1. ¿Tlen uelis kichiuaskej telpokamej tlen yomoapolaktijkej?

TELPOKAMEJ, namejuan uelis nantlapaleuiskej itech miak tlamantli porque nanchikauakej (Prov. 20:29). Uelis nantlapeuiskej itech tlanechikol. Nanmiakej nankinekij nanmochiuaskej siervos ministeriales. Pero xamo oksekimej nanmechitaj ayamo nankipiaj miak xiuitl noso kitaj ayamo uelis nankichiuaskej seki tekitl tlen moneki. Tla ijkon mitspanoua, maski ok titelpochtli onka seki tlamantli tlen uelis tikchiuas uan ijkon kitaskej tokniuan ueli titlapaleuia.

2. ¿Tlen timomachtiskej?

² Tikitaskej tlen okipanok tekiua David. Noijki timomachtiskej tlen okinpanok Asá uan Jehosafat, yejuan okatkaj tekiuajkej ompa Judá. Tikitaskej tlen ouijkayotl okipixkej, tlen okichijkej uan tlen kinmachtiaj telpokamej.

3. ¿Ken uelis kinpaleuiskej telpokamej tokniuan tlen yikipiaj miak xiuitl?

³ Ijkuak David okatka telpochtli omomachti seki tlamantli tlen okinpaleui oksekimej. Kuali omouikaya iuan Jehová. Noijki omomachti kuali tlatsotsonas uan ijkon okipaleui Saúl, ye achto okitlalijka Jehová ma yeto tekiua (1 Sam. 16:16, 23). Noijki ijkon miakej telpokamej kimatij kichiuaskej seki tlamantli, ik non, uelis kinpaleuiskej tokniuan tlen inmiuan monechikouaj. Miakej tokniuan tlen yikipiaj miak xiuitl motlasojkamatij  ijkuak kinmachtiaj ken kintekitiltiskej intableta uan okseki tlamantli para momachtiskej uan ijkuak monechikoskej. Tla te tikmati tikintekitiltis, uelis tikinpaleuis tokniuan tlen yikipiaj miak xiuitl.

4. ¿ Ken uelis kichiuaskej telpokamej ken David? (Xikita dibujo itech página 1).

⁴ Ijkuak David okatka telpochtli okichiuaya tlen okiluiayaj. Itajtsin okinauati ma kinmalui ichkamej uan ye omochijchika kinmaluis maski okatka oui. Satepan okilui tekiua Saúl: “Noteko ne nitlajpixki uan nikinmaluia ichkauan notajtsin. Se tonal ouala se león uan okiuikak se ichka uan noijki se tonal ouala se oso uan okiuikak se ichka. Ne onikintokak uan onikinmikti uan ijkon onikinmakixti ichkamej” (1 Sam. 17:34, 35). David okimatiaya kinmaluis ichkamej uan amo omomojti. Telpokamej uelis kichiuaskej ken David ijkuak kinmiluiaj itlaj ma kichiuakan itech tlanechikol.

5. ¿Tlen uelis kichiuaskej telpokamej ijkon ken kiteititia Salmo 25:14?

⁵ Ijkuak David okatka telpochtli kuali omouikaya iuan Jehová. Okatka yolchikauak uan okimatiaya kitsotsonas arpa, amo okitaya Jehová san ken iDios, ye iuan omouikaya (xiktlajtolti Salmo 25:14). Telpokamej okachi xikpatioitakan nanmouikaskej iuan Jehová, tla ijkon nankichiuaj okachi nantlapaleuiskej itech tlanechikol.

6. ¿Tleka amo kuali okitayaj oksekimej tlen okinekiaya kichiuas David?

⁶ David noijki okipixki ouijkayotl, sekimej amo kuali okitayaj tlen okinekiaya kichiuas. Ijkuak omotemakti para moteuis iuan Goliat, tekiua Saúl amo okinekiaya ijkon ma kichiua, ye okilui: “Ok titelpochtli” (1 Sam. 17:31-33). Achto, noijki ikni okilui ye amo okimatiaya kichiuas tlen okinauatiayaj (1 Sam. 17:26-30). Pero Jehová amo ijkon okitak David porque okixmatiaya. David okineltokaya Jehová kipaleuiskia, ik non, okimikti Goliat (1 Sam. 17:45, 48-51).

7. ¿Ken uelis tikchiuas ijkon ken okichi David?

⁷ ¿Ken uelis tikchiuas ijkon ken okichi David? Achto, moneki tikmatis timochias. Xamo akinmej mitsixmatij desde ijkuak otikatka titsikitsin yolik kitaskej  yitimokuayejyekoua ken ikaj tlen yikipia miak xiuitl. Pero xikilnamiki Jehová amo san mitsita, ye kuali mitsixmati uan kimati tlen uelis tikchiuas (1 Sam. 16:7). Okse tlamantli tlen uelis tikchiuas: Kuali ximouika iuan Jehová. David okitaya tlen Jehová okichijchi uan omokuayejyekouaya tlen okimachtiaya (Sal. 8:3, 4; 139:14; Rom. 1:20). Noijki okse tlamantli tlen uelis tikchiuas: Xikilui Jehová ma mitspaleui ijkuak mitspinauiaj akinmej inmiuan timomachtia porque tiiTlaixpantijka. Xiktlatlaujti ma mitspaleui. Noijki xikchiua tlen kijtoua Biblia, amatlajkuilolmej uan videos. Ijkuak tikitas ken Jehová mitspaleuia xikixnamiki ouijkayotl, okachi itech titlaneltokas. Ijkuak oksekimej kitaskej tikkauilia ma mitspaleui Jehová, kineltokaskej uelis tikinpaleuis.

8, 9. (1) ¿Tlen okipaleui David ma mochia hasta ijkuak omochi tekiua? (2) ¿Tlen kinmachtia telpokamej tlen okichi David?

⁸ Ma tikitakan okseki tlamantli tlen okipanok David. Jehová okipejpenki ma yeto tekiua pero omochixki miak xiuitl para tlanauatiskia (1 Sam. 16:13; 2 Sam. 2:3, 4). ¿Tlen okipaleui amo ma mosotlaua? David amo okachi omotekipacho uan okitak tlen omonekiaya kichiuas. Ijkuak ocholojtinemiaya oyajki kanin ochantiayaj filisteos, ompa omoteui iuan akinmej okinkokoliayaj israelitas. Ijkon okimalui itlal altepetl Judá (1 Sam. 27:1-12).

⁹ ¿Tlen mitsmachtia tlen okichi David? Xiktekichiuili Jehová uan xikinpaleui tokniuan. Se tokni tlen itoka Ricardo * ijkon okichi. Ijkuak ayamo okipiaya miak xiuitl, omokuayejyekouaya se tonal mochiuaskia precursor regular pero ijkuakon ayamo oueliaya. Pero amo omotekipacho, ye okachi omochijchika tetlapouis. Ye okijto: “Non onechpaleui para okachi kuali ma nimouika iuan Jehová. Onimochijchikauaya oksepa nikintlapouitij akinmej okachi okinekiayaj kimatiskej uan kuali onimoyektlaliaya. Satepan ikaj opejki nikmachtia, ayakmo onimomojtiaya ijkuak okachi onitetlapouiaya”. Axkan Ricardo tlapaleuia ken siervo ministerial uan precursor regular.

10. ¿Tlen okichi David ijkuak itlaj kipejpenaskia?

¹⁰ Ma tikitakan okseki tlamantli tlen okipanok David. Se tonal ijkuak ye iuan itlakeualuan okicholilijtinemiaya Saúl, okinkajtejkej infamilia porque omoteuitoj. Pero sekimej tlen okinkokoliayaj okintlachtekilitoj uan okinuikakej infamilia. Xamo David uelis kijtoskia kuali otlateuiaya, ik non, xamo mokuayejyekoskia uelis kinmakixtiskia ifamilia. Pero ye okilui Jehová ma kipaleui, ik non, okitlajtlani teopixki tlen omotokayotiaya Abiatar kox kinteuiskia akinmej okintlachtekitoj. Jehová okilui kema iuan okijto kintlaniliskia (1 Sam. 30:7-10). ¿Tlen mitsmachtia tlen okichi David?

11. ¿Tlen moneki tikchiuas ijkuak ayamo tikpejpena itlaj tikchiuas?

¹¹ Xikintlajtlani motatajuan noso tlayekankej ken uelis itlaj tikpejpenas tikchiuas. Yejuan uelis mitspaleuiskej ximokuayejyeko tlen uelis tikpejpenas tikchiuas. Jehová okintlali tlayekankej uan kineltoka uelis kichiuaskej tlen ye kinmiluia uan noijki kineltoka uelis tikchiuas  tlen ye mitsiluia. Jehová okintlali ken “tlatliokólili” itech tlanechikol (Efes. 4:8). Tla tikpia chikauak motlaneltokilis ijkon ken yejuan uan tikinkaki, kuali tikpejpenas tlen tikneki tikchiuas. Ma tikitakan tlen okichi tekiua Asá.

12. ¿Ken okatka Asá ijkuak omochi tekiua?

¹² Ijkuak Asá okatka telpochtli okatka yolyamanki uan yolchikauak. Itajtsin omotokayotiaya Abías, ijkuak oixpoliuik Asá omochi tekiua, okinpojpolo teotsitsintin itech nochi ialtepe. Noijki okinmilui akinmej ochantiayaj Judá ma mouikakan iuan Jehová uan ma kintlakamatikan itlanauatiluan (2 Crón. 14:1-7). Ijkuak Zérah tlen ochantiaya Etiopía okinuikak 1,000,000 (se millón) soldados ompa Judá, Asá okilui Jehová ma kipaleui, ye okilui: “Oh Jehová te amo mitstekipachoua kox miakej noso amo akinmej tikinpaleuia noso kox kipiaj chikaualistli. Techpaleui oh Jehová toTajtsin Dios, porque melauak motech titlaneltokaj”. Tlen okijto Asá okiteititi okineltokaya Jehová kipaleuiskia ye uan ialtepe. Uan ijkon opanok “Jehová okintlanili etíopes” (2 Crón. 14:8-12).

13. ¿Tlen okipanok Asá uan tleka?

¹³ Temomojti ijkuak se millón soldados oajsitoj ialtepe Asá pero ye okineltokak Jehová kipaleuiskia, ik non, otlatlankej. Satepan tekiua Baasá tlen otlanauatiaya ompa Israel okinekiaya kinteuis. Maski amo okatka oui inmiuan moteuiskiaj Asá amo okilui Jehová ma kipaleui, okilui tekiua tlen otlanauatiaya Siria ma kipaleui. Amo kuali tlen okichi Asá, ik non, Jehová okitekitilti Hananí para ma kilui: “Ken otimopaleui itech ueyi tekiua tlen kajki Siria uan amo itech Jehová moTajtsin Dios, isoldados ueyi tekiua itech Siria momak ocholojkej”. Desde ijkuakon nochipa inmiuan omoteuijtokaj (2 Crón. 16:7, 9; 1 Rey. 15:32). ¿Tlen techmachtia tlen amo kuali okichi Asá?

14. (1) ¿Ken uelis tikteititis titlaneltoka itech Jehová? (2) ¿Tlen panos tla tikchiuas tlen kijtoua 1 Timoteo 4:12?

¹⁴ ¿Tlen mitsmachtia tlen okipanok tekiua Asá? Moneki tiyetos tiyolyamanki uan moneki titlaneltokas itech  Jehová. Ijkuak otimoapolakti otikteititi otikpiaya chikauak motlaneltokilis uan otikneltokaya Jehová mitspaleuiskia. Jehová oyolpakik uan omitskauili xipoui iuan ifamilia. ¡Non se ueyi tetliokolil! Pero ok moneki ijkon tikchijtos. Xamo amo tikitas oui ijkon tikchiuas ijkuak itlaj miak ipati moneki tikpejpenas pero noijki ijkon moneki tikchiuas ijkuak tikpejpenas okseki tlamantli tlen ika timoyolpaktis, kanin titekipanos noso tlen tikneki tikchiuas satepan. Amo ximokuayejyeko te tikmati tlen tikpejpenas porque tiixtlamatki, xikintemo principios bíblicos tlen uelis mitspaleuiskej uan xikchiua (Prov. 3:5, 6). Tikyolpaktis Jehová tla ijkon tikchiuas uan mitstlakaitaskej tokniuan (xiktlajtolti 1 Timoteo 4:12).

15. ¿Tlen amo kuali okichi Jehosafat ijkon ken kijtoua 2 Crónicas 18:1-3; 19:2?

¹⁵ Tinochtin titlajtlakolejkej, ik non, ualeua timotlapololtiaj. Pero amo xikkaua non ma mitstsakuili, xiktekichiuili Jehová ika nochi moyolo. Ximokuayejyeko tlen okipanok tekiua Jehosafat. Ye okichi tlen kuali. Ijkuak opejki tlanauatia okipatioitak mouikas iuan toTajtsin Dios uan okitlakamatki. Okintitlanki ompa Judá sekimej tlakamej para ma kinpaleuikan ma kixmatikan Jehová (2 Crón. 17:4, 7). Maski okitekichiuili Jehová ualeua okipejpenki kichiuas itlaj amo kuali. Ik non, Jehová ikaj okititlanki para ma kiyektlali (xiktlajtolti 2 Crónicas 18:1-3; 19:2). Ma tikitakan tlen uelis mitsmachtis tlen okichi.

16. ¿Tlen mitsmachtia tlen okichi tokni Rajeev?

¹⁶ Mitspaleuis tla tikchiuas tlen kijtoskej motatajuan uan tlayekankej. Miakej telpokamej kitaj oui okachi kitekichiuiliskej Jehová. Xamo ijkon mitspanoua. Pero amo ximosotlaua, xikita tlen okichi se tokni tlen itoka Rajeev. Ye kilnamiki tlen okipanok ijkuak ok okatka telpochtli, ye okijto: “Amo onikmatiaya tlen nikchiuaskia. Onechpaktiaya nikchiuas ken oksekimej telpokamej; onechpaktiaya nimauiltis uan nimoyolpaktis uan amo onechpaktiaya nimonechikos  nion nitetlapouis”. ¿Tlen okipaleui okse tlamantli ma mokuayejyeko? Se tlayekanki okipaleui, ye okijto: “Onechpaleui ma nikajsikamati tlen kijtoua 1 Timoteo 4:8”. Rajeev okiteititi yolyamanki uan okitak tlen omonekiaya kichiuas. Ye okijto: “Onikpejpenki okachi niktekichiuilis Jehová”. ¿Tlen opanok satepan? “Seki xiuitl satepan onimochi siervo ministerial”.

17. ¿Ken kitaj tokniuan ijkuak telpokamej kitekichiuiliaj Jehová?

¹⁷ Telpokamej, tokniuan tlen inmiuan namonechikouaj namechpatioitaj porque nankitekichiuiliaj Jehová ika nochi namoyolo (Sof. 3:9). Kinpaktia ijkuak kitaj nanyolpakij uan nantlapaleuiaj itech tlanechikol. Namechtlakaitaj uan kineltokaj uelis nankichiuaskej tlen namechiluiskej (1 Juan 2:14).

18. ¿Tlen mokuayejyekoua Jehová ijkuak kita miakej telpokamej kitekichiuiliaj ijkon ken kijtoua Proverbios 27:11?

¹⁸ Telpokamej, xikilnamiktokan Jehová namechtlasojtla uan kimati uelis nankitekichiuiliskej. Ye okijto itlamian tonalmej miakej telpokamej kitekichiuiliskej ika nochi inyolo (Sal. 110:1-3). Jehová kimati tiktlasojtla uan tikneki okachi tiktekichiuilis. Ik non, amo ximosotlaua uan xikinpaleuijto tokniuan. Ijkuak timotlapololtis xikkaki tlen tokniuan mitsiluiskej uan xikseli ijkuak mitsyektlaliskej, xikilnamiki Jehová kineki mitspaleuis (Heb. 12:6). Xikchiua tekitl ijkon ken tokniuan mitsiluiskej. Tla ijkon tikchiuas, tikyolpaktis moTajtsin Jehová (xiktlajtolti Proverbios 27:11).