Se tokni itoka Sara * okijto: “Nipinaua uan ualeua amo nikmati tlen nikchiuas. Amo nechpaktia nimouikas iuan akinmej san niman kualanij. Pero kuali nimomachilia ijkuak nika iuan akinmej yolyamankej. Kuali inmiuan nimotlapouia uan nikinmiluia tlen nikmachilia uan tlen nechtekipachoua. Nochtin noyolikniuan ijkon inyelis”.

Tlen okijto Sara kiteititia kuali timomachiliaj ijkuak tikatej iuan akinmej yolyamankej. Jehová noijki kuali kinmita akinmej ijkon inyelis. Biblia techiluia: “Xiyetokah nonyolyamankeh” (Col. 3:12). ¿Tlen kijtosneki tiyetoskej tiyolyamankej? ¿Ken okiteititi Jesús okatka yolyamanki? ¿Tiyolpakiskej tla tiyetoskej tiyolyamankej?

Akinmej yolyamankej katej ika yolseuilistli. Kintlasojtlaj oksekimej uan kintlakaitaj. Noijki amo okachi motekipachouaj uan kimatij monauatiskej ijkuak tlajyouiaj.

Akinmej yolyamankej noijki yolchikauakej. Ika griego tlajtoli “yolyamanki” okitekitiltiayaj ijkuak se caballo yokitekauiliaya ipan ma tlejkokan. Se caballo tlen kitekauilia ipan ma tlejkokan kuali kitekitiltia ichikaualis. Ijkon panoua ijkuak tiyolyamankej. Tikmatij timonauatiskej, amo san niman tikualanij uan kuali timouikaj iuan oksekimej.

Xamo tikijtouaj tejuan amo tiyolyamankej. Noijki ualeua oui tiyetoskej tiyolyamankej porque oksekimej amo kimatij mochiaskej uan san kualantokej (Rom. 7:19). Moneki timochijchikauaskej para tiyetoskej tiyolyamankej pero techpaleuis iespíritu santo Jehová (Gál. 5:22, 23). ¿Tleka miak ipati ma timochijchikauakan?

Kuali timouikaskej iuan oksekimej tla tiyolyamankej. Ken okijto Sara, kuali timomachiliaj ijkuak tikatej iuan akinmej yolyamankej. Jesús okatka yolyamanki uan yolkuali (2 Cor. 10:1). Konemej noijki okinekiayaj iuan yetoskej (Mar. 10:13-16).

Kuali tiyetoskej uan noijki oksekimej tla tiyolyamankej. Noijki amo okachi timotekipachoskej nion san niman tikualaniskej (Prov. 16:32). Ijkon kuali timomachiliskej porque amo  tikinyolkokoskej akinmej tikintlasojtlaj. Noijki kuali yetoskej oksekimej tla tiyolyamankej porque amo tikinchiuiliskej tlen amo kuali.

Jesús nochipa okatka yolyamanki maski omonekiaya kichiuas miak tlamantli. Miakej otlajyouiayaj uan okinekiayaj ikaj ma kinyolseui. Melauak okinyolchika tlen Jesús okinmilui: “Xiwikih nonawak [...] porke Ne niyolyámanki iwa niteiknoma” (Mat. 11:28, 29).

¿Ken tiyetoskej tiyolyamankej ken Jesús? Ma timomachtikan iTlajtol toTajtsin Dios uan ijkon tikmatiskej ken okinmitaya Jesús oksekimej uan tlen okichiuaya ijkuak okixnamikiaya ouijkayotl. Noijki ma timochijchikauakan ma tikchiuakan ken ye ijkuak tikixnamikij ouijkayotl (1 Ped. 2:21). Ma tikitakan eyi tlamantli tlen okipaleui Jesús ma yeto yolyamanki.

Jesús melauak okatka yolyamanki. Ye okijto: “Ne niyolyámanki iwa niteiknoma” (Mat. 11:29). Biblia kijtoua ma tiyetokan tiyolyamankej uan ma titeiknomatikan porque ninmej ome tlamantli mouikaj (Efes. 4:1-3). ¿Tleka ijkon tikijtouaj?

Tla tiyolyamankej, amo san niman timoyolkokoskej tla itlaj techchiuiliaj. ¿Tlen okichi Jesús ijkuak oksekimej okijtojkej ‘ye ápistli iwa tláwanki’? Ye okiteititi “ixtlamatilis Dios moixmati ika tlan kichiwah ipilwah akimeh kitlakitah” (Mat. 11:19).

Amo san niman ma tikualanikan tla ikaj kijtoua kox tiixchipajkej noso kanin tiuitsej. Se tlayekanki itoka Peter uan chanti Sudáfrica, okijto: “Ijkuak ikaj kijtoua itlaj tlen nechkualania nimokuayejyekoua tlen kichiuaskia Jesús”. Noijki okijto: “Axkan ayakmo san nimokuayejyekojtok tlen kijtouaj oksekimej”.

Jesús okajsikamatiaya tlen oksekimej okinpanouaya. Imachtijkauan Jesús okinekiayaj kipaleuiskej pero ualeua okichiuayaj itlaj tlen amo kuali. Se youak ijkuak yikimiktiskiaj Jesús, Pedro, Santiago uan Juan amo okiyolchikajkej ken ye okinekiaya. Jesús okinmilui: “Nomoespíritu mochikajtok, pero nomokuerpo amo chikawak” (Mat. 26:40, 41). Ye okajsikamatiaya itlatitlaniluan okatkaj tlajtlakolejkej, ik non, amo okualanki.

Ma tikitakan tlen okipanok se tokni itoka Mandy. Achto okinekiaya nochi ma kichiuakan ken ye okijtouaya pero axkan mochijchikaua yetos yolyamanki ken Jesús. Ye okijto: “Nikilnamiktok tinochtin titlajtlakolejkej uan nikita tlen kuali kichiuaj oksekimej ijkon ken Jehová kichiua”. Mandy okipatlak iyelis uan opejki teiknomati ijkon ken Jesús oteiknomatki. Tla tejuan noijki ijkon tikchiuaskej, okachi amo oui tiyetoskej tiyolyamankej.

Jesús okineltokak toTajtsin Dios kipaleuiskia. Ijkuak okatka nikan tlaltikpak okichiuilijkej miak tlamantli tlen amo kuali uan okixiko. Okijtojkej otlakajkayauaya, okikokolijkej uan okitlajyouiltijkej. Pero ye nochipa okatka yolyamanki “nochi okikawaya imak Dios, non teixkomaka kemi moneki” (1 Ped. 2:23). Jesús okimatiaya toTajtsin Dios kimaluiskia uan ye kimati tlen kinchiuiliskia akinmej okitlajyouiltijkej.

San timoouijtiliskej tla tikualaniskej ijkuak itlaj amo kuali techchiuiliaj. Ik non, Biblia techiluia: “Ijkuak se tlakatl kualantok, amo kichiwa tlan Dios kipaktia” (Sant. 1:20). Uelis tikualaniskej tla itlaj amo kuali techchiuiliaj porque titlajtlakolejkej.

Se tokni itoka Cathy uan chanti Alemania omokuayejyekouaya amikaj kipaleuiskia tla amo mopaleuiskia. Pero ayakmo ijkon omokuayejyeko ijkuak opejki kineltoka Jehová. Ye okijto: “Ayakmo san nikualantok. Axkan okachi niyolyamanki porque nikmati Jehová kimati tlen kichiuas”. Ijkon ken Jesús, tla tikneltokaj toTajtsin Dios techpaleuis ijkuak ikaj techchiuilia tlen amo kuali, okachi tiyetoskej tiyolyamankej.

Jesús otlamachti tla tiknekij tiyolpakiskej moneki tiyetoskej tiyolyamankej. Okijto: “Mapakikah non moikneliah” noso yolyamankej (Mat. 5:5). Ma tikitakan ken techpaleuia tla tiyolyamankej.

Kinpaleuia akinmej yomonamiktijkej kuali ma mouikakan. Se tokni itoka Robert uan chanti Australia, okijto: “Onikiluiaya nosiua miak tlamantli teyolkoko maski amo ijkon onikmachiliaya. Pero ijkuak ikaj yotikyolkokojkej ayakmo ueli itlaj se kichiua. Amo kuali onimomachiliaya ijkuak onikyolkokouaya nosiua”.

Ijkuak titlajtouaj tinochtin “titlajtolpanoah”. Kipiaj ouijkayotl akinmej yomonamiktijkej tla amo kuali mokuayejyekouaj tlen kimoiluiaj (Sant. 3:2). Tla tiyolyamankej timokuayejyekoskej tlen tikijtoskej uan tiyetoskej ika yolseuilistli (Prov. 17:27).

Robert omochijchika yetos yolyamanki uan opejki “kuali monawatia”. ¿Okipaleui? Ye okijto: “Axkan ijkuak nikpia se ouijkayotl iuan nosiua, nimochijchikaua kuali nikkaki, nikyektlapouia uan amo san niman nikualani. Non nechpaleuia okachi kuali iuan ma nimouika”.

Techpaleuia okachi kuali ma timouikakan iuan oksekimej. Akinmej san niman kualanij amo kinpiaj inyolikniuan. Pero akinmej yolyamankej mochijchikauaj mouikaskej ika “yolsewílistli” iuan oksekimej (Efes. 4:2, 3). Cathy okijto: “Niyolpaki ijkuak nika iuan oksekimej porque niyolyamanki maski ualeua sekimej kuejsijkej”.

Techpaleuia ma tiyetokan ika yolseuilistli. Biblia kijtoua “ixtlamatílistli non Dios kitemaka” mouika iuan yolyamanilistli uan yolseuilistli (Sant. 3:13, 17). Akin yolyamanki “kipia yolseuilistli” (Prov. 14:30). Martin mochijchikaua yetos yolyamanki, ye okijto: “Axkan niteajsikamati uan ayakmo okachi nikualani. Non nechpaleuia ma niyolpaki uan ma niyeto ika yolseuilistli”.

Ualeua moneki timochijchikauaskej tiyetoskej tiyolyamankej. Se tokni okijto: “Ualeua nikualankamiki”. Pero Jehová kineki ma tiyetokan tiyolyamankej uan ye techpaleuis tla timochijchikauaj (Is. 41:10; 1 Tim. 6:11). Ye techpaleuis ma tikpatlakan toyelis uan techyolchikauas (1 Ped. 5:10). Satepan uelis tikteititiskej “itlasojtlalis iwa iteiknomatilis Cristo” ijkon ken okichi tlatitlanil Pablo (2 Cor. 10:1).