1. ¿Tlen mokuayejyekouaj sekimej itekipanojkauan Jehová?

 SAPANOUA tipakij ijkuak tikmatij “Jehová kiyolpaktia tlen kichiuaj itekipanojkauan” (Sal. 149:4). Pero ualeua sekimej sotlauaj uan mokuayejyekouaj Jehová paki tiktekichiuiliaj ken grupo. Pero xamo motlajtlaniaj: “¿Kox tisejse noijki tikyolpaktiaj Jehová?”. Miakej itekipanojkauan toTajtsin Dios tlen yiuejkika okatkaj noijki omokuayejyekouayaj kox okiyolpaktiaya tlen okichiuayaj (1 Sam. 1:​6-10; Job 29:​2, 4; Sal. 51:11).

2. ¿Akinmej kiyolpaktiaj Jehová?

² Biblia kijtoua uelis tikyolpaktiskej Jehová maski titlajtlakolejkej. ¿Tlen moneki tikchiuaskej? Moneki tikteititiskej tikneltokaj Jesucristo uan timoapolaktiskej (Juan 3:16). Ijkon oksekimej kitaskej yotimoyolkopkej uan yotikiluijkej toTajtsin Dios tikchiuaskej tlen ye kineki (Hech. 2:38; 3:19). Jehová sapanoua paki ijkuak kita timochijchikauaj iuan timouikaskej. Tikyolpaktiskej Jehová uan kuali iuan timouikaskej tla timochijchikauaj tikchiuaskej tlen otikiluijkej ijkuak ixpan otimotemakakej (Sal. 25:14).

3. ¿Tlen tlajtlanilmej tikinnankiliskej?

³ Pero ¿tleka ualeua sekimej mokuayejyekouaj amo kiyolpaktiaj Jehová? ¿Ken kiteititia Jehová tikyolpaktiaj? ¿Tlen techpaleuis matikneltokakan tikyolpaktiaj Jehová?

¿TLEKA SEKIMEJ MOKUAYEJYEKOUAJ AMO KIYOLPAKTIAJ JEHOVÁ?

4, 5. ¿Tlen moneki matikneltokakan maski ualeua timokuayejyekouaj amitlaj topati?

⁴ Miakej tikmachiliaj amitlaj topati desde ijkuak otimoskaltijkej (Sal. 88:15). Se tokni itoka Adrián okijto:  “Nochipa nimokuayejyekoua amitlaj nopati. Nikilnamiki ijkuak onikatka nichokotsin onikiluiaya Jehová makinpaleui nofamilia para satepan mayetokan itech xochitlali. Pero ne onimokuayejyekouaya amo uelis ompa niyetoskia”. Tony okiskaltijkej ipapanuan tlen amo okatkaj iTlaixpantijkauan Jehová. Ye okijto: “Amo keman onechiluijkej onechpatioitayaj nion amo onechiluiayaj onechtlasojtlayaj. Onikmachiliaya amo keman okinpaktiaya tlen onikchiuaya”.

⁵ Matikilnamikikan Jehová otechnotski matipouikan itech ialtepe maski ualeua tikmachiliskej amitlaj topati (Juan 6:44). Ye kimati ken tikpiaj toyelis maski ualeua tejuan amo tikitaj uan noijki kuali techixmati (1 Sam. 16:7; 2 Crón. 6:30). Ikinon matikneltokakan ijkuak techiluia techpatioita (1 Juan 3:​19, 20).

6. ¿Ken omomachiliaya Pablo ijkuak omokuayejyekouaya tlen amo kuali okichi?

⁶ Xamo sekimej ok moyolkokouaj porque okichiuayaj tlen amo kuali ijkuak ayamo omomachtiayaj (1 Ped. 4:3). Oksekimej mochijchikauaj amo kichiuaskej tlen amo kuali maski yimiak xiuitl kitekichiuiliaj Jehová. ¿Tejuatsin noijki ok timoyolkokoua? Tla ijkon mitspanotok xamo mitsyolseuis tikmatis itekipanojkauan Jehová noijki ijkon omomachiliayaj. Ijkon omomachiliaya apóstol Pablo porque omokuayejyekouaya san okichiuaya tlen amo kuali (Rom. 7:24). Ye omoyolkopki uan omoapolakti. Pero okijto omomachiliaya ‘amo okachi ipati innauak oksekimej apóstoles’ uan okatka ‘okachi tlajtlakole’ (1 Cor. 15:9; 1 Tim. 1:15).

7. ¿Tlen moneki matikneltokakan tla yotimoyolkopkej?

⁷ ToTajtsin Dios kijtoua techtlapojpoluis tla timoyolkopaj (Sal. 86:5). Ikinon tla yotimoyolkopkej matikneltokakan yotechtlapojpolui porque ye melauak kichiua tlen kijtoua (Col. 2:13).

8, 9. ¿Tlen techpaleuis amo matimokuayejyekokan Jehová amo kipatioita tlen tikchiuaj?

⁸ Tinochtin tiknekij tiktekichiuiliskej Jehová ika nochi toyolo. Pero xamo sekimej mokuayejyekouaj amitlaj ipati tlen kichiuaj uan amo uelis kiyolpaktiskej toTajtsin Dios. Se tokni itoka Amanda okijto: “Mojmostla nimokuayejyekoua tlen okachi nikchiuas para niktekichiuilis Jehová. Ikinon ualeua nikneki nikchiuas seki tlamantli tlen amo niueli. Pero ijkuak amo ueli nikchiua tlen oniknekiaya, nimoyolkokoua uan nimokuayejyekoua noijki nikyolkokoua Jehová”.

⁹ ¿Tlen techpaleuis amo matimokuayejyekokan Jehová amo kipatioita tlen tikchiuaj? Matikilnamiktokan Jehová techajsikamati uan amo techiluia matikchiuakan tlen amo tiuelij. Ye kipatioita tlen tikchiuaj tla timochijchikauaj tikchiuaskej ika nochi toyolo. Matimokuayejyekokan ken yiuejkika sekimej okitekichiuilijkej Jehová ika nochi inyolo. Pablo miak xiuitl okitekichiuili Jehová. Ye uejka oyajki uan otlapaleui mamomiaktilikan tlanechikolmej. Pero satepan ayakmo okachi ueli otetlapoui ijkon ken achto okichiuaya. Non amo kijtosneki ayakmo okiyolpaktiaya Jehová. Pablo omochijchikauaya kitekichiuilis toTajtsin Dios uan ye okiteochi (Hech. 28:​30, 31). Tejuan noijki ualeua amo tiktekichiuiliaj Jehová ijkon ken tiknekiskiaj. Pero ye kipatioita tiktekichiuiliaj ika nochi toyolo. Matikitakan seki tlamantli tlen kiteititia Jehová kiyolpaktia tlen tikchiuaj.

 ¿TLEN TLAMANTLI KITEITITIA JEHOVÁ KIYOLPAKTIA TLEN TIKCHIUAJ?

10. ¿Ken techiluia Jehová tikyolpaktiaj? (Juan 16:27).

¹⁰ Techtlapouia ika iTlajtol. Jehová kipaktia kiteititis kintlasojtla akinmej kitekichiuiliaj uan kiselia tlen kichiuaj. Biblia kijtoua ome uelta Jehová okilui Jesús itlaj miak ipati. Ye okijto: “Nin noKone niktlasojtla uan ye kichiua manipaki” (Mat. 3:17; 17:5). ¿Mitspaktiskia noijki mamitsilui Jehová tikyolpaktia? Ye amo techualtlapouia desde iluikak pero techtlapouia ika iTlajtol. Ijkuak tiktlajtoltiaj Jesús kualtsin okintlapouiaya idiscípulos, noijki tikmachiliaj Jehová techtlapouia (xiktlajtolti Juan 16:27). Jesús okichi ijkon ken iTajtsin kichiua. Ikinon ijkuak tiktlajtoltiaj Jesús okinmilui idiscípulos okintlasojtlaya maski ualeua omotlapololtiayaj, uelis timokuayejyekoskej Jehová noijki ijkon techtlapouia (Juan 15:​9, 15).

11. ¿Tleka ijkuak titlajyouiaj amo matikijtokan ayakmo tikyolpaktiaj Jehová? (Santiago 1:12).

¹¹ Jehová techpaleuia. Ye kineki techpaleuis ikinon techmaka tlen ika timopanoltiskej. Pero ualeua kitekauilia matitlajyouikan ijkon ken okipanok Job (Job 1:​8-11). Amo matikijtokan ayakmo tikyolpaktiaj Jehová ijkuak titlajyouiaj. Ijkuak ijkon techpanoua matikteititikan tiktlasojtlaj uan matikneltokakan techpaleuis (xiktlajtolti Santiago 1:12). Matikitakan ken techtlasojtla uan techpaleuia matitlaxikokan.

12. ¿Tlen techmachtia tlen okipanok Dimitri?

¹² Matikitakan tlen okipanok se tokni tlen itoka Dimitri uan chanti Asia. Ye ayakmo okipiaya kanin tekipanos. Opanok miak metstli uan amo okajsiaya kanin tekipanos ikinon okijto okachi tetlapouiskia porque okineltokaya Jehová kipaleuiskia. Pero opanok seki metstli uan amo okajsiaya kanin tekipanos. Satepan opejki mokokoua uan omonekiaya uetos. Saiktlami opejki mokuayejyekoua amo kuali okinmaluiaya ikoneuan uan isiua ikinon ayakmo okiyolpaktiaya Jehová. Pero se youak itakotsin okikixti se amatl kanin ijkuilitok Isaías 30:15: “Nanyetoskej chikauakej tla nanmoyolseuijtokej uan nantlaneltokaj”. Satepan okimakak uan okilui: “Notajtsin, xikilnamiki nin texto  ijkuak timoyolkokos”. Dimitri okitak Jehová okipaleuijtoka porque ye uan ifamilia okipiayaj intlaken, tlen kikuaskej uan kanin chantiskej. Ye okijto: “Omonekiaya nikneltokas Jehová techpaleuiskia uan amo nimotekipachos”. Tla tejuan noijki ijkon techpanotok, matikneltokakan Jehová kitekipachoua tlen techpanoua uan techpaleuis matitlaxikokan.

13. ¿Ken kiteititia Jehová kiselia tlen tikchiuaj?

¹³ Kinyolinia tokniuan. Jehová kinyolinia tokniuan matechyolchikauakan ijkuak moneki. Ijkon okipanok se tokni tlen chanti Asia. Ye amo okipiaya kanin tekipanos uan opejki mokokoua miak. Satepan inamik otlajtlakolchi uan ayakmo okatka tlayekanki. Tokni sapanoua otlajyouijtoka ikinon okijto: “Amo onikajsikamatiaya tleka ijkon onechpanotoka. Onimokuayejyekouaya onikchi itlaj amo kuali ikinon Jehová ayakmo okiseliaya tlen onikchiuaya”. Ikinon okitlatlaujti Jehová makititi ok okitlasojtlaya uan ye okinankili. ¿Ken okichi? Ye okijto: “Tlayekankej nouan omotlapouijkej uan onechpaleuijkej manikita Jehová ok nechtlasojtla”. Satepan oksepa okitlatlaujti Jehová uan okilui makipaleui makita ken okipaleuijtoka. ¿Tlen opanok? Ye okijto: “Non tonal onikseli se carta tlen onechijkuililijkej tokniuan tlen inuan nimonechikoua. Ijkuak oniktlajtolti, onikitak Jehová okikak tlen oniktlatlaujti”. Non kiteititia Jehová techtlasojtlaj ijkuak oksekimej techyolchikauaj (Sal. 10:17).

14. ¿Tlen okse tlamantli kiteititia tikyolpaktiaj Jehová?

¹⁴ Jehová noijki kiteititia tikyolpaktiaj ijkuak kinpaleuia tokniuan matechyektlalikan. Ijkon opanok achto siglo ijkuak apóstol  Pablo okinmijkuilili 14 cartas tokniuan. Itech nonmej cartas okinmilui tlen omonekiaya kichiuaskej. ¿Tleka Jehová okiyekanki apóstol Pablo makinmijkuilili tlen omonekiaya kichiuaskej? Porque ye yolkuali, techtlasojtla uan techyektlalia “ijkon ken se teta kichiua iuan ikone tlen kiyolpaktia” (Prov. 3:​11, 12). Ikinon tla ikaj techyektlalia ika tlen tlamachtia Biblia, amo matimokuayejyekokan ayakmo tikyolpaktiaj Jehová. Ijkuak ikaj techyektlalia kijtosneki Jehová techtlasojtla (Heb. 12:6). ¿Tlen okseki tlamantli kiteititia tikyolpaktiaj Jehová?

OKSEKI TLAMANTLI TLEN KITEITITIA TIKYOLPAKTIAJ JEHOVÁ

15. ¿Akinmej kinmaka Jehová iespíritu santo uan tlen tikneltokaj tla tikkauaj matechyekana?

¹⁵ Jehová kinmaka iespíritu santo akinmej kiyolpaktiaj (Mat. 12:18). Uelis timotlajtlaniskej kox tikteititiaj techyekana iespíritu santo toTajtsin Dios. Kox axkan okachi tikmatij timochiaskej. Matikneltokakan tikyolpaktiaj toTajtsin Dios tla tikkauaj matechyekana iespíritu santo. (Xikita recuadro “ Techyekana espíritu santo”).

16. ¿Akinmej kinmiluia Jehová matetlapouikan ijkon ken kijtoua 1 Tesalonicenses 2:4 uan ken timomachiliaj?

¹⁶ Jehová kinmiluia akinmej kiyolpaktiaj matetlapouikan kuali tlajtoli (xiktlajtolti 1 Tesalonicenses 2:4). Matikitakan ken okipaleui se tokni tlen itoka Joselyn matetlapoui. Se tonal omoyolkokouaya ijkuak oijsak. Ye okijto: “Onimomachiliaya amitlaj uelis nikchiuaskia porque onisotlauaya. Pero non tonal omonekiaya nitetlapouiti porque onitlapaleuijtoka ken precursora. Ikinon oniktlatlaujti Jehová manechpaleui uan onia onitetlapouito”. Non tonal omotlapoui iuan se siuatl itoka Mary tlen okipiaya kualtsin iyelis uan okiseli momachtis Biblia. Opanok seki metstli Mary okilui Joselyn non tonal ijkuak okitlajpaloto ye okitlatlaujtijtoka toTajtsin Dios makipaleui. ¿Tlen okajsikamatki Joselyn ijkuak ijkon okipanok? Ye okijto okimachili okiyolpakti Jehová. Amo nochtin techkakiskej ijkuak titetlapouiaj. Pero matikneltokakan Jehová yolpaki ijkuak kita  timochijchikauaj tikintlapouiskej oksekimej kuali tlajtoli.

17. ¿Tlen techmachtia tlen okichi Vicky ijkuak omokuayejyeko Jehová ipatka okitemakak iKone? (Salmo 5:12).

¹⁷ Jehová okitlaxtla mamomakixtikan akinmej kiyolpaktiaj (1 Tim. 2:​5, 6). Pero ¿tlen tikchiuaskej tla tikitaj oui tikneltokaskej tikyolpaktiaj Jehová maski yokitlaxtla matechmakixtikan uan maski yotimoapolaktijkej? Matikneltokakan tlen Jehová techiluia maski ualeua amo kuali timomachiliaj. Jehová yokijto kinteochiuas akinmej yolkualmej porque kineltokaj ye yokintlaxtla mamomakixtikan (xiktlajtolti Salmo 5:12; Rom. 3:26). Se tokni itoka Vicky sapanoua okipaleui ijkuak omokuayejyeko tlen topatka okichi Jehová. Ye omokuayejyekouaya Jehová amo okitlasojtlaya pero satepan okijto: “Onikajsikamatki Jehová kimati mochias [...]. Pero yetoskia ken onikiluiaya: ‘Amo keman uelis techtlasojtlas. Amo keman uelis tikpojpolos notlajtlakol maski nopatka otiktemakak moKone’”. Tejuan noijki tikajsikamatiskej Jehová techtlasojtla uan uelis tikneltokaskej tikyolpaktiaj tla timokuayejyekouaj topatka okitemakak iKone.

18. ¿Tlen tikchiuaskej tla tiktlasojtlaj Jehová?

¹⁸ Xamo ualeua timoyolkokoskej uan timotlajtlaniskej kox tikyolpaktiaj Jehová maski timochijchikauaskej tikchiuaskej nochi tlen axkan yotimomachtijkej. Tla ijkon techpanoua matikilnamikikan tikyolpaktiaj Jehová ijkuak ‘nochipa tiktlasojtlaj’ (Sant. 1:12). Ikinon inauak matimotokikan uan matimochijchikauakan matikitakan ken tikyolpaktiaj. Nochipa matikilnamiktokan “amo oui tikixmatiskej” (Hech. 17:27).