¿Tleka okijto “Fulano” tla monamiktiskia iuan Rut kijtlakoskia tlen kiseliskia? (Rut 4:1, 6).

Yiuejkika ijkuak se tlakatl tlen yokipiaya isiua oixpoliuiaya uan amo okipiaya ikoneuan, ¿tlen kipanoskia itlaluan? ¿Ayakmo kipiaskia ifamilia uan pojpoliuiskia itoka? Nochi nin tlamantli okijtouaya tlanauatil tlen okijkuilo Moisés.

Tla se tlakatl oixpoliuiaya noso okinemakaya itlaluan porque amo okipiaya tomin, ikni noso se ifamiliar uelis kikouiliskia itlaluan. Ijkon nonmej tlalmej ok yetoskia itech non familia (Lev. 25:23-28; Núm. 27:8-11).

¿Tlen omochiuaya para amo mapojpoliui itoka ifamilia akin oixpoliuik? Ikni akin oixpoliuik omonamiktiaya iuan isiua para kipiaskiaj se konetl tlen uelis kiseliskia tlalmej uan ijkon amo pojpoliuiskia itoka. Ijkuak ikaj omonamiktiaya iuan iuejpol noijki omomaluiaya isiua tlakatl akin oixpoliuik (Deut. 25:5-7; Mat. 22:23-28). Ijkon okipanok Rut.

Matimokuayejyekokan tlen okipanok Noemí. Ye omonamikti iuan Elimélec pero ijkuak inamik uan ome itelpochuan oixpolikej, ayakmo okatka se tlakatl tlen kimaluiskia (Rut 1:1-5). Ijkuak Noemí omokopki Judá, okilui isiuamon Rut makilui Boaz makikouili itlaluan Elimélec (Rut 2:1, 19, 20; 3:1-4). Pero Boaz okimatiaya okatka okse ifamiliar Elimélec tlen uelis kikouaskia itlaluan (Rut 3:9, 12, 13). Biblia kijtoua omotokayotiaya “Fulano”.

Fulano okijto uelis kikouaskia itlaluan Elimélec (Rut 4:1-4). Maski okimatiaya kitlaxtlauaskia miak tomin, noijki okimatiaya Noemí yokipiaya miak xiuitl uan amo uelis kipiaskia ikoneuan para kimakaskia itlaluan Elimélec. Uelis omokuayejyeko nochi itlaluan Elimélec ye kimokauiskia.

Ijkuak Fulano okimatki omonekiaya monamiktis iuan Rut ayakmo okinek kikouas itlaluan Elimélec. Ikinon okijto amo uelis kikouaskia porque kijtlakoskia tlen kiseliskia (Rut 4:5, 6). ¿Tleka ayakmo okinek kikouas nonmej tlalmej?

Tla Fulano noso okse ifamiliar Elimélec omonamiktiaya iuan Rut uan okipiayaj se inkone, non konetl omonekiaya kiselis itlaluan Elimélec. ¿Ken kijtlakoskia tlen kiseliskia Fulano? Biblia amo kijtoua pero axkan tikitaskej tleka xamo ijkon okijto.

• Se, xamo Fulano omokuayejyeko kitlaxtlauaskia miak tomin para kikouaskia itlaluan Elimélec pero satepan kiseliskia ikone Rut.

• Ome, omonekiaya kinmakas tlen ika mopanoltiskia Noemí uan Rut.

• Eyi, tla Rut uan Fulano kinpiaskiaj oksekimej inkoneuan tlen kinseliskia noijki omonekiaya kinmakaskej intlakpaikniuan.

• Naui, tla Fulano amo okipiaya oksekimej ikoneuan, konetl tlen kipiaskia iuan Rut kiseliskia itlaluan Elimélec uan itlaluan Fulano. Noijki nonmej tlalmej kimakaskia ikone Rut uan kixmatiskiaj ken ikone Elimélec. Fulano amo okinek kipaleuis Noemí porque amo okinekiaya kipolos tlen okipiaya. Ikinon okikauili Boaz makikoua itlaluan Elimélec uan ye okiko. ¿Tleka ijkon okichi? Porque amo okinekiaya mapoliui itoka akin oixpoliuik (Rut 4:10).

Fulano amo kuali tlen okichi porque amitlaj okinek kipolos. Ikinon satepan amikaj okilnamik itoka noijki amo okipatioitak kiselis tlen Boaz kema okiseli porque ye opouik itech ifamilia Mesías. Fulano amo okinek kipaleuis akin omonekiaya ikinon amo okiteochijkej (Mat. 1:5; Luc. 3:23, 32).