1, 2. ¿Akinmej uelis kipaleuiskej akin momachtijtok ma moapolakti?

SE TOKNI tlen itoka Amy uan chanti ompa Fiyi okijto: “Onechpaktiaya nimomachtis tlen Biblia kijtoua”. Noijki okijto: “Onikmatiaya melauak tlen onimomachtijtoka pero amo onikpatlaya nonemilis pero onikchi uan onimoapolakti porque onechpaleuijkej tokniuan”. Tlen okipanok tokni itlaj techmachtia: ikaj tlen momachtia uelis moapolaktis tla nochtin tokniuan itech tlanechikol kipaleuiaj.

² Nochtin tokniuan uelis kinpaleuiskej oksekimej noijki ma kitekichiuilikan Jehová (Efes. 4:16). Se precursora tlen itoka Leilani uan chanti ompa Vanuatu okijto: “Sekimej kijtouaj nochtin akinmej chantij itech se altepetl kipaleuiaj se chokotsin. Noijki ijkon uelis tikijtoskej itech akinmej momachtiaj: nochtin tokniuan itech se tlanechikol, kipaleuiaj akin momachtia ma kitekichiuili Jehová”. Se chokotsin kuali moskaltia porque kipaleuiaj uan kiyolchikauaj ifamilia, iyolikniuan uan akinmej kimachtiaj. Noijki ijkon tokniuan uelis motlapouiskej iuan akin momachtijtok, uelis kiyolchikauaskej uan noijki uelis kimachtiskej ika tlen kichiuaj (Prov. 15:22).

3. ¿Tlen techmachtia tlen kijtouaj Ana, Dorín uan Leilani?

³ Tla ikaj tikmachtijtokej, ma tikinkauilikan oksekimej tokniuan noijki ma kipaleuikan. ¿Tleka ijkon tikijtouaj? Ma tikitakan tlen okijto se precursora especial tlen itoka Ana uan chanti ompa Moldavia: “Akin momachtijtok moneki ma kipaleuikan uan akin kimachtia amo san ye uelis kipaleuis”. Okse precursor especial tlen itoka Dorín uan  noijki ompa chanti okijto: “Ualeua tokniuan kiluiaj akin momachtia itlaj tlen kipaleuia pero xamo ne amo nikmatiskia tlen nikiluis”. Tokni Leilani noijki okijto: “Ijkuak tokniuan kitlasojtlaj uan kipaleuiaj akin momachtijtok, ijkon kitas tikatej itech ialtepe toTajtsin Dios” (Juan 13:35).

4. ¿Tlen timomachtiskej?

⁴ Pero xamo timotlajtlania: “¿Ken uelis nitlapaleuis tla amo ne nitlamachtia?”. Axkan tikitaskej tlen uelis tikchiuaskej ijkuak se tokni techiluia iuan ma titlamachtitij uan ijkuak akin momachtia peua monechikoua. Noijki tikitaskej ken uelis tlayekankej kinpaleuiskej ma moapolaktikan akinmej momachtijtokej.

5. ¿Tlen uelis tikchiuaskej tla se tokni techiluia iuan ma titlamachtitij?

⁵ Akin tlamachtia ye akin okachi moneki kipaleuis akin kimachtia ma kajsikamati iTlajtol toTajtsin Dios, tejuan san tikpaleuiskej tla techiluia iuan ma titlamachtitij (Ecl. 4:9, 10). Pero ¿ken uelis tikpaleuiskej ken moneki?

6. ¿Ken uelis tikchiuaskej tlen kijtoua Proverbios 20:18 ijkuak tiaskej iuan tokni tlen titlamachtitij?

⁶ Ma timomachtikan. Ma tikiluikan akin tlamachtia ma techtlapoui itech akin kimachtia (xiktlajtolti Proverbios 20:18). Uelis tiktlajtlaniskej ken kajki akin kimachtis, tlen momachtiskej uan kox itlaj kineki kiluis. Noijki uelis tiktlajtlaniskej tla moneki itlaj tikijtoskej noso tlen amo moneki tikijtoskej uan ken uelis tikpaleuiskej para ma kitekichiuili Jehová. Tokni amo techiluis seki tlamantli tlen amo moneki tikmatiskej pero techpaleuis tlen techiluis para tikmatiskej ken uelis titlapaleuiskej. Se misionera tlen itoka Joy ijkon motlapouia iuan akinmej iuan tlamachtitiuij. Tokni okijto: “Ijkon akin nouan tlamachtiti mochijchikaua tlapaleuis uan kimati tlen kijtos”.

7. ¿Tleka moneki ma timomachtikan?

⁷ Tla se tokni techiluia iuan ma titlamachtitij, moneki ma timomachtikan (Esd. 7:10). Dorín tokni tlen achto yotikijtojkej noijki okijto: “Niyolpaki ijkuak kuali momachtia akin nouan tlamachtiti porque ijkon uelis tlapaleuis”. Ijkon akin momachtia kitas tejuan timomachtiaj achto tiaskej tikmachtitiuij. Tla amo uelis timomachtiskej nochi, ma tikitakan tlen okachi ipati kilnamiktos akin tikmachtiaj.

8. ¿Tlen techpaleuis ma tikijtokan tlen moneki tla timotlatlaujtiskej ijkuak titlamachtiskej?

⁸ Noijki moneki timotlatlaujtiskej ijkuak titlamachtiskej, ik non, achto ma timokuayejyekokan tlen tikijtoskej tla  techiluiskej ma timotlatlaujtikan. Ijkon tikijtoskej itlaj tlen okachi moneki (Sal. 141:2). Se tokni tlen itoka Hanae uan chanti ompa Japón ok kilnamiki ken omotlatlaujtiaya se tokni tlen oyaya iuan akin okimachtiaya. Okijto: “Onikitaya tokni okitlasojtlaya Jehová uan ne noijki ijkon oniknekiaya nikchiuas. Kuali onimomachiliaya ijkuak tokni omotlatlaujtiaya uan okijtouaya notoka”.

9. Ijkon ken kijtoua Santiago 1:19, ¿ken uelis titlapaleuiskej ijkuak titlamachtitiuij?

⁹ Ma tikpaleuikan akin tlamachtia. Se precursora especial tlen itoka Omamuyovbi uan chanti ompa Nigeria okijto: “Tokni tlen kuali tlapaleuia tlakaktok ijkuak titlamachtijtokej. Kijtoua tlen teyolchikaua pero amo sapanoua tlajtoua porque kimatok akin tlamachtia ye akin tlayekanas”. Pero ¿ken uelis tikmatiskej keman moneki titlajtoskej uan tlen tikijtoskej? (Prov. 25:11). Kuali ma tikkakikan akin tlamachtia uan akin momachtia (xiktlajtolti Santiago 1:19). San ijkon uelis titlapaleuiskej ijkuak monekis. Pero amo sapanoua ma titlajtokan, amitlaj ma tikijtokan ijkuak tokni tlamachtijtok nion ma tikijtokan okseki tlamantli tlen amo mouika ika tlen timomachtijtokej. Uelis itlaj tikijtoskej noso se neskayotl noso itlaj titetlajtlaniskej uan ijkon okachi tikyekijtoskej tlen tlamachtia tokni. Xamo ualeua timokuayejyekouaj amo uelis titlapaleuiskej. Pero tla tikyolchikauaj akin momachtijtok uan tikpaleuiaj, ijkon kinekis kitekichiuilis Jehová.

10. ¿Ken uelis kipaleuis tlen tikiluiskej akin momachtia?

¹⁰ Ma tikijtokan tlen otechpanok. Tla tikitaj uelis tikpaleuiskej akin momachtijtok, ma tikiluikan ken opejki timomachtiaj, ken otikixnamikej se ouijkayotl uan ken otechpaleui Jehová (Sal. 78:4, 7). Xamo tlen tikijtoskej omonekiaya kikakis akin momachtijtok. Noijki xamo kipaleuis okachi ma tlaneltoka, ma kichiua tlen kipaleuis ma moapolakti uan ma kixnamiki se ouijkayotl (1 Ped. 5:9). Se tokni tlen itoka Gabriel uan chanti ompa Brasil okijto tlen okipaleui ijkuak omomachtijtoka Biblia: “Tlen tokniuan onechtlapouiayaj onechititi Jehová kimati nochi tlen techpanoua. Tla tokniuan okixikojkej ouijkayotl, ne noijki niuelis”.

11, 12. ¿Tleka moneki kuali ma tikinselikan akinmej yikin peua monechikouaj?

¹¹ Tla tiknekij ma moapolakti uan ma kitekichiuili Jehová akin momachtia, moneki monechikos uan kichiuas tlen ompa  kikaki (Heb. 10:24, 25). Xamo ijkuak ikaj monechikoua yaui porque okiyole akin kimachtia. Pero tinochtin uelis tikiluiskej nochipa ma monechiko, ¿ken uelis tikchiuaskej?

¹² Kuali ma tikselikan (Rom. 15:7). Tla akin momachtia kuali tikseliaj ijkuak touan monechikoua, xamo nochipa kinekis monechikos. Ma tiktlapouikan ika tlasojtlalistli uan ma kiluikan ken intoka san sekimej tokniuan para ma kinmixmati uan ijkon kuali momachilis. Amo ma timokuayejyekokan yikipaleuijtok akin kimachtia porque xamo ayamo ajsiti noso kichijtok okseki tekitl tlen moneki. Ik non, tejuan iuan ma timotlapouikan uan kuali ma tikkakikan. ¿Ken kipaleuis tlen tikchiuaskej? Ma tikitakan tlen okijto se tokni tlen itoka Dimitri. Ayamo kipia miak xiuitl omoapolakti uan yisiervo ministerial. Ye okijto: “Ijkuak yikin opejki nimonechikoua, onimoka kiauak uan onimomojtiaya. Se tokni onechitak uan onechuikak kanin okatkaj tokniuan. Onechtlajtlachialti ijkuak miakej tokniuan onechtlajpalotoj. Sapanoua onechpakti uan oniknekiaya mojmostla nimonechikos. Amo keman ijkon onimomachiliaya”.

13. ¿Ken kipaleuis akin tikmachtiaj tla tikchiuaj tlen moneki?

¹³ Ma tikchiuakan tlen moneki. Tlen tikchiuaj uelis kipaleuis akin momachtijtok ma kita tejuan melauak tikchiuaj ken Cristo (Mat. 5:16). Se tokni tlen itoka Vitali uan chanti Moldavia okijto: “Ijkuak onikitak tlen okichiuayaj tokniuan, tlen omokuayejyekouayaj uan ken okipiayaj inyelis, onikitak iTlaixpantijkauan Jehová melauak kichiuaj tlen toTajtsin Dios kineki”.

14. ¿Ken uelis ikaj kipaleuis tlen tikchiuaj?

¹⁴ Tla akin tikmachtiaj kineki moapolaktis moneki kichiuas tlen momachtijtok. Ualeua oui ijkon kichiuas pero ijkuak kitas ken kipaleuia kichiuas tlen kijtoua Biblia, xamo non kipaleuis ma kineki kichiuas ijkon ken tejuan tikchiuaj (1 Cor. 11:1). Ma tikitakan tlen okipanok tokni Hanae, tlen itech yotimotlapouijkej. Ye okijto: “Tokniuan okichiuayaj tlen ne onimomachtijtoka. Yejuan onechmachtijkej ma nikinyolchikaua oksekimej, ma nikintlapojpolui uan ma nitetlasojtla. Nochipa okijtouayaj tlen kuali okichiuayaj oksekimej. Ne oniknekiaya nikchiuas ijkon ken yejuan”.

15. Ijkon ken kijtoua Proverbios 27:17, ¿tleka moneki ma timouikakan iuan akinmej momachtijtokej uan touan monechikouaj?

¹⁵ Ma timouikakan inmiuan akinmej momachtijtokej. Ijkuak touan monechikos akin momachtijtok iuan ma timotlapouikan (Filip. 2:4). Uelis tiktlajtlaniskej ken  kajki ifamilia, kox kipia tekitl uan ken kita tlen momachtijtok. Pero amo ma tiktlajtlanikan tlen amo toteki. Tla tikitaj itlaj kipatla itech inemilis, ma tikyolchikauakan. Ijkon peuas iuan timouikaskej, tikpaleuiskej okachi ma kipatla inemilis uan ma moapolakti (xiktlajtolti Proverbios 27:17). Hanae axkan tlapaleuia ken precursora regular uan okijto ken omomachili ijkuak opejki monechikoua: “Ijkuak opejki nimouika iuan tokniuan, okachi oniknekiaya nimonechikos. Maski onisotlauaya, nochipa onimonechikouaya. Onechpaktiaya nimotlapouis iuan tokniuan porque inmiuan onimouikaya uan non onechpaleui ayakmo ma nimouika iuan akinmej amo iTlaixpantijkauan Jehová. Oniknekiaya kuali nimouikas iuan Jehová uan tokniuan, ik non, onimoapolakti”.

16. ¿Ken uelis titlapaleuiskej para akin momachtijtok kuali ma momachili iuan tokniuan?

¹⁶ Ijkuak peua kipatla inemilis akin momachtijtok, ma tikpaleuikan para ma kimachili noijki tikpatioitaj itech tlanechikol. Uelis ijkon tikchiuaskej tla tikyoleuaj tokalijtik (Heb. 13:2). Se tokni tlakatl tlen itoka Denís uan tlapaleuia ompa Moldavia kilnamiki ijkuak omomachtiaya Biblia, ye okijto: “Miak uelta nosiua uan ne otechyoleuayaj tokniuan inkalijtik, otechyolchikauayaj ijkuak otechtlapouiayaj ken okinpaleui Jehová. Non otechpaleui ma tiknekikan tiktekichiuiliskej Jehová uan noijki otechpaleui ma tikajsikamatikan tla ijkon tikchiuaskiaj, melauak tiyolpakiskiaj”. Ijkuak ikaj tlen momachtijtok peua tetlapouia uelis tikiluiskej touan ma tetlapouiti. Se tokni tlen itoka Diego uan chanti Brasil okijto: “Miakej tokniuan onechyoleuayaj inmiuan ma nitetlapouiti. Non onechpaleui okachi ma nikinmixmati uan okachi opejki nimouika iuan Jehová uan Jesús”.

17. ¿Tlen uelis kichiuaskej tlayekankej para kipaleuiskej akin momachtijtok?

¹⁷ Ma motlapouikan iuan akin momachtijtok. Tlayekankej, tla nankipaleuiaj akin momachtijtok uan nankitlasojtlaj, ijkon nankipaleuiskej ma moapolakti. ¿Uelis iuan nanmotlapouiskej ijkuak timonechikouaj? Tla nankilnamiktokej itoka, kitas melauak namechtekipachoua. Kuali momachilis tla ijkuak nanmonechikouaj, nankinotsaj ika itoka ijkuak peuas tlanankilis. ¿Uelis nanmaxiliskej para nantlamachtitiuij iuan se tokni? Tla ijkon nankichiuaskej, melauak kipaleuis akin momachtijtok. Se tokni tlen itoka Jackie uan chanti Nigeria, tlapaleuia ken precursora,  ye okijto: “Akinmej nikinmachtia motlajtlachialtiaj ijkuak kimatij tokni tlayekanki tlen iuan onitlamachtito. Se akin nikmachtia okijto: ‘Akin techyekana itech noreligión amo keman ijkon kichiua. Ye san yaui inkalijtik akinmej kipiaj miak tomin uan yaui tla kitlaxtlauiskej’”. Akin ijkon okijto yopejki touan monechikoua.

18. ¿Ken uelis kichiuaskej tlayekankej tlen kijtoua Hechos 20:28?

¹⁸ Xikinmiluikan tokniuan ken okachi kuali tlamachtiskej uan noijki xikinyolchikauakan. Tlayekankej moneki xikinpaleuikan akinmej tetlapouiaj para okachi kuali tetlapouiskej uan tlamachtiskej (xiktlajtolti Hechos 20:28). Tla nankitaj se tokni momojtia namouan tlamachtis, namejuan xikiluikan iuan nantlamachtiskej. Jackie tlen itech yotimotlapouijkej, okijto: “Tlayekankej nechtlajtlaniaj ken katej akinmej nikinmachtia. Ijkuak itlaj nikita oui, nechiluiaj tlen uelis nikchiuas”. Tlayekankej uelis kinyolchikauaskej uan kinpaleuiskej tokniuan para nochipa ma mochijchikajtokan uan ma kinpaleuikan akinmej kinmachtijtokej (1 Tes. 5:11). Jackie noijki okijto: “Nechpaktia ijkuak tlayekankej nechyolchikauaj uan nechiluiaj kipatioitaj tlen nikchiua. Tlen nechiluiaj melauak nechpaleuia, yetoskia ken atl sesek ijkuak tlatotonia. Ijkuak nechyolchikauaj nechpaleuia ma nikilnamikto kuali tlen nikchijtok uan noijki okachi niyolpaki ijkuak nitlamachtia” (Prov. 25:25).

19. ¿Tlen uelis tikchiuaskej tinochtin?

¹⁹ Xamo amo tinochtin ikaj tikmachtiaj pero uelis tikpaleuiskej ikaj ma kitekichiuili Jehová. Amo sapanoua ma titlajtokan ijkuak se tokni techiluia iuan ma titlamachtitij uan kuali ma timomachtikan para tikmatiskej tlen tikijtoskej, ijkon uelis tikpaleuiskej. Ma timouikakan iuan akinmej peuaj monechikouaj uan ma tikchiuakan tlen moneki para ijkon yejuan kitaskej tlen moneki kichiuaskej. Uan tlayekankej uelis kinyolchikauaskej akinmej momachtijtokej tla inmiuan motlapouiaj. Noijki uelis kinyolchikauaskej tokniuan tlen tlamachtiaj tla kinpaleuiaj okachi kuali ma tlamachtikan uan noijki tla kinmiluiaj tlen kuali kichijtokej. Melauak tiyolpakij ijkuak titlapaleuiaj maski san tepitsin para ikaj ma kitlasojtla Jehová uan ma kitekichiuili.