1. ¿Tleka moneki ma techpaleui toTajtsin Dios para tiyetoskej tiixtlamatkej? (Proverbios 4:7).

 ¿YOTIKPEJPENKI tikchiuas itlaj miak ipati? Xamo kema. Ijkuak ijkon otikchi otikilui Jehová ma mitspaleui tiyetos tiixtlamatki (Sant. 1:5). Tekiua Salomón okijkuilo: “Ixtlamatilistli non tlen okachi ipati” (xiktlajtolti Proverbios 4:7). Ye okijto ixtlamatilis Jehová okachi kuali (Prov. 2:6). ¿Uelis ixtlamatilis toTajtsin Dios techpaleuis ma titlaxikokan ijkuak techpanoua tlen amo kuali? Kema. Axkan tikitaskej ken uelis techpaleuis.

2. ¿Ken uelis tiyetoskej tiixtlamatkej?

² Tiyetoskej tiixtlamatkej tla timomachtiaj uan tikchiuaj tlen okijtojkej ome tlakamej tlen okatkaj ixtlamatkej. Achto tikijtoskej tlen okichi Salomón. Biblia kijtoua: “ToTajtsin Dios okipaleui Salomón ma yeto ixtlamatki, kuali ma mokuayejyeko” (1 Rey. 4:29). Noijki tikitaskej tlen okichi Jesús ijkuak okatka nikan tlaltikpak, ye okatka okachi ixtlamatki (Mat. 12:42). Ijkin kijtoua se profecía: “Iespíritu Jehová ipan yetos, kimakas ixtlamatilistli uan ajsikamatilistli” (Is. 11:2).

3. ¿Tlen timomachtiskej?

³ Jehová okinpaleui Salomón uan Jesús ma yetokan ixtlamatkej, ik non, tlen okijtojkej techpaleuia. Axkan  tikitaskej eyi tlamantli: ken moneki tikitaskej tomin, ken moneki tikitaskej toteki uan ken moneki timokuayejyekoskej.

4. ¿Kox okipiaya Jesús tomin ijkon ken Salomón?

⁴ Salomón okipiaya miak tomin uan miak tlamantli patio (1 Rey. 10:7, 14, 15). Pero Jesús amo okipiaya miak tlamantli nion amo okipiaya ikal (Mat. 8:20). Jehová okinpaleui Salomón uan Jesús ma yetokan ixtlamatkej, ik non, okitakej tomin ken moneki.

5. ¿Ken okitaya tomin Salomón?

⁵ Salomón okijto tomin techpaleuia (Ecl. 7:12). Tla tikpiaj tomin, tikpiaj tlen moneki uan tlen techpaktia. Maski Salomón okipiaya miak tomin, okimatiaya onka okseki tlamantli tlen okachi moneki. Ik non, ye okijkuilo: “Moneki tikpejpenaskej se kuali tokayotl uan amo miak tomin” (Prov. 22:1, nota). Ye okitak akinmej kinekij kipiaskej miak tomin amo yolpakij ika tlen kipiaj (Ecl. 5:10, 12). Noijki okijto tlen uelis techpanos tla okachi tikpatioitaj tomin, axkan uelis tikpiaskej uan satepan ayakmo (Prov. 23:4, 5).

6. ¿Okipatioitak Jesús kipias miak tlamantli? (Mateo 6:31-33).

⁶ Jesús amo okachi okipatioitak kipias miak tlamantli, maski oyolpakiaya ijkuak otlakuaya uan otlakoniaya (Luc. 19:2, 6, 7). Se tonal atl okikopki vino uan non achto milagro tlen okichi (Juan 2:10, 11). Ijkuak okimiktijkej okipiaya itlaken tlen patio (Juan 19:23, 24). Ijkuak ye okatka nikan tlaltikpak okiteititi amo okachi okipatioitaya kipias miak tlamantli. Ik non, okinmilui imachtijkauan: “Amaka tlakatl weletis kintekitilis ome inteko [...]. Amaka weletis kimopantis Dios tla satlawel momijmiktia para kitlawelpias tomi” (Mat. 6:24). Jesús otlamachti tla  tiktematiltiaj tlen kichiuas iTekiuajkayo toTajtsin Dios, Jehová techmakas tlen techpoloua (xiktlajtolti Mateo 6:31-33).

7. ¿Ken yokiteochi Jehová se tokni porque amo kipatioita kipias miak tomin?

⁷ Jehová kijtoua ken moneki tikitaskej tomin uan miakej tokniuan yokitakej okachi kuali katej maski amo kipiaj miak tomin. Ma tikitakan tlen okichi se tokni tlen itoka Daniel. Ye okijto: “Ijkuak onikatka nitelpochtli onikijto niktekichiuilis Jehová”. Daniel amo kitemoua kipias miak tlamantli, ik non, ika tlen kimati yotlapaleui Betel uan ijkuak kanaj tlaxixini. Ye kijtoua: “Niyolpaki niktekichiuilis Jehová. Tla sapanoua nitekipanoskia, nikpiaskia miak tomin pero non amo nechpaleuiskia ma nikinpia noyolikniuan. Noijki niyolpaki porque nikpaleuijtok iTekiuajkayo toTajtsin Dios. Jehová sapanoua yonechteochi”. Yotikitakej tiyolpakiskej tla okachi tiktekichiuiliaj Jehová uan amo tikpatioitaj tikpiaskej miak tomin.

8. ¿Ken tikmatij Salomón amo okachi okipatioitak tekipanos? (Eclesiastés 5:18, 19).

⁸ Salomón okijto kuali timomachiliaj ijkuak titekipanouaj porque non se tetliokolil tlen techmaka toTajtsin Dios (xiktlajtolti Eclesiastés 5:18, 19). Noijki okijto: “Tla chikauak titekitis, itlaj tikmotlanilis” (Prov. 14:23). Ye okipaktiaya tekipanos, okinchijchi kalmej uan otlatokaya, okichi atekochmej, okitokak xochitl uan noijki okinchijchi altepemej (1 Rey. 9:19; Ecl. 2:4-6). Xamo Salomón chikauak otekipano uan oyolpakik pero okimatiaya ok omonekiaya itlaj kichiuas. Okichi miak tlamantli para Jehová, otlapaleui ma kichijchiuakan se kualtsin teokali uan ompa kiueyichiuaskiaj, opanok chikome xiuitl uan otlanki okichijchijkej (1 Rey. 6:38; 9:1). Maski okichi miak tlamantli, okajsikamatki okachi ipati mouikas iuan Jehová. Ye okijto: “Ken yomokak nochi, nin tlamantli tlami ijkin: Xiktlakaita akin melauak toTajtsin Dios uan xikintlakamati itlanauatiluan” (Ecl. 12:13).

9. ¿Tlen okichi Jesús para kiteititis otekipanouaya san ken moneki?

⁹ Jesús kuali otekipano, ijkuak okatka telpochtli okuajximaya (Mar. 6:3). Xamo itatajuan okitlasojkamatiliayaj porque okinpaleuiaya ma kipiakan tlen ika mopanoltiskej. Ye amo okatka tlajtlakole, ik non, nochi kuali okichiuaya uan xamo miakej okinpaktiaya ken otekipanouaya. Maski Jesús kuali otekipanouaya nochipa omajxiliaya para mouikas iuan Jehová (Juan 7:15). Ik non, ijkuak yotetlapouiaya okijto: “Amo xitekitikah por n tlákuali non kimati tlami, yej xitekitikah por n tlákuali non ayik tlami iwa kitemaka yolílistli” (Juan 6:27). Ijkuak okatka itech tepetl okijto: “Yej xikoololokah itech ilwikak tlan milák ipati” (Mat. 6:20).

10. ¿Tlen uelis panos tla kuali titekipanouaj?

¹⁰ Jehová techpaleuia ma tiyetokan tiixtlamatkej, ik non, titekipanouaj san ken moneki. Akinmej tikchiuaj ken Cristo moneki kuali titekipanoskej (Efes. 4:28). Akinmej tikinpaleuia kitaj tejuan amo titlachtekij uan chikauak titekipanouaj uan xamo hasta techiluiaj kinpaktia ken titekipanouaj. Xamo  peuas okachi miak horas titekipanoskej. Ijkon akin tikpaleuiaj kijtos iTlaixpantijkauan Jehová kinpaktia tekipanoskej. Pero tla ijkon tikchiuaj, xamo ayakmo timajxiliskej tiyetoskej iuan tofamilia uan ayakmo tikinpaleuiskej ma mouikakan iuan Jehová. Moneki san niman itlaj tikpatlaskej para timajxiliskej tikchiuaskej tlen okachi moneki.

11. ¿Tlen okajsikamatki William ijkuak otekipanouaya iuan se tlayekanki?

¹¹ Se tokni telpochtli tlen itoka William okajsikamatki moneki titekipanoskej san ken moneki. Ye otekipano iuan se tlayekanki. William okijto: “Tokni kipaktia tekipanos uan sekimej kinpaktia ken tekipanoua. Ijkuak kitlamia iteki majxilia para yetos iuan ifamilia uan mouikas Jehová. Ik non, ye sapanoua yolpaki”. *

12. ¿Ken okiteititi Salomón amo uelis kichiuaskia nochi iselti uan tlen okipanok satepan?

¹² Ijkuak Salomón okitekichiuiliaya Jehová omokuayejyeko uan okichi san ken moneki. Ik non, ijkuak ayamo miak xiuitl otlanauatiaya uan ok okatka telpochtli okilui Jehová ma kiyekana (1 Rey. 3:7-9). Ye okimatiaya amo kuali tla moueyinekiskia, ik non, okijkuilo: “Akin moueyineki satepan tlajyouis uan akin mokuayejyekoua ueyititok satepan uetsiti” (Prov. 16:18). Satepan ijkuak yotlanauatijtoka miak xiuitl okilka tlen okijkuilo porque opejki moueyineki uan ayakmo okitlakamatki toTajtsin Dios. Tlanauatil okijtouaya tekiuajkej hebreos amo omonekiaya kichiuaskiaj nin tlamantli: “Amo ma kinmotemoli miakej isiuauan tlamo kixeloskej iyolo” (Deut. 17:17). Salomón amo okitlakamatki non tlanauatil uan okinpixki  700 isiuauan uan 300 san inmiuan okatka uan miakej okinueyichiuayaj teotsitsintin (1 Rey. 11:1-3). Xamo omokuayejyeko amitlaj kipanoskia pero satepan otlajyoui porque amo okitlakamatki Jehová (1 Rey. 11:9-13).

13. ¿Tlen techmachtia ijkuak timokuayejyekouaj Jesús okatka yolyamanki?

¹³ Jesús nochipa okatka yolyamanki uan okimatiaya amo uelis kichiuaskia nochi iselti. Ijkuak ayamo oualaya nikan tlaltikpak, ompa iluikak okitekichiuili Jehová. Biblia kijtoua: “Ika ye toTajtsin Dios okichijchi nochi okseki tlamantli itech iluikak uan itech tlaltikpak” (Col. 1:16 TNM). Ijkuak Jesús omoapolakti okilnamik ken okipaleuiaya iTajtsin ompa iluikak (Mat. 3:16; Juan 17:5). Maski okilnamik nochi tlen okichi, amo omoueyineki. Ye amo okiteititi okachi okimatiaya uan amo oksekimej. Okinmilui imachtijkauan: “Yej oniwala onitekitiko iwa nimotemakas manechmiktikah iwa ijkó miakeh mamomakixtikah” (Mat. 20:28). Okimatiaya amitlaj uelis kichiuaskia iselti (Juan 5:19). ¡Jesús okatka yolyamanki! ¿Tiknekij ijkon tiyetoskej?

14. ¿Ken techpaleuia tlen okijto Jesús ma tikilnamiktokan amo nochi uelis tikchiuaskej?

¹⁴ Jesús okinmititi imachtijkauan omonekiaya ma mokuayejyekokan uan ma kichiuakan san ken moneki (Mat. 10:30). Ik non, okinmilui: “Dios kuali kimatok kech tsónkali nonkipiah itech nomotsonteko”. Ijkuak timokuayejyekouaj amitlaj ueli tikchiuaj, sapanoua techyolchikaua tlen Jesús okijto. Noijki tikitaj Jehová kipatioita tlen tikchiuaj. Ye otechpejpenki ma tiktekichiuilikan uan nochipa ma tiyoltokan, ik non, amo ma timokuayejyekokan ye omotlapololti.

15. (1) Ijkon ken okijto revista Akin Tetlapouijtok, ¿tleka moneki timokuayejyekoskej ken moneki? (2) Ijkon ken fotos tlen motaj itech página 24, ¿tlen amo tikseliskej tla amo timokuayejyekouaj ken moneki?

¹⁵ Yikipia kanaj 15 xiuitl se revista Akin  Tetlapouijtok okijto moneki ma timokuayejyekokan ken moneki. Noijki okijto amo ma timokuayejyekokan okachi tikmatij itlaj tikchiuaskej, noijki amo ma timokuayejyekokan amitlaj topati. Se tokni ijkin okijto: “Amo nimokuayejyekoua amo niyolkuali pero noijki amo nikijtoua sapanoua niyolkuali. Ijkon ken oksekimej ualeua nimotlapololtia uan ualeua nikchiua tlen kuali”. * ¿Kox techpaleuia tla timokuayejyekouaj uan tikchiuaj san ken moneki?

16. ¿Tleka Jehová techiluia tlen moneki tikchiuaskej?

¹⁶ Jehová techtlasojtla uan kineki kuali ma tiyetokan, ik non, itech Biblia techiluia tlen moneki tikchiuaskej (Is. 48:17, 18). Okachi kuali ma tikpejpenakan tiktekichiuiliskej Jehová. Tla ijkon tikchiuaj, tiyolpakiskej. Amo sapanoua titlajyouiskej ken akinmej kinekij kipiaskej miak tomin, sapanoua tekipanouaj noso amo mokuayejyekouaj ken moneki. Ik non, ma tikteititikan tiixtlamatkej ijkon tikyolpaktiskej Jehová (Prov. 23:15).