1, 2. (1) ¿Tlen tlamantli techpaleuia ma tikajsikamatikan tiknekij ma techyolseuikan uan tejuan noijki uelis ijkon tikchiuaskej? (2) ¿Tlen okinpanok sekimej konemej?

ITECH toeso kajki tiknekij ma techyolseuikan uan noijki ma titeyolseuikan. Ma tikitakan tlen kichiua se chokotsin ijkuak uetsi. Ijkuak yaui mauiltiti, uetsi uan motlankuaxixipeua. Peua choka uan yaui kitemoti inantsin. Inantsin amo uelis kipajtis pero kiyolseuis. Kitlajtlania kanin ouetski, kixayouajuatsa, kinapaloa, kitlajtlasojtla uan xamo kipajtilia kanin omotlankuaxixipe. Chokotsin san niman moyolseuia uan xamo oksepa yaui mauiltiti. Satepan ayakmo kilnamikis porque pajtis.

² Pero oksekimej konemej okachi tlajyouiaj porque okinchiuilijkej itlaj amo kuali. Porque miakej inmiuan omotekakej uan xamo miak uelta ijkon okinchiuilijkej. Non tlamantli ualeua amo ueli kilkauaj. Sekimej tlen motekaj iuan konemej kintsakuaj. Pero oksekimej amitlaj kinchiuiliaj. Maski sekimej kintsakuaj, konemej sapanoa tlajyouiaj uan nochipa kilnamiktokej tlen okinchiuilijkej.

3. (1) Ijkon ken kijtoa 2 Corintios 1:3, 4, ¿tlen kineki Jehová ma tikchiuakan? (2) ¿Tlen tlajtlanilmej tikinnankiliskej?

³ ¿Tlen kipaleuis se tokni ma moyolchikaua maski okichiuilijkej tlen amo kuali? (Xiktlajtolti 2 Corintios 1:3, 4). Jehová kineki ma tikintlasojtlakan uan ma tikinyolseuikan. Ik non, ma tikinnankilikan eyi tlajtlanilmej: ¿Tleka moneki ma tikinyolseuikan akinmej okinchiuilijkej tlen amo kuali? ¿Akin moneki kinyolseuis? ¿Tlen uelis  tikchiuaskej uan ijkon tikinyolseuiskej?

4, 5. (1) ¿Tleka tikijtoaj konemej amo kipiaj inyelis ken akinmej yikipiaj miak xiuitl? (2) ¿Tlen kichiua se konetl ijkuak kichiuiliaj tlen amo kuali?

⁴ Sekimej tlen okinchiuilijkej tlen amo kuali ok moneki ma tikinyolseuikan. ¿Tleka? Porque konemej amo kipiaj inyelis ken akinmej yikipiaj miak xiuitl uan ualeua sekimej sapanoa moyolkokoaj ijkuak kinpanoa tlen amo kuali. Ma tikitakan tleka ijkon tikijtoaj.

⁵ Konemej moneki kuali mouikaskej iuan akinmej kinmiskaltiaj. Non kinpaleuia kuali ma momachilikan uan ma kitakan kintlasojtlaj (Sal. 22:9). Tetikipacho porque miakej motekaj iuan konemej akinmej inmiuan chantij noso akinmej inmiuan mouikaj. ¿Tlen kichiua se konetl ijkuak kichiuiliaj tlen amo kuali? Ijkuak moskaltis ayakmo ikaj kineltokilis.

6. ¿Tleka sapanoa tlajyouiaj konemej ijkuak ikaj inmiuan moteka?

⁶ Konemej amo ueli mopaleuiaj. Sapanoa tlajyouiaj ijkuak ikaj inmiuan moteka. Ijkon momachiliaj porque ayamo yikipiaj miak xiuitl, ayamo mokuayejyekoaj monamiktiskej uan ayamo kimatij tlen kijtosneki ijkuak se tlakatl moteka iuan isiua. Ijkuak ikaj moteka inmiuan konemej, ayakmo kuali kitaj ijkuak se tlakatl moteka iuan isiua, ayakmo motlasojtlaj uan ayakmo kinneltokiliaj oksekimej.

7. (1) ¿Tleka amo oui kinkajkayauaj konemej uan ken kinkajkayauaj? (2) ¿Ken momachiliaj konemej ijkuak kinkajkayauaj?

⁷ Konemej ayamo kuali mokuayejyekoaj uan ayamo ueli inselti momaluiaj (1 Cor. 13:11). Ik non, miakej kinkajkayauaj uan satepan inmiuan motekaj. Kinmiluiaj sapanoa kintlajyouiltiskej, kinmiluiaj yejuan intlajtlakol inmiuan ma motekakan, amitlaj ma kijtokan, amo ikaj kinneltokilis tla ikaj kiluiskej tlen okinpanok. Noijki kinmiluiaj inmiuan motekaj porque kintlasojtlaj. Satepan konemej ayakmo kimatij kox okinkajkayajkej. Ijkuak moskaltijtias konetl, xamo momachilis sokio, kimachilis amitlaj ipati uan amo kinamiki ikaj ma kitlasojtla.

8. ¿Tleka uelis tikneltokaskej Jehová kinyolseuia akinmej tlajyouiaj?

⁸ Nin tlamantli kiteititia konemej sapanoa tlajyouiaj ijkuak ikaj inmiuan moteka. Nin tlamantli sapanoa tlajtlakoli. Tikatej itlamian tonalmej, ik non, miakej motekaj iuan konemej. Miakej ayakmo tetlasojtlaj uan “amokualteh iwa tekajkayajkeh okachi kijtlakojtiaskeh inyolo” (2 Tim. 3:1-5, 13). Sapanoa amo kuali tlen kichiua Satanás uan miakej kichiuaj tlen ye kipaktia. Pero Jehová okachi kipia miak chikaualistli amo ken Satanás uan nochtin tlen kipaleuiaj. ToTajtsin Dios kita nochi tlen kichiuaj. Ik non, ma tikneltokakan ye kimati sapanoa titlajyouiaj uan noijki kineki techyolseuis. Sapanoa tiyolpakij tiktekichiuiliaj Jehová akin “nochipa techiknomati iwa nochipa techyolchikawa. Ye nochipa techyolchikawa ijkuak titlaijyowiah, para ijkó tejwah noiwa matikinyolchikawakah akimeh tlaijyowiah, ijkó kemi Dios techyolchikawa” (2 Cor. 1:3, 4). Pero ¿Jehová akin kitekitiltia ma techyolseui?

9. Ijkon ken kijtoa Salmo 27:10, ¿ken kinpaleuia Jehová akinmej inkalchanejkauan amo okinpaleuijkej?

⁹ Akinmej okinchiuilijkej tlen amo kuali, xamo kinekij ma tikinyolseuikan porque intatajuan amo okinpaleuijkej ijkuak ikaj inmiuan omotekak noso se ikalchanejka ijkon okinchiuili. Tekiua David okimatiaya san Jehová techyolseuia (xiktlajtolti Salmo 27:10). Ye okineltokaya toTajtsin Dios kintlasojtla uan kinmaluia akinmej inkalchanejkauan amo okintlasojtlakej. ¿Ken kiteititia techtlasojtla? Jehová kichiua ma techyolchikauakan itekipanojkauan. Nochtin tokniuan katej ken tokalchanejkauan. Noijki Jesús okijto okatka ikni uan inantsin akin okiueyichiuaya toTajtsin Dios (Mat. 12:48-50).

10. ¿Ken okijto Pablo otlapaleuiaya?

¹⁰ Ma tikitakan tlen panoa itech tlanechikol. Tlatitlanil Pablo sapanoa okinpaleuiaya tokniuan uan kuali tlen okichiuaya. ToTajtsin Dios okinauati ma kinmijkuilili tokniuan ma kichiuakan ken Pablo porque ye okichiuaya ken Cristo (1 Cor. 11:1). Se tonal okijto ken otlapaleuiaya, okijto: “Pero tejwah amo ijkó otikchijkeh nomowah, yej otomechtlasojtlakeh kemi se tena kintlasojtla iwa kinyekmokuitlawia ipilwah” (1 Tes. 2:7). Ik non, axkan tlayekankej kualtsin kintlapouiaj tokniuan uan noijki kintlasojtlaj ijkuak kinyolseuiaj ika Biblia akinmej tlajyouiaj.

11. ¿Tlen kiteititia amo san tlayekankej moneki kinyolseuiskej akinmej tlajyouiaj?

¹¹ Pero amo san tlayekankej moneki kinyolseuiskej akinmej tlajyouiaj. Moneki tinochtin ‘Matimosepanyolchikawakah’ (1 Tes. 4:18). Tokniuan siuamej tlen kipiaj chikauak intlaneltokilis uelis kinyolseuiskej akinmej tlajyouiaj. Jehová techyolseuia ken se siuatl kiyolseuia ikone (Is. 66:13). Biblia kijtoa sekimej siuamej okinpaleuijkej akinmej otlajyouiayaj (Job 42:11).  Jehová yolpaki ijkuak tokniuan siuamej kinpaleuiaj akinmej moyolkokoaj. Ualeua tlayekankej xamo kitlajtlaniskej se tokni siuatl kox uelis kipaleuis se tokni siuatl tlen tlajyouiaj. *

12. ¿Tlen amo tikchiuaskej ijkuak ikaj tikyolseuiskej?

¹² Ijkuak ikaj tikyolseuiskej, amo san tlen amo ma tiktlajtlanikan tlen amo toteki (1 Ped. 4:15). Ik non, ¿ken uelis tikinpaleuiskej uan tikinyolseuiskej akinmej tlajyouiaj? Ma tikitakan makuili tlamantli.

13. (1) Ijkon ken kijtoa 1 Reyes 19:5-8, ¿tlen okichi iángel Jehová? (2) ¿Ken uelis tikchiuaskej ken iángel Jehová?

¹³ Ma tikiluikan tlen kipaleuis. Profeta Elías ocholo ijkuak yikimiktiskiaj uan sapanoa omoyolkoko uan okinekiaya mikis. Pero Jehová okiualtitlanili se ángel ma kiyolchikauaki. Nin ángel okitotonili itlakual uan okilui ma tlakua (xiktlajtolti 1 Reyes 19:5-8). Nin tlamantli sapanoa techpaleuis ijkuak titeyolseuiskej. Amo moneki miak tlamantli tikchiuiliskej akin tlajyouia. Uelis tiktlamakaskej, itlaj tiktliokoliskej, uelis tikijkuililiskej se amatsintli uan ijkon tikteititiskej tiktlasojtlaj uan techtekipachoa. Ijkon tikchiuaskej tla amo ueli timotlapouiaj iuan akin tlen tlajyouia.

14. ¿Tlen okse tlamantli techmachtia tlen okipanok Elías?

¹⁴ Achto touan ma momatikan. Oksepa ma timotlapouikan tlen okipanok Elías. Jehová okimakak chikaualistli para ma tlaxiko ijkuak oyajki itech tepetl Horeb ompa kanin Jehová okichi se tlajtolsenkaualistli iuan ialtepe. Xamo kuali omomachili Elías porque ayakmo okinmitaya akinmej okinekiayaj kimiktiskej. ¿Tlen techmachtia nin tlamantli? Tla tiknekij tikinpaleuiskej akinmej okinchiuilijkej tlen amo kuali, moneki achto touan ma momatikan. Ik non, tlayekankej moneki kimatoskej tlatlamantli tikteititiaj tlen tikmachiliaj. Se tokni siuatl xamo okachi kuali momachilia ikalijtik konis café, té noso tsopelikatl ijkuak motlapouis iuan tlayekankej. Okse tokni xamo kineki motlapouis iuan tlayekankej ompa kanin timonechikoaj.

15, 16. ¿Tlen kijtosneki kuali tikinkakiskej akinmej okinchiuilijkej tlen amo kuali?

¹⁵ Kuali ma tikinkakikan. Biblia kijtoa: “Nonnochteh san xitlamatokah ijkuak nonkinkakiskeh oksikimeh, amo san nima xitlajtokah” (Sant. 1:19). ¿Kuali tikinkakij oksekimej? Xamo timokuayejyekoaj san moneki tikinkakiskej uan amitlaj tikinmiluiskej. Amo. Kijtosneki tikchiuaskej okseki tlamantli. Ma tikitakan tlen okichi Jehová ijkuak okiualtitlanki iángel ma kipaleuiki Elías. Kuali okikak ijkuak Elías okilui tlen okiyolkokoaya. Jehová okitak Elías omomojtiaya, iselti omomachiliaya uan omokuayejyekoaya amitlaj ipati nochi tlen okichi. Pero Jehová okilui amo ma motekipacho. Ijkon Jehová okiteititi kuali okikaktoka (1 Rey. 19:9-11, 15-18).

¹⁶ ¿Ken tikteititiskej tiktlasojtlaj uan tikiknomatij akin okichiuilijkej tlen amo kuali? Tikteititiskej tiktlasojtlaj tla achto timokuayejyekoaj tlen tikiluiskej. Uelis tikiluiskej: “Sapanoa nechyolkokoa  tlen omitspanok. Amo kuali ijkon ma kinchiuilikan konemej”. Tla tiknekij tikajsikamatiskej tlen techtlapouia, ma tikiluikan ma techyekilui tlen okipanok noso ma tikiluikan: “Ijkuak otechtlapouijtoka onikajsikamatki... ¿ijkon moneki nikajsikamatis?”. Ijkon tikteititiskej tiktlasojtlaj uan tikajsikamatij tlen okipanok (1 Cor. 13:4, 7).

17. ¿Tleka amo san niman itlaj ma tikijtokan ijkuak ikaj techtlapouis tlen okipanok?

¹⁷ Ma tikmatikan tlen tikijtoskej. Amo san niman itlaj ma tikijtokan noso san niman ma tikinmiluikan tlen amo kuali kichiuaj. Amo san niman ma timosotlauakan. Elías okilui Jehová nochi tlen okitekipachoaya. Satepan Jehová okipaleui ma kipia okachi chikauak itlaneltokilis. Pero Elías oksepa okilui Jehová nochi tlen okitekipachoaya (1 Rey. 19:9, 10, 13, 14). Nin techmachtia ualeua akinmej moyolkokoaj miak uelta techiluiskej tlen kimachiliaj. Ijkuak ijkon panos, ma tikchiuakan ken Jehová akin amo san niman mosotlaua. Ma tikintlasojtlakan, ma tikinmiknomatikan uan amo san niman ma tikinmiluikan tlen moneki kichiuaskej (1 Ped. 3:8).

18. ¿Ken uelis kinpaleuis akinmej tlajyouiaj tla inpatka timotlatlaujtiaj?

¹⁸ Ika nochi toyolo ma tikiluikan Jehová ma kinpaleui akinmej tlajyouiaj. Akinmej moyolkokoaj amo ueli motlatlaujtiaj. Xamo amo kuali momachiliaj kitlatlaujtiskej Jehová. Inmiuan ma timotlatlaujtikan uan ma tikiluikan Jehová itoka uan ijkon sejse ma kinpaleui. Ma tikiluikan Jehová sapanoa tiktlasojtlaj akin moyolkokoa uan noijki tokniuan sapanoa kitlasojtlaj. Ma tikiluikan Jehová ma kiyolseui ichkatsin. Sapanoa kinyolseuis tla ijkon tikchiuaskej (Sant. 5:16).

19. ¿Tlen techpaleuis ma tikinyolseuikan akinmej tlajyouiaj?

 ¹⁹ Ma tikinmiluikan itlaj tlen kinyolchikauas. Achto kuali ma timokuayejyekokan ijkuak itlaj tikijtoskej. Kinyolkokos tla san tlen amo tikijtoskej pero kinyolchikauas tla tikinmiluiskej tlen kuali (Prov. 12:18). Ik non, ma tikiluikan Jehová ma techpaleui ma tikinmiluikan itlaj tlen kinyolseuis uan noijki ma tikteititikan tikintlasojtlaj. Noijki ma tikilnamiktokan okachi kinpaleuis tlen kijtoa Biblia (Heb. 4:12).

20. ¿Tlen tiknekij ma kimatokan akinmej tlajyouiaj?

²⁰ Akinmej kinchiuiliaj tlen amo kuali, ualeua momachiliaj sokiojkej uan mokuayejyekoaj amikaj kintlasojtla. Noijki xamo kijtoaj amo kinnamiki ikaj ma kintlasojtla. Pero amo melauak tlen mokuayejyekoaj. Ik non, ika tlen kijtoa Biblia ma tikinmiluikan Jehová sapanoa kinpatioita (xikita recuadro “ Textos tlen ika titeyolseuiskej”). Ma tikilnamikikan tlen okipanok profeta Daniel ijkuak omoyolkoko uan okimachili ayakmo otlaxikoaya. ToTajtsin Dios okiualtitlanki se ángel ma kiluiki ye sapanoa okitlasojtlaya (Dan. 10:2, 11, 19). Axkan noijki Jehová sapanoa kinpatioita tokniuan tlen tlajyouiaj.

21. (1) ¿Tlen kinpanos akinmej kichiuaj tlen amo kuali uan amo moyolkopaj? (2) ¿Tlen moneki ok ma tikchiuakan?

²¹ Ijkuak tikinyolseuiaj akinmej tlajyouiaj, tikinmilnamiktiaj Jehová kintlasojtla. Noijki nochipa ma tikilnamiktokan toTajtsin Dios nochi kichiua ika melajkayotl. Jehová kita nochi tlen kichiuaj akinmej motekaj iuan konemej. Nochi kita uan kintlajyouiltis akinmej ijkon kichiuaj uan amo moyolkopaj (Núm. 14:18). Pero axkan ok moneki ma timochijchikauakan ma tikinyolseuikan akinmej tlajyouiaj. Sapanoa techyolseuia tikmatiskej Jehová ayakmo kikauilis Satanás ma techyolkoko nion akinmej kipaleuiaj. Ayakmo miak poliui uan ayakmo tikilnamikiskej tlen otechchiuilijkej (Is. 65:17).