1. ¿Tlen kinekij kichiuaskej tokniuan akinmej kipiaj inkoneuan?

 TLA NANKIPIAJ namokoneuan nankinekij nankinpaleuiskej makixmatikan uan makintlasojtlakan Jehová. Pero toTajtsin Dios amo tikitaj, ¿tlen uelis nankichiuaskej para namokoneuan mamouikakan iuan Jehová? (Sant. 4:8).

2. ¿Ken uelis tetajmej kinpaleuiskej inkoneuan makixmatikan Jehová?

² Tetajmej uelis kinpaleuiskej inkoneuan okachi mamouikakan iuan Jehová ijkuak san sekan momachtiaj iTlajtol (2 Tim. 3:14-17). Biblia kijtoua okse tlamantli tlen uelis kinpaleuis namokoneuan okachi mamouikakan iuan Jehová. Itech amochtli Proverbios kijtoua se teta motlapouia iuan ikone uan kiyoleua okachi makixmati Jehová ika tlen okichijchi (Prov. 3:19-21). Axkan tikitaskej ken uelis tetajmej kinpaleuiskej inkoneuan okachi makixmatikan Jehová ika tlen okichijchi.

3. ¿Ken uelis tetajmej kinpaleuiskej inkoneuan?

³ Maski tejuan amo ueli tikitaj toTajtsin Dios “weleti tikitah itech nochi tlan [...] okichijchi. Iwa desde ijkuak okichijchi n tlaltíkpaktli” (Rom. 1:20). Xamo nanyolpakij ijkuak nanpaxialotiuij iuan namokoneuan. Pero ijkuakon uelis nankinpaleuiskej okachi makixmatikan Jehová ijkuak inmiuan nanmotlapouiskej nochi tlen ye okichijchi. Matikitakan ken uelis tetajmej kichiuaskej ken Jesús.

4. ¿Jesús ken okinmachti imachtijkauan ika tlen toTajtsin Dios okichijchi? (Lucas 12:24, 27-30).

 ⁴ Matikitakan ken Jesús okinpaleui imachtijkauan ika tlen toTajtsin Dios okichijchi. Se tonal okinmilui makitakan kakalomej noso cuervos uan lirios (xiktlajtolti Lucas 12:24, 27-30). Uelis Jesús kijtoskia okse yolkatl noso okse xochitl pero okinmilui imachtijkauan tlen yokixmatiayaj. Xamo okitakej kakalomej tlen opatlaniayaj uan lirios tlen ompa okatka uan noijki xamo Jesús okinmititi. ¿Tlen okichi Jesús satepan? Ye okinmilui imachtijkauan, Jehová kitemaka tlen kipia uan yolkuali. Ikinon ye kinmakas tlen ika mopanoltiskej uan tlen kimokentiskej akinmej nochipa kitekichiuiliaj ijkon ken kichiuaj iuan kakalomej uan xochimej.

5. ¿Ken uelis tetajmej kinpaleuiskej inkoneuan okachi makixmatikan Jehová ika tlen okichijchi?

⁵ Tla namejuan nankipiaj namokoneuan, ¿ken uelis nankinmachtiskej ijkon ken okichi Jesús? Uelis nankinmiluiskej namokoneuan tlen xochitl noso tlen yolkatl namechpaktia. Noijki amo xikilkauakan nankinmiluiskej ken techpaleuia non okachi matikixmatikan Jehová. Satepan uelis nankintlajtlaniskej tlen yolkatl noso tlen xochitl okachi kinpaktia. Namokoneuan uelis namechkakiskej ijkuak nanmotlapouiskej itech Jehová tla inmiuan nanmotlapouiaj tlen yejuan okachi kinpaktia.

6. ¿Tlen techmachtia tlen okichi inantsin Christopher?

⁶ Pero tetajmej amo moneki momachtiskej okachi itech se yolkatl noso itech se xochitl. Jesús amo okijto ken otlakuayaj kakalomej noso ken ochijchitokaj xochimej. Xamo namokoneuan kinpaktia kimatiskej ken chijchitokej seki tlamantli tlen onka. Pero ualeua san moneki nankinmiluiskej noso nankintlajtlaniskej seki tlamantli tlen amo oui, ijkon nankinpaleuiskej makixmatikan Jehová. Se tokni tlen itoka Christopher okijto: “Nonantsin otechiluiaya seki tlamantli tlen amo oui para okachi matikpatioitakan tlen okichijchi Jehová. Ijkuak otikinmitayaj tepemej otechiluiaya: ‘¡Sapanoua uejueyij uan kuajkualtsitsintin ninmej tepemej! Jehová sapanoua ixtlamatki’. Ijkuak otiayaj itech mar noijki otechiluiaya: ‘¡Xikitakan chikauak moliniaj olas! ToTajtsin Dios sapanoua chikauak’”. Christopher okijto: “Nonantsin amo oui tlen otechiluiaya ijkon otechpaleui matikajsikamatikan seki tlamantli”.

7. ¿Ken uelis nankinmachtiskej namokoneuan mamokuayejyekokan tlen okichijchi Jehová?

⁷ Ijkuak namokoneuan moskaltijtiaskej uelis nankinmachtiskej uan nankinpaleuiskej okachi makixmatikan Jehová ika tlen okichijchi. Uelis nankinmiluiskej itlaj tlen okichijchi Jehová uan uelis nankintlajtlaniskej: “¿Tlen mitsmachtia nin itech Jehová?” Xamo namechtlajtlachialtis ijkuak namechiluiskej tlen mokuayejyekouaj (Mat. 21:16).

8. ¿Tlen okichiuayaj israelitas ijkuak oyayaj itech ojtli iuan inkoneuan?

⁸ Jehová okinnauati israelitas makinmachtikan inkoneuan itlanauatiluan ijkuak oyayaj itech ojtli (Deut. 11:19). Ijkuak onejnemiayaj ompa Israel okitayaj sekimej yolkamej uan xochimej. Ijkuakon israelitas uelis kinpaleuiskiaj  inkoneuan makinekikan kimatiskej tlen okichijchi Jehová. Axkan tetajmej uelis ijkon kichiuaskej. Matikitakan tlen yokichijkej sekimej tetajmej.

9. ¿Tlen mitsmachtia tlen okijtojkej Punitha uan Katya?

⁹ Se tokni tlen itoka Punitha, tlen chanti itech se ueyi altepetl tlen kajki India, okijto: “Ijkuak tikintlajpalouaj tofamilia akinmej chantij itech se altepetsintli, timotlapouiaj inmiuan tokoneuan tlen okichijchi Jehová. Nikita nokoneuan okachi amo oui kajsikamatij tlen okichijchi Jehová ijkuak amo tikatej kanin miakej nejnentokej nion kanin katej carros”. Tla nanmotlapouiaj inmiuan namokoneuan kanin tlakualtsin xamo nochipa kilnamikiskej. Se tokni tlen itoka Katya, okijto: “Ok nikilnamiki ijkuak onikatka iuan notatajuan kanin tlakualtsin. Sapanoua nikintlasojkamatilia ijkuak onikatka nitakotsin onechmachtijkej manikita uan manimokuayejyeko tlen okichijchi Jehová”.

10. ¿Tlen uelis kichiuaskej tetajmej tla oui kitaj yaskej itech se altepetsintli? (Xikita recuadro “ Nin kinpaleuis tetajmej”).

¹⁰ Xamo nankitaj oui nanyaskej kanin tlakualtsin. Amol noijki chanti India, ye okijto: “Kanin nichanti tetajmej sapanoua tekipanouaj uan xamo patio tla kinekij yaskej itech se altepetsintli. Pero uelis motlapouiskej itech se parque noso inakastlan se ventana uan kitaskej tlen okichijchi Jehová”. Tla nankipiaj namokoneuan uelis nankinmititiskej tlen okichijchi Jehová ijkuak nankitaskej tlen onka kanin nanchantij (Sal. 104:24). Uelis nankinmitaskej totomej, okuilimej, xochitl noso okseki tlamantli. Karina tlen chanti Alemania okijto: “Nonantsin kipaktia xochitl ikinon  ijkuak onikatka nitakotsin uan otiayaj tinejnemij onechititiaya xochitl tlen kualtsin omotaya”. Noijki uelis nankinmititiskej tlen okichijchi Jehová ika videos uan amatlajkuilolmej tlen yotechmakak ialtepe Jehová. Nochtin uelis nankinpaleuiskej namokoneuan makitakan tlen toTajtsin Dios okichijchi. Matikitakan ken uelis nankinpaleuiskej namokoneuan okachi makixmatikan Jehová.

11. ¿Tlen uelis kichiuaskej tetajmej para makitakan inkoneuan Jehová kintlasojtla?

¹¹ Uelis nankinpaleuiskej namokoneuan makitakan Jehová tetlasojtla ijkuak nankintlapouiskej ken miakej yolkamej kinmaluiaj inkoneuan (Mat. 23:37). Noijki uelis nankinmiluiskej onka miak tlamantli tlen Jehová okichijchi. Yotikitakej tlen okijto Karina itech párrafo 10, ye okijto: “Ijkuak otiayaj tinejnemij iuan nonantsin ye onechiluiaya manikita uan manimokuayejyeko ken chijchitok sejse xochitl porque kiteititia Jehová tetlasojtla. Maski yopanok seki xiuitl ok nikinmita ken chijchitokej seki xochimej uan non nechpaleuia manikita Jehová sapanoua techtlasojtla”.

12. ¿Ken uelis tetajmej kinpaleuiskej inkoneuan makajsikamatikan Jehová sapanoua ixtlamatki? (Salmo 139:14; noijki xikita foto).

¹² Uelis nankinpaleuiskej namokoneuan makitakan Jehová sapanoua ixtlamatki uan amo ken tejuan (Rom. 11:33). Uelis nankinmiluiskej atl mokopa mixtli uan satepan uetsi itech nochi tlaltikpak (Job 38:36, 37). Noijki uelis nanmotlapouiskej ken otechchijchi Jehová (xiktlajtolti Salmo 139:14). Matikitakan tlen okichi se tokni tlen itoka Vladimir, ye okijto: “Se tonal tokone oyaya itech bicicleta ouetsito uan omokojko. Opanok seki tonal uan opajtik. Nosiua uan ne otikiluijkej Jehová okichijchi totlalnakayo para matipajtikan. Noijki otikiluijkej amo ijkon kinpanoua seki tlamantli tlen sekimej kichijchiuaj. Ijkon tikijtouaj porque se carro amo iselti ueli moyektlalia ijkuak panoua se accidente. Ijkuak ijkon tikiluiaj tokone, ye kajsikamati Jehová sapanoua ixtlamatki”.

13. ¿Ken uelis tetajmej kinpaleuiskej inkoneuan mamokuayejyekokan Jehová sapanoua chikauak? (Isaías 40:26).

¹³ Jehová techyoleua matitlachiakan iluikak uan matikitakan ye sapanoua chikauak porque kichiua sitlalimej amo mamolinikan (xiktlajtolti Isaías 40:26). Uelis nankinmiluiskej namokoneuan matlachiakan iluikak uan mamokuayejyekokan tlen kitaj. Se tokni tlen itoka Tingting uan chanti Taiwán ok kilnamiki tlen okipanok ijkuak okatka takotsin. Ye okijto: “Se tonal ne uan nonantsin uejka otiajkej uan otimokauatoj kanin tlakualtsin, ijkuakon otikitakej miakej sitlalimej itech iluikak. Noijki akinmej inmiuan onimomachtiaya okinekiayaj manikchiua tlen amo kuali uan onechtekipachouaya ayamo kuali nimouikas iuan Jehová. Nonantsin onechpaleui manimokuayejyeko Jehová sapanoua chikauak uan okinchijchi sitlalimej. Non onechpaleui manikilnamiki Jehová uelis kichiuaskia nochipa maniktlakamati. Ijkuak onikitak tlen toTajtsin Dios okichijchi oniknek okachi iuan nimouikas uan nochipa niktekichiuilis maski san tlen nechpanoskia”.

14. ¿Ken uelis tetajmej kinpaleuiskej inkoneuan makitakan Jehová yolpaki?

¹⁴ Tlen okichijchi Jehová kiteititia ye yolpaki. Ixtlamatkej yokitakej yolkamej mauiltiaj, ijkon kichiuaj totomej uan michimej (Job 40:20). Xamo namokoneuan yokitakej ken mauiltia se miston noso ken mauiltiaj sekimej itskuimej uan xamo non okinuetskitij. Ijkuak okse tonal namokoneuan kinuetskitis tlen kichiua se yolkatl uelis nankinmiluiskej toTajtsin Dios yolpaki (1 Tim. 1:11, TNM).

15. ¿Tlen uelis kinpaleuis tetajmej para kimatiskej tlen mokuayejyekoua inkoneuan? (Proverbios 20:5; noijki xikita foto).

¹⁵ Sekimej tetajmej ualeua kitaj oui kimatiskej tlen kinpanoua inkoneuan. Tla ijkon namechpanouaj, ¿tlen uelis namechpaleuis para nankimatiskej tlen mokuayejyekouaj namokoneuan? (xiktlajtolti  Proverbios 20:5). Sekimej tetajmej yokinpaleui motlapouiskej inmiuan inkoneuan ijkuak kitaj tlen Jehová yokichijchi. ¿Tleka ijkon kichiuaj tetajmej? Porque ijkon konemej uan intatajuan amitlaj kinkuejsouaj. Se tokni tlen itoka Masahiko uan chanti Taiwán, noijki okijto: “Ijkuak tiauij itech tepetl noso ijkuak tikatej itech mar okachi amo oui timotlapouiaj inmiuan tokoneuan porque amitlaj kinkuejsouaj. Ijkon tikitaj tlen kimachiliaj uan tlen mokuayejyekouaj”. Yotikitakej tlen okijto Katya itech párrafo 9, ye okijto: “Ijkuak onikisaya escuela nonantsin uan ne otiayaj itech se kualtsin parque. Ompa amo oui onikitaya nikiluis nonantsin tlen onechpanouaya escuela uan tlen onechtekipachouaya”.

16. ¿Ken uelis familias yolpakiskej ika tlen Jehová okichijchi?

¹⁶ Tlen Jehová okichijchi kinpaleuiaj familias kuali mamomachilikan, mamoyolpaktikan uan kuali mamouikakan. Biblia kijtoua keman uelis tiuetskaskej uan keman uelis timijtotiskej (Ecl. 3:1, 4, nota). Jehová okichijchi kanin tlakualtsin para ompa matikchiuakan tlen techpaktia. Miakej familias kinpaktia paxialotiuij kanin katej miakej xochimej, kanin tlakualtsin, kanin tepeyo noso kanin kajki mar. Sekimej konemej moyolpaktiaj motlaloskej noso mauiltiskej itech parque, oksekimej kinpaktia kitaskej yolkamej noso ajkuiskej itech aueyatl, kanin kajki miak atl noso itech mar. Jehová okichijchi miak tlamantli kanin uelis timoyolpaktiskej.

17. ¿Tleka moneki tetajmej kinpaleuiskej inkoneuan mayolpakikan ika tlen okichijchi Jehová?

¹⁷ Tetajmej uan inkoneuan yolpakiskej ika nochi tlen okichijchi Jehová ijkuak yetoskej itech xochitlali. Ayakmo techmomojtiskej yolkamej nion yejuan techmauiliskej (Is. 11:6-9). Ijkuak tiyetoskej itech xochitlali tinochtin tiyolpakiskej ika tlen Jehová okichijchi (Sal. 22:26). Tla nankipiaj namokoneuan, axkan moneki nankimachtiskej ika tlen okichijchi Jehová. Tla ijkon nankichiuaj namokoneuan okachi kixmatiskej Jehová uan momachiliskej ijkon ken tekiua David, ye okijto: “Oh Jehová, nochi kuali tlen te otikchijchi” (Sal. 86:8).