Tiyolpakij maski amo tikpiaj miak tlamantli
DANIEL UAN MÍRIAM omonamiktijkej septiembre itech 2000 uan okipiayaj nochi tlen ika mopanoltiskej ompa itech Barcelona (España). Daniel okijto: “Tlen otiktlaniayaj, otechajxiliaya para tiaskej titlakuatiuij kanin kinemakaj tlakuali patio, tiaskej itech okseki altepemej uan kuali timotlakentiskej. Noijki nochipa otitetlapouiayaj”. Pero innemilis omopatlak.
Itech ueyi nechikol tlen omochi itech 2006, oajsik itech iyolo Daniel ijkuak otlajtlankej itech se tlapoualistli: “¿Tikinpaleuijtokej ‘akinmej kinuikaj kinmiktiskej’ para kiseliskej yolilistli tlen amo keman tlamis?” (Proverbios 24:11). Itech non tlapoualistli okiyekijtojkej moneki tikintlapouiskej tlaltikpaktlakamej para uelis momakixtiskej (Hechos 20:26, 27). Daniel kijtoa: “Onikmachili ne onechtlapouijtoka Jehová”. Noijki omoijto okachi tiyolpakij ijkuak timochijchikauaj tiktekichiuiliskej Jehová. Daniel kuali okimatiaya melauak ijkon panoa porque isiua okatka precursora uan oyolpakiaya.
Nin tlapoualistli sapanoa okitlajtlachialti Daniel uan okijto omonekiaya kipatlas inemilis. Ik non, ayakmo okachi otekitiaya uan omochi precursor uan omokuayejyeko sapanoa yolpakiskiaj ijkuak ye uan isiua tlapaleuiskiaj kanin okachi moneki.
SATEPAN OTIYOLPAKEJ
Itech mayo 2007, Daniel uan Míriam ayakmo otekitikej uan oyajkej Panamá kanin achto ompa youiaj. Otetlapouiayaj itech islas del archipiélago de Bocas del Toro, itech mar Caribe. Ompa chantij miakej tlen tlajtoaj guaymí. Daniel uan Míriam okijtojkej ika tomin tlen okololojkej kinmajxiliskia para ompa yetoskiaj kanaj chikueyi metstli.
Oyayaj itech barco uan itech bicicleta para tetlapouiskej itech islas. Ok kilnamikij ijkuak otlejkokej itech tepeyo kanaj 30 kilómetros ika bicicleta uan sapanoa otonaya. Daniel sapanoa osotlauak uan yikuaxiuintiskia. Pero ijkuak okinmixmatkej guaymíes, kuali okinselijkej uan okachi ijkuak opejki momachtiaj seki tlajtolmej. Uan satepan opejki kinmachtiaj 23 tlaltikpaktlakamej.
¿Tlen okichijkej ijkuak ayakmo okipiayaj tomin? Daniel kijtoa: “Yotiknekiayaj tichokaskej ijkuak yitimokuepaskiaj España. Amo otiknekiayaj tikinkajteuaskej akinmej otikinmachtiayaj”. Pero se metstli satepan otechiluijkej itlaj tlen melauak otechyolpakti. Míriam kijtoa: “Otechiluijkej ma tiyetokan precursores especiales. Sapanoa otiyolpakej ijkuak otikmatkej ompa timokauaskiaj”.
OKACHI OYOLPAKEJ
Ken ialtepe Jehová okipatlak seki tlamantli, itech 2015 Daniel uan Míriam okinmiluijkej ayakmo yetoskiaj precursores especiales. ¿Tlen kichiuaskiaj? Okineltokakej tlen kijtoa Salmo 37:5: “Xikmaka Jehová moojui; itech xitlaneltoka uan ye mitspaleuis”. Uan okajsikej se tekitl tlen kinkauilia ma yetokan precursores regulares uan tlapaleuiaj itech se tlanechikol tlen kajki Veraguas (Panamá).
Daniel kijtoa: “Achto tikisaskiaj itech España amo otikmatiayaj kox uelis ompa tichantiskiaj maski amo tikpiaskiaj miak tlamantli. Axkan tikitaj amo itlaj techpoloa. ¿Tlen kichiua okachi ma yolpakikan? Yejuan kijtoaj: “Sapanoa tiyolpakij tikinpaleuiskej akinmej yolyamankej ma kixmatikan Jehová”.