1. Satepan ijkuak Adán uan Eva otlajtlakolchijkej, ¿tlen okijto Jehová itech akin techkokolia?

ADÁN kuali okimatiaya koamej amo tlajtoaj. Ik non, ijkuak koatl omotlapoui iuan Eva, Adán omokuayejyeko omotlapouijtoka iuan se espíritu (Gén. 3:1-6). Yejuan amo okimatiayaj miak tlamantli itech non koatl. Pero Adán okikak non koatl uan okixnamik iTajtsin akin kajki iluikak (1 Tim. 2:14). Jehová san niman okijto akin okichi ma tlajtlakolchiua Adán uan Eva uan okijto kipojpoloskia. Pero noijki okijto peuaskia kintlajyouiltis akinmej kitlasojtlaj toTajtsin Dios (Gén. 3:15).

2, 3. ¿Tleka Jehová amo miak tlamantli okijto itech Satanás achto ualaskia Mesías?

² Jehová amo techiluia tlen itoka non ángel tlen okixnamik. * Ye omochixki dos mil quinientos xiuitl para techiluiskia  akin okixnamik (Job 1:6). Satanás moixmati ken “Tekokolia” noso “Teixnamiki” uan nin moajsi itech amochtli 1 Crónicas, Job uan Zacarías. ¿Tleka Jehová amo miak tlamantli okijto itech nin ángel achto ualaskia Mesías?

³ Itech Escrituras Hebreas Jehová amo miak tlamantli okijto itech Satanás uan tlen kichiua. Jehová okichi ma kijkuilokan Escrituras Hebreas para techpaleuiskia ma tikmatikan akin Mesías uan ma tikchiuakan ken ye (Luc. 24:44; Gál. 3:24). Jehová okitekitilti Mesías uan imachtijkauan para ma kitematiltikan tlen axkan tikmatij itech Satanás uan ángeles tlen kipaleuiaj. * Uan kuali ijkon kichiua Jehová porque kitekitiltis Jesús uan tlapejpenalmej para kipojpolos Satanás uan nochtin akinmej kipaleuiaj (Rom. 16:20; Apoc. 17:14; 20:10).

4. ¿Tleka amo ma tikmauilikan Satanás?

⁴ Tlatitlanil Pedro okijto Diablo “kemi yaskia se lío” uan tlatitlanil Juan okijto yetoskia ken se “weyi dragón” uan “koatl” (1 Ped. 5:8; Apoc. 12:9). Pero ¿moneki tikmauiliskej Satanás? Amo. Porque ye amo okachi chikauak (xiktlajtolti Santiago 4:7). Tejuan techpaleuia Jehová, Jesús uan ángeles yolmelajkej. Yejuan techpaleuiaj, ik non, uelis tikixnamikiskej Satanás. Pero moneki tikinnankiliskej eyi tlajtlanilmej tlen miak inpati: ¿Hasta kanin ajsi itlanauatilis Satanás? ¿Ken kineki techijtlakos? ¿Tlen tlamantli amo uelis kichiuas? Ma tikitakan nin tlamantli uan tikitaskej ken techpaleuia.

5, 6. ¿Tleka tekiuajkej amo uelis techmakaskej tlen melauak moneki?

⁵ Katej miakej ángeles tlen kixnamikij toTajtsin Dios uan ye Satanás kinnauatia. Ijkuak ayamo oatemiaya tlaltikpak, okichi miakej ángeles ma auilnemikan iuan siuamej. Biblia kineskayotia ken se “weyi dragón” tlen okinkajkaya sapanoa miakej sitlalimej. Nonmej ángeles okixnamikej Jehová uan opejki kipaleuiaj Satanás (Gén. 6:1-4; Jud. 6; Apoc. 12:3, 4). Pero Satanás uan akinmej kinnauatia noijki kipiaj se altepetl. Satanás kipia se altepetl ken toTajtsin Dios. Satanás tlanauatia itech non altepetl, okinmakak tekitl uan chikaualistli amo kuali ejekamej para ma tlanauatikan itech tlaltikpak (Efes. 6:12).

⁶ Satanás kitekitiltia ialtepe para kinnauatis tekiuajkej. Nin omotak ijkuak okititi Jesús “nochteh n altepemeh de nin tlaltíkpaktli” uan okilui: “Ne nikchiwas xiknawati nochi tlan onka itech nin tlaltíkpaktli iwa tiweyixtos intech. Porke nochi noaxka, iwa weletis nikmaktilis san akin ne niknekis” (Luc. 4:5, 6). Miakej tekiuajkej ok tlapaleuiaj maski Satanás kinnauatia. Uan miakej tekiuajkej melauak kinekij tlapaleuiskej. Pero amo onka se tekiua tlen uelis techmakas tlen melauak moneki (Sal. 146:3, 4; Apoc. 12:12).

7. ¿Ken kitekitiltia Satanás tlaneltokalistli tlen amo melauak, nochi tlen uelis tikkouaskej uan tekiuajkej? (Xikita dibujo kanin peua tlamachtil).

⁷ Satanás uan amo kuali ejekamej noijki kitekitiltia tlaneltokalistli tlen amo melauak uan nochi tlen uelis tikkouaskej para kinkajkayauas “nochteh n tlaltikpaktlakah”  (Apoc. 12:9). Satanás kitekitiltia tlaneltokalistli tlen amo melauak para ma tikkauakan Jehová. Uan noijki kineki amo ma tikmatikan itoka toTajtsin Dios (Jer. 23:26, 27). Miakej kineltokaj kiueyichiuaj toTajtsin Dios pero amo melauak porque kinueyichijtokej amo kuali ejekamej (1 Cor. 10:20; 2 Cor. 11:13-15). Noijki Satanás tlakajkayaua ika nochi tlen kinemakaj. Kineki ma tikneltokakan tiyolpakiskej tla tikpiaskej tomin uan okseki tlamantli (Prov. 18:11). Miakej kineltokiliaj uan kitemoaj miak tomin uan amo kitekichiuiliaj Jehová (Mat. 6:24). Tla tiknekiskej okachi miak tomin ayakmo tiktlasojtlaskej Jehová (Mat. 13:22; 1 Juan 2:15, 16).

8, 9. (1) ¿Tlen ome tlamantli techmachtia tlen okichi Adán, Eva uan ángeles tlen okixnamikej Jehová? (2) ¿Tleka techpaleuia tikmatiskej Satanás tlanauatia itech tlaltikpak?

⁸ Tlen okichi Adán, Eva uan ángeles tlen okixnamikej Jehová techmachtia ome tlamantli. Se, techmachtia moneki tikpejpenaskej akin tiktekichiuiliskej Jehová noso Satanás. Amo uelis ome tikintekichiuiliskej (Mat. 7:13). Ome, tla tiktekichiuiliskej Satanás amo techmakas nochi tlen moneki. Adán uan Eva inselti okipejpenkej tlen kuali uan tlen amo kuali. Uan amo kuali ejekamej ueli kinnauatiaj tekiuajkej (Gén. 3:22). Titlajyouiskej tla tikpejpenaskej tiktekichiuiliskej Satanás (Job 21:7-17; Gál. 6:7, 8).

⁹ ¿Tleka techpaleuia ma tikmatikan hasta kanin ajsi itlanauatilis Satanás? Porque nin techpaleuia ma tikinmitakan tekiuajkej ken moneki uan nin techpaleuis okachi ma titetlapouikan. Uan tikmatij Jehová kineki ma tikintlakaitakan tekiuajkej (1 Ped. 2:17). Kineki ma tikintlakamatikan intlanauatiluan tekiuajkej tla amo kixnamikij iTlajtol (Rom. 13:1-4). Pero amo ma timokajkalakikan itech política (Juan 17:15, 16; 18:36). Noijki tikmatiskej Satanás tlanauatia itech tlaltikpak, techyolchikaua ma titetlapouikan. Ye kineki kipojpolos uan kisokiotis itoka Jehová, ik non, timochijchikauaj titetlapouiaj tlen melauak itech toTajtsin Dios. Tikitaj se ueyi tlateochiualistli techixmatij ken tiiTlaixpantijkauan Jehová uan tikteititiaj itoka. Uan okachi ipati tiktlasojtlaskej Jehová uan amo tikpatioitaj tomin noso okseki tlamantli (Is. 43:10; 1 Tim. 6:6-10).

10-12. (1) ¿Ken okinkajkaya Satanás miakej ángeles? (2) ¿Tlen techmachtia tlen okinpanok ángeles?

¹⁰ Satanás kitekitiltia miak tlamantli  para techkajkayauas. Tikitaskej seki tlamantli tlen kineki ika techkajkayauas uan noijki kineki techmomojtis.

¹¹ Achto ma tikitakan tlen okitekitilti Satanás para kinkajkayauas miakej ángeles. Xamo miak xiuitl okinmitak tlen okichiuayaj uan omokuayejyeko ken uelis kinmijtlakoskia uan ijkon kitekichiuiliskiaj. Uan sekimej okinkajkaya ijkuak oauilnenkej iuan siuamej. Inkoneuan sapanoa okatkaj uejueyij, omoteuiayaj uan otetlajyouiltiayaj (Gén. 6:1-4). Satanás amo san okitekitilti auilnemilistli xamo noijki okinmilui kinnauatiskiaj tlaltikpaktlakamej. Amo okinekiaya ma nesi “ikone siuatl” tlen toTajtsin Dios okijto nesiskia (Gén. 3:15). Pero Jehová okatemiti nochi tlaltikpak uan ayakmo omochi tlen Satanás okinekiaya uan amo kuali ejekamej.

¹² ¿Tlen techmachtia nin tlamantli? Amo ma tikajauilmatikan auilnemilistli nion ma timoueyinekikan. Ángeles tlen Satanás okinkajkaya yimiak xiuitl okitekichiuilijtokaj Jehová. Pero okachi omokuayejyekojkej itech tlen amo kuali uan satepan okichijkej tlen okinekiayaj. Tejuan noijki xamo yimiak xiuitl tiktekichiuilijtokej toTajtsin Dios. Pero tla timokuayejyekoa tlen amo kuali, satepan tikchiuaskej tlen timokuayejyekoaj (1 Cor. 10:12). Miak ipati ma tikitakan tlen onka itech toyolo, amo ma timoueyinekikan uan ayakmo ma timokuayejyekokan tlen amo kuali (Gál. 5:26; xiktlajtolti Colosenses 3:5).

13. (1) ¿Tlen okse tlamantli kitekitiltia Satanás para techkajkayauas? (2) ¿Tlen tikchiuaskej para amo ma techkajkayaua?

¹³ Satanás noijki kitekitiltia naualotl para ika techkajkayauas. Axkan Satanás kineki kichiuas ma tikmatikan tlen kichiuaj amo kuali ejekamej ika tlaneltokalistli tlen amo melauak uan tlen ika timoyolpaktiaj. Kintekitiltia películas, videojuegos uan okseki tlamantli para ma mota kualtsin naualotl. ¿Tlen tikchiuaskej para amo ma techkajkayaua Satanás ika nin tlamantli? Amo ma tikchiakan ialtepe Jehová ma techilui tlen uelis ika timoyolpaktiskej uan tlen amo. Moneki tikmachtiskej totlalnamikilis ika itlanauatiluan Jehová para tikpejpenaskej tlen kuali (Heb. 5:14). Techpaleuis ma tikchiuakan tlen kuali tla tiktlasojtlaj Jehová ika nochi toyolo (Rom. 12:9). Ma timotlajtlanikan: “Tla akin nikmachtia noso akin niktlapouia kitaskia tlen ika nimoyolpaktia, ¿kitaskia nikchiua tlen nikmachtia noso amo?”. Amo techkajkayauas Satanás  tla tikchiuaj tlen titetlapouiaj (1 Juan 3:18).

14. (1) ¿Tlen kichiua Satanás para ma tikkauakan Jehová? (2) ¿Tlen techpaleuis ma titlaxikokan?

¹⁴ Axkan ma tikitakan tlen kichiua Satanás para ma tikkauakan Jehová. Ye uelis kichiuas tekiuajkej ayakmo ma techkauilikan ma titetlapouikan. Noijki uelis kichiuas akinmej iuan titekipanoaj noso tlen inmiuan timomachtiaj ma techpinauikan porque timochijchikauaj tikintlakamatiskej itlanauatiluan toTajtsin Dios (1 Ped. 4:4). Noijki uelis kichiuas tokalchanejkauan ma techiluikan ayakmo ma timonechikokan maski amo kinekij techijtlakoskej (Mat. 10:36). ¿Tlen tikchiuaskej para titlaxikoskej? Achto, ma tikilnamiktokan ijkon techpanos porque Satanás kineki techijtlakos (Apoc. 2:10; 12:17). Ome, amo ma tikilkauakan moneki tiknankiliskej Satanás porque kijtoa san tiktekichiuiliaj toTajtsin Dios ijkuak amo titlajyouiaj uan tikkauaskej tla titlajyouiskej (Job 1:9-11; 2:4, 5). Eyi, ma tiktlatlaujtikan Jehová ma techmaka chikaualistli para ma titlaxikokan. Uan ma tikilnamiktokan Jehová amo keman techkauas (Heb. 13:5).

15. Xikijto kox uelis techchiualtis Satanás ma tikchiuakan tlen amo tiknekij.

¹⁵ Satanás amo uelis techchiualtis ma tikchiuakan tlen amo tiknekij (Sant. 1:14). Miakej kichiuaj tlen Satanás kineki uan yejuan amo kitaj. Pero ijkuak peuaj momachtiaj tlen melauak itech toTajtsin Dios moneki kipejpenaskej akin kitekichiuiliskej (Hech. 3:17; 17:30). Satanás amo uelis techchiualtis ma tikkauakan toTajtsin Dios tla yotikpejpenkej tiktekichiuiliskej (Job 2:3; 27:5).

16, 17. (1) ¿Tlen okseki tlamantli amo ueli kichiua Satanás uan amo kuali ejekamej? (2) ¿Tleka amo ma timomojtikan ijkuak timotlapouiaj iuan Jehová?

¹⁶ Onka okseki tlamantli tlen Satanás uan amo kuali ejekamej amo ueli kichiuaj. Biblia amo kijtoa uelis kimatiskej tlen timokuayejyekoaj uan tlen tikpiaj itech toyolo. San Jehová uan Jesús kimatij (1 Sam. 16:7; Mar. 2:8). ¿Moneki timomojtiskej ijkuak timotlapouiaj iuan Jehová? ¿Timomojtiskej porque Satanás uan amo kuali ejekamej kikakij tlen tikiluiaj Jehová uan uelis ika techixnamikiskej? Amo. Ma timokuayejyekokan, ¿timomojtiaj ijkuak tiktekichiuiliaj Jehová maski Satanás kita? Amo. Ik non, amo ma timomojtikan ijkuak timotlapouiaj iuan Jehová maski Satanás ma kikaki (1 Rey. 8:22, 23; Juan 11:41, 42; Hech. 4:23, 24). Tla timochijchikauaj tikchiuaskej tlen titetlapouiaj uan tikchiuaskej tlen kineki Jehová, ye amo keman kikauilis Diablo ma techtlajyouiltijto (xiktlajtolti Salmo 34:7).

¹⁷ Moneki ma tikixmatikan akin techkokolia pero amo ma tikmauilikan. Uelis tiktlaniliskej Satanás maski titlajtlakolejkej porque Jehová techpaleuis (1 Juan 2:14). Tla tikixnamikij Diablo ye cholos (Sant. 4:7; 1 Ped. 5:9). Satanás kineki kinmijtlakos telpokamej uan ichpokamej. ¿Tlen uelis kichiuaskej para kixnamikiskej Diablo? Nin tiknankiliskej itech okse tlamachtil.