1, 2. ¿Tleka amo moneki timosotlauas tla ayamo uelis timoapolaktis? (Xikita fotos itech página 1).

 TLA YOTIKPEJPENKI timoapolaktis, tiyolpakij porque tikneki ijkon tikchiuas. ¿Yiuelis timoapolaktis? Tla timokuayejyekoua kema uan tlayekankej noijki ijkon kijtouaj, ximoapolakti. Sapanoua tiyolpakis tiktekichiuilis Jehová.

² Pero tla omitsiluijkej ayamo uelis timoapolaktis noso xamo timokuayejyekoua te ayamo uelis timoapolaktis, amo ximosotlaua. Uelis timochijchikauas para timoapolaktis maski titelpochtli, tiichpochtli noso yitikpia miak xiuitl.

3. ¿Tlen okitlajtlani etíope Felipe uan tlen uelis timotlajtlaniskej? (Hechos 8:36, 38, TNM).

³ (Xiktlajtolti Hechos 8:36, 38, TNM). Se tlakatl etíope okitlajtlani Felipe: “¿Tlen nechtsakuilia amo ma nimoapolakti?”. Non tlakatl okinekiaya moapolaktis. Pero ¿yiuelis moapolaktiskia?

4. ¿Ken okiteititi tlakatl etíope okinekiaya kimatis okseki tlamantli?

⁴ Tlakatl etíope “yowalmokopaya de Jerusalén kan okiweyijkachiwato Dios” (Hech. 8:27). Ye opejki tlaneltoka ken judíos, okimatiaya tlen kijtoua Escrituras Hebreas uan non okipaleui makixmati Jehová. Pero ye okinekiaya kimatis okseki tlamantli. ¿Tlen okichijtoka  ijkuak Felipe okinamik itech ojtli? Okitlajtoltijtoka rollo tlen okijkuilo Isaías (Hech. 8:28). Pero non sapanoua oui okitak kajsikamatis. Tlakatl amo san okinekiaya kimatis seki tlamantli ikinon okachi omomachti.

5. ¿Tlen okichi etíope ika tlen omomachti?

⁵ Non tlakatl okitekichiuiliaya Candace, ye otlanauatiaya ompa Etiopía. Tlakatl okimaluiaya nochi tlen okipiaya non tekiua (Hech. 8:27). Xamo ye okipiaya miak tekitl pero okinekiaya kiueyichiuas Jehová. Ikinon amo san omomachti tlen melauak, okichi tlen okitlajtolti. Maski okatka Etiopía oyajki hasta Jerusalén para kiueyichiuas Jehová itech teokali. Xamo uejka kanin oyajki uan okitlaxtla miak tomin pero maski okichi miak tlamantli, ye okinekiaya kiueyichiuas Jehová.

6, 7. ¿Tlen okichi etíope para okachi kitlasojtlas Jehová?

⁶ Felipe okiyekilui tlakatl etíope tlen tlamachtia Biblia porque amo okimatiaya uan omonekiaya kipatioitas, okilui Jesús okatka Mesías (Hech. 8:34, 35). Ijkuak non tlakatl okimatki tlen okichi Jesús, okiyolchika. Ye uelis ok kitekichiuiliskia tekiua uan miakej kitlakaitaskiaj pero ye sapanoua opejki kintlasojtla Jehová uan Jesús ikinon okipejpenki moapolaktis uan peuas kichiuas ken Jesús. Felipe okitak non tlakatl yiuelis moapolaktiskia ikinon okiapolakti.

⁷ Tlen okipanok etíope, mitspaleuis xikita tlen uelis tikchiuas para timoapolaktis. Tla ijkon tikchiuas, uelis tikijtos ken etíope: “¿Tlen nechtsakuilia amo manimoapolakti?”. Axkan tikitaskej ken uelis tikchiuas ken etíope, tikchiuas tlen timomachtijtok uan okachi timouikas iuan Jehová.

8. Ijkon ken kijtoua Juan 17:3, ¿tlen moneki tikchiuas?

⁸ (Xiktlajtolti Juan 17:3). ¿Omitspaleui tlen okijto Jesús ximomachti Biblia? Miakej ijkon okinpanok pero tlen okijto Jesús noijki techpaleuia para okachi matimomachtikan Biblia. Maski yitikmati “akin melauak toTajtsin Dios”, ok monekis okachi tikixmatis (Ecl. 3:11). Satepan ijkuak ayakmo tiixpoliuiskej okachi tikixmatiskej Jehová uan okachi iuan timouikaskej (Sal. 73:28).

9. ¿Tlen ok moneki tikchiuaskej maski tikajsikamati seki tlamantli tlen tlamachtia Biblia?

⁹ Ijkuak peua tikixmatij Jehová, tikajsikamatij seki tlamantli tlen tlamachtia iTlajtol toTajtsin Dios. Ijkuak apóstol Pablo okinmijkuilili hebreos okijto timomachtiaj “tlan okachi amo owi”. Ye amo okijto, amo ipati tlen timomachtiaj porque okiyekijto yetoskia ijkuak se konetl kimakaj leche (Heb. 5:12; 6:1). Ye noijki okinyole tokniuan okachi mamomachtikan iTlajtol toTajtsin Dios. ¿Tikneki timomachtis tlen tlamachtia Biblia? ¿Tikneki okachi timochijchikauas tikixmatis Jehová uan tlen ye kineki kichiuas?

10. ¿Tleka sekimej amo kinpaktia momachtiskej?

¹⁰ Sekimej amo kinpaktia momachtiskej. ¿Ijkon mitspanoua? ¿Otimomachti itech escuela uan kuali tikintlajtoltiaj amochmej? ¿Omitspaktiaya ijkon tikchiuas? ¿Noso otikitak oui tikintlajtoltis amochmej? Miakej ijkon kinpanoua ikinon amo ximotekipacho tla ijkon omitspanok. Jehová mitspaleuis porque san ye okachi kuali techmachtia.

11. ¿Tleka Jehová “akin Kuali Tlamachtia”?

¹¹ Jehová “akin Kuali Tlamachtia” (Is. 30:20, 21). Ijkuak Jehová techmachtia amo san niman kualani, teiknomati, yolkuali uan amo san kita tlen amo kuali tikchiuaj (Sal. 130:3). Ye amo techiluia seki tlamantli tlen amo uelis tikchiuaskej. Ijkuak Jehová otechchijchi otechmakak tokuatitix (Sal. 139:14). Ye otechchijchi para matiknekikan timomachtiskej, Jehová kineki ijkon matikchiuakan uan matiyolpakikan. Ikinon axkan moneki timochijchikauaskej timomachtiskej tlen melauak tlamachtia Biblia (1 Ped. 2:2). ¿Tlen mitspaleuis? Ximokuayejyeko tlen uelis tikchiuas, xiktlajtolti uan mojmostla ximomachti Biblia (Jos. 1:8). Jehová mitspaleuis para mamitspakti timomachtis uan tiktlajtoltis tlen ye kichiua.

12. ¿Tleka moneki timomachtis tlen okichi uan ken otetlapoui Jesús?

¹² Noijki ximochijchikaua timokuayejyekos tlen okichi uan ken otetlapoui Jesús. Itech ninmej tonalmej okachi oui ikinon tla tiknekij tiktekichiuiliskej Jehová moneki tikchiuaskej tlen okichi Jesús (1 Ped. 2:21). Ye okinmilui imachtijkauan kintlajyouiltiskiaj (Luc. 14:27, 28). Pero okimatiaya tlaxikoskiaj ijkon ken ye okichi (Juan 16:33). Ximomachti tlen okichi Jesús uan ximochijchikaua nochipa tikchiuas ken ye.

13. ¿Tlen moneki tikiluis Jehová uan tleka?

¹³ Ijkuak timomachtiaj amo san moneki timomachtiskej miak tlamantli. Moneki okachi tikixmatiskej Jehová, tiktlasojtlaskej uan tikneltokiliskej (1 Cor. 8:1-3). Ijkuak okachi tikixmatis Jehová moneki tikiluis mamitspaleui okachi titlaneltokas (Luc. 17:5). Ye mitspaleuis uan tla okachi timomachtia tlen melauak tlamachtia Biblia, okachi tikneltokilis uan tiktekichiuilijtos akin melauak toTajtsin Dios (Sant. 2:26).

14. ¿Ken okiyekijto Pedro moneki tikchiuaskej tlen timomachtiaj? (Noijki xikita dibujo).

¹⁴ Apóstol Pedro okijto imachtijkauan Jesús moneki kichiuaskej tlen momachtiaj. Ijkon okinmilui ijkuak okijto  tlen okipanok Noé. Jehová okilui kichiuaskia chikauak makiaui uan ijkon kinmixpoloskia akinmej amo yolkualmej. Pero Noé amo san okikak tlen kichiuaskia Jehová. Ye uan ifamilia omonekiaya kichiuaskiaj itlaj para momakixtiskej. Ijkuak Pedro okijkuilo “ijkuak Noé okichijchiwaya n arka” okinekiaya kijtos ijkuak ayamo chikauak okiauiaya (1 Ped. 3:20). Noé uan ifamilia okichijkej tlen Jehová okinnauati, okichijchijkej se ueyi arca (Heb. 11:7). Satepan Pedro okijto ijkuak Noé omomakixti yetoskia ijkuak ikaj moapolaktia. Ye okijto: “Nin kineskayotia apolaktilistli tlen axkan noijki namechmakixtia” (1 Ped. 3:21, TNM). Axkan te timochijchikajtok para timoapolaktis yetoskia ken ijkuak Noé uan ifamilia okichijchijkej arca. Ikinon ¿tlen moneki tikchiuas para timoapolaktis?

15. ¿Tlen kijtosneki ijkuak ikaj moyolkopa?

¹⁵ Moneki timoyolkopaskej uan ayakmo titlajtlakolchiuaskej (Hech. 2:37, 38). Ikinon ayakmo tikchiuaskej tlen achto otikchiuayaj. ¿Ayakmo tikchiua tlen Jehová amo kipaktia, amo tiauilnemi, amo titlachichina, amo tikijtoua tlen amo kuali nion tlen pitsotik? (1 Cor. 6:9, 10; 2 Cor. 7:1; Efes. 4:29). Tla ok ijkon tikchiua, ximochijchikaua para ayakmo ijkon tikchiuas. Uelis tikiluis tokni akin mitsmachtia mamitspaleui noso uelis tikinmiluis tlayekankej mamitspaleuikan. Tla titelpochtli uan ok tichanti iuan motatajuan uelis tikinmiluis mamitspaleuikan para ayakmo tikchiuas tlen amo kuali uan ijkon uelis timoapolaktis.

16. ¿Ken tikteititia timouika iuan Jehová?

¹⁶ Noijki moneki timochijchikauas timouikas iuan Jehová ikinon ximonechiko uan xitlanankili (Heb. 10:24, 25). Ijkuak mitsiluiskej yiuelis titetlapouis maski ayamo timoapolaktia, ximochijchikaua mojmostla titetlapouis. Tla ijkon tikchiuas okachi mitspaktis titetlapouis (2 Tim. 4:5).  Tla titelpochtli uan ok tichanti iuan motatajuan, ximotlajtlani: “¿Notatajuan nochipa nechiluiaj moneki nimonechikos uan nitetlapouis? ¿Noso ijkon nikchiua porque nechpaktia?”. Tla tikneki ijkon tikchiuas, tikteititis titlaneltoka, tiktlasojtla Jehová uan tiktlasojkamatilia. Ijkuak timochijchikaua timouikas iuan Jehová tikteititia san ye tikneki tikueyichiuas uan yetoskia ken itlaj tiktliokolia (2 Ped. 3:11; Heb. 13:15). Jehová kipaktia ijkon matikchiuakan pero amo porque oksekimej ijkon techiluiaj (noijki xikita 2 Corintios 9:7). Tejuan techyolpaktia ijkuak tiktekichiuiliaj Jehová ika nochi toyolo.

17, 18. ¿Tlen mitspaleuis ximoapolakti uan tleka? (Proverbios 3:3-6).

¹⁷ Ijkuak tiknekis timoapolaktis titlajyouis. Xamo sekimej mitspinauiskej noso mitstlajyouiltiskej porque titlaneltoka (2 Tim. 3:12). Noso timochijchikajtok para ayakmo tikchiuas tlen amo kuali pero ualeua tikita oui ayakmo ijkon tikchiuas. Noijki xamo timokuayejyekoua oui timoapolaktis uan timosotlaua. ¿Tlen mitspaleuis ayakmo ijkon ximomachili? Mitspaleuis tla tiktlasojtla Jehová.

¹⁸ Okachi ipati tiktlasojtlas Jehová (xiktlajtolti Proverbios 3:3-6). Tla tiktlasojtla toTajtsin Dios ika nochi moyolo, mitspaleuis xitlaxiko ijkuak mitspanos tlen amo kuali. Biblia kijtoua miak uelta Jehová okiteititi kintlasojtla itekipanojkauan ika nochi iyolo. Non kijtosneki ye nochipa kinpaleuia uan nochipa kintlasojtla (Sal. 100:5). Jehová omitschijchi ken ye (Gén. 1:26). Ikinon ¿ken uelis titetlasojtlas ijkon ken Jehová?

19. ¿Ken uelis tikteititis tiktlasojkamatilia Jehová? (Gálatas 2:20).

¹⁹ Xitetlasojkamati (1 Tes. 5:18). Mojmostla ximotlajtlani: “¿Ken okiteititi axkan Jehová nechtlasojtla?”. Satepan ijkuak tiktlatlaujtis Jehová, xiktlasojkamatili. Ijkon ken apóstol Pablo xikpatioita ijkuak Jehová kiteititia mitstlasojtla (xiktlajtolti Gálatas 2:20). Ximotlajtlani: “¿Nikneki nikititis Jehová  niktlasojtla?”. Tla tiktlasojtla Jehová, amo titlajtlakolchiuas, titlaxikos ijkuak titlajyouis uan okachi iuan timouikas. Ijkon mojmostla tikteititis tiktlasojtla toTajtsin Dios.

20. ¿Tlen kijtosneki ikaj motemaka ixpan Jehová uan tleka ipati?

²⁰ Ijkuak okachi tiktlasojtlas Jehová mitsyolinis tikiluis nochipa tiktekichiuilis, ijkon tikteititis yotimotemakak ixpan uan uelis nochipa tiktekichiuilijtos. Ijkuak timotemaka ixpan Jehová tikiluia nochipa tikchiuas tlen ye kineki maski titlajyouis. San se uelta ijkon tikiluia Jehová pero amo xikajauilmati. Noijki xikilnamikto tlen tikpejpenas tikchiuas, sapanoua ipati (Sal. 50:14). Satanás kitemos ken kichiuas para ayakmo xiktlasojtla Jehová uan amo xiktekichiuili. Pero amo xikkauili ijkon makichiua (Job 27:5). Tla tiktlasojtla Jehová ika nochi moyolo, ye mitspaleuis xikchiua tlen otikilui uan okachi iuan ximouika.

21. ¿Tleka tikijtouaj ijkuak ikaj moapolaktia yikin peua kitekichiuilia Jehová?

²¹ Ijkuak yotimotemakak ixpan Jehová, xikinmilui tlayekankej tlen ok uelis tikchiuas. Noijki xikilnamiki amo san moneki timoapolaktis, ximokuayejyeko ken uelis nochipa tiktekichiuilis Jehová. Okachi ximouika iuan uan ximochijchikaua okachi tiktlasojtlas, non mitspaleuis ximoapolakti. Ijkuak ijkon tikchiuas nochipa tikilnamiktos non tonal pero ijkuakon yikin tipeuas tiktekichiuilis Jehová. Ikinon ximochijchikaua okachi tikintlasojtlas Jehová uan iKone.