1, 2. ¿Tleka moneki tikmatiskej tlen kijtoua amochtli Apocalipsis?

 ¿KEMAN ikaj yotikitak ifotos? Xamo amikaj otikixmatiaya pero otikitak se foto tlen omitspakti porque ompa timota. Ijkuak tikita, tikneki tikilnamikis keman uan kanin otikixti. Noijki tikneki tikmatis akinmej inmiuan tika. Sapanoua tikpatioita non foto.

² Amochtli Apocalipsis yetoskia ken non foto. ¿Tleka? Ma tikitakan ome tlamantli. Se, porque san tejuan otechijkuililijkej. Kanin peua kijtoua: “Ye ni tlan Dios okinextili n Cristo Jesús, iwa ijkó matechnextili tejwah itekitwah tlan ayakmó wejkawas tlamochiwas” (Apoc. 1:1). Tlen ompa ijkuilitok amo nochtin okinmijkuililijkej. Otechijkuililijkej san tejuan akinmej tiktekichiuiliaj toTajtsin Dios uan titlapaleuiaj ma mochiuakan nonmej profecías. ¡Yetoskia ken tikatej “itech se foto”!

3, 4. Ijkon ken kijtoua amochtli Apocalipsis, ¿keman mochiuaskiaj profecías uan tleka moneki ma tikmatikan?

³ Ome, nonmej profecías tikinpatioitaj porque mochiuaj ijkuak moneki. Apóstol Juan okijto keman mochiuaskiaj, ye okijto: “Se tonati pialoni, [noso itonal Toteko] n Espíritu Santo owala notech” (Apoc. 1:10). Apóstol Juan non okijkuilo kanaj itech xiuitl 96. Ijkuakon opoliuiaya miak xiuitl para “itonal Toteko” (Mat. 25:14, 19; Luc. 19:12). Pero profecías kiteititiaj “itonal toTeko” opejki 1914 ijkuak Jesús okitlalijkej tekiua. Itech non xiuitl opejki mochiua itech ialtepe Jehová profecías tlen  kijtoua Apocalipsis. Ik non, tejuan tikatej itech “itonal toTeko”.

⁴ Tejuan tikatej itech ninmej tonalmej, ik non, moneki tikilnamikiskej tlen ijkuilitok itech Apocalipsis 1:3: “Miak mayolpakikah akimeh kiamapoah iwa akimeh kikakih iwa kichiwah tlan Dios kitematiltia, porke mach [amo] ok wejkawas mochiwas tlan nika ijkuilitok”. Ik non, moneki ma tiktlajtoltikan tlen toTajtsin Dios “kitematiltia” , ma tikkakikan uan ma tiktlakamatikan. Pero ¿tlen “kitematiltia” toTajtsin Dios uan moneki tiktlakamatiskej?

5. ¿Ken kiteititia amochtli Apocalipsis moneki tikitaskej kox Jehová kiselia ijkuak tikueyichiuaj?

⁵ Kanin peua Apocalipsis kijtoua Jesús kita nochi tlen panotok itech tlanechikolmej (Apoc. 1:12-16, 20; 2:1). Ijkon kiteititia tlen okinmilui chikome tlanechikolmej ompa Asia Menor. Okinyekilui seki tlamantli tlen kinpaleuiskia tokniuan itech achto siglo ma kiueyichiuakan Jehová ken ye kineki. Non noijki techpaleuia tejuan. ¿Tlen techmachtia? Jesucristo akin techyekana kimati ken timouikaj iuan Jehová, ye techpaleuia, techmaluia uan kimati nochi tlen panoua. Kuali kimati tlen moneki tikchiuaskej para ma techseli Jehová. Ma tikitakan seki tlamantli tlen okijto uan tejuan noijki moneki tiktlakamatiskej axkan.

6. (1) Ijkon ken kijtoua Apocalipsis 2:3, 4, ¿tlen okinpanotoka tokniuan ompa Éfeso? (2) ¿Tlen techmachtia?

⁶ (Xiktlajtolti Apocalipsis 2:3, 4). Nochipa ma tiktlasojtlakan Jehová. Tlen Jesús okinmilui tokniuan tlen omonechikouayaj ompa altepetl Éfeso, kiteititia yejuan otlaxikojtokaj uan maski otlajyouijtokaj ok okitekichiuilijtokaj Jehová. Pero ayakmo okitlasojtlayaj ijkon ken achto okichiuayaj. Ik non, tla okinekiayaj Jehová ma kinseli ijkuak okiueyichiuayaj, omonekiaya ma kitlasojtlakan. Axkan tejuan noijki amo san moneki titlaxikoskej, moneki tikitaskej tlen techyolinia ijkon ma tikchiuakan. Jehová amo san kita tlen tikchiuaj, ye kita tleka tikchiuaj tlen ye kijtoua. Jehová kipatioita ma tikueyichiuakan porque tiktlasojtlaj uan tiktlasojkamatiliaj (Prov. 16:2; Mar. 12:29, 30).

7. (1) Ijkon ken kijtoua Apocalipsis 3:1-3, ¿tlen okitak Jesús okinpanotoka tokniuan ompa Sardis? (2) ¿Tlen moneki tikchiuaskej?

⁷ (Xiktlajtolti Apocalipsis 3:1-3). Ma tiijsatokan. Tokniuan ompa Sardis okse tlamantli okinpanotoka. Maski achto okachi okitekichiuiliayaj Jehová satepan ayakmo ijkon okichiuayaj. Ik non, Jesús okinmilui ma ijsatokan. Non techilnamiktia Jehová amo kilkaua tlen tikchiuaj (Heb. 6:10). Pero amo ma timosotlauakan uan amo ma timokuayejyekokan ayakmo moneki itlaj tikchiuaskej. Xamo amo uelis tikchiuaskej ijkon ken achto otikchiuayaj pero moneki timochijchikauaskej tikchiuaskej “iteki n Toteko”. Ik non, moneki ma tiijsatokan hasta ma tlami nochi tlen amo kuali (1 Cor. 15:58; Mat. 24:13; Mar. 13:33).

8. ¿Tlen techmachtia tlen Jesús okinmilui tokniuan tlen ochantiayaj Laodicea? (Apocalipsis 3:15-17).

⁸ (Xiktlajtolti Apocalipsis 3:15-17).  Ma tiktekichiuilikan Jehová ika nochi toyolo uan ma tiyolpakikan. Tlen Jesús okinmilui tokniuan tlen ochantiayaj Laodicea, kiteititia okinpanotoka okse tlamantli. Yetoskia ken okatkaj san yamankej noso ayakmo oyolpakiayaj ijkuak okitekichiuiliayaj Jehová. Ik non, Jesús okinmilui: “Amitla mopati, amitla tikpia”. Yejuan omonekiaya oksepa yolpakiskiaj ijkuak kitekichiuiliskiaj Jehová (Apoc. 3:19). ¿Tlen techmachtia? Tla ayakmo tiyolpakij ijkon ken achto otiyolpakiayaj, moneki okachi ma tiktlasojkamatilikan tlen techmaka Jehová (Apoc. 3:18). Amo ma tiktemokan tikpiaskej miak tlamantli porque uelis techtlapololtis. Tiknekij okachi tikpatioitaskej tiktekichiuiliskej Jehová.

9. ¿Tlen technejmachtia tlen Jesús okinmilui tokniuan tlen ochantiayaj Pérgamo uan Tiatira?

⁹ Amo ma tikselikan tlen tlamachtiaj akinmej kixnamikij ialtepe Jehová. Jesús okinmilui amo kuali tlen okichijtokaj sekimej tokniuan tlen ochantiayaj Pérgamo porque otlamachtiayaj tlen amo melauak uan okichiuayaj amo kuali ma mouikakan tokniuan (Apoc. 2:14-16). Pero okinmilui kuali tlen okichijtokaj tokniuan tlen ochantiayaj Tiatira porque amo okiselijkej “weyi tlamachtílistli de n satanás” uan okinyole amo ma kikauakan tlen toTajtsin Dios tlamachtia (Apoc. 2:24-26). Tokniuan tlen ayakmo kuali omouikayaj iuan Jehová uan okineltokayaj tlen amo melauak otlamachtiayaj, omonekiaya moyolkopaskej. Tejuan noijki amo ma tikselikan tlen tlamachtiaj akinmej kixnamikij ialtepe Jehová. Yejuan yetoskiaj ken “de milajka kineltokah Dios, pero ika tlan kichiwaskeh moixmatiskeh amo milák kineltokah” (2 Tim. 3:5). Amo techkajkayauaskej akinmej tlamachtiaj tlen amo melauak tla timomachtiaj iTlajtol toTajtsin Dios (2 Tim. 3:14-17; Jud. 3, 4).

10. ¿Tlen okseki techmachtia tlen Jesús okinmilui tokniuan tlen ochantiayaj Pérgamo uan Tiatira?

¹⁰ Amo ma tiauilnemikan. Ompa Pérgamo uan Tiatira opanotoka okse tlamantli. Sekimej tokniuan okinkauayaj oksekimej ma auilnemikan, ik non, Jesús okinmilui amo kuali tlen okichijtokaj  (Apoc. 2:14, 20). Non techmachtia maski yiuejkika tiktekichiuiliaj Jehová, ye amo kipaktis ma tiauilnemikan maski sapanoua titlapaleuiaj itech ialtepe (1 Sam. 15:22; 1 Ped. 2:16). Maski miakej amo kitlakamatij Jehová, ye kineki tejuan nochipa ma tiktlakamatikan (Efes. 6:11-13).

11. ¿Tlen yotimomachtijkej? (Xikita recuadro “ Techmachtia”).

¹¹ ¿Tlen yotimomachtijkej? Yotikitakej miak ipati ma tikitakan kox kiselia Jehová ken tikueyichiuaj. Tla tikchijtokej itlaj tlen amo kuali, moneki san niman ma tikpatlakan tonemilis (Apoc. 2:5, 16; 3:3, 16). ¿Tlen okseki okinmilui Jesús tokniuan?

12. ¿Tlen techmachtia tlen okinmiluijkej tokniuan tlen ochantiayaj Esmirna uan Filadelfia? (Apocalipsis 2:10).

¹² Axkan ma tikitakan tlen okseki okinmiluijkej tokniuan tlen ochantiayaj Esmirna uan Filadelfia. Jesús okinmilui amo ma momojtikan tla kintlajyouiltiskej porque Jehová kinteochiuaskia tla tlaxikoskiaj (xiktlajtolti Apocalipsis 2:10; 3:10). ¿Tlen techmachtia tlen Jesús okinmilui tokniuan? Moneki ma tikilnamiktokan tinochtin techtlajyouiltiskej, ik non moneki timoyektlaliskej para titlaxikoskej (Mat. 24:9, 13; 2 Cor. 12:10). ¿Tleka moneki ma tikilnamiktokan nin tlamantli?

13, 14. ¿Tlen kinpanoua itekipanojkauan Jehová ijkuak mochiua tlen kijtoua Apocalipsis capítulo 12?

¹³ Amochtli Apocalipsis kijtoua itech ninmej tonalmej itekipanojkauan Jehová kintlajyouiltiskej. Capítulo 12 kijtoua ‘omotekilmakakej ompa iluikak’ ijkuak Jesús opejki tlanauatia. Jesucristo uan ángeles omoteuijkej iuan amo kuali ejekamej (Apoc. 12:7, 8). Pero akinmej kikokoliaj toTajtsin Dios amo otlatlankej, okinkixtijkej iluikak uan okinualtlamotlakej, ik non, sapanoua miakej kintlajyouiltiaj (Apoc. 12:9, 12). Pero ¿tlen kinpanoua itekipanojkauan Jehová?

¹⁴ Amochtli Apocalipsis kijtoua amo kikauiliaj Satanás ma kalaki iluikak, ik non, sapanoua kualantok uan kintlajyouiltia tlapejpenalmej. Porque yejuan yetoskej itech iTekiuajkayo toTajtsin Dios uan kitematiltiaj akin Jesucristo (Apoc. 12:17; 2 Cor. 5:20; Efes. 6:19, 20). ¿Ken mochijtok non profecía?

15. ¿Akinmej ome profetas tlen kijtoua Apocalipsis capítulo 11 uan tlen okinpanok?

¹⁵ Satanás okichi akinmej kikokoliaj toTajtsin Dios ma kintlajyouiltikan  tokniuan tlapejpenalmej. Yejuan okijtouayaj ken tetlapouiskej uan okipaleuiayaj ialtepe Jehová. Yejuan kineskayotiaj ome profetas * tlen kijtoua amochtli Apocalipsis (Apoc. 11:3, 7-11). Itech 1918 chikueyi tokniuan tlen okijtouayaj ken tetlapouiskej, okinteluijkej uan tekiuajkej okijtojkej ma kintsakuakan miak xiuitl. Omotaya ayakmo keman tetlapouiskiaj.

16. ¿Tlen opanok itech 1919 uan tlen ok kichijtok Satanás?

¹⁶ Apocalipsis capítulo 11 kijtoua amo uejkauaskia oksepa kinyolitiskiaj “ome profetas”. Melauak ijkon opanok porque ayamo opanouaya se xiuitl uan itech marzo 1919, tokniuan tlapejpenalmej okinkixtijkej uan satepan ayakmo okinteluijkej. Tokniuan san niman okitakej ken tetlapouiskej. Pero Satanás opejki kintlajyouiltia nochtin akinmej kitekichiuiliaj Jehová uan hasta axkan ijkon kichijtok (Apoc. 12:15). Ik non, tinochtin moneki titlaxikoskej uan titlaneltokaskej (Apoc. 13:10).

17. ¿Ken kinpaleuia Jehová itekipanojkauan maski Satanás kintlajyouiltia?

¹⁷ Amochtli Apocalipsis kijtoua itekipanojkauan Jehová san niman kinpaleuiskej. Biblia kijtoua: “Tlali [...] okitolo n atl”, non “atl” kijtosneki ijkuak kintlajyouiltiaj tokniuan (Apoc. 12:16). Axkan noijki ijkon panotok. Ualeua sekimej tekiuajkej kinpaleuiaj itekipanojkauan Jehová uan ayakmo kintsakuaj. Uan tokniuan mochijchikauaj kichiuaskej tlen Jehová kineki (1 Cor. 16:9). ¿Tlen kichiuaj?

18. ¿Tlen moneki tikchiuaskej?

¹⁸ Jesús okijto imachtijkauan kitematiltiskiaj itech nochi tlaltikpak tlen kichiuas iTekiuajkayo toTajtsin Dios ijkuak ayamo pojpoliui nochi tlen amo kuali (Mat. 24:14, TNM). Yejuan ijkon kichiuaj porque kinpaleuia se ángel noso miakej ángeles. Amochtli Apocalipsis kijtoua ángel: “Okiwikaya n kualitlájtoli de Dios non techmakixtia. Oyaya kinmatiltiti nochteh akimeh chantitokeh ipan tlaltíkpaktli, itech nochteh paísmeh, innawak nochteh  non tlatlamantli tlachixtokeh, innawak nochteh akimeh tlatlamantli tlajtoah, iwa itech nochteh n altepemeh” (Apoc. 14:6).

19. ¿Tlen ok titetlapouiskej akinmej tiktlasojtlaj Jehová?

¹⁹ Itekipanojkauan Jehová amo san kitematiltiaj tlen kichiuas iTekiuajkayo. Noijki kinpaleuiaj ángeles, ijkon kijtoua amochtli Apocalipsis capítulos 8 hasta 10. Ninmej ángeles kitematiltiaj tlen kinpanos akinmej amo kiseliaj tlen kichiuas iTekiuajkayo toTajtsin Dios. Ik non, tiiTlaixpantijkauan Jehová tiktematiltiaj itlaj tlen yetoskia ken “tesiwitl iwa tletl”. Kijtosneki tlen toTajtsin Dios kichiuilis nochi tlen kiyekana Satanás (Apoc. 8:7, 13). Nochtin moneki kimatiskej ayakmo miak poliui uan tlamis nochi tlen amo kuali. Moneki kipatlaskej innemilis uan ijkon uelis momakixtiskej (Sof. 2:2, 3). Moneki ma tiyetokan tiyolchikauakej porque miakej amo kinpaktia tlen tikinmiluiaj. Noijki itech ueyi tlajyouilistli okachi amo kinpaktis tlen tikinmiluiskej (Apoc. 16:21).

20. ¿Tlen tikitaskej itech ok ome tlamachtilmej?

²⁰ Moneki ma tiktlakamatikan ‘tlan Dios techmatiltia’, tejuan titlapaleuiaj ma mochiua tlen kijtoua amochtli Apocalipsis (Apoc. 1:3). Pero ¿ken titlaxikoskej maski techtlajyouiltiskej uan timoyolchikauaskej ijkuak titetlapouiskej? Techpaleuis ome tlamantli. Se, tlen kijtoua amochtli Apocalipsis kinpanos akinmej kikokoliaj toTajtsin Dios. Ome, toTajtsin Dios techteochiuas tla nochipa tiktlakamatiskej. Non tikitaskej itech ok ome tlamachtilmej.