1. ¿Tlen okachi kinpaktia miakej ijkuak yauij kanin timonechikouaj? (Noijki xikita foto).

 MATIMOKUAYEJYEKOKAN se tlakatl uan isiua se tonal yauij kanin timonechikouaj. Yejuan motlajtlachialtiaj porque tokniuan kuali okinselijkej uan okitakej ken motlasojtlaj. Ijkuak mokopaj inchan, siuatl kiluia inamik: “Kuali tlen kichiuaj iTlaixpantijkauan Jehová uan non nechpaktia”.

2. ¿Tleka sekimej ayakmo kitekichiuiliaj Jehová?

² Miak ipati ijkuak kiteititiaj motlasojtlaj akinmej melauak kichiuaj ken Cristo. Pero tejuan noijki titlajtlakolejkej (1 Juan 1:8). Ikinon ijkuak okachi kuali tikinmixmatij tokniuan, okachi tikitaj tlen amo kuali kichiuaj (Rom. 3:23). Teyolkoko tikijtoskej sekimej ayakmo kitekichiuiliaj Jehová porque san kitaj ijkuak motlapololtiaj tokniuan.

3. ¿Tlen kichiuaj akinmej melauak kichiuaj ken Cristo? (Juan 13:34, 35).

³ Oksepa matikitakan texto kanin kisa nin tlamachtil (xiktlajtolti Juan 13:34, 35). ¿Tlen kichiuaj akinmej melauak imachtijkauan Cristo? Yejuan motlasojtlaj pero noijki motlapololtiaj. Noijki matikitakan  Jesús amo okijto: “Ijkon namejuan nankimatiskej namejuan notlamachtijkauan”. Ye okijto: “Tla nomejwah nonmosepantlasojtlah, nochteh [...] nomechitaskeh nomejwah de milajka notlamachtijkawah”. Jesús okiyekijto imachtijkauan uan oksekimej kimatiskiaj akinmej melauak kichiuaj ken ye porque motlasojtlaskiaj.

4. ¿Tlen uelis motlajtlaniskej sekimej?

⁴ Akinmej amo iTlaixpantijkauan Jehová xamo motlajtlaniaj: “¿Tleka akinmej melauak kichiuaj ken Cristo kinmixmatij porque motlasojtlaj? ¿Ken okiteititi Jesús okintlasojtlaya iapóstoles? ¿Ken uelis tikchiuaskej ken Jesús?”. Akinmej tiiTlaixpantijkauan Jehová noijki moneki ijkon timotlajtlaniskej. Tla ijkon tikchiuaj, okachi titetlasojtlaskej ijkuak oksekimej motlapololtiskej (Efes. 5:2).

5. ¿Tlen kijtosneki tlen okijto Jesús itech Juan 15:12, 13?

⁵ Jesús okiyekijto imachtijkauan sapanoua motlasojtlaskiaj uan miakej kitaskiaj (xiktlajtolti Juan 15:12, 13). Matikitakan tlen okinnauati: “Ximotlasojtlakah non nochteh ijkó kemi Ne nomechtlasojtla”. ¿Tlen kijtosneki? Ye okiyekijto ijkuak ikaj okitlasojtlaya ikni uelis ipatka motemakaskia. b

6. ¿Ken techmachtia iTlajtol toTajtsin Dios matikpatioitakan timotlasojtlaskej?

⁶ ITlajtol toTajtsin Dios techmachtia matikpatioitakan timotlasojtlaskej. Miakej tokniuan kijtouaj kinpaktiaj ninmej versículos: “Dios Ye n tlasojtlálistli” (1 Juan 4:8); “Xiktlasojtla mokni  kemi te timotlasojtla” (Mat. 22:39); “Akin milák tetlasojtla, kimati tetlapojpolwia” (1 Ped. 4:8); “N tlasojtlálistli ayik tlamis” (1 Cor. 13:8). Nonmej versículos kiteititia sapanoua ipati matimochijchikauakan titetlasojtlaskej.

7. ¿Tleka Satanás amo uelis kichiuas oksekimej san sekan mayetokan uan mamotlasojtlakan?

⁷ Miakej motlajtlaniaj: “¿Ken uelis nikmatis katli religión tlen melauak? Nochi religiones kijtouaj melauak tlamachtiaj tlen kijtoua Biblia pero non amo melauak porque okse tlamantli tlamachtiaj itech toTajtsin Dios”. Miakej ayakmo kimatij tlen kineltokaskej porque Satanás kichiua religiones matlakajkayauakan. Ye amo uelis kichiuas itech nochi tlaltikpak oksekimej san sekan mayetokan uan mamotlasojtlakan ken se familia non san Jehová ueli kichiua. Ijkon tikijtouaj porque Jehová tetlasojtla uan techmaka iespíritu santo uan techpaleuia matimotlasojtlakan (1 Juan 4:7). Ikinon Jesús okijto akinmej melauak yetoskiaj imachtijkauan motlasojtlaskej.

8, 9. ¿Ken yokinpaleui oksekimej ijkuak kitaj iTlaixpantijkauan Jehová motlasojtlaj?

⁸ Jesús okijto miakej kitaskiaj imachtijkauan motlasojtlaskej. Se tokni tlen itoka Ian ok kilnamiki ijkuak oyajki se ueyi nechikol tlen omochi itech se estadio. Ye achto ompa okinmitato akinmej mauiltiaj. Ye okijto: “Onikitak okse tlamantli okichiuayaj. Nochtin kuali omouikayaj, kualtsin omotlakentijkej uan inkoneuan otetlakamatiayaj”. Noijki okijto: “Onechtlajtlachialti nikitas nochtin oyolpakiayaj uan omoyolseuijtokaj, ne ijkon oniknekiaya nimomachilis. Amo nikilnamiki tlen otlamachtijkej non tonal pero nochipa nikilnamiki tlen kichiuaj iTlaixpantijkauan Jehová”. c Tokni okitak sapanoua tikintlasojtlaj tokniuan ikinon tikinchiuiliaj tlen kuali uan tikintlakaitaj.

⁹ Se tokni tlen itoka John kilnamiki tlen okipanok ijkuak yikin omonechiko iuan tokniuan. Ye okipakti kitas nochtin kuali omouikayaj iuan nochtin okichiuayaj tlen kuali, ye okijto: “Nochtin omotlasojtlayaj, ijkon onikitak melauak okiueyichiuayaj toTajtsin Dios”. d Noijki ok katej miakej tlen kijtouaj iTlaixpantijkauan Jehová melauak kichiuaj ken Cristo.

10. ¿Tlen uelis kichiuas ayakmo matimotlasojtlakan? (Noijki xikita nota).

¹⁰ Yotikitakej ualeua tokniuan motlapololtiaj. Xamo kijtoskej noso kichiuaskej seki tlamantli tlen techyolkokos (Sant. 3:2). e Non uelis kichiuas ayakmo matimotlasojtlakan. ¿Tlen techpaleuis matitetlasojtlakan? Matikitakan tlen okichi Jesús (Juan 13:15).

11. ¿Tlen okiteititijkej se tonal Santiago uan Juan? (Noijki xikita dibujo).

¹¹ Jesús okimatiaya imachtijkauan okatkaj tlajtlakolejkej. Ikinon okintlasojtlak uan okinpaleui ijkuak omotlapololtiayaj para ijkon uelis kinseliskia  Jehová. Se tonal apóstoles Santiago uan Juan okiluijkej inantsin mamotlapoui iuan Jesús para makinkauili inauak matlanauatikan itech iTekiuajkayo (Mat. 20:20, 21). Yejuan okiteititijkej omoueyinekiayaj uan otlaixnekiayaj (Prov. 16:18).

12. ¿Tleka tikijtouaj Santiago uan Juan amo san yejuan omotlapololtijkej?

¹² Non tonal amo san omotlapololtijkej Santiago uan Juan. Matikitakan tlen okichijkej oksekimej apóstoles: “Ijkuak n májtlakteh itlamachtijkawah ijkó okikakeh, okualankeh iwan nonteh ome iknimeh” (Mat. 20:24). Matimokuayejyekokan tlen opanok. Iapóstoles Jesús xamo okinmiluijkej Santiago uan Juan: “¿Tleka namejuan nanmokuayejyekouaj okachi nanmopati para nantlanauatiskej iuan Jesús? Amo san namejuan nanmochijchikauaj para nantlapaleuiskej iuan Jesús. Tejuan noijki technamiki titlanauatiskej iuan”. Non tonal apóstoles ayakmo okiteititijkej omotlasojtlayaj.

13. ¿Tlen okichi Jesús maski iapóstoles omotlapololtiayaj? (Mateo 20:25-28).

¹³ ¿Tlen okichi Jesús? Ye amo san niman okualanki. Ye amo okijto kintemoskia oksekimej tlakamej para mayetokan iapóstoles tlen omonekiaya okachi kuali makiteititikan okatkaj  yolyamankej uan mamotlasojtlakan. Jesús okiteititi okintlasojtlayaj ikinon inmiuan omotlapoui porque okimatiaya okatkaj yolkualmej (xiktlajtolti Mateo 20:25-28). Maski iapóstoles amo san non tonal omotlapololtijkej, Jesús nochipa okiteititi okintlasojtlaya (Mar. 9:34; Luc. 22:24).

14. ¿Ken omoskaltijkej iapóstoles Jesús?

¹⁴ Jesús okimatiaya ken omoskaltijkej iapóstoles (Juan 2:24, 25). Itech nonmej tonalmej tlayekankej judíos okinpatioitayaj akinmej oueyititokaj uan otlanauatiayaj (Mat. 23:6; noijki xikita video Asientos del frente en la sinagoga, itech nota de estudio tlen kajki itech Mateo 23:6, TNM). Tlayekankej judíos okineltokayaj yejuan okachi inpati (Luc. 18:9-12). f Jesús okimatiaya tlen ompa opanotoka uelis kinmijtlakoskiaj iapóstoles uan amo kuali kinmitaskiaj oksekimej (Prov. 19:11). Jesús okimatiaya ualeua iapóstoles motlapololtiskiaj. Pero okimatiaya okatkaj yolkualmej ikinon okinpaleui mamotlasojtlakan, mayetokan yolyamankej uan ayakmo mamoueyinekikan nion matlaixnekikan.

15. ¿Tlen techmachtia tlen okinpanok Santiago uan Juan?

¹⁵ Sapanoua techpaleuis tla timomachtiaj tlen okinpanok Santiago uan Juan. Amo kuali tlen okitlajtlanilijkej Jesús. Noijki amo kuali tlen okichijkej oksekimej apóstoles porque okualankej uan ayakmo kuali omouikakej. Pero Jesús nochipa okiteititi okintlasojtlaya 12 iapóstoles. ¿Tlen techmachtia tlen okinpanok? Amo san matikitakan ijkuak oksekimej motlapololtiaj, okachi ipati matikitakan tlen tikchiuaskej ijkuak motlapololtiaj. Ikinon ijkuak se tokni techyolkokouaj, matimotlajtlanikan: “¿Tleka sapanoua onechkualani tlen okichi? ¿Moneki nikpatlas tlen nikchiua? ¿Kipanotok tlen amo kuali tokni tlen onechyolkoko? ¿Uelis okachi niktlasojtlas uan niktlapojpoluis maski onechyolkoko?”. Tla nochipa tikintlasojtlaj oksekimej, tikteititiskej melauak tikchiuaj ken Cristo.

16. ¿Tlen okachi techmachtia tlen okichi Jesús?

¹⁶ Tlen okichi Jesús techmachtia moneki timochijchikauaskej para tikinmajsikamatiskej tokniuan (Prov. 20:5). Jesús okitaya tlen kipiaj itech inyolo oksekimej pero tejuan amo tiuelij. Pero kema uelis tikinmiknomatiskej tokniuan ijkuak motlapololtiaj (Efes. 4:1, 2; 1 Ped. 3:8). Techpaleuis tla okachi tikinmixmatij tokniuan. Matikitakan ken tikchiuaskej.

17. ¿Ken okipaleui se tlayekanki itech circuito ijkuak omochijchika kixmatis se tokni?

¹⁷ Se tlayekanki itech circuito tlen otlapaleuiaya África oriental okixmatki se tokni tlen omotaya amo uelis iuan mouikaskia. Tokni amo san omokuayejyeko amo kuali iuan mouikaskia. Ye okijto: “Amo onikijto, amo iuan nimouikas uan onimochijchika okachi kuali  nikixmatis”. Ijkuak ijkon okichi tlayekanki, okajsikamatki tlen okipanok tokni ijkuak omoskalti. Tokni okijto: “Ijkuak onikmatki tlen okipanok yiuejkika tokni uan ken omochijchika para kitekichiuilis Jehová, onechpaleui okachi maniktlakaita. Satepan opejki okachi kuali timouikaj”. Tla timochijchikauaj okachi kuali timouikaj iuan tokniuan uan tikinmajsikamatij tlen kinpanotok, okachi tikintlasojtlaskej.

18. ¿Tlen uelis timotlajtlaniskej tla se tokni otechyolkoko? (Proverbios 26:20).

¹⁸ Ualeua monekis timotlapouiskej iuan se tokni tlen otechyolkoko. Pero ijkuak ijkon tikchiuaskej matimotlajtlanikan: “¿Nikmati nochi tlen opanok?” (Prov. 18:13). “¿Amo okinekiaya ijkon kichiuas?” (Ecl. 7:20). “¿Ijkon yonikchi ne?” (Ecl. 7:21, 22). “Tla nimotlapouis iuan tokni, ¿okachi timokualaniskej?” (xiktlajtolti Proverbios 26:20). Tla ijkon timotlajtlaniaj, uelis tikajsikamatiskej tleka moneki tiktlasojtlaskej tokni uan tikilkauaskej tlen otechchiuili.

19. ¿Tlen yotikijtojkej tikchiuaskej?

¹⁹ TiiTlaixpantijkauan Jehová tikteititiaj melauak tikchiuaj ken Cristo. Pero tisejse noijki uelis tikteititiskej tikintlasojtlaj tokniuan maski ualeua motlapololtiaj. Tla ijkon tikchiuaj, tikinpaleuiskej oksekimej makitakan akinmej melauak kichiuaj ken Cristo uan tikinpaleuiskej noijki makiueyichiuakan Jehová akin tetlasojtla. Ikinon matikteititikan melauak tikchiuaj ken Cristo uan matimochijchikauakan nochipa matimotlasojtlakan.