1, 2. Ijkon ken kijtoua Hechos 8:27-31, 35-38, TNM, ¿tleka omoapolakti tlakatl tlen oualaya Etiopía?

¿TIKNEKI timoapolaktis uan timochiuas imachtijka Jesús? Miakej moapolaktiaj porque kitlasojtlaj Jehová uan motlasojkamatij. Ma tikitakan tlen okipanok se tlakatl tlen okitekichiuiliaya se siuatl tlen otlanauatiaya Etiopía.

² Non tlakatl san niman omoapolakti ijkuak okajsikamatki iTlajtol toTajtsin Dios (xiktlajtolti Hechos 8:27-31, 35-38, TNM). ¿Tleka ijkon okichi? Okipatioitaya iTlajtol toTajtsin Dios, ik non, ijkuak oyaya itech icarreta okitlajtolti se texto tlen moajsi itech amochtli Isaías. Sapanoua omotlasojkamatki ijkuak Felipe okiyekilui tlen okichi Jesús. Noijki yokitlasojtlaya Jehová porque okiueyichiuato ompa Jerusalén. Non kiteititia okika religión tlen okipiaya uan okinekiaya pouis iuan ialtepe toTajtsin Dios. Okitlasojtlaya Jehová, ik non, omoapolakti uan omochi imachtijka Cristo (Mat. 28:19, TNM).

3. ¿Tleka sekimej kitaj oui moapolaktiskej? (Xikita recuadro “ ¿Tlen tlali kineskayotia moyolo?”).

³ Tla tiktlasojtla Jehová non mitspaleuis ximoapolakti.  Pero onka okseki tlamantli tlen amo mitskauilis ximoapolakti. Xamo tikintlasojtla mofamiliares uan moyolikniuan. Pero amo iTlaixpantijkauan Jehová uan timomojtia ayakmo mouan ma mouikakan (Mat. 10:37). Xamo tikita oui tikkauas seki tlamantli tlen Jehová amo kipaktia (Sal. 97:10). Xamo ijkuak otimoskalti omitspaktiaya tiiluichiuas iuan akinmej pouij itech religión tlen amo melauak, ik non, oui tikita ayakmo tiiluichiuas maski Jehová amo kipaktia (1 Cor. 10:20, 21). Pero moneki tikpejpenas akin okachi moneki tiktlasojtlas.

4. ¿Tlen mitspaleuis ximoapolakti?

⁴ Amo tlajtlakoli tla tikpatioita okseki tlamantli noso tikintlasojtla oksekimej. Xamo yotikpatioitaya Biblia ijkuak opejki timomachtia uan yotiktlasojtlaya Jesús. Noijki xamo axkan mitspaktia timouikas iuan tokniuan porque yitikinmixmati. Pero non amo mitspaleuis ximotemaka ixpan Jehová uan ximoapolakti. Moneki tiktlasojtlas Jehová tla tikneki timoapolaktis. Amitlaj mitstsakuilis xiktekichiuili Jehová tla okachi tiktlasojtlas. Amo san timoapolaktiskej tla tiktlasojtlaj Jehová, noijki techpaleuia nochipa ma tiktekichiuilikan.

5. ¿Tlen tlajtlanilmej tikinnankiliskej?

⁵ Jesús okijto ma tiktlasojtlakan Jehová ‘ika nochi toyolo, ika nochi toalma, ika nochi totlalnamikilis iwa ika nochi tochikawalis’ (Mar. 12:30). ¿Ken uelis tiktlasojtlas Jehová uan tiktlakaitas? Moneki tikilnamiktos mitstlasojtla (1 Juan 4:19). Nin tlamachtil kijtoua seki tlamantli tlen mitspaleuis. Noijki kijtoua tlen peuas tikchiuas ijkuak tiktlasojtlas Jehová. *

6. Ijkon ken kijtoua Romanos 1:20, ¿tlen mitspaleuis okachi xikixmati Jehová?

⁶ Ximokuayejyeko tlen okichijchi Jehová uan ijkon tikixmatis (xiktlajtolti Romanos 1:20; Apoc. 4:11). Ximokuayejyeko Jehová ixtlamatki porque kuali okinchijchi yolkamej uan xiuitl. Noijki ximomachti ken otechchijchi (Sal. 139:14). Ximokuayejyeko ken okichijchi tonaltsin. Pero xikilnamikto noijki okinchijchi sapanoua miakej sitlalimej (Is. 40:26). * Okachi tiktlakaitas Jehová tla tikchiuas tlen yotikijtojkej. Ijkuak tikajsikamatis Jehová ixtlamatki uan kipia chikaualistli, okachi iuan timouikas. Pero moneki okachi tikixmatis Jehová tla tikneki tiktlasojtlas ika nochi moyolo.

7. ¿Tlen moneki tikneltokas tla tikneki tiktlasojtlas Jehová ika nochi moyolo?

⁷ Moneki tikneltokas Jehová mitstlasojtla. ¿Tikita oui tikneltokas mitstlasojtla uan mitspatioita akin nochi otlachijchi? Tla ijkon mitspanoua, xikilnamikto toTajtsin Dios “amo wejka kajki de tejwah” (Hech. 17:26-28). Xikilnamikto David okilui Salomón ‘Jehová techitilia tinochtin toyolo’. Ye kijtoua tikajsis tla tiktemos (1 Crón. 28:9). Jehová omitsyoltilanki ijkon ken kijtoua Juan 6:44 uan kineki ximomachti Biblia. Noijki okachi tiktlasojtlas  Jehová ijkuak tikajsikamatis nochi tlen yokichi para mitspaleuis.

8. ¿Ken tikteititis tiktlasojkamatilia Jehová mitstlasojtla?

⁸ Tikteititis tiktlasojkamatilia Jehová mitstlasojtla tla iuan timotlapouis. Okachi tiktlasojtlas tla tikiluis nochi tlen mitstekipachoua uan tla tiktlasojkamatilis ken mitspaleuia. Noijki okachi iuan timouikas ijkuak tikitas ken mitsnankilia ijkuak tiktlatlaujtia (Sal. 116:1). Tikneltokas Jehová mitsajsikamati. Tla tikneki okachi timouikas iuan Jehová, moneki tikajsikamatis ken mokuayejyekoua uan tlen kineki xikchiua. Uelis ijkon tikchiuas tla timomachtis Biblia.

9. ¿Ken tikteititis tikpatioita Biblia?

⁹ Xikpatioita Biblia. San Biblia techiluia akin Jehová uan tlen kineki xikchiua. ¿Ken tikteititis tikpatioita Biblia? Mojmostla xiktlajtolti, ximomachti uan xikchiua tlen ompa kijtoua (Sal. 119:97, 99; Juan 17:17). ¿Mojmostla tiktlajtoltia Biblia?

10. ¿Tlen techiluia Biblia?

¹⁰ San Biblia techiluia sekimej okitakej Jesús ijkuak ouala nikan tlaltikpak uan tlen okichi. Tiknekis timouikas iuan Jesús ijkuak tikmatis tlen okichi uan tlen okijto.

11. ¿Tlen mitspaleuis okachi xiktlasojtla Jehová?

¹¹ Xiktlasojtla Jesús. Non mitspaleuis okachi xiktlasojtla Jehová. Porque Jesús kipia iyelis ken Jehová (Juan 14:9). Tla okachi tikixmatis Jesús, tikmatis ken iyelis Jehová uan okachi tiktlasojtlas. Ximokuayejyeko ijkuak Jesús okinmiknomatki akinmej okinchikoitayaj, akinmej amitlaj okipiayaj uan akinmej omokokouayaj. Ximokuayejyeko ken mitspaleuia ijkuak tikchiua tlen otlamachti (Mat. 5:1-11; 7:24-27).

12. ¿Tlen tikchiuas ijkuak okachi tikixmatis Jesús?

¹² Okachi tiktlasojtlas Jesús tla timokuayejyekos topatka omotemakak ma  kimiktikan uan ijkon techtlapojpoluis toTajtsin Dios (Mat. 20:28). Tikajsikamatis tleka topatka omotemakak. Non mitspaleuis ximoyolkopa uan tikiluis Jehová ma mitstlapojpolui (Hech. 3:19, 20; 1 Juan 1:9). Tla okachi tiktlasojtlas Jehová uan Jesús, okachi tiknekis tiyetos iuan akinmej kitlasojtlaj.

13. ¿Tlen mitsiluia Jehová?

¹³ Xikintlasojtla akinmej kintlasojtla Jehová. Xamo sekimej mofamiliares uan moyolikniuan amo kajsikamatiskej tleka tikneki timotemakas ixpan Jehová uan ayakmo mitsnotsaskej. Pero Jehová mitsiluia tokniuan yetoskej ken mofamilia. Tokniuan mitstlasojtlaskej uan mitspaleuiskej ijkuak monekis tla inmiuan timouikas (Mar. 10:29, 30; Heb. 10:24, 25). Xamo se tonal mofamiliares noijki kitekichiuiliskej Jehová uan kichiuaskej tlen ye kineki (1 Ped. 2:12).

14. Ijkon ken kijtoua 1 Juan 5:3, ¿ken yomitspaleui itlanauatiluan Jehová?

¹⁴ Xikinpatioita itlanauatiluan Jehová uan xikintlakamati. Xamo achto otikchiuaya seki tlamantli tlen otikmatiaya kuali. Pero axkan yotikitak okachi mitspaleuiaj itlanauatiluan Jehová (Sal. 1:1-3; xiktlajtolti 1 Juan 5:3). Ximokuayejyeko ken kinpaleuia Biblia akinmej yomonamiktijkej, tetajmej uan konemej (Efes. 5:22-6:4). ¿Okachi yolpakij akinmej inmiuan tichanti tla tikchiua tlen kijtoua Biblia? ¿Mitspaleuia tlen timomachtia kuali xikinpejpena akinmej inmiuan timouika? ¿Okachi tiyolpaki? (Prov. 13:20; 1 Cor. 15:33). Xamo tikijtos mitspaleuia.

15. ¿Tlen mitspaleuis tla amo tikmati ken timoyekanas ika principios bíblicos?

¹⁵ Xamo ualeua amo tikmati ken timoyekanas ika principios bíblicos tlen axkan timomachtijtok. Ik non, Jehová kipia ialtepe tlen techmachtia ika Biblia uan mitspaleuis xikmati tlen kuali uan tlen amo kuali (Heb. 5:13, 14). Tla tikintlajtoltis amatlajkuilolmej uan timomachtis, tikmatis ken mitspaleuis uan tiknekis tipouis iuan ialtepe Jehová.

16. ¿Ken kajki ialtepe Jehová?

¹⁶ Xikpatioita ialtepe Jehová uan xikpaleui. Jehová okintlali tlanechikolmej itech ialtepe uan Jesús kinyekana (Efes. 1:22; 5:23). Noijki Jesús okinpejpenki sekimej tlakamej tlen yaskej iluikak ma kiyekanakan tekitl tlen axkan kineki ma mochiua. Ninmej tokniuan Jesús okintokayoti “tlakeuali yolmelajki uan ixtlamatki”. Yejuan techpaleuiaj ma timouikakan iuan Jehová uan ma tikpiakan chikauak totlaneltokilis (Mat. 24:45-47, TNM). Akinmej pouij iuan “tlakeuali yolmelajki” kitaj ma yetokan tlayekankej itech tlanechikolmej uan kuali ma techmachtikan (Is. 32:1, 2; Heb. 13:17; 1 Ped. 5:2, 3). Tlayekankej kinekij mitspaleuiskej ximouika iuan Jehová uan mitsyolchikauaskej. Pero noijki kinekij mitspaleuiskej xikinmachti oksekimej ma kixmatikan Jehová (Efes. 4:11-13).

17. Ijkon ken kijtoua Romanos 10:10, 13, 14, ¿tleka tikinpaleuiaj oksekimej ma kixmatikan Jehová?

¹⁷ Xikinpaleui oksekimej ma kitlasojtlakan Jehová. Jesús okinnauati imachtijkauan ma kinmachtikan oksekimej ma kixmatikan toTajtsin Dios (Mat. 28:19, 20). Nin tlanauatil tikmatij moneki tiktlakamatiskej.  Pero tla okachi tiktlasojtlas Jehová, timomachilis ken Pedro uan Juan ijkuak okijtojkej amo “san tejwah matikpixtokah tlan otiktakeh iwa otikkakeh” (Hech. 4:20). Sapanoua tiyolpakij ijkuak ikaj tikpaleuiaj ma kixmati Jehová. Felipe oyolpakik ijkuak okipaleui tlakatl tlen oualaya Etiopía ma kajsikamati iTlajtol toTajtsin Dios uan omoapolakti. Tla tikchiuas ken Felipe uan titetlapouis ken Jesús otlanauati, tikteititis tikneki timochiuas iTlaixpantijka Jehová (xiktlajtolti Romanos 10:10, 13, 14). Ijkuakon xamo timotlajtlanis ken tlakatl tlen oualaya Etiopía: “¿Tlen nechtsakuilia amo ma nimoapolakti?” (Hech. 8:36, TNM).

18. ¿Tlen timomachtiskej itech okse tlamachtil?

¹⁸ Tla timoapolaktis non tlen okachi kuali tikchiuas. Amo san ajauili timoapolaktis, ik non, moneki kuali timokuayejyekos tlen kijtosneki. ¿Tlen moneki tikmatis tla tikneki timoapolaktis? ¿Tlen moneki tikchiuas tla tikneki timoapolaktis uan tla yotimoapolakti? Non timomachtiskej itech okse tlamachtil.