1. ¿Tlen ome tlamantli uelis tikneltokaskej?

JEHOVÁ nochipa kintlasojtlas akinmej kitekichiuiliaj. Noijki kipatioita melajkayotl (Sal. 33:5). Tikneltokaj nin ome tlamantli. Se tlamantli, Jehová kiyolkokoa ijkuak kintlajyouiltiaj itekipanojkauan. Ome tlamantli, Jehová kijtoa kitlajyouiltis akinmej kintlajyouiltiaj itekipanojkauan. Achto tlamachtil * otikitakej Jehová okintlasojtlaya israelitas uan okiteititi nochtin ma kinchiuilikan nochi ika melajkayotl (Deut. 10:18). Nin tlanauatil kiteititia Jehová sapanoa kintekipachoa akinmej kiueyichiuaj.

2. ¿Tlen tlajtlanilmej tikinnankiliskej?

² Itech xiuitl 33, ijkuak okitlalijkej achto tlanechikol omoijto ayakmo kitlakamatiskiaj tlanauatil tlen okijkuilo Moisés. ¿Kijtosneki ayakmo mopaleuiskiaj ika nin tlanauatil uan ayakmo kinchiuiliskiaj nochi ika melajkayotl? Amo. Akinmej opejkej kichiuaj ken Cristo okinmakakej okse yankuik tlanauatil. Itech nin tlamachtil achto timotlapouiskej itech yankuik tlanauatil uan satepan tikinnankiliskej ninmej tlajtlanilmej: ¿Tleka tikijtoaj nin tlanauatil kiteititia tlasojtlalistli? ¿Tleka nin tlanauatil kiteititia nochtin ma tikinchiuilikan ika melajkayotl? ¿Ken kiteititiaj kitlakamatij nin tlanauatil akinmej kinyekanaj oksekimej?

3. ¿Tlen poui itech “itlanawatil Cristo” ijkon ken kijtoa Gálatas 6:2?

³ (Xiktlajtolti Gálatas 6:2). Akinmej tikchiuaj ken Cristo technauatia “itlanawatil Cristo”. Jesús amo kanaj okinmijkuilili imachtijkauan tlanauatilmej. Pero okinmilui tlen kichiuaskiaj, okinmakak tlanauatilmej uan principios bíblicos tlen ika moyekanaskiaj. Itech “itlanawatil Cristo” poui nochi tlen otlamachti. Ma timomachtikan seki tlamantli uan ijkon okachi tikajsikamatiskej.

4, 5. (1) ¿Ken otlamachti Jesús? (2) ¿Keman otlamachti?

⁴ ¿Ken otlamachtiaya Jesús? Ye okinmilui tlen melauak itech toTajtsin Dios uan noijki okinmilui ken yolpakiskiaj. Noijki okinmilui san iTekiuajkayo toTajtsin Dios techpaleuis ayakmo ma titlajyouikan (Luc. 24:19). Jesús noijki okichiuaya tlen otlamachtiaya. Ijkon imachtijkauan okitakej tlen okichiuaya uan noijki ijkon okichijkej (Juan 13:15).

⁵ ¿Keman otlamachti Jesús? Ijkuak ouala nikan tlaltikpak (Mat. 4:23). Noijki okinmachti imachtijkauan ijkuak okiyolitijkej. Se tonal, okinmonextili kanaj quinientos tlaltikpaktlakamej uan okinnauati ma kinchiuakan imachtijkauan (Mat. 28:19, 20, TNM; 1 Cor. 15:6). Jesús kiyekana tlanechikol, ik non, ok okinmachti imachtijkauan maski oyajki iluikak. Itech xiuitl 96, okilui tlatitlanil Juan ma kinyolchikaua tlapejpenalmej (Col. 1:18; Apoc. 1:1).

6, 7. (1) ¿Kanin omoijkuilo tlen otlamachti Jesús? (2) ¿Tlen moneki tikchiuaskej tla tiknekij tiktlakamatiskej itlanauatil Cristo?

⁶ ¿Kanin omoijkuilo tlen otlamachti Jesús? Itech naui Evangelios moijtoa tlen okichi uan tlen okijto ijkuak nikan okatka. Okseki tlen ijkuilitok itech Escrituras Griegas Cristianas techpaleuia ma tikajsikamatikan ken mokuayejyekoa Jesús. Noijki akinmej otlajkuilojkej okinyekanki iespíritu santo toTajtsin Dios uan noijki okipiayaj “itlayejyekolis n Cristo” (1 Cor. 2:16).

⁷ ¿Tlen techmachtia? Tlen otlamachti Jesús techpaleuia itech nochi tonemilis.  Ik non, tokalijtik timoyekanaj ika itlanauatil Cristo, kanin titekipanoaj, kanin timomachtiaj uan ijkuak timonechikoaj iuan tokniuan. Tikajsikamatiskej nin tlanauatil tla tiktlajtoltiskej Escrituras Griegas uan itech timokuayejyekoskej. Tiktlakamatij itlanauatil Cristo ijkuak tikchiuaj tlen technauatia, ijkuak tikintlakamatij tlanauatilmej uan ijkuak timoyekanaj ika principios tlen moajsij itech Biblia. Ijkuak tiktlakamatij itlanauatil Cristo, tiktlakamatij Jehová porque ye okimachti Jesús (Juan 8:28).

8. ¿Tlen kiteititia itlanauatil Cristo?

⁸ Tla se kali kuali chijchitok, akinmej ompa chantij amo momojtiaj itlaj kinpanos. Noijki ijkon kinpanoa akinmej kitlakamatij itlanauatil Cristo porque nin tlanauatil kuali kajki. Itlanauatil Cristo kiteititia tlasojtlalistli. ¿Tleka ijkon tikijtoaj?

9, 10. (1) ¿Tlen tlamantli kiteititia Jesús nochi okichiuaya ika tlasojtlalistli? (2) ¿Ken uelis tikchiuaskej ken Jesús?

⁹ Se tlamantli, Jesús nochi kichiua ika tlasojtlalistli. Ye otetlasojtlaya, ik non, oteiknomatiaya ijkuak otlamachti, ijkuak okinpajti akinmej omokokoayaj, okintlamakak akinmej oapismikiayaj uan ijkuak okinyoliti akinmej yoixpolikaj (Mat. 14:14; 15:32-38; Mar. 6:34; Luc. 7:11-15). Okichiuaya miak tlamantli maski ualeua amo omajxiliaya. Pero ye oyolpakiaya ijkuak okinpaleuiaya oksekimej. Noijki sapanoa otechtlasojtlak ijkuak topatka omotemakak (Juan 15:13).

¹⁰ ¿Tlen techmachtia? Uelis tikchiuaskej ken Jesús tla nochipa tikinpaleuiaj oksekimej. Noijki ma tikinmiknomatikan akinmej tikintlapouiaj. Tla tikinmiknomatij, techyolinis ma tikintlapouikan uan ma tikinmachtikan. Ijkuak ijkon tikchiuaj, tikteititiaj tiktlakamatij itlanauatil Cristo.

11, 12. (1) ¿Ken tikmatij Jehová techtlasojtla? (2) ¿Ken uelis titetlasojtlaskej ken Jehová?

¹¹ Ome tlamantli, Jesús okitematilti iTajtsin tetlasojtla. Ijkuak Jesús otetlapoui uan otlamachti, okiteititi Jehová sapanoa kintlasojtla itekipanojkauan. Otlamachti toTajtsin Dios sapanoa techpatioita (Mat. 10:31). Noijki Jesús okiteititi Jehová kinselia akinmej moyolkopaj uan oksepa touan monechikoaj (Luc. 15:7, 10). Noijki okijto Jehová sapanoa otechtlasojtlak ijkuak okitemakak iKone (Juan 3:16).

¹² ¿Tlen techmachtia? ¿Ken uelis titetlasojtlaskej ken Jehová? (Efes. 5:1, TNM; 2). Ma tikinpatioitakan tokniuan uan kuali ma tikinselikan akinmej Jehová kintlapojpoluia (Sal. 119:176). Noijki tikteititiaj tikintlasojtlaj tokniuan tla tikinpaleuiaj ijkuak moneki (1 Juan 3:17). Noijki tiktlakamatij itlanauatil Cristo ijkuak tikteititiaj tikintlasojtlaj oksekimej.

13, 14. (1) ¿Tlen tlanauatil moajsi itech Juan 13:34, 35 uan tleka tikijtoaj yankuik? (2) ¿Ken tikteititiaj tiktlakamatij nin yankuik tlanauatil?

¹³ Eyi tlamantli, Jesús okinnauati imachtijkauan ma motlasojtlakan (xiktlajtolti Juan 13:34, 35). Jesús okitlali nin yankuik tlanauatil porque amo opouiaya itech tlanauatil tlen okijkuilo Moisés. Jesús otlanauati ma timotlasojtlakan ken ye otechtlasojtlak. Moneki okachi tikintlasojtlaskej. Jesús topatka omotemakak uan moneki noijki ma timotemakakan inpatka tokniuan. Pero moneki tikintlasojtlaskej tokniuan tla tiknekij ijkon tikchiuaskej.

 ¹⁴ ¿Tlen techmachtia? ¿Ken tikteititiaj tiktlakamatij yankuik tlanauatil? Ijkuak tikinpaleuiaj tokniuan. Amo san moneki inpatka timotemakaskej. Uelis tikchiuaskej seki tlamantli maski mota amitlaj ipati. Ma tikpaleuikan se tokni ma uia nechikol. Noijki tikteititiaj tiktlakamatij yankuik tlanauatil ijkuak tikchiuaj tlen kinpaktia tokniuan uan ijkuak titlapaleuiaj kanin tlaxixini. Tla ijkon tikchiuaj, tiktlakamatij itlanauatil Cristo uan titlapaleuiaj itech tlanechikol kuali ma momachilikan tokniuan.

15-17. (1) ¿Ken okiteititi Jesús nochtin okinchiuili ika melajkayotl? (2) ¿Ken uelis tikchiuaskej ken Jesús?

¹⁵ Biblia kijtoa melajkayotl kijtosneki kuali tikchiuaskej tlen kijtoa toTajtsin Dios uan amo tikchiuaskej tlen san tejuan techpaktia. ¿Tleka tikijtoaj itlanauatil Cristo kiteititia melajkayotl?

¹⁶ Achto ma tikitakan ken okiteititi Jesús okichiuaya nochi ika melajkayotl. Ijkuak nikan okatka, teopixkej judíos okinkokoliayaj akinmej ochantiayaj itech okseki altepemej, okinchikoitayaj akinmej amitlaj okipiayaj uan amo okintlakaitayaj siuamej. Pero Jesús amo keman ijkon okichi. Noijki akinmej amo okatkaj judíos itech otlaneltokakej pero amo keman okinmixtope (Mat. 8:5-10, 13). Okintlapoui akinmej okipiayaj tomin uan akinmej amo (Mat. 11:5; Luc. 19:2, 9). Amo keman okinchikoitak siuamej nion amo okinchiuili tlen amo kuali. Nochtin okintlakaitaya maski sekimej okikokoliayaj (Luc. 7:37-39, 44-50).

¹⁷ ¿Tlen techmachtia? Tikchiuaj ken Jesús tla nochtin tikintlapouiaj tlen tlamachtia Biblia uan amo keman tikinchikoitaj. Ma tikintlapouikan akinmej kipiaj tomin uan akinmej amo kipiaj. Akinmej kipiaj se religión uan akinmej amo. Tlakamej tlen kichiuaj ken Cristo, kintlakaitaj siuamej. Tiktlakamatij itlanauatil Cristo ijkuak tikchiuaj nochi nin tlamantli.

18, 19. ¿Tlen otlamachti Jesús itech melajkayotl uan tlen techmachtia?

¹⁸ Axkan ma tikitakan tlen okijto Jesús itech melajkayotl. Okinmachti imachtijkauan seki principios tlen ika moyekanaskiaj uan ijkon amo kinchiuiliskiaj oksekimej tlen amo kuali. Ma tikitakan tlen okijto itech se tlanauatil (Mat. 7:12). Tinochtin tiknekij ma techchiuilikan tlen kuali, ik non, moneki noijki ma tiktechiuilikan tlen kuali. ¿Tlen panos tla ijkon tikchiuaskej? Oksekimej kinekiskej techchiuiliskej tlen kuali. Pero ¿tlen tikchiuaskej tla yotechchiuilijkej tlen amo kuali? Jesús okinmilui imachtijkauan Jehová kinpaleuis akinmej “motiotsajtsiliah tlajka iwa n yuak” porque okinchiuilijkej tlen amo kuali (Luc. 18:6, 7). Ijkon techiluia toTajtsin Dios porque ye kimati tlen ouijkayotl mojmostla tikixnamikij uan ye kiyektlalis ijkuak monekis (2 Tes. 1:6).

¹⁹ ¿Tlen techmachtia? Tiktechiuiliskej tlen kuali tla timoyekanaj ika principio tlen okijto Jesús. Jehová kiyektlalis tla yotechchiuilijkej itlaj amo kuali.

20, 21. (1) ¿Ken kiteititiaj kitlakamatij itlanauatil Cristo akinmej kinyekanaj oksekimej? (2) ¿Ken kiteititiaj tlakamej kintlasojtlaj insiuauan? (3) ¿Ken moneki kiteititiskej tetajmej kintlasojtlaj inkoneuan?

²⁰ Yotikitakej itlanauatil Cristo kiteititia tlasojtlalistli. Ik non, akinmej kinyekanaj oksekimej moneki kintlasojtlaskej uan  kintlakaitaskej. Ma kilnamiktokan Cristo kineki ma tikteititikan tlasojtlalistli itech nochi tlen tikchiuaj.

²¹ Akinmej kinyekanaj inkalchanejkauan. Tlakamej moneki kintlasojtlaskej insiuauan ken “Cristo okitlasojtlak tlanechikol” (Efes. 5:25, TNM; 28, 29). Tlakamej okachi kitaj tlen kinpoloa insiuauan. Ualeua sekimej tlakamej oui kiteititiskej kintlasojtlaj insiuauan porque amo ijkon okinmititijkej ijkuak okinmiskaltijkej. Pero moneki kipatlaskej inyelis tla kinekij kitlakamatiskej itlanauatil Cristo. Siuamej kintlakaitaj innamik ijkuak kintlasojtlaj. Noijki tetajmej tlen kintlasojtlaj inkoneuan amo keman kinuijuikaltiaj nion kinchiuiliaj tlen amo kuali (Efes. 4:31). Kiteititiaj kintlasojtlaj uan ijkon konemej kuali momachiliaj. Ijkon konemej kintlasojtlaskej intatajuan uan kinneltokiliskej tlen kinmiluiaj.

22. Ijkon ken kijtoa 1 Pedro 5:1-3, ¿akin iaxkauan tokniuan uan ken moneki tikteititiskej tikintlasojtlaj?

²² Akinmej kiyekanaj tlanechikol. Tlayekankej moneki kilnamiktoskej amo inmiaxkauan tokniuan (Juan 10:16; xiktlajtolti 1 Pedro 5:1-3). Ijkuak kijtoa “ipilwah Dios” kijtosneki ye Jehová iaxkauan. Ye kineki ma tikteititikan tikintlasojtlaj (1 Tes. 2:7, 8). Tla tlayekankej kinmaluiaj tokniuan ken Jehová kineki, ye kinselia uan tokniuan kintlasojtlaj tlayekankej uan kintlakaitaj.

23, 24. (1) ¿Tlen kichiuaj tlayekankej ijkuak ikaj tlajtlakolchiua? (2) ¿Tlen kilnamiktokej tlayekankej ijkuak ikaj tlajtlakolchiua?

²³ ¿Tlen tekitl okichiuayaj yiuejkika tlayekankej? Tlatlamantli tekitl okipiayaj tlayekankej uan jueces. Pero okitlakamatiayaj itlanauatil toTajtsin Dios tlen okinmakak israelitas. Ninmej tlakamej amo san okitayaj ken omonekiaya kiueyichiuaskej Jehová.  Noijki okiyektlaliayaj tlen amo kuali okichiuayaj israelitas. Pero axkan okse tlamantli kichiuaj tlayekankej ika itlanauatil Cristo. Ijkuak se tokni tlajtlakolchiua, yejuan kitaj nin ouijkayotl. Yejuan kineltokaj toTajtsin Dios okintlali tekiuajkej para ma kiyektlalikan okseki tlamantli. San tekiuajkej uelis kijtoskej ma titlatlaxtlauakan noso ikaj kitsakuaskej porque itlaj okichi (Rom. 13:1-4).

²⁴ Tla non tekitl kichiuaj tekiuajkej, ¿tlen kichiuaj tlayekankej ijkuak ikaj tlajtlakolchiua? Mopaleuiaj ika Biblia ijkuak kiyektlaliaj ouijkayotl uan noijki ika moyekanaj ijkuak kipejpenaj tlen kichiuaskej. Kilnamiktokej itlanauatil Cristo kiteititia tlasojtlalistli. Nin tlamantli kinpaleuia tlayekankej ma kimatikan ken kipaleuiskej akin otlajtlakolchi. Tlayekankej moyekanaj ika tlasojtlalistli ijkuak kitaj kox melauak omoyolkopki uan ijkon kita kox uelis kipaleuiskej oksepa ma mouika iuan toTajtsin Dios.

25. ¿Tlen timomachtiskej itech okse tlamachtil?

²⁵ Timotlasojkamatij porque tikpiaj itlanauatil Cristo. Ijkuak timochijchikauaj tiktlakamatij, titlapaleuiaj ma kitakan tokniuan tikintlasojtlaj, tikinpatioitaj uan kuali ma momachilikan itech tlanechikol. Pero axkan tikatej itlamian tonalmej uan miakej okachi “kijtlakojtiaskeh inyolo” (2 Tim. 3:13). Ik non, moneki ma timomaluikan. Tikitaskej Jehová kiteititia tlasojtlalistli uan melajkayotl itech tlanechikol ijkuak konemej kinchiuiliaj tlen amo kuali. Nin tlamantli tikitaskej itech okse tlamachtil.