1. ¿Tlen tlamantli tikitaj oui tikchiuaskej?

 ¿TIKNEKI tikchiuas se tlamantli para okachi tiktekichiuilis Jehová pero tikita oui? b Amo ximotekipacho porque miakej ijkon kinpanoua. Matikitakan tlen okipanok Philip. Ye okinekiaya okachi motlatlaujtis pero okitaya oui ijkon kichiuas. Erika okijto mochijchikauaskia ajsis kualkan ijkuak tetlapouiti. Pero nochipa oajsiaya yitlajka. Tomáš miak uelta okinekiaya kitlajtoltis nochi Biblia. Ye okijto: “Amo onechpaktiaya niktlajtoltis Biblia. Eyi uelta ijkon onikchi pero san oniktlajtoltiaya hasta amochtli Levítico”.

2. ¿Tleka amo matimotekipachokan tla ayamo tikchiuaj tlen tiknekij para okachi tiktekichiuiliskej Jehová?

² Amo ximotekipacho tla tikita oui okachi tiktekichiuilis Jehová. Moneki timochijchikauas uan timajxilis para tikchiuas seki tlamantli. Xamo ijkon tikchiuaj porque tiktlasojtla Jehová uan tikpatioita kuali iuan timouika. Ye kimati tlen uelis tikchiuas uan amo mitsiluia xikchiua tlen amo tiueli (Sal. 103:14; Miq. 6:8). Xikita kox melauak uelis tikchiuas tlen tikneki para okachi tiktekichiuilis Jehová. Tla tikita tiuelis tikchiuas tlen tikneki, ¿tlen mitspaleuis ijkon xikchiua? Matikitakan seki tlamantli.

3. ¿Tleka moneki itlaj matechyolini para tikchiuaskej tlen yotikijtojkej?

³ Moneki timokuayejyekoskej tlen techyolinia okachi matiktekichiuilikan Jehová. ¿Tleka ijkon tikijtouaj? Matimochijchikauakan  tla tiknekij tikchiuaskej tlen yotikijtojkej. Tlen techyolinia itlaj matikchiuakan yetoskia ken ejekatl kixtopejti tsotsoli tlen kipia barco. Barco ajsiti kanin yaui tla ejeka. Pero okachi san niman ajsiti tla chikauak ejekas. Okachi timochijchikauaskej tla tikilnamiktokej tlen techyoliniaj matiktekichiuilikan Jehová. Matikitakan tlen okipanok se tokni itoka David tlen chanti altepetl Salvador. Ye okijto: “Okachi timochijchikauaj tikchiuaskej tlen yotikijtojkej tla nochipa tikilnamiktokej tleka ijkon tiknekij tikchiuaskej”. ¿Tlen techyolinis matikchiuakan tlen yotikijtojkej?

4. ¿Tlen uelis tiktlajtlaniliskej Jehová? (Filipenses 2:13; noijki xikita dibujo).

⁴ Matikiluikan Jehová matechyolini para tikchiuaskej tlen yotikijtojkej. Jehová ika iespíritu techpaleuis matimochijchikauakan matikchiuakan tlen yotikijtojkej (xiktlajtolti Filipenses 2:13). Ualeua tikijtouaj itlaj tikchiuaskej porque tikmatij ijkon moneki tikchiuaskej, kuali tla ijkon tikchiuaj. Pero xamo itech toyolo amo tiknekij tikchiuaskej. Ijkon okipanok tokni Norina tlen chanti Uganda. Ye okijto mochijchikauas ikaj kimachtis. Pero amo oyolpakiaya ijkon kichiuas porque omokuayejyekouaya amo kuali tlamachtia. ¿Tlen okipaleui? Ye okijto: “Onikiluiaya Jehová manechpaleui okachi manimochijchikaua para nikajsis ikaj akin nikmachtis. Noijki onimochijchika okachi kuali nitlamachtis. Seki metstli satepan onikitak yonechpaktiaya nitlamachtis. Non xiuitl ome opejki nikinmachtia”.

5. ¿Tlen moneki tikchiuaskej tla tiknekij okachi tiktekichiuiliskej Jehová?

⁵ Matimokuayejyekokan ken yotechpaleui Jehová (Sal. 143:5). Ápostol Pablo omokuayejyeko Jehová kitlasojtla non okiyolini okachi makitekichiuili ika nochi iyolo (1 Cor. 15:9, 10; 1 Tim. 1:12-14). Noijki tla timokuayejyekouaj Jehová techtlasojtla, non okachi techyolinis matiktekichiuilikan (Sal. 116:12). Matikitakan tlen okipaleui se tokni tlen chanti ompa Honduras makitekichiuili Jehová ken precursora regular. Ye okijto: “Onimokuayejyeko Jehová sapanoua nechtlasojtla. Onechkauili manipoui itech ialtepe, nechmaluia uan nechpaleuia. Ijkuak ijkon onikchi, opejki okachi niktlasojtla Jehová uan okachi oniknekiaya niktekichiuilis ken precursora”.

6. ¿Tlen techyolinis matikchiuakan tlen yotikijtojkej tikchiuaskej?

⁶ Jehová techteochiuas tla okachi tiktekichiuiliskej. Itech párrafo 1 otikitakej tlen okipanotoka tokni Erika. ¿Tlen okipaleui maajsi kualkan kanin tetlapouiti? Ye okijto: “Onikitak amo onikkakiaya miak tlamantli ijkuak amo kualkan  oniajsiaya. Pero tla kualkan niajsiskia, uelis nikintlajpaloskia tokniuan uan inuan nimotlapouiskia. Noijki nikkakiskia tlen tokni techiluia para kuali titetlapouiskej uan tiyolpakiskej ijkuak ijkon tikchiuaskej”. Tokni Erika ijkon okichi porque okitak ken kipaleuia. Tejuatsin, ¿tlen tikneki tikchiuas? Tla tikneki mojmostla tiktlajtoltis Biblia noso timotlatlaujtis, ximokuayejyeko ken mitspaleuis okachi ximouika iuan Jehová (Sal. 145:18, 19). Noijki tla tikneki okachi tikchiuas ken Cristo, ximokuayejyeko ken mitspaleuis kuali ximouika inuan oksekimej (Col. 3:14). ¿Tlen okachi moneki tikchiuas? Xikijkuilo tlen tlamantli tikneki tikchiuas uan xikojpaui ijkuak monekis. Itech párrafo 1 otikitakej tlen okipanotoka tokni Tomáš. Ye okijto: “Nechyolchikaua ijkuak nikita nechpaleuia tlen nikneki nikchiuas”.

7. ¿Tlen okichijkej Julio uan isiua para okachi kitekichiuiliskej Jehová?

⁷ Matimouikakan inmiuan akinmej techyolchikauaskej (Prov. 13:20). Matikitakan tlen okichijkej Julio uan isiua porque okinekiayaj yaskej kanin okachi moneki tetlapouiskej. Julio okijto tlen okinpaleui: “Otimouikayaj inmiuan akinmej ueliskia techpaleuiskej uan otikintlapouiayaj tlen otiknekiayaj tikchiuaskej. Otechiluiayaj tlen uelis tikchiuaskej porque yejuan okachi okitekichiuiliayaj Jehová. Noijki otechtlajtlaniayaj tlen yotikchijkej uan otechyolchikauayaj ijkuak omonekiaya”.

8. ¿Tlen panos tla san ualeua timochijchikauaj? (Noijki xikita dibujo).

⁸ Xamo tinochtin ualeua amitlaj tiknekij tikchiuaskej. ¿Kijtosneki ayakmo tikchiuaskej tlen otikijtojkej? Amo. Oksepa matikitakan ken ejekatl kiuika barco. Ejekatl kiuika barco maajsiti kanin moneki pero ualeua amo chikauak ejeka noso amo ejeka. ¿Kijtosneki ayakmo itlaj kichiuas akin kiuika barco? Amo. Seki barcos kipiaj motor uan okseki kipiaj remos tlanajnakastlan tlen uelis kintekitiltiskej para kiuikaskej barco. Noijki ijkon uelis techpanos. Ualeua tiknekiskej itlaj tikchiuaskej pero ualeua amitlaj tiknekiskej tikchiuaskej. Ikinon moneki tikchiuaskej okseki tlamantli para uelis tikchiuaskej tlen yotikijtojkej. Ijkon ken ijkuak ikaj kiuika barco kichiua okseki tlamantli para ajsis kanin moneki. Tejuan noijki moneki timochijchikauaskej para tikchiuaskej tlen yotikijtojkej maski tikitaj oui noso amo tiknekij. Non techpaleuis matikchiuakan tlen tiknekij. Achto matikitakan tlen motlajtlaniaj sekimej uan satepan tikitaskej tlen uelis techpaleuis matikchiuakan tlen yotikijtojkej.

9. Xikyekijto tleka moneki timochijchikauaskej okachi tiktekichiuiliskej Jehová maski ualeua amo tiknekij.

 ⁹ Jehová kineki matipakikan uan matiktekichiuilikan ika nochi toyolo (Sal. 100:2; 2 Cor. 9:7). Ikinon ¿tleka moneki timochijchikauaskej okachi tiktekichiuiliskej maski ualeua amo tiknekij ijkon tikchiuaskej? Matikitakan tlen okichi apóstol Pablo. Ye okijto: “Niknajnawatia nokuerpo iwa niktoktia manechtlakita” (1 Cor. 9:25-27). Pablo okichi tlen Jehová okinauati maski amo okinekiaya kichiuas. ¿Okiyolpaktiaya Jehová tlen okichiuaya Pablo? Kema. Ye okiteochi porque sapanoua okitekichiuili (2 Tim. 4:7, 8).

10. ¿Tleka moneki timochijchikauaskej okachi tiktekichiuiliskej Jehová maski ualeua oui?

¹⁰ Jehová yolpaki ijkuak okachi timochijchikauaj tiktekichiuiliskej maski tikitaj oui. ¿Tleka? Porque tiktlasojtlaj uan tikchiuaj tlen yotikijtojkej maski ualeua amo techpaktia. Jehová techteochiuas tla timochijchikauaskej ijkon ken okiteochi Pablo (Sal. 126:5). Xamo okachi techyolinis matiktekichiuilikan Jehová ijkuak tikitaskej techteochiua. Se tokni itoka Lucyna uan chanti Polonia, okijto: “Ualeua amo nikneki nitetlapouiti ijkuak nisotlaua. Pero ijkuak yonimokopato onitetlapouito sapanoua niyolpaki. Nikita ken Jehová itlaj nechtliokolia”. Axkan matikitakan tlen uelis tikchiuaskej tla amitlaj techyolinia matikchiuakan.

11. ¿Ken techpaleuia Jehová matikmatikan timonauatiskej?

¹¹ Matikiluikan Jehová matechpaleui matimonauatikan. Akin ijkon kichiua kimati kinauatis tlen kimachilia uan tlen kichiua. Tla tikmatij timonauatiskej, amo san techpaleuia amo matikchiuakan tlen amo kuali. Noijki techpaleuia matikchiuakan tlen kuali maski ualeua tikitaj oui noso amo tiknekij tikchiuaskej. Uelis ijkon tikchiuaskej porque iespíritu santo toTajtsin Dios techyekana. Ikinon moneki tiktlajtlaniliskej Jehová iespíritu santo tla tiknekij tikmatiskej timonauatiskej (Luc. 11:13; Gál. 5:22, 23). Itech párrafo 3 otikitakej tlen okipanok David. Ye mochijchikaua momachtis uan sapanoua kipaleuia ijkuak motlatlaujtia. Ye okijto: “Onikilui Jehová manechpaleui manimonauati uan ye onechpaleui. Onikijkuilo tlen tonal nimomachtis uan ijkon nikchijtok”.

12. ¿Ken techpaleuia Eclesiastés 11:4 okachi matiktekichiuilikan Jehová?

¹² Amo matikchiakan nochi tlamantli kuali mayeto. Axkan amo nochi kuali yetos. Amo keman itlaj tikchiuaskej tla tikchiaskej nochi kuali mayeto (xiktlajtolti Eclesiastés 11:4). Se tokni itoka Dayniel okijto: “Axkan amo nochi kuali yetos. Pero kuali tiyetoskej tla itlaj tikchiuaskej”. Se tokni itoka Paul tlen chanti Uganda noijki okijto tlen techpaleuis san niman matikchiuakan tlen yotikijtojkej. Ye okijto: “Jehová techteochiuas tla tikchiuaj tlen yotikijtojkej maski titlajyouiaj” (Mal. 3:10).

13. ¿Ken uelis techpaleuis tla achto tikchiuaskej tlen amo oui?

¹³ Achto matikchiuakan tlen amo oui. Xamo amo tiknekij tikchiuaskej tlen yotikijtojkej porque tikitaj oui. Tla ijkon techpanotok, matikxexelokan tlen tikchiuaskej uan achto matikchiuakan tlen amo oui. Matikijtokan tiknekij itlaj tikpatlaskej itech tonemilis pero tikitaj oui. Xamo uelis tipeuaskej ika se tlamantli tlen amo oui. Tla tiknekij tiktlajtoltiskej nochi Biblia, achto matikchiuakan se  programa uan amo miak matiktlajtoltikan. Itech párrafo 1 otikitakej tlen okipanotoka Tomáš. Ye okitaya sapanoua oui kitlajtoltis Biblia ipan se xiuitl maski yokijtojka ijkon kichiuas. Ye okijto: “Onikitaya oui niktlajtoltis Biblia ipan se xiuitl porque okatka miak. Ikinon oksepa opejki niktlajtoltia pero amo miak. Onikijto mojmostla niktlajtoltiskia san seki versículos uan nimokuayejyekoskia tlen nechmachtia. Ijkon okachi onechpakti niktlajtoltis Biblia”. Tomáš okachi oyolpakiaya ijkuak okitlajtoltiaya Biblia ikinon opejki okachi kitlajtoltia uan nochi okitlajtolti. c

14. ¿Tlen uelis techpanos?

¹⁴ Ualeua itlaj panotikisa ijkuak tiknekij itlaj tikchiuaskej. Xamo ayakmo timajxiliskej tikchiuaskej tlen yotikijtojkej porque “itlaj amo kuali techpanotikisa” (Ecl. 9:11). Noijki xamo tikixnamikij seki tlamantli tlen kichiua matimosotlauakan (Prov. 24:10). Tejuan titlajtlakolejkej uan timotlapololtiaj. Non uelis kichiuas ayakmo matikchiuakan tlen yotikijtojkaj (Rom. 7:23). Ualeua xamo san tisotlauaj (Mat. 26:43). ¿Tlen techpaleuis matikchiuakan tlen yotikijtojkej?

15. ¿Tleka timochijchikauaj tikchiuaskej tlen yotikijtojkej maski titlajyouiaj? (Salmo 145:14).

¹⁵ Amo matimotekipachokan tla timotlapololtiaj. Biblia kijtoua xamo techpanos miak tlamantli. Noijki kijtoua Jehová techpaleuis matikchiuakan tlen yotikijtojkej (xiktlajtolti Salmo 145:14). Itech párrafo 1 otikitakej tlen okipanok Philip. Ye okijto: “Amo nikita keski uelta nimotlapololtia. Ne nikita keski uelta nimochijchikaua oksepa nikchiuas tlen yonikijto”. Oksepa matikitakan tlen okijto David: “Ne amo nikita ken itlaj nechtsakuilia ijkuak itlaj amo kuali kisa  noso amo kuali nimomachilia. Non tlamantli nechkauilia manikteititi sapanoua niktlasojtla Jehová”. Tejuan noijki tikteititiskej tiknekij tikyolpaktiskej Jehová tla timochijchikauaj tikchiuaskej tlen yotikijtojkej maski titlajyouiaj. Jehová yolpaki ijkuak kita timochijchikauaj tikchiuaj tlen yotikijtojkej.

16. ¿Tlen techpaleuis tla itlaj techtsatsakuilia?

¹⁶ Amo matimosotlauakan tla amo kuali kisa tlen tiknekij tikchiuaskej. Matikitakan tlen tiknekij tikchiuaskej uan matimotlajtlanikan: “¿Tlen uelis techpaleuis amitlaj matechtsatsakuili uan tikchiuaskej tlen yotikijtojkej?” (Prov. 27:12). Pero tla amo keman ueli tikchiuaj tlen yotikijtojkej maski timochijchikauaj, uelis tikpatlaskej tlen tiknekij tikchiuaskej. Tla ijkon techpanotok matimokuayejyekokan kox uelis tikchiuaskej tlen yotikijtojkej. d Jehová techajsikamati uan amo kijtos amo ueli tikchiuaj tlen yotikijtojkej (2 Cor. 8:12).

17. ¿Tleka moneki matikilnamiktokan tlen yotikchijkej?

¹⁷ Matikilnamiktokan tlen yotikchijkej. Biblia kijtoua: “Totajtsi Dios yolmilajka, iwa ayik kilkawas tlan nomejwah ononkichijkeh” (Heb. 6:10). Tejuan noijki amo matikilkauakan. Matikilnamiktokan yitimouikaj iuan Jehová, titetlapouiaj uan yotimoapolaktijkej. Tlen yotikchijkej kiteititia uelis tikchiuaskej okseki tlamantli tlen yotikijtojkaj uan ijkon okachi tiktekichiuiliskej Jehová (Filip. 3:16).

18. ¿Ken moneki timomachiliskej ijkuak tikchiuaskej tlen yotikijtojkej? (Noijki xikita dibujo).

¹⁸ Ijkon ken akin kiuika barco ajsi kanin moneki uan yolpaki, tejuan tiyolpakij porque Jehová techpaleuia matikchiuakan tlen yotikijtojkej. Yolpakij akinmej kiuikaj barco. Tejuan noijki uelis tiyolpakiskej tla timochijchikauaj tikchiuaskej tlen yotikijtojkej uan tikitaj ken techpaleuia Jehová uan techteochiua (2 Cor. 4:7). Jehová okachi techteochiuas tla timochijchikauaskej tikchiuaskej tlen yotikijtojkej uan amo timosotlauaj (Gál. 6:9).