1. ¿Tlen okinmilui Jesús imachtijkauan achto mikiskia? (Xikita foto kanin peua tlamachtil).

SE YOAK achto mikiskia Jesús, omotlapoui iuan imachtijkauan. Okinmilui sapanoa okintlasojtlaya. Uan ken yotimomachtijkej yichikome Jesús okijto ye “milajka uvaskuawitl”. Ik non, okinyolchika imachtijkauan ma mochijchikauakan nochipa ma tetlapouikan (Juan 15:8).

2. (1) ¿Tleka moneki ma tikmatikan tleka titetlapouiaj? (2) ¿Tlen timomachtiskej?

² Pero Jesús amo san okinmilui tlen omonekiaya kichiuaskej noijki okinmilui tleka omonekiaya tetlapouiskej. Okinmilui tleka omonekiaya tetlapouiskej. ¿Tleka moneki noijki ma tikmatikan tleka titetlapouiaj? Porque techyolchikauas ma titetlapouikan itech “nochtin uejueyij altepemej” (Mat. 24:13, 14). Ik non, ma tikitakan naui tlamantli tleka moneki titetlapouiskej. Noijki tikitaskej naui tlamantli tlen techmaka Jehová uan non techpaleuis okachi ma titetlapouikan.

3. (1) Ijkon ken kijtoa Juan 15:8, ¿tleka titetlapouiaj? (2) ¿Tlen kineskayotia uvas tlen okijto Jesús uan tleka?

³ Sapanoa miak ipati titetlapouiaj porque ijkon tikueyichiuaj Jehová uan noijki titlapaleuiaj ma mochipaua itoka (xiktlajtolti Juan 15:1, 8). Itech nin texto, Jesús okijto iTajtsin ken “uvastékitki”. Uan ye okijto kineskayotia “uvaskuawitl” uan imachtijkauan kineskayotiaj “imamayo” (Juan 15:5). Ijkon uvas kuali kineskayotia Tekiuajkayotl porque imachtijkauan Jesús tetlapouiaj. Jesús okinmilui itlatitlaniluan: “Notajtsi kiselia weyílistli ijkuak nomejwah nonkitemakah miak nomotlakilo”. Ijkon ken akin uvastoka uan kuajkuali tlaki uvas, tejuan tikueyichiuaj Jehová ijkuak timochijchikauaj kuali titetlapouiskej iTekiuajkayo (Mat. 25:20-23).

4. (1) ¿Ken titlapaleuiaj ma mochipaua itoka toTajtsin Dios? (2) ¿Ken timomachilia porque titlapaleuia ma mochipaua itoka toTajtsin Dios?

⁴ ¿Titlapaleuiaj ma mochipaua itoka Jehová ijkuak titetlapouiaj? Itoka Jehová santo amo uelis tikchiuaskej okachi santo. Pero ma tikitakan tlen okijto Isaías tlen otlajtoaya ipatka totajtsin Dios: “Jehová akin kinyekana miakej soldados... san ye moneki nankitaskej santo” (Is. 8:13). Titlapaleuiaj ma mochipaua itoka Jehová ijkuak tikpatioitaj itoka uan ijkuak tikinmiluiaj oksekimej ma kitakan itoka santo (Mat. 6:9). Ijkuak titetlapouiaj ken iyelis Jehová uan ijkuak tikinmiluiaj oksekimej kikuepas se xochitlali tlaltikpak, tikinpaleuiaj oksekimej ma kitakan amo melauak tlen okijto Satanás (Gén. 3:1-5). Noijki titlapaleuiaj ma mochipaua itoka Jehová ijkuak tikinmiluiaj oksekimej san Jehová kinamiki “weyílistli, mawistílistli iwa n weletílistli” (Apoc. 4:11). Se tokni itoka Rene * tlen yikipia dieciséis xiuitl tekiti ken precursor, okijto: “Niktlasojkamatilia Jehová porque nechkauilia ma niyeto niiTlaixpantijka. Non nechpaleuia okachi ma nitetlapoui”.

5. (1) ¿Tlen kijtoa Juan 15:9, 10 para ma titetlapouikan? (2) ¿Tlen okinmilui Jesús imachtijkauan para tlaxikoskiaj?

⁵ (Xiktlajtolti Juan 15:9, 10). Sapanoa miak ipati titetlapouiaj porque tiktlasojtlaj Jehová uan iKone (Mar. 12:30; Juan 14:15). Jesús okinmilui imachtijkauan ‘xiyetokah nochipa ika notlasojtlalis’. ¿Tleka ijkon okinmilui? Porque kuali okimatiaya omonekiaya nochipa tlaxikoskej akinmej okinekiayaj kichiuaskej ken ye. Jesús miak uelta okinmilui imachtijkauan ‘mayetokah nochipa ika itlasojtlalis’ para ma kajsikamatikan tlen omonekiaya kixikoskej (Juan 15:4-10).

6. ¿Ken tikteititiaj tikatej itech itlasojtlalis Cristo?

⁶ ¿Ken tikteititiaj tikatej itech itlasojtlalis Cristo uan noijki tiknekij ma techseli? Ijkuak tiktlakamatij. Jesús okijto: “Porke ijkó kemi Ne onikchi moneki no ijkó xikchiwakah” nin kijtosneki kineki ma tikchiuakan tlen ye okichi (Juan 13:15).

7. ¿Ken tikteititiaj titetlasojtlaj?

⁷ Jesús okijto titetlakamatiskej mouika iuan tlasojtlalistli, okijto: “Akin kixmati  notlanawatil, iwa kichiwa tlan kijtoa, non tlakatl nechtlasojtla” (Juan 14:21). Noijki tikteititiaj tiktlasojtlaj toTajtsin Dios ijkuak titetlapouiaj ken Jesús otlanauati (Mat. 17:5; Juan 8:28). Jehová uan Jesús noijki techtlasojtlaj Ijkuak tikteititiaj tikintlasojtlaj.

8. ¿Tleka titetlapouiaj?

⁸ Noijki titetlapouiaj porque tiknekij tikinnejmachtiskej oksekimej iueyi tonal Jehová amo uejka kajki. Biblia kijtoa Noé otetlapoui itech melajkayotl (xiktlajtolti 2 Pedro 2:5). Noé otetlapoui atemiskia tlaltikpak. ¿Tleka ijkon tikijtoaj? Ma tikitakan tlen okijto Jesús: “Itech nekateh tonatijmeh ijkuak ayamó owalaya n chikawak kiawitl, n tlakah otlakuayah, okoniah, omonamiktiayah iwa okinmijtlaniah ichpokameh, asta n tonati ijkuak Noé okalak kan weyi arka. Mach okajsikamatkeh asta ijkuak okinmajsiko non kiawitl temojti iwa nochteh okinwík. Ijkó noiwa tlamochiwas ijkuak niwalmuikas, Ne Non onimochi ni tlakatl” (Mat. 24:38, 39). Noé otetlapouiaya maski amo okikakiayaj.

9. ¿Ken techpaleuia Ezequiel 3:18, 19 uan 18:23 ma titetlapouikan?

⁹ Axkan tikinpaleuiaj oksekimej ma kimatikan tlen iTekiuajkayo toTajtsin Dios uan tlen kineki kichiuas satepan para tejuan. Ijkon ken Jehová kineki ma kikakikan iTlajtol, tejuan noijki tiknekij ma kikakikan para ma yoltokan (Ezeq. 18:23). Ijkuak tiauij tikintlapouitiuij inkalijtik oksekimej uan kanin miakej panoaj, tikinmatiltiaj miakej iTekiuajkayo toTajtsin Dios kachiuas tlen amo kuali (Ezeq. 3:18, 19; Dan. 2:44; Apoc. 14:6, 7).

10. (1) ¿Ken techpaleuia Mateo 22:39 ma titetlapouikan? (2) Xikijto ken okipaleuijkej akin otlamaluiaya.

¹⁰ Noijki titetlapouiaj porque titetlasojtlaj (Mat. 22:39). Kuali tikmatij akinmej tikintlapouiaj uelis kipatlaskej ken mokuayejyekoaj ijkuak itlaj kinpanoa. Ik non, timochijchikauaj tikintlapouiskej. Ma timokuayejyekokan tlen okipanok Pablo iuan Silas. Okintsakej ompa Filipos porque otetlapouiayaj. Tlajko yoak chikauak otlalolinki uan omotlapojkej puertas. Akin otlamaluiaya okinekiaya momiktis porque omokuayejyeko nochtin ocholojkej. Pero Pablo okitsajtsili amo ma momikti. Uan akin otlamaluijtoka otlajtlanki: “¿Tlan moneki nikchiwas para nimomakixtis? Yejwah okinankilijkeh: ‘Xikneltoka n Toteko Cristo Jesús iwa mitsmakixtis’” (Hech. 16:25-34).

11. ¿Tlen techmachtia tlen okipanok akin otlamaluiaya?

¹¹ ¿Tlen techmachtia tlen okipanok akin  otlamaluiaya? Ijkuak otlalolinki okipatlak ken omokuayejyekoaya uan satepan okitemo ma kipaleuikan. Axkan noijki ijkon kinpanoa akinmej amo kinekij techkakiskej uan kipatlaj ken mokuayejyekoaj. Ijkon kinpanoa ijkuak ayakmo kipiaj tekitl, ijkuak mokualaniaj akinmej yomonamiktijkej, ijkuak kinmiluiaj kipiaj se kokolistli noso ijkuak miki akin okitlasojtlayaj. Ijkuak ijkon kinpanoa, peuaj motlajtlaniaj tleka ijkon panoa. Xamo noijki motlajtlaniaj ken akin otlamaluiaya: “¿Tlan moneki nikchiwas para nimomakixtis?”. Ijkuak tikintlapouiaj, kinekij ma tikinyolseuikan uan ma tikinpaleuikan.

12. ¿Tleka tiknekij titetlapouiskej?

¹² Tla ok titetlapouijtoskej, tikinyolseuiskej akinmej kinekij techkakiskej (Is. 61:1). Se tokni itoka Carla tlen yikipia chikueyi xiuitl kitekichiuilijtok Jehová, okijto: “Axkan miakej amo kimatij tlen kichiuaskej. Ik non, moneki ma tikinpaleuikan ma kikakikan iTlajtol toTajtsin Dios”. Uan se tokni itoka Eva tlen yikipia treinta y cuatro xiuitl tekiti ken precursora, okijto: “Axkan sapanoa miakej moyolkokoaj. Nikneki nikinpaleuis, ik non, nitetlapouia”. Ok titetlapouiskej tla titetlasojtlaj.

13, 14. (1) ¿Tlen tlamantli techpaleuia ijkon ken kijtoa Juan 15:11? (2) ¿Uelis tiyolpakiskej ken Jesús? (3) Tla tiyolpakij, ¿ken techpaleuis ma titetlapouikan?

¹³ Se yoak achto kimiktiskiaj Jesús, okinmilui imachtijkauan itlaj kinmakaskia tlen kinpaleuiskia okachi ma tetlapouikan. ¿Tlen tlamantli kinmakaskia uan ken kinpaleuiskia?

¹⁴ Techmaka yolpakilistli. ¿Tikitaskiaj oui titetlapouiskej? Amo. Ijkuak Jesús otlanki otlajto itech “uvaskuawitl”, okijto tiyolpakiskiaj ijkuak titetlapouiskiaj (xiktlajtolti Juan 15:11). ¿Tleka tiyolpakiskiaj? Ken yotikitakej Jesús okijto ye kineskayotia “uvaskuawitl” uan imachtijkauan “imamayo”. Imamayo kiselia atl uan nochi tlen kipaleuia ma moskalti. Ijkon ken Jesús yolpaki kichiuas tlen kineki iTajtsin, tejuan noijki tiyolpakiskej ken Jesús tla iuan tikatej uan tikchiuaj ken ye (Juan 4:34; 17:13; 1 Ped. 2:21). Se tokni itoka Ana tlen yikipia kanaj cuarenta xiuitl tekititok ken precursora, okijto: “Niyolpaki ijkuak nio nitetlapouiti uan non nechyolchikaua ma niktekichiuilijto Jehová”. Yolpakilistli techpaleuis ma titetlapouikan maski miakej amo techkakij (Mat. 5:10-12).

15. (1) ¿Tlen tlamantli techpaleuia ijkon ken kijtoa Juan 14:27? (2) ¿Ken techpaleuia yolseuilistli ma titetlapouikan?

¹⁵ Techmaka yolseuilistli (xiktlajtolti Juan 14:27). Non yoak Jesús okijto: “Noyolsewilis nomechkajtewilia”. ¿Ken techpaleuia yolseuilistli ma titetlapouikan? Ijkuak amo timosotlauaj titetlapouiaj, tikmatokej Jehová uan Jesús yolpakij uan non techyolseuia (Sal. 149:4; Rom. 5:3, 4; Col. 3:15). Se tokni itoka Alfredo tlen yikipia kanaj cuarenta y cinco xiuitl kitekichiuilijtok Jehová, okijto: “Nisotlaua ijkuak tlami titetlapouiaj pero melauak niyolpaki”. Timotlasojkamatij porque tikpiaj yolseuilistli.

16. (1) ¿Tlen tlamantli techpaleuia ijkon ken kijtoa Juan 15:15? (2) ¿Ken uelis mouikaskiaj tlatitlanilmej iuan Jesús?

 ¹⁶ Timouikaj iuan Jesús. Ijkuak Jesús otlanki okinmilui imachtijkauan ma yolpakikan, ye okinmilui tleka miak ipati ma tetlasojtlakan uan amo itlaj ma kichiakan (Juan 15:11-13). Satepan Jesús okinmilui yejuan okatkaj “itlakaikniwah”. ¡Melauak miak ipati mouikaskiaj iuan Jesús! ¿Tlen omonekiaya kichiuaskej itlatitlaniluan para mouikaskiaj iuan Jesús? Omonekiaya tetlapouijtoskej (xiktlajtolti Juan 15:14-16). Ome xiuitl achto Jesús okinmilui: “Xikinmatiltijtiwiah yoajsiko n tonati ijkuak Dios pewas nomechnawatis” (Mat. 10:7). Non yoak achto kimiktiskiaj, okinyolchika amo ma mosotlauakan uan ma tetlapouijtokan (Mat. 24:13; Mar. 3:14). Jesús kuali okimatiaya oui kichiuaskiaj tlen okinnauati. Pero uelis kichiuaskiaj uan ijkon iuan mouikaskiaj. ¿Ken kichiuaskiaj? Kiseliskiaj okse tlamantli tlen noijki kinpaleuiskia.

17. (1) ¿Tlen tlamantli techpaleuia ijkon ken kijtoa Juan 15:16? (2) ¿Uan ken kinpaleuiskia imachtijkauan Jesús?

¹⁷ Technankilia ijkuak tiktlatlaujtiaj. Jesús okinmilui: “Nochi tlan nonkitlajtlaniliskeh Notajtsi ika Notoka, Ye nomechmakas” (Juan 15:16). Nin xamo sapanoa okinyolchika. * Yejuan amo kuali okajsikamatiayaj tleka Jesús omonekiaya mikis. Pero nochipa kinpaleuiskia maski mikiskia. Jehová kinnankiliskia ijkuak kiluiskiaj ma kinpaleui ma tetlapouikan. Satepan okitlajtlanilijkej Jehová ma kinyolchikaua uan okinnankili (Hech. 4:29, 31).

18. ¿Tlen okseki tlamantli techpaleuia?

¹⁸ Axkan noijki ijkon techpanoa. Okachi timouikaj iuan Jesús ijkuak titetlapouiaj. Uan Jehová technankilis ijkuak tikiluiskej ma techpaleui ma tikixnamikikan san tlen ouijkayotl ijkuak titetlapouiaj (2 Cor. 4:7). Melauak tiktlasojkamatiliaj Jehová porque technankilia ijkuak tiktlatlaujtiaj uan noijki timouikaj iuan Jesús. Nochi nin techpaleuia ma titetlapouijtokan (Sant. 1:17).

19. (1) ¿Tleka ok titetlapouijtokej? (2) ¿Tlen techpaleuis ma tiktlamikan tekitl tlen Jehová otechmakak?

¹⁹ Ken yotimomachtijkej, titetlapouiaj porque tiknekij tikueyichiuaskej Jehová uan titlapaleuiaj ma mochipaua itoka, tikteititiaj tiktlasojtlaj ye, Jesús uan titetlapouiaj porque titetlasojtlaj. Noijki Jehová techmaka yolpakilistli, yolseuilistli, technankilia ijkuak tiktlatlaujtiaj uan noijki timouikaj iuan Jesús. Nochi nin techpaleuia ma titetlapouikan. Uan Jehová yolpaki ijkuak kita timochijchikauaj ika nochi toyolo titetlapouijtokej.