1. ¿Tleka sekimej tokniuan ayakmo majxiliaj momachtiskej?

AXKAN miakej sapanoa tekipanoaj para kipiaskej tlen ika mopanoltiskej. Miakej moneki tekipanoskej sejse tonal uan ijkon kinmakaskej inkalchanejkauan tlen ika mopanoltiskej. Sekimej yauij uejka tekipanotiuij uan oksepa ualmokopaj ijkuak tlami tekipanoaj. Sekimej tekipanoaj sejse tonal ixko tonaltsin. Sapanoa sotlauaj tokniuan tlen ijkon tekipanoaj uan ijkuak ajsij inkalijtik san kinekij moseuiskej uan ayakmo majxiliaj momachtiskej.

2. ¿Tejuatsin keman timomachtia?

² Moneki timajxiliskej timomachtiskej iTlajtol toTajtsin Dios uan amatlajkuilolmej. Pero moneki kuali ma timomachtikan tla tiknekij timouikaskej iuan toTajtsin Dios uan tla tiknekij tikpiaskej yolilistli tlen amo keman tlamis (1 Tim. 4:15). Sekimej tokniuan mojmostla kualkan meuaj momachtiaj porque amikaj kinkuejsoa uan okachi kilnamiktokej tlen momachtiaj. Oksekimej yoak momachtiaj uan mokuayejyekoaj kanin amitlaj kinkuejsoa.

3, 4. ¿Tlen tlamantli ayakmo kisa uan tleka?

³ Tinochtin tikmatokej moneki timajxiliskej timomachtiskej. Pero ¿tlen moneki timomachtiskej? Xamo timokuayejyekoaj tikpiaj miak tlamantli tiktlajtoltiskej uan amo timajxiliaj. Sekimej tokniuan nochi momachtiaj pero oksekimej amo majxiliaj. Akinmej pouij itech Cuerpo Gobernante kimatij ijkon kinpanoa tokniuan. Ik non, okijtojkej ayakmo miakej ma mochijchiuakan amatlajkuilolmej.

 ⁴ Axkan ayakmo kichijchiuaj Anuario. Pero itech jw.org^® uan itech JW Broadcasting^® uelis tikajsiskej tlen okinpanok tokniuan uan non techyolchikauas. Axkan sejse xiuitl kisaj eyi revistas Akin Tetlapouijtok uan eyi revistas ¡Ma titlachixtokan! Pero nin amo kijtosneki okachi timajxiliskej tikchiuaskej okseki tlamantli. Okipatlakej seki tlamantli para okachi ma timajxilikan timomachtiskej (Filip. 1:10). Axkan ma tikitakan tlen okachi moneki tikpatioitaskej uan ken techpaleuis timomachtiskej Biblia.

5, 6. ¿Tlen moneki okachi kuali timomachtiskej?

⁵ ¿Tlen moneki okachi tikpatioitaskej? Moneki mojmostla timajxiliskej timomachtiskej iTlajtol toTajtsin Dios. Axkan ayakmo miak capítulos timomachtiaj chichikometika. Ijkon timajxiliaj okachi timokuayejyekoskej uan okachi timomachtiskej tlen tiknekij tikmatiskej. Amo san ma tikintlajtoltikan capítulos. Tlen tiktlajtoltiaj moneki ma ajsi itech toyolo uan ma techpaleui okachi ma timouikakan iuan Jehová (Sal. 19:14).

⁶ ¿Tlen moneki okachi kuali timomachtiskej? Ma timomachtikan revista Akin Tetlapouijtok uan Tlamachtil ika Biblia itech tlanechikol uan okseki tlen timomachtiaj tlajko semana. Noijki ma tikintlajtoltikan nochi revistas Akin Tetlapouijtok uan ¡Ma titlachixtokan!

7. ¿Tleka amo ma timoyolkokokan tla amo ueli nochi timomachtiaj tlen kajki itech jw uan itech JW Broadcasting?

⁷ Xamo ikaj uelis kijtos: “Amo nimajxilis nimomachtis nochi tlen kajki itech jw uan tlen kajki itech JW Broadcasting. Sapanoa miak...”. Ma tikitakan tlen uelis tikchiuaskej. Ma tikijtokan kanin tlakualnemakaj onka tlatlamantli tlakuali. Pero akinmej yauij ompa tlakuatiuij amo kikuaskej nochi tlakuali tlen ompa kinemakaj. San kipejpenaj tlen kikuaskej. Noijki ijkon techpanoa. Amo ma timoyolkokokan tla amo nochi timomachtiaj tlen kajki itech Internet. San moneki ma timochijchikauakan ma timajxilikan ma tiktlajtoltikan uan ma tikitakan tlen tiuelij. Pero ¿tlen kijtosneki timomachtiskej uan ken uelis techpaleuis?

8. (1) ¿Ken uelis timomachtiskej revista Akin Tetlapouijtok? (2) ¿Ken techpaleuis tla timomachtiskej ken kijtoa párrafo?

⁸ Timomachtiskej amo san kijtosneki tiktlajtoltiskej uan tiktlapaluiskej se amatlajkuilol. Kijtosneki kuali tiktlajtoltiskej uan tikitaskej ken techpaleuis. Ma tikitakan ken timomachtiskej ika revista Akin Tetlapouijtok. Achto ma tikitakan kanin kijtoa xikilnamikto. Satepan ma tikitakan tlen itoka tlamachtil, subtítulos uan noijki tlajtlanilmej tlen tikinnankiliskej ijkuak tlamis timomachtiskej. Ijkuak ijkon yotikchijkej, kuali ma tiktlajtoltikan nochi tlamachtil. Ma tikitakan tlen tlajtolmej kitekitiltia para ma timomachtikan uan ninmej tlajtolmej moajsij kanin peuaj párrafos. Nonmej tlajtolmej techiluiaj tlen techmachtia non párrafo. Ijkuak tiktlajtoltiskej tlamachtil ma timokuayejyekokan ken sejse párrafo mouika iuan  subtítulo uan noijki iuan itoka tlamachtil. Ma tikinmijkuilokan tlajtolmej tlen amo tikinmajsikamatij uan tlen okachi tiknekij tikmatiskej.

9. (1) ¿Tleka moneki kuali ma tikinmitakan textos tlen kiualika revista Akin Tetlapouijtok uan ken uelis tikchiuaskej? (2) Ijkon ken kijtoa Josué 1:8, ¿tlen moneki tikchiuaskej ijkuak tikintlajtoltiskej textos?

⁹ Timomachtiaj Biblia ijkuak timomachtiaj revista Akin Tetlapouijtok. Ik non, kuali ma tikitakan tlen kijtoaj textos tlen ompa ijkuilitokej uan okachi kuali ma tikinmitakan tlen kijtoaj motlajtoltiskej. Kuali ma tikitakan ken textos mouikaj iuan párrafo. Noijki ma timokuayejyekokan ken tikchiuaskej tlen kijtoaj textos (xiktlajtolti Josué 1:8).

10. Ijkon ken kijtoa Hebreos 5:14, ¿tleka tetajmej moneki kinmititiskej ken momachtiskej inkoneuan ijkuak kiueyichiuaj Jehová?

¹⁰ Axkan ma timotlapouikan tlen uelis tikchiuaskej ijkuak tikueyichiuaj Jehová iuan tokalchanejkauan. Tetajmej kinekij ma kinpakti inkoneuan ijkuak kiueyichiuaj Jehová. Maski tetajmej nochipa kitemoaj tlen momachtiskej, amo moneki kichiuaskej miak tlamantli oui. Uelis kitaskej Broadcasting sejse metstli noso kichiuaskej akali tlen okichijchi Noé uan uelis kichiuaskej okseki tlamantli. Pero tetajmej moneki kinmititiskej inkoneuan ken uelis momachtiskej. Konemej moneki kimatiskej ken momachtiskej para ijkuak monechikoskej noso ijkuak itlaj kintlajtlaniskej kanin momachtiaj (xiktlajtolti Hebreos 5:14). Tla inkalijtik momachtiaj se tlamachtil, ijkuak monechikoskej okachi tlakaktoskej uan noijki ijkon kichiuaskej itech uejueyij nechikolmej. Ompa amo nochipa kintlaliaj videos. Pero tetajmej moneki kitaskej keski xiuitl kipiaj inkoneuan uan ken inyelis uan ijkon kitaskej kox uejkauaskej momachtiskej.

11. ¿Tleka moneki ma tikinmititikan akinmej tikinmachtiaj inselti ma momachtikan?

¹¹ Akinmej tikinmachtiaj noijki moneki tikinmititiskej ken momachtiskej inselti. Tiyolpakij ijkuak kitlapaluiaj tlen tlanankiliskej ijkuak timomachtiskej noso tlen timomachtiskej ijkuak timonechikoskej. Pero moneki tikinmititiskej ken moneki momachtiskej inselti. Non kinpaleuis ijkuak kixnamikiskej ouijkayotl uan amo monekis kitlajtlaniskej se  tokni tlen moneki kichiuaskej. Inselti kitemoskej uan kajsiskej tlen kinekij kimatiskej.

12. ¿Tleka moneki ma tikilnamiktokan tleka timomachtiaj?

¹² Tla amo techpaktia timomachtiskej, xamo timokuayejyekoaj amo keman tiyolpakiskej ijkuak timomachtiskej. Pero uelis tiyolpakiskej. Achto, amo miak ma timomachtikan uan satepan yolik okachi timomachtijtiaskej. Ma tikilnamiktokan tleka timomachtiaj. Timomachtiaj para kuali timouikaskej iuan Jehová. Pero noijki timomachtiaj para kuali titlanankiliskej ijkuak ikaj itlaj techtlajtlanis noso ijkuak tikixnamikiskej ouijkayotl.

13. (1) ¿Tlen uelis kichiuas se telpochtli tla kineki kuali tlanankilis ijkuak itlaj kitlajtlaniskej? (2) ¿Ken uelis tikchiuas tlen kijtoa Colosenses 4:6?

¹³ Ma tikijtokan itech escuela miakej kineltokaj evolución. Te tikneki tikijtos amo ijkon tlamachtia Biblia pero tikmachilia amo tiuelis. Moneki okachi timomachtis para okachi xikneltoka Jehová otlachijchi. Noijki porque moneki tikinmiluis akinmej inmiuan timomachtia tlen tikneltoka (Rom. 1:20; 1 Ped. 3:15). Achto moneki tikmatis tleka yejuan kineltokaj evolución. Satepan xitlatemo tlen kijtoaj amatlajkuilolmej. Ijkuakon tikitas amo oui tikijtos tlen tikneltoka. Miakej kineltokaj evolución porque okinmilui ikaj tlen kitlakaitaj. Pero ijkuak tikajsis kanaj ome tlamantli miak ipati, uelis tiknankilis akin kineki kimatis tlen tikneltoka (xiktlajtolti Colosenses 4:6).

14, 16. (1) ¿Ken uelis okachi kuali tikajsikamatiskej se amochtli tlen kajki itech Biblia? (2) ¿Ken techpaleuiaj textos tlen ompa ijkuilitokej okachi ma tikajsikamatikan amochtli tlen okijkuilo Amós? (Xikita recuadro “ Okachi ma tikinmixmatikan akinmej okitekichiuilijkej Jehová”).

¹⁴ Ma tikijtokan itech se nechikol timomachtiskej tlen okijkuilo se profeta tlen amo okachi tikixmatij. Tla tiknekij tikixmatiskej, moneki achto tiktlajtoltiskej tlen okijkuilo. ¿Ken tikchiuaskej?

¹⁵ Achto ma timotlajtlanikan akin okatka nin profeta, kanin ochantiaya uan tlen okichiuaya. Nochi nin techpaleuis ma tikajsikamatikan tleka okintekitilti seki tlajtolmej noso tleka okinmijkuilo neskayomej. Ijkuak tiktlajtoltiskej tlen okijkuilo, ma tikintemokan tlajtolmej tlen kiteititiaj ken iyelis profeta.

¹⁶ Satepan ma tiktemokan keman okijkuilo non amochtli. Uelis tikitaskej “Tabla de los libros de la Biblia”, nin kajki kanin peua Traducción del Nuevo Mundo de las Santas Escrituras (con referencias). Noijki itech Amatlajkuilol tlen mitspaleuis timomachtis iTlajtol toTajtsin Dios itech sección 3 ompa kijtoa tlen profetas uan uejueyij tekiuajkej okatkaj. Amochtli tlen okijkuilo profeta kinpia profecías, ik non, moneki ma tiktemokan tlen opanotoka ijkuak okijkuilo. Uelis tiktemoskej tlen okinekiaya profeta amo ma kichiuakan oksekimej. Xamo moneki tikinmitaskej okseki amochmej itech Biblia tla tiknekij okachi tikmatiskej. Ma tikitakan tlen uelis tikchiuaskej. Tla tiknekij tikajsikamatiskej tlen opanok ijkuak okatka Amós, uelis tiktlajtoltiskej 2 Reyes uan 2 Crónicas tlen nesij itech referencias  marginales itech Amós 1:1. Noijki techpaleuis tla tiktlajtoltiskej amochtli Oseas. Porque Oseas noijki okatka itech nonmej tonalmej. Nochi nin tlamantli techpaleuis ma tikmatikan tlen opanotoka ijkuak okatka Amós (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Xikijto ken techpaleuia tla timokuayejyekoskej itech okseki tlamantli ijkuak tiktlajtoltiaj Biblia. Uelis tikijtos tlen kijtoaj párrafos noso uelis tikijtos okseki tlamantli.

¹⁷ Moneki ma timochijchikauakan kuali ma tikajsikamatikan Biblia. Ma tikijtokan tiktlajtoltiskej amochtli tlen okijkuilo Zacarías itech capítulo 12 kanin kijtoa mikis Mesías (Zac. 12:10). Ijkuak tiktlajtoltiaj versículo 12, kijtoa “ikalchanejkauan Natán” sapanoa chokaskiaj ijkuak mikiskia Mesías. Non versículo amo san ma tikpanouikan. Moneki ma timotlajtlanikan: “¿Tlen kipia tlen kitas Mesías iuan ikalchanejkauan Natán? ¿Kanin nikajsis okseki tlamachtil?”. Ik non, moneki okachi timomachtiskej. Referencia marginal tlen ompa nesi kijtoa ma tikitakan 2 Samuel 5:14, ompa kijtoa Natán okatka ikone David. Okse refencia kijtoa ma tikitakan Lucas 3:31 ompa kijtoa Jesús oualaya itech ikalchanejkauan Natán porque María noijki okiski itech ikalchanejkauan (xikita revista Akin Tetlapouijtok agosto 2017 página 32, párrafo 4). ¡Sapanoa tlapaleuia nin tlamantli! Otikmatiayaj omoijto Jesús ualaskia itech ikalchanejkauan David (Mat. 22:42). Pero David okinpiaya kanaj veinte ikoneuan. Nin tlamantli techititia tleka Zacarías okijto ikalchanejkauan  Natán sapanoa chokaskiaj ijkuak mikiskia Jesús.

¹⁸ Ma tikitakan okse tlamantli. Kanin peua Lucas kijtoa ángel Gabriel okitlajpaloto María uan okilui tlen kichiuaskia konetl tlen kipiaskia. Okijto: “Ye saikpanoa weyijkatitos, iwa kinotsaskeh Tekone de non Weyijkatitok. Dios Toteko kitlalis mayeto Rey ijkó kemi otlanawati David iwejkatata. Ye nochipa kinawatijtos n país de Israel, iwa itlanawatil mach ayik pojpoliwis” (Luc. 1:32, 33). Xamo san timokuayejyekoaj tlen achto okijto ángel Gabriel. Okijto Jesús yetoskia “Tekone de non Weyijkatitok”. Pero ángel Gabriel noijki okijto Jesús tlanauatiskia. Ik non, xamo timotlajtlaniaj tlen okajsikamatki María ijkuak ijkon okilui ángel Gabriel. ¿María omokuayejyeko Jesús kipatkayotiskia Herodes noso oksekimej tekiuajkej? ¿Omokuayejyeko ye noijki tlanauatiskia uan ikalchanejkauan chantiskiaj itech se ueyi kali? Biblia amo kijtoa kox María ijkon okilui ángel Gabriel. Noijki amo kanaj kijtoa ye okitlajtlanki okinekiaya yetos iluikak ijkon ken okichijkej ome imachtijkauan Jesús (Mat. 20:20-23). Nin techmachtia María okatka sapanoa yolyamanki.

19, 20. Ijkon ken kijtoa Santiago 1:22-25 uan 4:8, ¿tlen moneki tikilnamiktoskej ijkuak timomachtiskej?

¹⁹ Ma tikilnamiktokan timomachtiaj Biblia uan okseki amatlajkuilolmej porque tiknekij okachi kuali timouikaskej iuan Jehová. Pero noijki ma techpaleui okachi kuali ma tikpiakan toyelis uan ma tikpatlakan tlen moneki uan ijkon tikyolpaktiskej Jehová (xiktlajtolti Santiago 1:22-25; 4:8). Ma tiktlatlaujtikan Jehová ma techmaka iespíritu santo ijkuak timomachtiskej. Noijki ma tikiluikan ma techpaleui tlen timomachtiskej uan ma tikpatlakan toyelis.

²⁰ Tinochtin ma tikchiuakan ken kijtoa Salmo 1:2, 3: “Moyolpaktia ika itlanauatil Jehová uan tonal uan yoak ichtakatsin kitlajtoltia itlanauatil. Uan [...] nochi tlen kichiuas kuali kisas”.