1. ¿Tlen uelis kichiuaskiaj judíos ijkuak okiskej Babilonia?

 JEHOVÁ okichi tekiua Ciro ma kinpaleui israelitas ma kisakan itech altepetl Babilonia. Noijki okinpaleui judíos ma mokopakan inmialtepe uan ma kiyektlalikan kanin kiueyichiuaskiaj Jehová (Esd. 1:1, nota 3). Sapanoua oyolpakej porque axkan uelis kiueyichiuaskiaj Jehová ken ye kineki itech inmialtepe.

2. ¿Tlen okichijkej judíos ijkuak oajsitoj Jerusalén?

² Itech 537 ijkuak ayamo oajsiaya xiuitl 1, akinmej okiskej altepetl Babilonia oajsitoj Jerusalén, non altepetl okatka ik sur ompa Judá uan san niman opejki tekipanouaj uan itech 536 okitlakxilijkej teokali.

3. ¿Tlen okinpanok judíos?

³ Ijkuak opejki kichijchiuaj teokali, akinmej ochantiayaj itech okseki altepemej okinmiluijkej miak tlamantli tlen amo kuali uan okinyolkokojkej israelitas para ayakmo ma tekipanokan (Esd. 4:4). Pero satepan okachi oui okinpanok. Itech xiuitl 522 ijkuak ayamo oajsiaya xiuitl 1, opejki tlanauatia tekiua Artajerjes. * Akinmej okinkokoliayaj judíos, omopaleuijkej itech  tlen otlanauatiaya tekiua uan ijkon ayakmo kinkauiliskiaj ma kichijchiuakan teokali (Sal. 94:20). Okijtojkej judíos amo okitlakamatiayaj tekiua (Esd. 4:11-16). Tekiua okinneltokili tlen okiluijkej uan ayakmo okinkauili ma kichijchiuakan teokali (Esd. 4:17-23). Ik non, ayakmo okichijkej tlen okipeualtijkej (Esd. 4:24).

4. ¿Tlen okichi Jehová ijkuak amo okinkauilijkej judíos ma kichijchiuakan teokali? (Isaías 55:11).

⁴ Akinmej ik ompa ochantiayaj amo okiueyichiuayaj Jehová uan sekimej tlen otlanauatiayaj iuan tekiua persa, okijtouayaj amo kinkauiliskiaj judíos ma kichijchiuakan teokali. Pero Jehová okinekiaya ma kichijchiuakan uan ye nochipa kichiua tlen kineki (xiktlajtolti Isaías 55:11). ¿Ken okichi? Okitlali iprofeta Zacarías uan okititi chikueyi tlamantli. Non profeta okinmilui judíos tlen Jehová okititi uan ijkon okinyolchika para ma kichiuakan tlen Jehová okinekiaya. Zacarías okitak se candelabro uan ome olivos.

5. ¿Tlen timomachtiskej?

⁵ Tlen okitak Zacarías, se candelabro uan ome olivos okinyolchika israelitas. Axkan tinochtin ualeua timosotlauaj pero tlen okitak Zacarías uelis techpaleuis nochipa ma tiktekichiuilikan Jehová maski techtlajyouiltiskej, ijkuak itlaj techpanoua uan ijkuak itlaj technauatiaj uan amo tikajsikamatij.

6. ¿Ken okinpaleui judíos tlen kijtoua Zacarías 4:1-3? (Xikita dibujo itech página 1).

⁶ (Xiktlajtolti Zacarías 4:1-3). Zacarías okitak se candelabro uan ome olivos, non okinyolchika judíos ijkuak okinkokoliayaj. ¿Tleka? Zacarías okitak chiauak tlen kitemaka ome olivos kichiua ma xotlato chikome tlauili tlen kipia candelabro, non kipaleuia amo keman ma seui. Zacarías okitlajtlani ángel tlen kijtosneki tlen okitak. Ye okilui tlen Jehová okijto: “‘Amo mochiuas ika miakej soldados nion ika chikaualistli, mochiuas porque niktekitiltis noespíritu’, ijkon kijtoua Jehová akin kiyekana miakej soldados” (Zac. 4:4, 6). Chiauak tlen okisaya itech ome kuajmej, okijtosnekiaya iespíritu santo toTajtsin Dios, non amo keman tlami, ik non, soldados persas amo uelis kintlaniliskiaj judíos. Uelis tekipanoskiaj porque Jehová okinpaleuijtoka. ¡Non okinyolchika! Omonekiaya kineltokaskej Jehová kinpaleuiskia uan ijkon okichijkej maski amo okinkauiliayaj ma tekipanokan.

7. ¿Tlen okinpaleui judíos?

⁷ Satepan itlaj opanok uan non okinpaleui judíos. Itech 520 ijkuak ayamo oajsiaya xiuitl 1, ompa Persia otlanauatiaya Darío l. Ijkuak otlanauatijtoka ome xiuitl, okitak okatka se tlanauatil tlen okijtouaya judíos amo ma kichijchiuakan teokali pero ye okinkauili ma kitlamikan (Esd. 6:1-3). Tlen okinmiluijkej okichi ma yolpakikan. Satepan tekiua okinnauati oksekimej altepemej amo ma kintsakuilikan, noijki okinmilui ma kinmakakan tomin uan tlen kinekiskiaj para kichijchiuaskiaj  teokali (Esd. 6:7-12). Ijkon judíos okitlamijkej teokali itech kanaj naui xiuitl, itech 515 ijkuak ayamo oajsiaya xiuitl 1 (Esd. 6:15).

8. ¿Tleka uelis titlaxikos maski mitskokoliskej?

⁸ Axkan sekimej tokniuan noijki kinkokoliaj, sekimej chantij kanin amo kinkauiliaj ma tetlapouikan. Ompa uelis kintsakuaskej, kinuikaskej inmixpan tekiuajkej uan non kichiuas oksekimej ma kixmatikan Jehová (Mat. 10:17, 18). Ualeua ijkuak tekiuajkej mopatlaj kinpaleuiaj tokniuan noso ualeua jueces kinkauiliaj ma tetlapouikan. Oksekimej tokniuan okse tlamantli kinpanoua, itech inmialtepe kinkauiliaj ma kiueyichiuakan Jehová pero infamiliares amo kinkauiliaj (Mat. 10:32-36). Sekimej tlen ijkon okichiuayaj, satepan okitakej amo uelis kichiuaskej infamiliares amo ma kiueyichiuakan Jehová. Oksekimej tlen amo okinekiayaj satepan opejki momachtiaj, ik non, amo ximomojti, maski mitstlajyouiltiskej ok xitlaxikojto porque Jehová mitspaleuis ika iespíritu santo.

9. ¿Tleka omoyolkokojkej sekimej judíos?

⁹ Ijkuak okitlakxilijkej teokali, sekimej judíos tlen yokipiayaj miak xiuitl ochokakej (Esd. 3:12). Yejuan okitakej sapanoua kualtsin teokali tlen okichijchi Salomón, ik non, omoyolkokojkej porque omokuayejyekouayaj yankuik teokali tlen kichijchiuaskiaj amo ijkon yetoskia (Ageo 2:2, 3). ¿Ken kipaleuiskiaj ma yolpakikan tlen okitak Zacarías?

10. ¿Ken okinpaleui judíos tlen okijto ángel tlen kajki itech Zacarías 4:8-10?

¹⁰ (Xiktlajtolti Zacarías 4:8-10). ¿Tlen kijtosneki ijkuak ángel okijto judíos yolpakiskiaj uan kitaskiaj okipiaya se plomo itech ima tekiua judío Zorobabel? Plomo kitekitiltiaj ijkuak kalchiuaj para kitaskej itlaj amo ma yeto chijkoltik. Tlen ángel okinmilui judíos, kijtosneki kitlamiskiaj teokali ijkon ken Jehová okinekiaya maski sekimej kitaskiaj amo kualtsin. Tla Jehová yolpakiskia, yejuan noijki omonekiaya yolpakiskiaj. ToTajtsin Dios okachi  okipatioitaya itech non teokali ma kiueyichiuakan ijkon ken ye okinekiaya. Judíos yolpakiskiaj tla kiueyichiuaskiaj Jehová ken ye kineki.

11. ¿Tlen kitaj oui sekimej tokniuan?

¹¹ Miakej tikitaj oui itlaj tikpatlaskej. Sekimej tokniuan tlen okachi okitekichiuiliayaj Jehová, axkan ayakmo uelij. Sekimej tokniuan ayakmo okachi kitekichiuiliaj Jehová porque yikipiaj miak xiuitl. Ijkuak ijkon techpanoua uelis timoyolkokoskej. Xamo achto amo tikajsikamatiskej tleka ijkon techpanotok uan xamo uelis tikilnamikiskej tlen achto otikchiuayaj. Xamo timokuayejyekoskej ayakmo okachi tiktekichiuiliaj Jehová (Prov. 24:10). Ma tikitakan ken techpaleuis tlen okitak Zacarías okachi ma tiktekichiuilikan Jehová.

12. ¿Ken techpaleuia tlen okitak Zacarías amo ma timosotlauakan ijkuak itlaj techpanoua?

¹² Ijkuak itlaj techpanoua, ma tikitakan ken Jehová mokuayejyekoua uan non techpaleuis. Ye kichijtok miak tlamantli axkan uan techkauilia ma tiyetokan “titlapalewijkeh itech iteki” (1 Cor. 3:9). Uelis mopatlas ken tiktekichiuiliaj Jehová pero ye nochipa techtlasojtla. Ik non, tla itlaj mopatla itech ialtepe Jehová uan ayakmo ueli titlapaleuiaj, amo ma timokuayejyekojtokan tleka ijkon otechpanok, ma tikiluikan Jehová ken okachi uelis tiktekichiuiliskej (Ecl. 7:10). Amo ma timokuayejyekokan tlen ayakmo uelis tikchiuaskej, ma timokuayejyekokan tlen kema uelis tikchiuaskej. Tlen okitak Zacarías techyolchikaua uan techpaleuia ma tiyolpakikan uan ma tiktekichiuilijtokan Jehová, maski ayakmo titlapaleuiskej ken achto otikchiuayaj.

13. ¿Tleka sekimej judíos xamo amo kuali okitakej kichijchiuaskiaj teokali?

¹³ Maski judíos amo okinkauiliayaj ma kichijchiuakan teokali, akinmej okinyekanaya, ueyi teopixki Jesúa (Josué) uan tekiua Zorobabel opejki kichijchiuaj (Esd. 5:1, 2). Xamo sekimej judíos  okineltokayaj amo kuali tlen okichiuayaj porque akinmej okinkokoliayaj amo kinkauiliskiaj. Josué uan Zorobabel okiyekanayaj tekitl, ik non, omonekiaya kimatiskej Jehová kinpaleuiskia uan ye kema okinpaleui. Ma tikitakan ken okichi.

14. ¿Ken okinyolchika teopixki Josué uan tekiua Zorobabel tlen kijtoua Zacarías 4:12 uan 14?

¹⁴ (Xiktlajtolti Zacarías 4:12, 14). Jehová okititi Zacarías ome olivos, kijtosneki Josué uan Zorobabel. Non ome tlakamej yetoskiaj ken okatkaj inauak Jehová. Non okiteititi Jehová okineltokaya yejuan uelis kichiuaskiaj tlen ye okinekiaya. Ik non, judíos uelis kineltokaskiaj kuali tlen kichiuaskiaj Josué uan Zorobabel porque Jehová okinpaleuiaya para ma kinyekanakan judíos.

15. ¿Ken tikteititiaj tiktlakamatij tlen techiluia Jehová?

¹⁵ Axkan Jehová kiyekana ialtepe ika iTlajtol. Ompa techiluia ken kineki ma tikueyichiuakan. Tejuan tikteititiaj tiktlakamatij itlanauatiluan ijkuak nochipa tiktlajtoltiaj iTlajtol uan timokuayejyekouaj tlen ompa kijtoua. Ximotlajtlani: “Ijkuak niktlajtoltia iTlajtol noso se amatlajkuilol, ¿nimokuayejyekoua ken nechpaleuia tlen ompa kijtoua? ¿Okachi nimomachtia tlen amo nikajsikamati noso san niktlajtoltia?” (2 Ped. 3:16). Tla timokuayejyekouaj tlen Jehová techmachtia, okachi kuali tiktekichiuiliskej (1 Tim. 4:15, 16).

16. ¿Tlen techpaleuis ma tiktlakamatikan tlen techiluia “tlakeuali yolmelajki uan ixtlamatki” maski amo tikajsikamatij?

¹⁶ Jehová techyekana ika “tlakeuali yolmelajki uan ixtlamatki” (Mat. 24:45, TNM). Ualeua technauatia seki tlamantli tlen amo tikajsikamatij, ken ijkuak tlaxixini noso timokuayejyekouaj sapanoua techmaluia ijkuak onka se ueyi kokolistli. Ik non, ¿tlen moneki tikchiuaskej tla timokuayejyekouaj tlen technauatia amo techpaleuis? Xamo techpaleuis tla tikilnamikij ken okinpaleui judíos ijkuak okintlakamatkej tlen okinmiluijkej Josué uan Zorobabel. Noijki techpaleuis tlen yiuejkika okinpanok sekimej itekipanojkauan  Jehová. Ye okinmilui tlen omonekiaya kichiuaskiaj, xamo yejuan omokuayejyekouayaj amo kinpaleuiskia pero satepan kema okinpaleui (Juec. 7:7; 8:10).

17. ¿Ken okinpaleui judíos tlen okitak Zacarías?

¹⁷ Maski amo ouejka tlen okitak Zacarías, ome olivos uan candelabro, non okinpaleui judíos okachi ma kitekichiuilikan Jehová. Judíos okajsikamatkej tlen okitak Zacarías uan okichijkej tlen omomachtijkej, okitakej Jehová okinyekanaya uan okintlasojtlaya. Ika iespíritu santo, okinpaleui ma kitlamikan teokali uan ma yolpakikan (Esd. 6:16).

18. ¿Ken techpaleuis tlen okitak Zacarías?

¹⁸ Tlen okitak Zacarías, se candelabro uan ome olivos uelis techpaleuis. Yotimomachtijkej techpaleuis ma titlaxikokan maski titlajyouiskej, ma tiyolpakikan maski itlaj techpanoua uan ma tikneltokakan tlen technauatiskej maski amo tikajsikamatij. Ik non, ¿tlen tikchiuaskej ijkuak itlaj techpanos? Ijkon ken Zacarías, achto ma tikitakan ken Jehová kinmaluijtok itekipanojkauan. Non kijtosneki okachi ma titlaneltokakan uan nochipa ma tikueyichiuakan Jehová ika nochi toyolo (Mat. 22:37). Ijkon Jehová techpaleuis nochipa ma tiktekichiuilikan uan tiyolpakiskej (Col. 1:10, 11).