1. ¿Tlen yitikmatij ijkon ken kijtoua Mateo 24:9?

JEHOVÁ otechchijchi para ma titetlasojtlakan uan para ma techtlasojtlakan. Ik non, timoyolkokouaj uan xamo noijki hasta timomojtiaj ijkuak ikaj techkokolia. Se tokni tlen chanti Europa uan itoka Georgina, okijto: “Ijkuak onikpiaya 14 xiuitl nonantsin onechkokoliaya porque opejki niktekichiuilia Jehová. Amo kuali onimomachiliaya uan onimotlajtlaniaya kox amo onikatka niyolkuali”. * Se tokni tlen itoka Danilo okijto: “Ijkuak soldados onechuitekej, onechuijuikaltijkej uan onechiluijkej itlaj amo kuali nechiuiliskiaj porque niiTlaixpantijka Jehová, onimomojti uan onikmachili amitlaj nopati”. Techyolkokoua ijkuak oksekimej techkokoliaj pero Jesús okijto ijkon techpanoskia (xiktlajtolti Mateo 24:9).

2, 3. ¿Tleka techkokoliaj akinmej amo kitekichiuiliaj Jehová?

² Akinmej amo kixmatij Jehová techkokoliaj porque amo tikchiuaj ken yejuan (Juan 15:17-19). Tikintlakamatij tekiuajkej pero amo tikinueyichiuaj nion tlen kinneskayotia. San Jehová tikueyichiuaj porque san ye kinamiki tlanauatis pero Satanás uan akinmej kichiuaj ken ye kixnamikij (Gén. 3:1-5, 15). Tikinmatiltiaj oksekimej san iTekiuajkayo toTajtsin Dios kiyektlalis nochi tlen kintlajyouiltia oksekimej uan san niman kinpojpolos nochtin akinmej kikokoliaj (Dan. 2:44; Apoc. 19:19-21). Akinmej yolkualmej kinpaktia ijkon ma pano pero akinmej  amo yolkualmej kinkualania (Sal. 37:10, 11).

³ Akinmej amo kixmatij Jehová noijki techkokoliaj porque tikpiaj tonemilis ijkon ken kijtouaj itlanauatiluan Jehová. Miakej amo kitaj tlajtlakoli auilnemiskej, non tlen okichiuayaj akinmej ochantiayaj Sodoma uan Gomorra, ik non, toTajtsin Dios okinmixpolo (Jud. 7). Miakej techpinauiaj porque amo kuali tikitaj tlen yejuan kichiuaj uan tiktlakamatij tlen kijtoua Biblia (1 Ped. 4:3, 4).

4. ¿Tlen techpaleuis ma titlaxikokan ijkuak techkokoliaj?

⁴ ¿Tlen techpaleuis ma titlaxikokan maski techkokoliaj uan techuijuikaltiaj? Moneki tikneltokaskej Jehová techpaleuis. Tla titlaneltokaj itech Jehová, non techpaleuis uan ‘tiktsakuiliskeh ijkuak n diablo techmojmotlas ika kuawitl non xotlatokʼ (Efes. 6:16). Pero amo san moneki titlaneltokaskej, noijki moneki titetlasojtlaskej. Porque tla titetlasojtlaj amo san niman tikualaniskej uan tikxikoskej nochi tlen techtlajyouiltis (1 Cor. 13:4-7, 13). Tla tiktlasojtlaj Jehová, tokniuan uan hasta akinmej techkokoliaj, techpaleuis ma titlaxikokan. Non tikitaskej itech nin tlamachtil.

5. ¿Tlen okichi Jesús porque okitlasojtlaya iTajtsin?

⁵ Ijkuak ayamo okimiktiayaj Jesús, ye okinmilui imachtijkauan: “Nikchiwas tlan nechnawatia Notajtsi, para ijkó makimatikah n tlaltikpaktlakah” (Juan 14:31). Jesús okitlasojtlaya Jehová, ik non, okixiko tlen otlajyoui. Tla tejuan tiktlasojtlaj Jehová, noijki uelis titlaxikoskej.

6. Ijkon ken kijtoua Romanos 5:3-5, TNM, ¿ken timomachiliaj ijkuak techkokoliaj?

⁶ Itekipanojkauan Jehová tlaxikouaj ijkuak kintlajyouiltiaj porque kitlasojtlaj Jehová. Ma tikitakan tlen okinpanok apóstoles. Judíos tlen otlanauatiayaj itech Sanedrín okinmiluijkej ayakmo ma tetlapouikan. Pero yejuan okitlasojtlayaj Jehová, ik non, okitlakamatkej tlen okijto uan amo ‘tlen okijtojkej n tlakah’ (Hech. 5:29; 1 Juan 5:3). Axkan tekiuajkej amo kinkauiliaj tokniuan ma tetlapouikan uan kintlajyouiltiaj pero yejuan kitlasojtlaj Jehová, ik non, nochipa kitlakamatij. Ijkuak techkokoliaj amo timoyolkokouaj, tiyolpakij (Hech. 5:41; xiktlajtolti Romanos 5:3-5, TNM).

7. ¿Tlen tikchiuaskej ijkuak techixnamikis tofamilia?

⁷ Xamo okachi oui tikxikoskej ijkuak techixnamiki tofamilia. Ijkuak kitaj tiknekij tikixmatiskej Jehová, sekimej mokuayejyekouaj yotechkajkayajkej noso yotimokuapolojkej (noijki xikita Marcos 3:21). Xamo hasta kinekiskej techteuiskej. Pero Jesús yokijtojka ijkon techpanoskia, ye okijto: “Nomokokolikniwah yetoskeh non chanchiwah nomowah” (Mat. 10:36). Maski ijkon techchiuiliskej amo ma tikinkokolikan. Ijkuak okachi tiktlasojtlaj Jehová noijki okachi tikintlasojtlaj oksekimej (Mat. 22:37-39). Pero amo tikchiuaskej itlaj tlen amo kijtouaj principios bíblicos san para ikaj tikyolpaktiskej.

8, 9. ¿Tlen okipaleui se tokni ma kixiko ijkuak okixnamikej?

⁸ Yotikijtojkej tlen okipanok Georgina itech párrafo 1, ye okixiko ijkuak inantsin sapanoua okixnamik. Okijto: “Tiomej opejkej timomachtiaj Biblia iuan  iTlaixpantijkauan Jehová. Pero tlajko xiuitl satepan ijkuak yoniknekiaya nimonechikos nonantsin san niman okipatlak ken omokuayejyekouaya. Ijkuak nouan omotlapouiaya, onikitak omouikaya iuan akinmej okikajkej Jehová uan okixnamikiayaj ialtepe uan omokuayejyekouaya ken yejuan. Noijki onechuijuikaltiaya, onechtsonkaluilanaya, onechkechpatskaya uan onechintlamochiliaya noamatlajkuiloluan. Onimoapolakti ijkuak onikajxiti 15 xiuitl. Nonantsin ayakmo okinekiaya ma niktekichiuili Jehová, ik non, onechtitlanki itech se escuela kanin ompa onimokauaya. Sekimej okitekitiltiayaj drogas uan okichiuayaj okseki tlamantli amo kuali. Onikitak oui nikxikos porque omonekiaya nechtlasojtlas uan nechmaluis”.

⁹ Georgina okijto tlen okipaleui ma tlaxiko. Ye okijto: “Ijkuak nonantsin onechixnamik ijkuakon otlanki yoniktlajtoltijka Biblia. Onikneltokaya melauak tlen kijtoua Biblia uan okachi onimouikaya iuan Jehová. Nochipa oniktlatlaujtiaya uan ye onechkakiaya. Ijkuak onichantiaya itech escuela, se tokni onechyole ikalijtik para ompa timomachtiskiaj Biblia. Tokniuan onechyolchikajkej, onikinmitaya ken nofamilia. Onikitak Jehová okachi chikauak uan amo akinmej techkokoliaj”.

10. ¿Tlen moneki tikilnamiktoskej?

¹⁰ Apóstol Pablo okijkuilo amitlaj “weletis techachiwas de itech itlasojtlalis” toTajtsin Dios (Rom. 8:38, 39). Maski ualeua titlajyouiskej Jehová nochipa techpaleuis, techyolchikauas uan techyolseuis ijkon ken okipaleui Georgina. Ye noijki techpaleuis uan kinyolinis tokniuan ma techpaleuikan.

11. ¿Ken okinpaleui imachtijkauan Jesús tlen okinmilui itech Juan 15:12, 13? Xikijto tlen okichijkej sekimej tokniuan.

¹¹ Ijkuak yikimiktiskiaj Jesús, okinmilui imachtijkauan ma motlasojtlakan (xiktlajtolti Juan 15:12, 13). Ye okimatiaya non kinpaleuiskia ma mouikakan uan kixikoskiaj ijkuak oksekimej kinkokoliskiaj. Ma tikilnamikikan ijkuak okintlajyouiltijkej tokniuan tlen ochantiayaj Tesalónica. Yejuan okitlasojtlayaj Jehová,  nochipa okitlakamatkej uan otlaxikojkej (1 Tes. 1:3, 6, 7). Pablo okinmilui okachi ma motlasojtlakan (1 Tes. 4:9, 10). Non kinyoliniskia ma kinyolseuikan akinmej omoyolkokouayaj uan akinmej amo okipiayaj chikauak intlaneltokilis (1 Tes. 5:14). Yejuan okichijkej tlen Pablo okinmilui porque se xiuitl satepan itech okse carta tlen okintitlanili okinmilui: “Nomotlasojtlalis inawak oksikimeh okachi momiakilijti” (2 Tes. 1:3-5). Otetlasojtlayaj, non okinpaleui ma tlaxikokan ijkuak okinkokolijkej uan okintlajyouiltijkej.

12. ¿Ken okintlasojtlakej tokniuan Danilo uan isiua ijkuak itech inmialtepe okatka guerra?

¹² Yotimotlapouijkej tlen okipanok Danilo, ma tikitakan tlen okseki okipanok ye uan isiua. Ijkuak itech inmialtepe okatka guerra, ye uan isiua ok omonechikouayaj, ok otetlapouiayaj uan okinmakayaj oksekimej tokniuan tlen kikuaskiaj. Ye okijto: “Soldados onechiluijkej ayakmo ma nitlaneltoka itech Jehová. Ijkuak onikinmilui amo, onechuitekej uan okijtojkej nechtlatoponiliskiaj pero bala opanok ipan nosonteko”. Ijkuak yoyajtokaj onechiluijkej mokopaskiaj uan kichiualtiskiaj nosiua inmiuan ma moteka. San niman tokniuan otechtitlankej itech tren para ma tiakan okse altepetl. Nochipa nikilnamiki tokniuan otechtlasojtlakej. Ijkuak ompa otiajsitoj tokniuan otechtlamakakej, onechpaleuijkej ma nikajsi kanin nitekipanoskia uan kanin tichantiskiaj. Satepan tejuan noijki otikinpaleuijkej oksekimej tokniuan ijkuak oksekan oyayaj porque inmialtepe okatka guerra. Ijkuak timotlasojtlaj iuan tokniuan, titlaxikouaj ijkuak techkokoliaj.

13. ¿Ken techpaleuia iespíritu santo Jehová ijkuak techkokoliaj?

¹³ Jesús okijto moneki tikintlasojtlaskej akinmej techkokoliaj (Mat. 5:44, 45). Maski ualeua oui, Jehová techpaleuia ika iespíritu santo. ¿Ken techpaleuia ma titlaxikokan ijkuak oksekimej techkokoliaj? Titetlasojtlaj, amo san niman tikualanij, tiyolyamankej, tikinchiuiliaj tlen kuali oksekimej uan kuali timonauatiaj (Gál. 5:22, 23). Miakej tlen ifamilia okinmixnamikiaya ayakmo ijkon kichiuaj  uan sekimej opejkej kitekichiuiliaj Jehová porque insiua, innamik inkone noso ikaj okiteititi kuali tlen kichiua ijkon ken yotikitakej. Ik non, tla oui tikitaj tikintlasojtlaskej akinmej techkokoliaj, ma tikiluikan Jehová ma techpaleui ika iespíritu santo (Luc. 11:13). Ma tikilnamiktokan okachi kuali tla nochipa tikchiuaj tlen Jehová techiluia (Prov. 3:5-7).

14, 15. ¿Ken okipaleui se tokni Romanos 12:17-21 ijkuak inamik amo okinekiaya ma kitekichiuili Jehová?

¹⁴ Ma tikitakan tlen okipanok Yasmín ye chanti Oriente Medio. Inamik omokuayejyeko okikajkayajkej ijkuak omochi iTlaixpantijka Jehová uan ayakmo okinekiaya ma kitekichiuili. Okiuijuikalti uan okinmilui ifamiliares, se tlen otlayekanaya itech se religión, se akin tetlajchiuia ma kiluikan itlaj amo kuali kipanoskia uan okitlajtlakoltijkej okichiuaya amo kuali ma mouika ifamilia. Inamik tokni oyajki kanin omonechikouaya uan okinuijuikalti tokniuan. Miak uelta Yasmín ochokaya porque inamik okitlajyouiltiaya.

¹⁵ Ijkuak omonechikouaya, tokniuan okiyolseuiayaj uan okiyolchikauayaj. Tlayekankej okiluijkej ma kilnamikto tlen kijtoua Romanos 12:17-21 (xiktlajtolti). Yasmín okijto: “Onikitaya oui nikchiuas tlen kijtoua Biblia pero oniktlatlaujti Jehová ma nechpaleui uan ok onimochijchika. Ik non, ijkuak nonamik san okinekiaya kisokiotis piso, ne onikchipauaya. Ijkuak onechiluiaya tlen amo kuali, ne kuali oniknankiliaya uan onikmaluiaya ijkuak omokokouaya”.

16, 17. ¿Ken uelis tikchiuas ken okichi Yasmín?

¹⁶ Yasmín okitlasojtlak inamik, ik non, okipatlak iyelis. Ye okijto: “Opejki nechneltokilia porque ye kimati ne amo keman nitlakajkayaua. Kuali onechkak ijkuak otimotlapouijkej itech religión uan okijto ayakmo kualanis. Axkan hasta nechyoleua ma nimonechikoti. Okachi kuali timouikaj uan tiyolpakij. Nikneltoka se tonal kinekis momachtis uan nouan kitekichiuilis Jehová”.

¹⁷ Tlen okichi Yasmín techititia akin tetlasojtla “kimati moyekchia iwa nochi kixikoa” (1 Cor. 13:4, 7). Techyolkokoua ijkuak oksekimej techkokoliaj pero tla titetlasojtlaj, tikinyolyemaniaj. Tikyolpaktiaj Jehová ijkuak titetlasojtlaj. Akinmej  techixnamikij maski techkokoliskej tejuan uelis tiyolpaktoskej. Ma tikitakan ken uelis tikchiuaskej.

18. ¿Tleka uelis tiyolpakiskej maski techkokoliaj?

¹⁸ Jesús okijto: “Miak yolpakílistli nonkipiaskeh ijkuak nomechkokoliskeh” (Luc. 6:22). Amo tiktemouaj ma techkokolikan porque titlaneltokaj itech Jehová. Ik non, ¿tleka uelis tiyolpakiskej maski techkokoliskej? Ma tikitakan eyi tlamantli. Achto, ijkuak nochi tikxikouaj Jehová techselia (1 Ped. 4:13, 14). Ome, okachi titlaneltokaj itech Jehová (1 Ped. 1:7). Eyi, toTajtsin Jehová techkauilis nochipa ma tiyoltokan (Rom. 2:6, 7).

19. ¿Tleka oyolpakiayaj imachtijkauan Jesús maski okinuitekiayaj?

¹⁹ Satepan ijkuak toTajtsin Dios okiyoliti Jesús, apóstoles oyolpakej ijkon ken ye okinmiluijka. Maski okinuitekej uan ayakmo okinkauiliayaj ma tetlapouikan, yejuan oyolpakiayaj porque “Dios okinkawili matlaijyowikah iwa makimpijpinawikah por [okitemaltiltiayaj] Itoka n Jesús” (Hech. 5:40-42). Okachi okitlasojtlayaj inTeko uan amo okinmojtiayaj tlen okichiuayaj akinmej okinkokoliayaj. Okiteititijkej okitlasojtlayaj porque “nochipa otetlapouijkej”. Axkan miakej tokniuan nochipa kitekichiuiliaj Jehová maski kipiaj miak ouijkayotl. Kimatokej Jehová amo kilkauas kiteititiaj kitlasojtlaj uan okseki tlamantli tlen kichiuaj (Heb. 6:10).

20. ¿Tlen tikitaskej itech okse tlamachtil?

²⁰ Ok techkokolijtoskej porque miakej amo kitekichiuiliaj Jehová (Juan 15:19). Pero amo ma timomojtikan, Jehová kinyolchikauas uan kinmaluis akinmej kitekichiuiliaj ika nochi inyolo (2 Tes. 3:3). Ik non, ma tiktlasojtlakan Jehová, tokniuan uan hasta akinmej techkokoliaj. Tla ijkon tikchiuaskej san sekan tiktekichiuiliskej Jehová, iuan timouikaskej, tikueyichiuaskej uan tla titetlasojtlaj, titlaxikoskej maski techkokoliaj.