachoa amo tiksokiotiskej itoka Jehová. Xamo noijki techtekipachoa tlen kijtoaj akinmej amo kinpaktia tlen tikneltokaj. Xamo timokuayejyekoaj uelis kisokiotis itoka Jehová uan ialtepe. Pero nochi nin tlamantli amo ma techtekipacho.  Ijkuak ijkon techpanos, techyolseuis tlen Jehová okilui Jesús. Jehová nochipa kiueyichiuas itoka. ITekiuajkayo tlapaleuis ma moyektlali nochi tlen Satanás okijtlako uan noijki ayakmo kintlajyouiltiskej itekipanojkauan (Sal. 94:22, 23; Is. 65:17). Tikneltokaj melauak mochiuas tlen kijtoa nin texto: “Iyolsewilis Dios, non amaka weleti kajsikamati, kimokuitlawis [kimaluis] nomoyolo iwa nomotlayejyekolis por Cristo Jesús” (Filip. 4:6, 7).

17. Ijkon ken kijtoa Isaías 30:21, ¿ken techtlapouia Jehová?

¹⁷ Axkan Jehová ok techtlapouia (xiktlajtolti Isaías 30:21). Maski Jehová amo techualtlapouia, techmachtia ika tlen kijtoa Biblia. Noijki espíritu santo kipaleuia tlakeuali yolmelajki ma techmakato miak tlamantli tlen techpaleuis ma tikpiakan chikauak totlaneltokilis. Techmaka amatlajkuilolmej, noijki itech página tlen tikpiaj itech Internet, videos uan audios (Luc. 12:42). ¡Melauak tikseliaj miak tlamantli para ma tikpiakan chikauak totlaneltokilis!

18. ¿Ken techpaleuia tlen kijtoa Jehová ma tikpiakan chikauak totlaneltokilis uan ma tiyetokan tiyolchikauakej?

¹⁸ Amo keman ma tikilkauakan tlen Jehová okilui iKone ijkuak nikan okatka. Ma tikneltokakan Jehová uelis kiyektlalis nochi tlen Satanás yokijtlako uan nochi tlen kiyekana. Ma timochijchikauakan nochipa ma tikkakikan Jehová. Tla ijkon tikchiuaskej, tikxikoskej nochi ouijkayotl tlen tikixnamikiskej. Biblia kijtoa: “Nomejwah xikxikokah nochi n tlaijyowílistli iwa xikchiwakah tlan Dios kineki, iwa ijkó manomechmaka tlan Ye yokijto kitemakas” (Heb. 10:36).