1, 2. (1) ¿Keman okintlajkuilili Pablo tokniuan tlen ochantiayaj Éfeso? (2) ¿Tlen tlajtlanilmej tikinnankiliskej?

 PABLO okinekiaya kinyolchikauas tokniuan ijkuak otsaktoka itech se kali ompa Roma. Pero okintitlanili miakej cartas tokniuan porque amo ueli oyaya kintlajpaloti. Kanaj xiuitl 60 noso 61 Pablo okintitlanili se carta tokniuan tlen ochantiayaj ompa Éfeso (Efes. 1:1; 4:1).

² Yopanoka kanaj majtlaktli xiuitl ijkuak Pablo otetlapoui uan otlamachti kuali tlajtoli ompa Éfeso (Hech. 19:​1, 8-10; 20:​20, 21). Ye okinekiaya kinpaleuis tokniuan nochipa makitlakamatikan Jehová porque sapanoua okintlasojtlaya. Pero ¿tleka okintlajkuilili tokniuan tlen ochantiayaj Éfeso uan okinmilui achto okatkaj kanin tlayoua pero satepan okatkaj kanin tlanestok? ¿Tlen techmachtia tlen okinmilui makichiuakan? Axkan tikinnankiliskej ninmej tlajtlanilmej.

OTIKATKAJ KANIN TLAYOUA PERO AXKAN TIKATEJ KANIN TLANESTOK

3. ¿Tlen tlajtoli okijto Pablo para kiyekijtos ken okatkaj tokniuan tlen ochantiayaj Éfeso?

³ Pablo okinmilui tokniuan tlen ochantiayaj Éfeso ‘achto okatkaj kanin tlayoua pero axkan okatkaj [...] kanin tlanestok’ (Efes. 5:8). Pablo okijto tokniuan okatkaj kanin tlayoua pero satepan okatkaj kanin tlanestok para kiyekijtos yejuan okipatlakej innemilis. Achto matikitakan tleka okinmilui yejuan okatkaj “kanin tlayoua”.

4. ¿Tleka tikijtouaj tokniuan tlen ochantiayaj Éfeso achto okatkaj kanin tlayoua?

 ⁴ Okatkaj kanin tlayoua porque okineltokayaj tlen amo melauak. Tokniuan tlen ochantiayaj Éfeso okineltokayaj miak tlamantli tlen amo melauak ijkuak ayamo okichiuayaj ken Cristo. Ompa Éfeso okatka itemplo diosa Ártemis tlen miakej okixmatiayaj. Miakej sapanoua okipatioitayaj uan okitayaj kualtsin ken okichijchijkej. Miakej ompa oyayaj kinueyichiuatiuij indioses. Sekimej okitlaniayaj miak tomin porque okinchijchiuayaj tsikitsitsintin itemplos diosa Ártemis uan okinnemakayaj (Hech. 19:​23-27). Noijki miakej akinmej ompa ochantiayaj otetlajchiuiayaj (Hech. 19:19).

5. ¿Tleka tikijtouaj akinmej ochantiayaj Éfeso okatkaj kanin tlayoua porque okichiuayaj tlen amo kuali?

⁵ Okatkaj kanin tlayoua porque okichiuayaj tlen amo kuali. Akinmej ochantiayaj Éfeso oauilnemiayaj uan amo opinauayaj. Ijkon okichiuayaj itech teatros uan kanin okinueyichiuayaj indioses (Efes. 5:3). Yejuan ‘ayakmo okinkuejsouaya intlalnamikilis’ uan ayakmo itlaj okimachiliayaj ijkuak ijkon okichiuayaj (Efes. 4:​17-19). Yejuan ‘ayakmo okinkuejsouaya intlalnamikilis’ nion amo okilnamikiayaj Jehová kinmixkomakas. Amo okimatiayaj tlen kuali uan tlen amo kuali. Ikinon Pablo okinmilui ‘intlayejyekol okatka kanin tlayoua uan okikajkej yolilistli tlen kitemaka toTajtsin Dios’.

6. ¿Tleka Pablo okinmilui tokniuan tlen ochantiayaj Éfeso axkan okatkaj “kanin tlanestok”?

⁶ Pero sekimej okipatlakej innemilis ikinon Pablo okinmilui “axkan nankatej iuan toTeko kanin tlanestok” (Efes. 5:8). Yejuan opejkej kitlakamatij iTlajtol toTajtsin Dios porque okitayaj ken tlauili tlen okinyekanaya (Sal. 119:105). Yejuan ayakmo okichiuayaj tlen amo kuali uan ayakmo oauilnemiayaj. Opejkej kichiuaj ken toTajtsin Dios kichiua, omochijchikauayaj kiueyichiuaskej uan okiyolpaktiayaj (Efes. 5:1).

7. ¿Tleka tikijtouaj tejuan noijki otikatkaj ijkon ken akinmej ochantiayaj Éfeso?

⁷ Tejuan noijki otikatkaj kanin tlayoua ijkuak ayamo otimomachtiayaj iTlajtol  toTajtsin Dios. Ijkon otikatkaj porque otikneltokayaj tlen tlamachtiaj okseki religiones uan otikchiuayaj tlen amo kuali. Xamo otikchiuayaj seki iluitl tlen amo kipaktia toTajtsin Dios uan otiauilnemiayaj. Pero ijkuak opejki tikixmatij Jehová, opejki tikintlakamatij itlanauatiluan tlen kijtouaj tlen kuali uan tlen amo kuali. Sapanoua yotechpaleui otikixmatkej Jehová (Is. 48:17). Pero ualeua tikitaj oui tikchiuaskej tlen kuali uan ‘tiyetoskej ken ikoneuan tlauili’. Matikitakan tlen techpaleuis ijkuak ijkon techpanos.

AMO MATIYETOKAN “KANIN TLAYOUA”

8. ¿Tlen ayakmo omonekiaya kichiuaskej tokniuan tlen ochantiayaj Éfeso ijkon ken kijtoua Efesios 5:​3-5?

⁸ (Xiktlajtolti Efesios 5:​3-5). Tokniuan tlen ochantiayaj Éfeso ok omonekiaya mochijchikauaskej para kichiuaskej tlen kipaktia Jehová. Ijkon kisaskiaj kanin tlayoua porque okichiuayaj tlen amo kuali. Nin kijtosneki ayakmo auilnemiskiaj nion ayakmo pitsotlajtoskiaj. Pablo okinmilnamikti omonekiaya kikauaskej nochi non tlamantli tla okinekiayaj “kiseliskej iTekiuajkayo toTajtsin Dios tlen kiyekana Cristo”.

9. ¿Tleka moneki timomaluiskej tla amo tiknekij tiauilnemiskej?

⁹ Tejuan noijki moneki timomaluiskej tla amo tiknekij tikchiuaskej “tlen amitlaj ipati kichiuaj akinmej katej kanin tlayoua” (Efes. 5:11). Xamo okachi san niman tlajtlakolchiuas akin kita noso kikaki tlen pitsotik, kanin auilnemij noso kinmiluia oksekimej tlen kita noso tlen kikaki (Gén. 3:6; Sant. 1:​14, 15). Itech se altepetl sekimej iTlaixpantijkauan Jehová okichijkej se grupo itech internet uan ompa motlajkuililiskiaj. Ijkuak yikin opejki motlajkuililiaj, opejki motlapouiaj tlen tlamachtia Biblia uan akin Jehová. Pero satepan ayakmo omotlapouijkej non tlamantli uan opejki motlapouiaj ijkuak se tlakatl uan se siuatl san sekan motekaj. Satepan miakej okijtojkej tlen omotlapouiayaj okichi maauilnemikan.

10. ¿Tlen kineki Satanás matikchiuakan? (Efesios 5:6).

¹⁰ Akinmej kinyekana Satanás kinekij techkajkayauaskej para matikitakan amo tlajtlakoli tiauilnemiskej (2 Ped. 2:19). Satanás yimiak xiuitl kineki techkajkayauas porque amo kineki matikmatikan tlen kuali uan tlen amo kuali (Is. 5:20; 2 Cor. 4:4). Ikinon itech internet kichiuaj miak tlamantli tlen kixnamikij itlanauatiluan Jehová. Noijki itech películas uan tlen kipanoltiaj itech televisión. Satanás amo kineki matikitakan tlajtlakoli ijkuak ikaj auilnemi noso kichiua tlen pitsotik. Ye kineki ika matimoyolpaktikan uan amo techijtlakos (xiktlajtolti Efesios 5:6).

11. ¿Tleka tlen okipanok Angela techititia moneki matiktlakamatikan tlen kijtoua Efesios 5:7? (Noijki xikinmita fotos).

¹¹ Satanás kineki matimouikakan inuan akinmej amo kintlakamatij itlanauatiluan Jehová. Ikinon Pablo okinmilui tokniuan tlen ochantiayaj Éfeso amo mamouikakan inuan akinmej okichiuayaj tlen amo kuali. Ye okinmilui: “Amo xikchiuakan tlen yejuan kichiuaj” (Efes. 5:7). Pero tejuan moneki okachi timomaluiskej. ¿Tleka? Porque axkan noijki timotlapouiaj inuan oksekimej itech internet uan amo san inuan tikatej. Se tokni itoka Angela a tlen chanti Asia, okiyekijto tleka moneki timomaluiskej ijkuak timotlapouiaj inuan oksekimej itech internet. Ye okijto: “Yolik mitspatilijtiaskej  tlen timokuayejyekoua. Satepan opejki nimouika inuan akinmej amo moyekanaj ika principios bíblicos. Saiktlami opejki nimokuayejyekoua amo tlajtlakoli nikchiuas tlen Jehová amo kipaktia”. Pero tlayekankej okipaleuijkej Angela makipatla ken omokuayejyekouaya. Ye okijto: “Axkan okachi nikpatioita ken mokuayejyekoua Jehová uan amo san nimotlapouia inuan oksekimej itech internet”.

12. ¿Tlen moneki tikchiuaskej tla tiknekij tikintlakamatiskej itlanauatiluan Jehová?

¹² Amo matikinkauilikan oksekimej matechkajkayauakan maski kijtouaj amo tlajtlakoli tiauilnemiskej (Efes. 4:​19, 20). Ikinon matimotlajtlanikan: “¿Nimochijchikaua amo nimouikas inuan akinmej nimomachtia, akinmej inuan nitekipanoua noso oksekimej tlen amo kintlakamatij itlanauatiluan Jehová? ¿Nimochijchikaua nimoyekanas ika principios bíblicos maski oksekimej nechtlauelitaskej?”. Noijki 2 Timoteo 2:​20-22 techiluia kuali matikinpejpenakan akinmej inuan timouikaskej itech tlanechikol. Matikilnamiktokan amo nochtin techpaleuiskej matiktlakamatikan Jehová.

‘NOCHIPA MATIYETOKAN KEN IKONEUAN TLAUILI’

13. ¿Tlen kijtosneki ‘nochipa matiyetokan ken ikoneuan tlauili’? (Efesios 5:​7-9).

¹³ Pablo okinmilui tokniuan tlen ochantiayaj Éfeso ‘nochipa mayetokan ken ikoneuan tlauili’ uan ayakmo mayetokan kanin tlayoua (xiktlajtolti Efesios 5:​7-9). ¿Tlen kijtosneki tlen okinmilui? Kijtosneki nochipa matikchiuakan ken Cristo. Moneki tikchiuaskej seki tlamantli tla tiknekij tikchiuaskej ken Cristo. Moneki nochipa matiktlajtoltikan Biblia uan matimomachtikan uan noijki amatlajkuilolmej. Ijkuak timomachtiskej, matikitakan tlen okichi Jesús uan tlen otlamachti porque ye ‘kintlauilia akinmej chantij tlaltikpak’ (Juan 8:12; Prov. 6:23).

14. ¿Ken uelis techpaleuis iespíritu santo toTajtsin Dios?

¹⁴ Noijki moneki matechpaleui iespíritu santo toTajtsin Dios tla tiknekij ‘nochipa tiyetoskej ken ikoneuan tlauili’. ¿Tleka  ijkon tikijtouaj? Porque miakej kichiuaj tlen pitsotik ikinon tikitaj oui tiyetoskej tiyolchipauakej (1 Tes. 4:​3-5, 7, 8). Iespíritu santo toTajtsin Dios techpaleuis amo matimokuayejyekokan ijkon ken ixtlamatkej tlen katej nikan tlaltikpak. Porque yejuan amo mokuayejyekouaj ijkon ken Jehová mokuayejyekoua. Noijki techpaleuis matiyetokan ‘tiyolkualmej, matikchiuakan tlen kuali uan matikijtokan tlen melauak’ (Efes. 5:9).

15. ¿Tlen tikchiuaskej tla tiknekij matechmaka Jehová iespíritu santo? (Efesios 5:​19, 20).

¹⁵ Jesús okijto Jehová “kinmakas espíritu santo akinmej kitlajtlaniliaj” (Luc. 11:13). Ikinon matiktlatlaujtikan Jehová matechmaka iespíritu santo. Noijki tikseliskej espíritu santo ijkuak timonechikouaj inuan tokniuan para tikueyichiuaskej Jehová (xiktlajtolti Efesios 5:​19, 20). Ijkon espíritu santo techpaleuis matikpiakan tonemilis ijkon ken kipaktia toTajtsin Dios.

16. ¿Tlen techpaleuis kuali matikpejpenakan tlen tikchiuaskej? (Efesios 5:​10, 17).

¹⁶ Ijkuak itlaj tikpejpenaskej tikchiuaskej, moneki achto matikitakan “tlen Jehová kineki” uan satepan matikchiuakan (xiktlajtolti Efesios 5:​10, 17). Ijkuak timoyekanaj ika principios bíblicos, tikteititiaj timochijchikauaj tikitaskej ken kita Jehová tlen tiknekij tikchiuaskej. Kuali tikpejpenaskej tlen tikchiuaskej tla timoyekanaj ika principios bíblicos.

17. ¿Tlen uelis tikchiuaskej para amo timotonalpoloskej? (Efesios 5:​15, 16). (Noijki xikita dibujo).

¹⁷ Pablo noijki okinmilui tokniuan tlen ochantiayaj Éfeso amo san mamotonalpolokan (xiktlajtolti Efesios 5:​15, 16). Satanás kipaktiskia matiktemokan miak tlamantli tlen onka tlaltikpak uan amo matimajxilikan matiktekichiuilikan toTajtsin Dios (1 Juan 5:19). Amo oui tikixnekiskej tomin, tiknekiskej timomachtiskej noso titekipanoskej miak uan ayakmo tiktekichiuiliskej  toTajtsin Dios. Tla ijkon tikchiuaskej kijtosneki timokuayejyekouaj ijkon ken akinmej amo kitekichiuiliaj Jehová. Amo kijtosneki tlajtlakoli tikpiaskej seki tlamantli pero amo okachi matikpatioitakan. Ikinon amo matimotonalpolokan tla tiknekij ‘nochipa tiyetoskej ken ikoneuan tlauili’. Non kijtosneki matikitakan tlen okachi miak ipati tikchiuaskej.

18. ¿Tlen okichi Donald para okachi kitekichiuilis Jehová?

¹⁸ Matikitakan ken uelis okachi tiktekichiuiliskej Jehová. Ijkon okichi tokni Donald tlen chanti Sudáfrica. Ye okijto: “Onikitak tlen uelis nikchiuaskia uan oniktlatlaujti Jehová manechpaleui okachi manitetlapoui. Onikilui manechpaleui manikajsi kanin nitekipanos tlen nechkauiliskia manimajxili okachi nitetlapouis. Jehová onechpaleui manikajsi kanin nitekipanos. Ijkon ne uan nosiua okachi opejki tiktekichiuiliaj Jehová”.

19. ¿Tlen moneki tikchiuaskej tla tiknekij ‘nochipa tiyetoskej ken ikoneuan tlauili’?

¹⁹ Carta tlen Pablo okinmijkuilili tokniuan tlen ochantiayaj Éfeso okinpaleui makitlakamatikan Jehová uan tejuan noijki uelis techpaleuis. Axkan yotikitakej uelis techpaleuis tlen Pablo okinmilui tokniuan tlen ochantiayaj Éfeso kuali matikpejpenakan tlen ika timoyolpaktiskej uan akinmej inuan timouikaskej. Noijki techyolchikaua kuali matimomachtikan Biblia uan ijkon matikkauilikan matechyekana tlen ompa kijtoua. Noijki techilnamiktia miak ipati matechpaleui espíritu santo para matikpiakan kuali toyelis. Tla tikchiuaskej tlen okijto Pablo, uelis tikpejpenaskej tlen kipaktia Jehová. Non techpaleuis amo matiyetokan kanin tlayoua uan tiyetoskej kanin tlanestok.