1, 2. ¿Tleka seki principios bíblicos okachi tikinpatioitaj?

 IJKUAK ajsi tonal monamiktiaj novio uan novia kualtsin motlakentiaj. Noijki kuali kikakij tlen kinmachtia se tokni. Novio uan novia kuali yikimatij tlen kinmiluiskej. Pero tlen kikakij non tonal okachi kipatioitaj porque yomonamiktijkej uan kimatij okachi kinpaleuis.

² Noijki ijkon panoua ijkuak kinmiskaltiaj konemej. Xamo akinmej yomonamiktijkej, miak uelta yokikakej ken kinmiskaltiskej konemej pero okachi kinpatioitaj principios bíblicos ijkuak kinpiaj inkoneuan. ¡Kipiaskej okachi miak tekitl porque yetoskej tetajmej! Ijkuak mopatla tonemilis, okse tlamantli tikinmitaj principios bíblicos tlen kuali tikinmixmatij. Ik non, akinmej tiktekichiuiliaj Jehová, nochipa tiktlajtoltiaj Biblia uan timokuayejyekouaj tlen ompa kijtoua. Tikchiuaj ijkon ken okichiuayaj tekiuajkej tlen okatkaj itech altepetl Israel (Deut. 17:19).

3. ¿Tlen timomachtiskej?

³ Tetajmej namejuan uelis nankinpaleuiskej namokoneuan ma kixmatikan Jehová. Nin se tetliokolil tlen kipiaj akinmej kichiuaj ken Cristo. Pero amo san moneki nankinmiluiskej namokoneuan akin toTajtsin Dios. Moneki nankinpaleuiskej ma kitlasojtlakan ika nochi inyolo.  ¿Ken uelis nankinpaleuiskej? Axkan timomachtiskej naui principios bíblicos tlen namechpaleuis (2 Tim. 3:16). Noijki tikitaskej ken yokinpaleui sekimej tetajmej ijkuak kichiuaj tlen kijtoua Biblia.

4. ¿Tlen principio bíblico kinpaleuis tetajmej ma kinmachtikan inkoneuan ma kitlasojtlakan Jehová? (Santiago 1:5).

⁴ Xikkauilikan Jehová ma namechyekana. Moneki nanyetoskej nanixtlamatkej para uelis nankinpaleuiskej namokoneuan ma kitlasojtlakan Jehová. Ik non, xikiluikan ma namechpaleui (xiktlajtolti Santiago 1:5). San Jehová okachi uelis namechpaleuis porque ye teta tlen okachi ixtlamatki (Sal. 36:9). Noijki techmachtia tlen nochipa techpaleuis (Is. 48:17).

5. (1) ¿Ken kinpaleuia tetajmej ialtepe Jehová? (2) ¿Tlen omitsmachti video kanin kijtoua ken tokniuan okinmiskaltijkej inkoneuan?

⁵ Jehová namechmaka miak tlamachtil ika iTlajtol uan ialtepe para xikinpaleuikan namokoneuan ma kitlasojtlakan (Mat. 24:45, TNM). Itech jw kanin kijtoua BIBLIA TLAMACHTIA > AKINMEJ YOMONAMIKTIJKEJ UAN INFAMILIA onka miak tlamantli tlen namechpaleuis. Itech jw noijki onka videos tlen namechpaleuis xikchiuakan tlen Jehová namechmachtia para nankinmiskaltiskej namokoneuan (Prov. 2:4-6). *

6. ¿Tlen kijtoua se teta porque Jehová kinpaleuia ika ialtepe?

⁶ Miakej tetajmej kitlasojkamatiliaj Jehová porque kinpaleuia ika ialtepe. Se teta tlen itoka Joseph okijto: “Nikinpia eyi nokoneuan uan oui nikinmachtia tlen kijtoua Biblia. Ne uan nosiua tiktlatlaujtiaj Jehová ma techpaleui. Nochipa tikitaj kisa se tlamachtil noso se video ijkuak tejuan okachi tiknekij. Sapanoua techpaleuia tikkauiliaj Jehová ma techyekana”. Joseph uan isiua kitaj sapanoua kinpaleuia inkoneuan tlamachtilmej uan videos para ma mouikakan iuan Jehová.

7. ¿Tleka tetajmej moneki mochijchikauaskej kichiuaskej tlen kuali? (Romanos 2:21).

 ⁷ Xikchiuakan tlen kuali. Konemej kitaj tlen nankichiuaj uan yejuan noijki ijkon kichiuaj. Pero nochtin tetajmej tlajtlakolejkej (Rom. 3:23). Tetajmej tlen ixtlamatkej mochijchikauaj kinmachtiskej inkoneuan tlen kuali (xiktlajtolti Romanos 2:21). Se teta okijto: “Konemej ken se esponja tlen nochi kichichinaj”. Noijki okijto: “Yejuan techiluiaj ijkuak kitaj amo tikchiuaj tlen tikinmachtiaj”. Ik non, tetajmej moneki nankiteititiskej nankitlasojtlaj Jehová tla nankinekij namokoneuan noijki ma kitlasojtlakan.

8, 9. ¿Tlen omitsmachti tlen okijtojkej Andrew uan Emma?

⁸ Tetajmej uelis kichiuaskej miak tlamantli para kinmachtiskej inkoneuan ma kitlasojtlakan Jehová. Ma tikitakan tlen okijto se telpochtli tlen itoka Andrew. Ye kipia 17 xiuitl uan yomoapolakti, okijto: “Notatajuan nochipa onechmachtijkej miak ipati ma nimotlatlaujti. Nochi youak notajtsin nouan omotlatlaujtiaya maski ne yonimotlatlaujti. Notatajuan nochipa otechiluiayaj: ‘Uelis nankitlatlaujtiskej Jehová ijkuak nankinekiskej’. Ik non, sapanoua nikpatioita nimotlatlaujtis. Axkan kuali nimomachilia niktlatlaujtia Jehová uan nikita ken notajtsin tlen nechtlasojtla”. Tetajmej xikilnamiktokan tla nankitlasojtlaj Jehová, non kinpaleuis namokoneuan.

⁹ Axkan ma tikitakan tlen okijto Emma. Itajtsin otlateuikiliaya miak ijkuak okinkajte uan inantsin omonekiaya nochi kitlaxtlauas. Emma kilnamiki: “Nonantsin miak uelta amo okajxiliaya tomin. Pero ye nochipa otechiluiaya Jehová kinmaluia akinmej kitekichiuiliaj uan kinmaka tlen kinpoloua. Tlen okichiuaya okiteititiaya melauak ijkon okineltokaya. Nonantsin okichiuaya tlen otechiluiayaj”. ¿Tlen techmachtia tlen okichiuaya? Maski tlajyouiskej tetajmej, uelis kinmachtiskej inkoneuan tla kichiuaj tlen kinmiluiaj (Gál. 6:9).

10. ¿Tlen uelis kinpaleuiskia israelitas ma motlapouikan iuan inkoneuan? (Deuteronomio 6:6, 7).

¹⁰ Nochipa ximotlapouikan iuan namokoneuan. Jehová okinmilui israelitas nochipa ma kinmiluikan inkoneuan akin ye (xiktlajtolti Deuteronomio 6:6, 7). Yejuan mojmostla uelis kintlapouiskiaj inkoneuan ken uelis kitlasojtlaskej Jehová. Chokotsitsintin okipaleuiayaj intajtsin ijkuak otlatokaya uan ijkuak okololouaya tlen okitokaya. Takotsitsintin okipaleuiayaj innantsin ijkuak otlajtsomaya noso ijkuak okichiuaya okseki tlamantli inkalijtik. Nochi nin okinpaleuiaya ma kintlapouikan inkoneuan tlen okachi ipati. Uelis kinpaleuiskiaj ma mokuayejyekokan Jehová tetlasojtla uan ken okinmaluiaya.

11. ¿Keman uelis motlapouiskej tetajmej iuan inkoneuan?

¹¹ Axkan okse tlamantli tichantij. Itech miakej altepemej tetajmej ayakmo katej iuan inkoneuan. Porque tekipanouaj noso konemej momachtitiuij. Ik non, tetajmej moneki kitaskej keman yetoskej iuan inkoneuan uan inmiuan motlapouiskej (Efes. 5:15, 16; Filip. 1:10). Uelis ijkon kichiuaskej ijkuak kiueyichiuaj Jehová iuan infamilia. Se telpochtli tlen itoka Alexander okijto: “Notajtsin kiyektlalia nochi tlen moneki ijkuak tikueyichiuaj  Jehová iuan tofamilia. Ye kita amitlaj ma techtsakuili non tonal para san sekan tiyetoskej. Noijki timotlapouiaj ijkuak tlami timomachtiaj”.

12. ¿Tlen moneki kilnamiktos teta ijkuak kiueyichiua Jehová iuan ifamilia?

¹² ¿Tlen uelis kichiuas teta para ma yolpakikan ikoneuan ijkuak kiueyichiua Jehová iuan ifamilia? Uelis namechpaleuis tla san sekan nanmomachtiskej amochtli Tiyoltos uan tiyolpakis. Non amochtli namechpaleuis ximotlapouikan. Namejuan nankinekij namokoneuan ma namechiluikan ken momachiliaj uan tlen kintekipachoua. Ik non, amo xikinmiluikan miak tlamantli nion amo xikinmajuakan ijkuak nankiueyichiuaj Jehová iuan namofamilia. Amo xikualanikan tla yejuan kijtouaj itlaj tlen amo kijtoua Biblia. Xikintlasojkamatilikan porque namechiluiaj tlen kimachiliaj uan xikinyolchikauakan nochipa ijkon ma kichiuakan. Namejuan okachi uelis nankinpaleuiskej namokoneuan tla namechiluiaj tlen kimachiliaj.

13. ¿Tlen okse tlamantli kinpaleuis tetajmej ma kinpaleuikan inkoneuan ma mouikakan iuan Jehová?

¹³ Tetajmej uelis nankitemoskej ken nankinpaleuiskej namokoneuan ma mouikakan iuan Jehová. Amo moneki nanmotlaliskej iuan namokoneuan uan nanmomachtiskej Biblia para nankintlapouiskej toTajtsin Dios tetlasojtla. Se tokni tlen itoka Lisa okijto: “Tejuan otikinpaleuiayaj tokoneuan ma kixmatikan Jehová ijkuak otikinmititiayaj tlen ye okichijchi. Ijkuak totskui itlaj okichiuaya tlen otechuetskitiaya, otikinmilnamiktiayaj Jehová yolpaki uan kipatioita toyolilis ijkon ken tejuan tikpatioitaj”.

14. ¿Tleka tetajmej moneki kinpaleuiskej inkoneuan kuali ma kinpejpenakan akinmej inmiuan mouikaskej? (Proverbios 13:20).

¹⁴ Xikinpaleuikan namokoneuan ma mouikakan iuan akinmej kinpaleuiskej. ITlajtol toTajtsin Dios kijtoua akinmej inmiuan timouikaj uelis techpaleuiskej noso techijtlakoskej (xiktlajtolti Proverbios 13:20). Tetajmej, ¿nankimatij akinmej mouikaj iuan namokoneuan?  ¿Nankinmixmatij noso inmiuan nanmotlapouiaj? ¿Ken uelis nankinpaleuiskej namokoneuan ma mouikakan inmiuan akinmej kitlasojtlaj Jehová? (1 Cor. 15:33). Ijkuak itlaj nankichiuaj iuan namofamilia, xikinyoleuakan oksekimej tlen noijki kitlasojtlaj Jehová (Sal. 119:63).

15. ¿Tlen uelis kichiuaskej tetajmej para kinpaleuiskej inkoneuan kuali ma kinpejpenakan akinmej inuan mouikaskej?

¹⁵ Ma tikitakan tlen okichi se tokni tlen itoka Tony. Ye kijtoua tlen kichiua iuan isiua para kinpaleuiskej inkoneuan kuali ma kinpejpenakan akinmej inmiuan mouikaskej. Ye okijto: “Yikipia miak xiuitl ne uan nosiua tikinyoleuaj tokniuan tlen kipiaj tlatlamantli xiuitl uan tlatlamantli inmialtepe. San sekan titlakuaj uan tikueyichiuaj Jehová. Ijkon tikinmixmatij akinmej kitlasojtlaj Jehová uan yolpakij kitekichiuiliaj. Tochan yotikinkalotijkej akinmej tlayekanaj itech circuito. Noijki yotikinkalotijkej misioneros uan oksekimej tokniuan. Yotikitakej tokoneuan kinpaleuia okachi ma mouikakan iuan Jehová porque tokniuan techiluiaj tlen yokinpanok. Noijki kitaj ken kitekichiuiliaj Jehová ika nochi inyolo uan yolpakij”. Tetajmej xikinpaleuikan namokoneuan kuali ma kinpejpenakan akinmej inmiuan mouikaskej.

16. ¿Tlen moneki kilnamiktoskej tetajmej tla se inkone kikaua Jehová?

¹⁶ Tetajmej, amo ximokuayejyekokan amitlaj ipati tlen onankichijkej tla se namokone ayakmo kineki kitekichiuilis Jehová. Ye tinochtin techkauilia ma tikpejpenakan kox tiktekichiuiliskej noso amo. Tla se namokone kikaua Jehová, xikilnamiktokan ajsis tonal oksepa kitekichiuilis. Xikilnamiktokan tlen okipanok telpochtli tlen okauilti itomin (Luc. 15:11-19, 22-24). Non telpochtli okichi tlen amo kuali pero oksepa omokopki. Xamo nankijtoskej non amo melauak opanok. Pero tlen okipanok se telpochtli itoka Elie kiteititia melauak ijkon panoua.

17. ¿Ken namechyolchikaua tlen okipanok Elie?

 ¹⁷ Elie okijto tlen okichijkej itatajuan. Ye okijto: “Notatajuan omochijchikajkej onechmachtijkej ma niktlasojtla toTajtsin Dios uan ma nikpatioita tlen kijtoua Biblia. Pero ijkuak onitelpochtik ayakmo oniknek nikchiuas tlen yejuan onechmachtijkej”. Elie opejki kichiua seki tlamantli ken akinmej amo kitekichiuiliaj Jehová uan ayakmo okinekiaya ma kipaleuikan itatajuan ma mouika iuan Jehová. Oksekan ochantito uan ayakmo okichiuaya tlen Jehová kineki. Pero ualeua okitlapouiaya se iyolikni tlen tlamachtia Biblia. Elie okijto: “Okachi onikilnamikiaya Jehová ijkuak oniktlapouiaya noyolikni. Yolik oksepa opejki nikchiua tlen tlamachtia Biblia. Yetoskia ken opejki moskaltia xinachtli tlen notatajuan okitokakej itech noyolo”. Satepan Elie oksepa opejki kichiua tlen tlamachtia Biblia. * Itatajuan sapanoua oyolpakej porque ijkuak okatka tsikitsin okimachtijkej ma kitlasojtla Jehová (2 Tim. 3:14, 15).

18. ¿Ken tikita miakej tetajmej kinpaleuiaj inkoneuan ma kitlasojtlakan Jehová?

¹⁸ Tetajmej, Jehová namechkauilia xikinmiskaltikan namokoneuan para ma kitekichiuilikan (Sal. 78:4-6). Tikmatij oui ijkon nankichiuaskej pero tiknekij timechiluiskej kuali tlen nankichiuaj porque nanmochijchikauaj nankinpaleuiskej. Nochipa ximochijchikauakan xikinpaleuikan namokoneuan ma kitlasojtlakan Jehová Noijki xikinmiskaltikan ijkon ken Jehová kineki (Efes. 6:4). ToTajtsin Dios yolpakis tla ijkon nankichiuaskej.