1. ¿Tlen ouijkayotl tikixnamikij tiitekipanojkauan Jehová?

¿TIKIXNAMIKTOKEJ se ouijkayotl? Xamo se tokni itlaj otechchiuili uan otechyolkoko (Sant. 3:2). Xamo akinmej inmiuan timomachtiaj noso titekipanouaj techpinauiaj porque tiktekichiuiliaj Jehová (1 Ped. 4:3, 4). Xamo se tofamiliar amo kineki ma timonechikokan nion ma titetlapouikan (Mat. 10:35, 36). Tla sapanoua titlajyouijtokej, xamo tiknekiskiaj ayakmo tiktekichiuiliskej Jehová. Pero ma tikilnamiktokan maski san tlen techpanos Jehová kichiuas ma tiyetokan tiixtlamatkej uan techpaleuis ma titlaxikokan.

2. Ijkon ken kijtoua Romanos 15:4, ¿ken uelis techpaleuis ijkuak tiktlajtoltiaj Biblia?

² Itech iTlajtol Jehová techyekiluia ken sekimej itekipanojkauan okipixkej seki ouijkayotl. Techtlapouia tlen okinpanok porque kineki ma techpaleui. Ijkon okijto apóstol Pablo itech Romanos 15:4 (xiktlajtolti). Ijkuak tiktlajtoltiaj tlen okinpanok itekipanojkauan Jehová, techyolseuia uan techyolchikaua. Pero amo san moneki ma tiktlajtoltikan Biblia. Tlen tiktlajtoltiskej moneki techpaleuis ma tikpatlakan tlen timokuayejyekouaj uan ma ajsi itech toyolo. Ijkuak amo tikmatij ken tikyektlaliskej se ouijkayotl uelis ijkin tikchiuaskej: (1) ma timotlatlaujtikan, (2) ma timokuayejyekokan techpanotok tlen tiktlajtoltijtokej, (3) ma tikitakan ken techpaleuis uan (4) ma tikchiuakan tlen moneki. Ma tikitakan ken uelis tikchiuaskej. * Ijkon timomachtiskej  para tikitaskej tlen okipanok tekiua David uan apóstol Pablo.

3. Ijkuak tiktlajtoltiskej Biblia, ¿tlen moneki tikchiuaskej uan tleka?

³ (1) Ma timotlatlaujtikan. Ijkuak tiktlajtoltiskej Biblia, achto ma timotlatlaujtikan uan ma tikiluikan Jehová ma techpaleui ma tikajsikamatikan tlen tiktlajtoltiskej. Tla tiktemojtokej tlen techpaleuis ma tikyektlalikan se ouijkayotl, ma tikiluikan Jehová ma techpaleui ma tikajsikan itech iTlajtol tlen moneki tikchiuaskej (Filip. 4:6, 7; Sant. 1:5).

4. ¿Tlen moneki ma tikchiuakan ijkuak timomachtiaj?

⁴ (2) Ma timokuayejyekokan techpanotok tlen tiktlajtoltijtokej. Jehová okichi ma tiuelikan ma timokuayejyekokan uan non se kualtsin tetliokolil tlen otechmakak. Ijkuak tiktlajtoltiaj Biblia, ma timokuayejyekokan ken panotoskia tlen tiktlajtoltijtokej. Noijki ma timokuayejyekokan techpanotok tlen ompa kijtoua. Ma timokuayejyekokan tikitaj tlen ompa kijtoua uan noijki ma tikmachilikan tlen okimachili akin itech timomachtijtokej.

5. ¿Tlen moneki ma tikchiuakan?

⁵ (3) Ma tikitakan ken techpaleuis. Moneki ma tikitakan uan ma timokuayejyekokan tlen tiktlajtoltiaj uan noijki ma tikitakan ken techpaleuia. Tla ijkon tikchiuaj, tikajsikamatiskej nochi tlen timomachtijtokej. Non yetoskia ken titlakualchiuaskej, moneki tiktsoyoniskej nochi tlen kiuika tlakuali para uelik kisas. Noijki ijkon, ijkuak tikitaj noso timokuayejyekouaj tlen tiktlajtoltijtokej, moneki ma tikilnamiktokan nochi tlen opanok para uelis tikajsikamatiskej. Techpaleuis tla ijkin timotlajtlaniskej: “¿Ken okiyektlali itekipanojka Jehová ouijkayotl tlen okipiaya? ¿Ken okipaleui Jehová? ¿Ken uelis nikchiuas ken ye ijkuak nikixnamikis ouijkayotl?”.

6. ¿Tleka moneki ma tikchiuakan tlen yotikitakej?

⁶ (4) Ma tikchiuakan tlen moneki. Jesús okijto tla amo tikchiuaj tlen timomachtiaj, yetoskia ken tlakatl tlen kichijchiua ikalijtik ipan xali. Sapanoua tekipanoua pero san nenka kichiua. ¿Tleka? Porque ijkuak ejekakiauis uan tlatemis, ikalijtik xixinis (Mat. 7:24-27). Noijki ijkon tla timotlatlaujtiaj, timokuayejyekouaj techpanotok tlen tiktlajtoltijtokej uan tikitaj ken techpaleuis pero amo tikchiuaj tlen otimomachtijkej, san nenka. Amo tikpiaskej chikauak totlaneltokilis ijkuak tikixnamikiskej se ouijkayotl. Pero tla timomachtiaj uan tikchiuaj tlen otikitakej, techpaleuis ma tikpejpenakan tlen moneki, tikpiaskej yolseuilistli uan okachi titlaneltokaskej (Is. 48:17, 18). Axkan timomachtiskej tlen okipanok tekiua David uan ma tikchiuakan naui tlamantli tlen yotikitakej.

7. ¿Itech akin timotlapouiskej?

⁷ ¿Itlaj otechchiuili se toyolikni noso se tofamiliar? Tla ijkon yotechpanok techpaleuis timomachtiskej tlen okipanok Absalón, ye okatka ikone tekiua David. Absalón okixnamik itajtsin uan okinekiaya ye tlanauatis (2 Sam. 15:5-14, 31; 18:6-14).

8. ¿Tlen uelis tikchiuaskej para ma techpaleui Jehová?

⁸ (1) Ma timotlatlaujtikan. Tla otechchiuilijkej itlaj tlen amo kuali, ijkuak yotiktlajtoltijkej tlen kijtoua Biblia ma tikiluikan Jehová ken timomachiliaj (Sal. 6:6-9). Satepan ma timotlatlaujtikan para ma tikinmajsikan principios bíblicos uan ijkon tikmatiskej tlen tikchiuaskej.

9. Xikijto tlen okipanok David uan Absalón.

 ⁹ (2) Ma timokuayejyekokan techpanotok tlen tiktlajtoltijtokej. Ma timokuayejyekokan nochi tlen okipanok tekiua David uan ken omomachili. Miak xiuitl Absalón okichi seki tlamantli para israelitas ma kitlasojtlakan (2 Sam. 15:7). Ijkuak okitak uelis yiyetoskia tekiua, okintitlanki sekimej ma kinmitatij israelitas para ma kiselikan. Noijki okichi Ahitofel ma kixnamiki David, maski iuan omouikaya uan okipaleuiaya. Ijkuakon Absalón okijto okatka tekiua uan okinekiaya kikitskis uan kimiktis David. Xamo ijkuakon David omokokouaya (Sal. 41:1-9). Ijkuak David okimatki tlen okinekiaya kichiuilis ikone, san niman ocholo. Satepan isoldados Absalón okinteuijkej isoldados David. Otlatlankej isoldados David uan okimiktijkej Absalón.

10. ¿Tlen uelis kichiuaskia tekiua David?

¹⁰ Ma timokuayejyekokan ken omomachili David. Ye okitlasojtlaya Absalón uan okineltokaya Ahitofel okipaleuiaya. Pero yejuan okichiuilijkej tlen amo kuali. Okiyolkokojkej David uan hasta okinekiayaj kimiktiskej. David ueliskia mokuayejyekoskia oksekimej tlen inmiuan omouikaya noijki okipaleuiayaj Absalón uan mokuayejyekoskia noijki kichiuiliskiaj tlen amo kuali. Uelis san moyolkokoskia uan iselti choloskia noso uelis mosotlauaskia pero amo ijkon okichi. Ye okixnamik nochi tlen okipanok, ¿tlen okipaleui?

11. ¿Tlen okichi David ijkuak otlajyoui?

¹¹ (3) Ma tikitakan ken techpaleuis. ¿Tlen techmachtia tlen okipanok David? Ma timotlajtlanikan: “¿Tlen okichi David para moyolchikauas?”. Amo omomojti uan san ijkon omoka nion itlaj okichijtikiski. Ye okitlatlaujti Jehová uan okilui ma kipaleui. Noijki okinmilui iyolikniuan ma kipaleuikan. Ijkuak okijtouaya itlaj kichiuas, san niman okichiuaya. Maski okiyolkokojkej amo oyolchichiak nion omokuayejyeko nochtin kichiuiliskiaj tlen amo kuali. Ye okineltokak Jehová kipaleuiskia uan noijki akinmej inmiuan omouikaya.

12. ¿Ken okipaleui Jehová tekiua David?

¹² ¿Ken okipaleui Jehová tekiua David? Tla timomachtiskej tlen okipanok, tikitaskej Jehová okipaleui ma tlaxiko ijkuak otlajyouijtoka (Sal. 3:1-8; kanin peua). Jehová okiteochi tlen David okichi uan akinmej okipaleuijkej.

13. ¿Ken uelis tikchiuaskej ken David tla ikaj techchiuilia tlen amo kuali? (Mateo 18:15-17).

¹³ (4) Ma tikchiuakan tlen moneki. Ma timotlajtlanikan: “¿Ken uelis nikchiuas ken David?”. Tla tikmatij ken tikyektlaliskej se ouijkayotl, san niman ma tikchiuakan. Uelis tikchiuaskej tlen kijtoua Mateo capítulo 18 (xiktlajtolti Mateo 18:15-17). Amo san niman itlaj ma tikchijtikisakan porque timoyolkokouaj, timotekipachouaj noso tikualanij. Ma tikiluikan Jehová ma techyolseui uan ma techpaleui ma tiyetokan tiixtlamatkej para tikmatiskej tlen uelis tikchiuaskej. Ma tikneltokakan akinmej inmiuan timouikaj techpaleuiskej uan ma tikinkauilikan ijkon ma kichiuakan (Prov. 17:17). Nochipa ma tikchiuakan tlen Jehová techiluia itech iTlajtol (Prov. 3:5, 6).

14. ¿Keman uelis techyolchikauas tlen kijtoua 2 Timoteo 1:12-16 uan 4:6-11, 17-22?

¹⁴ ¿Amo kineki tofamilia ma tiktekichiuilikan Jehová? ¿Tichantij kanin tekiuajkej amo techkauiliaj ma timonechikokan  uan amo ma titetlapouikan? Tla kema, techyolchikauas tlen kijtoua 2 Timoteo 1:12-16 uan 4:6-11, 17-22. * Pablo okijkuilo tlen ompa kijtoua ijkuak otsaktoka.

15. ¿Tlen uelis tiktlatlaujtiskej Jehová?

¹⁵ (1) Ma timotlatlaujtikan. Ijkuak tiktlajtoltiskej nonmej versículos ma tikiluikan Jehová tlen techtlajyouiltia uan ken timomachiliaj. Ma tikiluikan tlen okachi techtekipachoua. Ma tiktlatlaujtikan ma techpaleui ma tikmatikan ken tikchiuaskej ken Pablo.

16. ¿Tlen okipanok Pablo?

¹⁶ (2) Ma timokuayejyekokan techpanotok tlen tiktlajtoltijtokej. Ma timokuayejyekokan techpanotok ken okipanok Pablo. Otsaktoka ompa Roma. Achto ompa yotsaktoka pero okimatoka kimiktiskiaj. Sekimej iyolikniuan okikajtejkej uan sapanoua osotlauaya (2 Tim. 1:15).

17. ¿Tlen uelis kichiuaskia Pablo?

¹⁷ Xamo Pablo uelis mokuayejyekoskia tla amo kichiuaskia seki tlamantli, amo kitsakuaskiaj. Uelis kualaniskia porque akinmej ochantiayaj Asia okikajtejkej uan noijki uelis mokuayejyekoskia oksekimej tlen inmiuan omouikaya noijki kichiuiliskiaj tlen amo kuali. Pero amo ijkon okichi. ¿Tleka ok okineltokak Jehová uan akinmej inmiuan omouikaya kipaleuiskiaj?

18. ¿Tlen okichi Pablo?

¹⁸ (3) Ma tikitakan ken techpaleuis. Ma timotlajtlanikan: “¿Tlen okichi Pablo para moyolchikauas?”. Maski okimatoka yikimiktiskiaj, ye okachi okipatioitaya kiueyichiuas Jehová (2 Tim. 1:3). Amo san okilnamiktoka sekimej okikajkej, ye omotlasojkamatki porque sekimej okitlasojtlayaj uan okipaleuiayaj. Noijki nochipa omomachtiaya iTlajtol toTajtsin Dios (2 Tim. 3:16, 17; 4:13). Ika nochi iyolo okineltokaya Jehová uan Jesús okitlasojtlayaj uan okimatoka yejuan nochipa kipaleuiskiaj uan kiteochiuaskiaj.

19. ¿Tlen okichi Jehová uan ijkon okipaleui Pablo?

¹⁹ Achto Jehová yokimatiltijka Pablo kitlajyouiltiskiaj porque okichiuaya ken Cristo (Hech. 21:11-13). ¿Ken okipaleui Jehová apóstol Pablo? Ye okinankili ijkuak okitlatlaujti uan okiyolchika (2 Tim. 4:17). Pablo omochijchika para kipiaskia tlen Jehová kimakaskia uan okimatilti melauak kiseliskia. Noijki Jehová okichi ma kipaleuikan akinmej inmiuan omouikaya.

20. ¿Ken uelis tikteititiskej titlaneltokaj ijkon ken okichi Pablo ken kijtoua Romanos 8:38, 39?

²⁰ (4) Ma tikchiuakan tlen moneki. Ma timotlajtlanikan: “¿Ken uelis nikchiuas ken Pablo?”. Tikmatokej noijki techtlajyouiltiskej ken ye porque tiktekichiuiliaj Jehová (Mar. 10:29, 30). Moneki tiktlatlaujtiskej Jehová uan noijki timomachtiskej para uelis titlaxikoskej ijkuak techtlajyouiltiskej. Noijki ma tikilnamiktokan okachi moneki tikpatioitaskej tikueyichiuaskej Jehová. Uelis tikneltokaskej ye amo keman techkauas toselti uan amikaj uelis kichiuas ayakmo ma techtlasojtla (xiktlajtolti Romanos 8:38, 39; Heb. 13:5, 6).

21. ¿Tlen okipaleui Aya uan Hector?

²¹ Tlen okinpanok sekimej itekipanojkauan Jehová techyolchikaua maski san tlen techpanotos. Se tokni tlen itoka Aya uan chanti Japón, okijto tlen okipanok Jonás okipaleui ayakmo ma momojti tetlapouis  itech carrito. Okse tokni tlen itoka Hector uan chanti ompa Indonesia, kitekichiuilia Jehová maski itatajuan amo kitekichiuiliaj uan ye okijto tlen okipanok Rut okipaleui okachi ma kitlasojtla Jehová uan noijki kipaleuia okachi ma kineki kitekichiuilis.

22. ¿Ken uelis techpaleuis videos, Biblia techiluia tlen yiuejkika opanok uan amochtli “Nechpaktia tlen nechmachtia Biblia”?

²² ¿Kanin uelis tikajsiskej tlen okinpanok itekipanojkauan Jehová tlen techyolchikauaskej? Uelis tikinmitaskej videos, uelis tikkakiskej Biblia techiluia tlen yiuejkika opanok uan uelis tiktlajtoltiskej amochtli “Nechpaktia tlen nechmachtia Biblia”. Non techpaleuis ma tikajsikamatikan tlen okinpanok yiuejkika itekipanojkauan Jehová. * Ijkuak non peuas tikkakiskej noso tiktlajtoltiskej, ma tiktlatlaujtikan Jehová ma techpaleui para ma tikajsikan tlen uelis techpaleuis. Ma timokuayejyekokan tejuan techpanotok tlen tiktlajtoltijtokej. Ma timokuayejyekokan tlen okichi itekipanojka Jehová tlen itech timomachtijtokej uan noijki ma timokuayejyekokan ken okipaleui Jehová. Satepan ma tikchiuakan tlen otimomachtijkej. Saiktlami ma tiktlasojkamatilikan Jehová porque otechpaleui ma tikmatikan tlen tikchiuaskej uan ma tikinyolchikauakan oksekimej, ijkon tikteititiskej melauak timotlasojkamatij.

23. ¿Tlen techiluia Jehová kichiuas itech Isaías 41:10, 13?

²³ Tlen kinauatijtok Satanás techtlajyouiltia (2 Tim. 3:1) Pero amo ma timotekipachokan nion ma timomojtikan porque Jehová kimatok tlen techpanotok. Ijkuak titlajyouiskej ye techiluia techkitskijtos ika imayekma (xiktlajtolti Isaías 41:10, 13). Tikmatokej Jehová techpaleuis uan itech Biblia tikajsiskej tlen techyolchikauas maski san tlen ouijkayotl tikpiaskej.