1. ¿Tlen moneki nochtin kipejpenaskej?

 AXKAN moneki nochtin kipejpenaskej tlen kichiuaskej. ¿Kipaleuiskej Jehová akin san ye kinamiki tlanauatis noso kipaleuiskej Satanás akin kikokolia? Akin kineki nochipa yoltos moneki kuali ma kipejpena akin kipaleuis (Mat. 25:31-33, 46). Ijkuak panotos ueyi tlajyouilistli akinmej nochipa kitlakamatiskej Jehová kiseliskej se marca tlen kiteititis momakixtiskej (Apoc. 7:14; Ezeq. 9:4, 6). Pero akinmej kipiaskej imarca yolkatl temomojti kinmixpoloskej (Apoc. 14:9-11).

2. (1) ¿Tlen techyolinia ma tikchiuakan tlen kijtoua Hebreos 10:35-39? (2) ¿Ken techpaleuia tlen kijtoua amochtli Apocalipsis?

² (Xiktlajtolti Hebreos 10:35-39). Kuali otikchi tla yotikpejpenki tikpaleuis iTekiuajkayo Jehová. Noijki xamo tikneki tikinpaleuis oksekimej ijkon ma kichiuakan. Tlen kijtoua amochtli Apocalipsis mitspaleuis, ompa kijtoua tlen kinpanos akinmej kixnamikij Jehová. Pero noijki kijtoua Jehová kinteochiuas akinmej kipaleuiaj iTekiuajkayo. Moneki ma timomachtikan tlen kijtoua non amochtli porque techpaleuis nochipa ma tiktekichiuilikan Jehová. Tlen yotimomachtijkej uelis tikinmatiltiskej oksekimej para noijki ma kipejpenakan nochipa kitekichiuiliskej.

3. ¿Tlen tikmatiskej itech nin tlamachtil?

³ Itech nin tlamachtil tikmatiskej: ¿Tlen kiseliskej akinmej kipaleuiskej iTekiuajkayo toTajtsin Dios? ¿Tlen kinpanos akinmej kipaleuiskej yolkatl chichiltik tlen kijtoua amochtli Apocalipsis?

4. ¿Akinmej okinmitak Juan katej iuan Jesús ompa iluikak?

⁴ Apóstol Juan okinmitak ome grupos tlen kipaleuiaj iTekiuajkayo Jehová. Yejuan nochipa yoltoskej uan kinteochiuas. Itech se grupo pouij 144,000 (Apoc. 7:4). Jehová okinpejpenki uan yetoskej iluikak para ualtlanauatiskej iuan Jesús (Apoc. 5:9, 10; 14:3, 4). Apóstol Juan okinmitak omoketokaj iuan Jesús “ipan Siontepetl” (Apoc. 14:1).

5. ¿Tlen kinpanos san niman tokniuan tlapejpenalmej tlen ok mokauaj nikan tlaltikpak?

⁵ Desde ijkuak okatkaj apóstoles, Jehová opejki miakej kinpejpena para ma pouikan itech 144,000 (Luc. 12:32; Rom. 8:17). Pero Juan okiluijkej ijkuak yitlamis nochi tlen amo kuali ayakmo miakej yetoskej nikan tlaltikpak. Ijkuak yipeuas ueyi tlajyouilistli, tokniuan tlapejpenalmej tlen ok yetoskej nikan tlaltikpak kiseliskej sello. Non kijtosneki Jehová kinselis (Apoc. 7:2, 3; 12:17). Ijkuak panotos ueyi tlajyouilistli, kinuikaskej iluikak tlapejpenalmej tlen ok yetoskej nikan tlaltikpak. Ijkon san sekan yetoskej 144,000 porque yejuan nochipa okitlakamatkej Jehová. Yejuan tlanauatiskej iuan Jesús itech iTekiuajkayo toTajtsin Dios (Mat. 24:31; Apoc. 5:9, 10).

6, 7. (1) ¿Katli okse grupo okitak Juan uan tlen kinpanos? (2) ¿Tleka tlapejpenalmej uan akinmej chantiskej tlaltikpak moneki kimatiskej tlen kijtoua Apocalipsis capítulo 7?

⁶ Satepan Juan okitak okse grupo. Okinmitak “senmiaktikeh tlaltikpaktlakah”. Okse grupo yejuan 144,000 amo ueli okinpouayaj (Apoc. 7:9, 10). Juan okiluijkej: “Nika kateh akimeh yopanokeh itech n weyi tlaijyowílistli, yejwah yokimpakeh intlakenwah iwa okinmistayaltijkeh ika iesso n Ichkatsi” (Apoc. 7:14). Ijkuak “senmiaktikeh tlaltikpaktlakah” momakixtiskej itech ueyi tlajyouilistli, chantiskej nikan tlaltikpak uan Jehová kinteochiuas (Sal. 37:9-11, 27-29; Prov. 2:21, 22; Apoc. 7:16, 17).

⁷ Ma timokuayejyekokan yitechpanotok tlen kijtoua amochtli Apocalipsis capítulo 7 maski tichantiskej iluikak noso timokauaskej nikan tlaltikpak. Sapanoua kualtsin yetos ijkuak ijkon panos. ¡Sapanoua tiyolpakiskej porque otikpejpenkej tikpaleuiskej iTekiuajkayo Jehová! ¿Tlen okseki techiluia amochtli Apocalipsis ijkuak uits ueyi tlajyouilistli? (Mat. 24:21).

8. ¿Ken peuas ueyi tlajyouilistli uan tlen kichiuaskej miakej?

⁸ Itech okse tlamachtil otikitakej tekiuajkej tlen tlanauatiaj tlaltikpak kiteuiskej Ueyi Babilonia, kijtosneki nochi religiones tlen katej uan tlamachtiaj tlen amo melauak (Apoc. 17:16, 17). Ijkon peuas ueyi tlajyouilistli. ¿Non kichiuas miakej ma kiueyichiuakan Jehová? Amo ijkon panos. Apocalipsis capítulo 6 kijtoua akinmej amo kitekichiuiliaj Jehová kitemoskej ma kinpaleuikan tekiuajkej uan tlasemankej. Non capítulo kiteititia yejuan yetoskiaj ken tepemej. Jehová amo kinselis porque amo kipaleuiskej iTekiuajkayo uan kitas yejuan kikokoliaj (Luc. 11:23; Apoc. 6:15-17).

9. ¿Tlen kichiuaskej iTlaixpantijkauan Jehová ijkuak panotos ueyi tlajyouilistli uan tlen panos?

⁹ Ijkuak panotos ueyi tlajyouilistli, oksekimej kitaskej iTlaixpantijkauan  Jehová kitlakamatij. Yejuan kitekichiuilijtoskej Jehová uan amo kipaleuiskej “yolkatl temojti” (Apoc. 13:14-17). Akinmej kixnamikij Jehová sapanoua kualaniskej. Ipan nochi tlaltikpak nochtin tekiuajkej peuas kintlajyouiltiskej itekipanojkauan Jehová. Biblia kintokayotia Gog de Magog (Ezeq. 38:14-16).

10. Ijkon ken kijtoua Apocalipsis 19:19-21, ¿tlen kichiuas Jehová ijkuak kitas kintlajyouiltiaj itekipanojkauan?

¹⁰ ¿Tlen kichiuas Jehová ijkuak kintlajyouiltiskej itekipanojkauan? Biblia kijtoua Jehová sapanoua kualanis (Ezeq. 38:18, 21-23). Amochtli Apocalipsis capítulo 19 kijtoua tlen panos. Jehová kiualtitlanis iKone ma kinmakixtiki itekipanojkauan uan kintlajyouiltis akinmej kinkokoliaj. Jesús amo yetos iselti porque kipaleuiskej sapanoua miakej ángeles uan noijki 144,000 tlapejpenalmej (Apoc. 17:14; 19:11-15). ¿Tlen panos satepan? Kinmixpoloskej nochtin akinmej kixnamikij Jehová (xiktlajtolti Apocalipsis 19:19-21).

11. ¿Tlen okachi ipati mochiuas tlen kijtoua amochtli Apocalipsis?

¹¹ ¿Ken momachiliskej itekipanojkauan Jehová ijkuak kinmixpoloskej akinmej amo yolkualmej pero yejuan kinmakixtiskej? Yejuan sapanoua yolpakiskej. Akinmej katej iluikak yolpakiskej ijkuak kipojpoloskej Ueyi Babilonia pero satepan okachi yolpakiskej (Apoc. 19:1-3). Amochtli Apocalipsis kijtoua monamiktis ‘Ichkatsin’ uan non tlen okachi miak ipati (Apoc. 19:6-9).

12. ¿Keman monamiktis ichkatsin? (Apocalipsis 21:1, 2).

¹² ¿Keman monamiktis ichkatsin? Ichkatsin ayamo monamiktis maski nochtin 144,000 yetoskej iluikak ijkuak peuas Armagedón (xiktlajtolti Apocalipsis 21:1, 2). Ichkatsin monamiktis ijkuak tlamis Armagedón. Ye monamiktis ijkuak toTajtsin Dios yokinmixpolo nochtin akinmej kikokoliaj (Sal. 45:3, 4, 13-17).

13. ¿Tlen panos ijkuak monamiktis ‘Ichkatsin’?

¹³ ¿Tlen panos ijkuak monamiktis ‘Ichkatsin’? Se tlakatl monamiktia iuan se siuatl. Pero ijkuak monamiktis ichkatsin kijtosneki monamiktis tekiua Jesucristo iuan 144,000. Yejuan kineskayotiaj inovia Jesucristo. Ijkuak ijkon panos, ye uan 144,000 peuas ualtlanauatiskej mil xiuitl (Apoc. 20:6).

14, 15. ¿Ken kinneskayotiaj 144,000 itech Apocalipsis capítulo 21? (Xikita dibujo tlen kajki itech página 1).

¹⁴ Satepan amochtli Apocalipsis capítulo 21 kinneskayotia 144,000 ken se altepetl kuajkualtsin. Non altepetl itoka “yankuik Jerusalén” (Apoc. 21:2, 9). Nin altepetl ‘motlakxilijtok ipan májtlakteh iwa ome temeh’ iuan ompa ijkuilitokej “intokah n májtlakteh iwa ome iapóstoles n Ichkatsi”. Xamo omotlajtlachialti Juan ijkuak okitak ompa oijkuilitoka itoka porque non se tlateochiuali (Apoc. 21:10-14; Efes. 2:20).

¹⁵ Non altepetl amo ken okseki altepemej. Iojui chijchitok ika oro, 12 puertas 12 perlas, tepamitl chijchitok ika temej kualtsitsintin uan noijki kanin motlakxilijtok. Non altepetl san se tlatamachiuali kipia (Apoc. 21:15-21). Pero Juan okitak itlaj opoliuiaya. ¿Tlen opoliuiaya? Ye  okijto: “Itech nin altepetl amo kanaj onikitak se tiopa [noso teokali], porke n Toteko Dios weletini iwa n Ichkatsi, yejwah innewiah totiopa [noso toteokal]. Itech non altepetl amo moneki nion tonati nion metsi matlawikah, ken itlawilnextilis Dios tlawilnextia, iwa n Ichkatsi, Ye itlawil” (Apoc. 21:22, 23). Akinmej pouij itech “yankuik Jerusalén” yetoskej iuan Jehová (Heb. 7:27; Apoc. 22:3, 4). Ik non, versículos kiteititiaj Jehová uan Jesús yejuan iteokal non altepetl.

16. ¿Ken kinteochiuaskej akinmej chantiskej tlaltikpak ijkuak Jesús ualtlanauatis?

¹⁶ Tlapejpenalmej sapanoua yolpakij mokuayejyekoskej ken yetos non altepetl. Pero akinmej chantiskej nikan tlaltikpak noijki moneki kimatiskej. Ijkuak Jesucristo tlanauatis mil xiuitl, yankuik Jerusalén sapanoua kinteochiuas akinmej chantiskej tlaltikpak. Juan okitak non tlateochiuali okatka ken “atl non kichiwa mayolitokah” uan “itejtempa” okatka “kuawitl non kichiwa se mayolito”. Noijki ika ixijyo uelis ‘kimpajtiskiah n tlaltikpaktlakah’ (Apoc. 22:1, 2). Nochtin akinmej chantiskej tlaltikpak sapanoua kinteochiuaskej. Nochtin akinmej kitlakamatiskej Jehová ayakmo yetoskej tlajtlakolejkej. Ayakmo mokokoskej, ayakmo moyolkokoskej nion ayakmo chokaskej (Apoc. 21:3-5).

17. ¿Akinmej kinteochiuaskej ijkuak Jesús ualtlanauatis mil xiuitl? (Apocalipsis 20:11-13).

¹⁷ ¿Akinmej kinteochiuaskej? Yejuan akinmej momakixtiskej ijkuak panos Armagedón uan konemej tlen satepan nesiskej. Pero amo san yejuan kinteochiuaskej. Apocalipsis capítulo 20 kijtoua kinyolitiskej akinmej yoixpolikej (xiktlajtolti Apocalipsis 20:11-13). Pero ¿akinmej kinyolitiskej? Kinyolitiskej akinmej okitekichiuilijkej Jehová uan noijki akinmej amo keman okixmatkej (Hech. 24:15; Juan 5:28, 29). ¿Kijtosneki nochtin kinyolitiskej ijkuak Jesucristo tlanauatis mil xiuitl? Amo. Amo kinyolitiskej akinmej amo okinekej kitekichiuiliskej Jehová. Yejuan okiteititijkej amo okinnamikiaya chantiskej itech xochitlali (Mat. 25:46, TNM; 2 Tes. 1:9, TNM; Apoc. 17:8; 20:15).

18. ¿Ken tiyetoskej ijkuak tlamis mil xiuitl?

¹⁸ Ijkuak tlamis mil xiuitl, ayakmo tikpiaskej tlajtlakoli akinmej tichantiskej nikan tlaltikpak. Axkan titlajyouiaj porque Adán otechpanoltili tlajtlakoli pero satepan ayakmo titlajyouiskej (Rom. 5:12). Ijkuakon ayakmo ikaj kipias tlajtlakoli. Ijkuak tlamis mil xiuitl kuali tiyetoskej porque ayakmo ikaj kipias tlajtlakoli (Apoc. 20:5).

19. ¿Tleka moneki techyejyekoskej ijkuak tlamis mil xiuitl?

¹⁹ Jesús amo okatka tlajtlakole uan nochipa okitlakamatki Jehová maski Satanás okiyejyeko. Ijkuak ayakmo tikpiaskej tlajtlakoli, ¿tikchiuaskej ken Jesús ijkuak Satanás techyejyekos? Motas tlen tikchiuaskej ijkuak tlamis mil xiuitl uan kikajkauaskej Satanás (Apoc. 20:7). Tla tiktlakamatiskej Jehová, nochipa tiyoltoskej uan ayakmo itlaj techtsakuilis (Rom. 8:21). Pero akinmej kixnamikiskej Jehová kinmixpoloskej ijkon ken Satanás uan amo kuali ejekamej (Apoc. 20:8-10).

20. ¿Ken mitspaleuia profecías tlen kijtoua Apocalipsis?

²⁰ Ijkuak yotimomachtijkej profecías tlen kijtoua amochtli Apocalipsis, ¿tlen timokuayejyekoua? ¿Tiyolpaki timokuayejyekos tiyetos ijkuak mochiuaskej nonmej profecías? ¿Tikneki tikinmiluis oksekimej ma kiueyichiuakan toTajtsin Dios? (Apoc. 22:17). Yotimomachtijkej tlen panos satepan uan sapanoua tiyolpakij, ik non, tiknekij tikijtoskej ken apóstol Juan: “Ijkó mamochiwa. ¡Xiwalmuika, Toteko Jesús!” (Apoc. 22:20).