Tla ikaj kitlajtoltia uan amo kuali mokuayejyekoua tlen kijtouaj nonmej versículos, uelis ijkon motlajtlanis. Pero Biblia kijtoua ome tlakamej omotokayotiayaj Mefibóset uan tla tiktlajtoltiskej tlen opanok, tikitaskej tlen techmachtia.

Tekiua Saúl okinpixki chikome itelpochuan uan ome ichpochuan. Achto itelpoch omotokayotiaya Jonatán, satepan se isiua tlen omotokayotiaya Rizpá okipixki se ikone tlen okitokayotijkej Mefibóset. Noijki Jonatán okipixki se ikone tlen omotokayotiaya Mefibóset. Ik non, se itelpoch Saúl uan se ixui omotokayotiayaj Mefibóset.

¿Tleka David okintemakti miakej tlakamej para ma kinmiktikan? Tekiua Saúl opejki kinkokolia gabaonitas tlen ochantiayaj iuan israelitas uan okinek kinmixpolos. Nesi miakej okinmikti. Tlen okinekiaya kichiuas tekiua Saúl sapanoua amo kuali. Porque ijkuak Josué okinyekanaya israelitas, omokajkej amo kinteuiskiaj gabaonitas (Jos. 9:3-27).

Tlen omoijto kichiuaskiaj, ok omonekiaya kitlakamatiskej ijkuak okatka Saúl pero ye okinekiaya kinmixpolos. Uan ye uan ifamilia sekimej okinmixpolojkej (2 Sam. 21:1). Ijkuak David opejki tlanauatia, gabaonitas tlen amo okinmiktijkej okiluijkej ken okintlajyouiltijkej. David okintlajtlani ken uelis kinpaleuiskia porque Saúl sapanoua okintlajyouilti uan ijkon Jehová kiteochiuaskia tlali. Yejuan amo okitlajtlanilijkej tomin. Okiluijkej ma kinmaktili chikome ikoneuan Saúl para kinmixpoloskej (Núm. 35:30, 31). David okichi tlen okiluijkej (2 Sam. 21:2-6).

Ijkuak ijkon opanok, Saúl uan Jonatán yoixpolikej pero ikone Jonatán tlen omotokayotiaya Mefibóset ok oyoltoka. Ye amo okichi ken ikoltsin Saúl, porque ijkuak okatka konetl itlaj okipanok, ik non, amo ueli onejnemiaya. David okiluijka Jonatán nochipa iuan mouikaskia uan kinpaleuiskia ixuiuan uan Mefibóset ompa opouiaya (1 Sam. 18:1; 20:42). Biblia kijtoua tekiua David okiknomatki Mefibóset (ikone Jonatán, ikone Saúl) porque yejuan okijtojkej kuali mouikaskiaj ixpan Jehová (2 Sam. 21:7).

David okinmakak gabaonitas ome ikoneuan Saúl, se omotokayotiaya Mefibóset uan makuili ixuiuan Saúl (2 Sam. 21:8, 9). Ijkon David okixpolo ifamilia Saúl porque sapanoua otlajtlakolchijkej.

Tlen opanok techmachtia ome ikoneuan uan makuili ixuiuan Saúl okichijkej tlen amo kuali, ik non, Jehová okitekauili ma kinmixpolokan. Tlanauatil okijtouaya tla se teta okichiuaya tlen amo kuali, ikoneuan amo kitlaxtlauaskiaj. Tlanauatil noijki okijtouaya akin otlajtlakolchiuaya san ye omonekiaya kixpoloskej (Deut. 24:16). Tlen opanok techititia ome ikoneuan uan makuili ixuiuan Saúl okinmixpolojkej gabaonitas, ik non, okitlaxtlajkej tlen okichijkej.

Tlen yiuejkika opanok techmachtia amo uelis tikijtoskej amo totlajtlakol tla otikchijkej itlaj tlen amo kuali porque otechnauatijkej. Biblia kijtoua: “Kuali xitlachia kanin tinejnemi uan nochi tlen tikchiuas kuali kisas. Amo xio ik moyekma nion ik mopochma. Amo xikchiua tlen amo kuali” (Prov. 4:24-27; Efes. 5:15).