1, 2. (1) ¿Tlen kijtoaj sekimej tlaltikpaktlakamej? (2) ¿Tlen timomachtiskej?

SEKIMEJ tlaltikpaktlakamej kijtoaj pampa uelis tikueyichiuaskej toTajtsin Dios amo moneki ikaj ma techyekana. Kijtoaj san moneki iuan mouikaskej. Pero ¿melauak non?

² Itech nin tlamachtil tikitaskej Jehová nochi kuali kichiua uan kinyekana itekipanojkauan (xikita recuadro “¿Tlen kijtosneki?”). Noijki timomachtiskej tlen moneki tikchiuaskej ijkuak ialtepe Jehová itlaj technauatia (1 Corintios 14:33, 40). Itech achto siglo, akinmej okichiuayaj ken Cristo, omoyekanayaj ika iTlajtol toTajtsin Dios. Ik non, otetlapouijkej itech miakej altepemej. Axkan, tiiTlaixpantijkauan Jehová noijki timoyekanaj ika Biblia uan tiktlakamatij tlen technauatia ialtepe. Ik non, titetlapouiaj itech Tekiuajkayotl itech nochi Tlaltikpak. Noijki tlanechikolmej san sekan katej, ika yolseuilistli uan chipauakej.

3. ¿Ken tikmatij Jehová nochi kuali kichiua?

³ Ijkuak timokuayejyekoaj itech nochi tlen Jehová  okichijchi, tikitaj nochi kuali kichiua. Ye “okichijchi Tlaltikpak ika ixtlamatilistli. Ika ajsikamatilistli kuali okitlali iluikak” (Proverbios 3:19). Pero san tepitsin tikmatij itech tlen toTajtsin Dios okichijchi. Ik non Biblia kijtoa “san ken se tlajtoli tlen amo chikauak itech mokaki” (Job 26:14). Pero maski san tepitsin tikixmatij semanauak, techpaleuia ma tikitakan Jehová nochi kuali okiyektlali (Salmo 8:3, 4). Ma timokuayejyekokan itech sapanoa miakej sitlalimej tlen kuali moliniaj. Noijki ken seki planetas kiyaualojtokej Tonaltsin. Jehová ijkon okinek ma yeto uan nin sapanoa techtlajtlachialtia. Ijkuak timokuayejyekoaj ken Jehová okichijchi iluikak uan Tlaltikpak ika ixtlamatilistli, tikueyichiuaj uan tiknekij tiyetoskej tiyolmelajkej (Salmo 136:1, 5-9).

4. ¿Tleka ixtlamatkej amo ueli kinnankiliaj tlajtlanilmej tlen okachi miak inpati?

⁴ Ixtlamatkej yomomachtijkej miak tlamantli itech Tlaltikpak uan semanauak. Ik non, axkan tonemilis amo okachi oui. Pero yejuan amo ueli kinnankiliaj tlajtlanilmej tlen okachi miak inpati. Se neskayotl, amo kuali kimatij ken okitlalijkej semanauak uan tleka onka yolilistli itech Tlaltikpak. Uan miakej amo kimatij tleka amo tiknekij timikiskej (Eclesiastés 3:11). ¿Tleka miakej amo kimatij tlen tlanankiliskej? Achto, ixtlamatkej uan oksekimej tlaltikpaktlakamej kijtoaj amo onka toTajtsin Dios uan noijki tlamachtiaj tiuitsej itech se yolkatl. Pero toTajtsin Dios technankilia itech se amochtli tlen itoka Biblia.

5. ¿Tlen neskayotl kiteititia moneki timoyekanaskej ika tlanauatilmej tlen kiyekana nochi tlen Jehová okichijchi?

⁵ Jehová okintlali tlanauatilmej pampa ma kiyekana tlen okichijchi uan amo mopatlaj. Pampa tekitiskej electricistas, plomeros, ingenieros, pilotos, cirujanos uan oksekimej moneki ma yetokan ninmej tlanauatilmej. Se neskayotl, cirujanos kimatij kanin kajki toyolo. ¿Tleka? Pampa tinochtin san sekan tikpiaj. Uan tinochtin tikmatij tla ikaj tlejko itech se kuauitl uan ualmokajkaua, uetsiki uan uelis mikis. ¿Tleka? Pampa onka se tlanauatil tlen kiyekana gravedad. Ik non, tla tiknekij tiyoltoskej, moneki tikintlakamatiskej tlanauatilmej tlen kiyekanaj nochi tlen Jehová okichijchi.

6. ¿Ken tikmatij Jehová kineki san sekan ma tikueyichiuakan?

⁶ Tetlajtlachialtia ken Jehová okiyektlali nochi tlen okichijchi. Ik non, noijki kineki ialtepe san sekan ma kiueyichiua. Uan itech Biblia techiluia ken kineki ma tikueyichiuakan. Tla Jehová uan ialtepe techyekanaj, melauak tiyolpakiskej.

7. ¿Tlen techmachtia ken ijkuilitok Biblia?

⁷ Biblia se tetliokolil tlen otechmakak toTajtsin Dios. Sekimej ixtlamatkej kijtoaj Biblia san kinpia amochmej tlen okinmijkuilojkej judíos uan akinmej kichiuaj ken Cristo uan motlajtolnamiki. Pero toTajtsin Dios okinpejpenki akinmej kijkuiloskiaj Biblia, keman uan tlen kijkuiloskiaj. Ik non,  nochi Biblia amo motlajtolnamiki uan techpaleuia ma tikajsikamatikan tlen toTajtsin Dios kineki techmachtis. Desde Génesis hasta Apocalipsis, Biblia tlajtoa itech ikaj akin kichiuas Tlaltikpak oksepa ma yeto se Xochitlali. Noijki techmachtia ye Jesucristo akin kichiuas non uan iTekiuajkayo kiteititis san Jehová kinamiki ma technauati (xiktlajtolti Génesis 3:15, * Mateo 6:10 uan Apocalipsis 11:15).

8. ¿Tlen kiteititia san sekan otekitiayaj israelitas?

⁸ ToTajtsin Dios noijki kuali okinyektlali israelitas. ¿Ken okichi? Okinmakak Tlanauatil. Se neskayotl, okatkaj sekimej siuamej tlen san sekan otekitiayaj iyekapan mantajkali kanin omonechikoaya (Éxodo 38:8). ToTajtsin Dios noijki okinnauati israelitas ken yaskiaj uan noijki ken kiuikaskia tabernáculo. Satepan, ueyi tekiua David okinnauati teopixkej uan levitas ken san sekan tekitiskiaj itech teokali (1 Crónicas 23:1-6; 24:1-3). Jehová okinteochiuaya israelitas Ijkuak okitlakamatiayaj. San sekan okatkaj uan okipiayaj yolseuilistli (Deuteronomio 11:26, 27; 28:1-14).

9. ¿Ken otekitiayaj tlanechikolmej itech achto siglo?

⁹ Tlanechikolmej itech achto siglo noijki san sekan otekitiayaj. Ijkuakon, okatka se cuerpo gobernante, kijtosneki sekimej tlakamej tlen okinyekanayaj tlanechikolmej. Achto, san tlatitlanilmej opouiayaj itech cuerpo gobernante. Pero satepan noijki tlayekankej opouiayaj itech cuerpo gobernante (Hechos 6:1-6; 15:6). Jehová okichi akinmej opouiayaj itech cuerpo gobernante uan akinmej okinpaleuiayaj ma kinmijkuilokan cartas tlen okinpiayaj tlanauatilmej uan tlanojnotsalmej pampa tlanechikolmej (1 Timoteo 3:1-13; Tito 1:5-9). ¿Ken okinpaleui tlanechikolmej tlen okinnauatiaya cuerpo gobernante?

10. Itech achto siglo, ¿tlen opanok ijkuak tlanechikolmej okitlakamatkej cuerpo gobernante? (Xikita tlaixkopinal tlen ika peua tlamachtil).

¹⁰ (Xiktlajtolti Hechos 16:4, 5). Itech achto siglo, sekimej tokniuan okintlajpaloayaj tlanechikolmej pampa kinmiluiskiaj tlen okijtojkej “tlatematiltijkeh iwa n tetajmeh” tlen okatkaj Jerusalén. Ken tlanechikolmej okitlakamatkej tlen okinnauati cuerpo gobernante, “nochteh n tokniwah okachi okineltokayah Cristo Jesús, iwa ixmostla okachi omomiakiliayah”. ¿Ken uelis ijkon tikchiuaskej itech totlanechikol?

11. ¿Tlen moneki kichiuaskej tlayekankej ijkuak itlaj kinnauatia ialtepe Jehová?

¹¹ Tokniuan akinmej tlayekanaj itech Betel, tlayekankej itech circuito, siervos ministeriales uan tlayekankej moneki kitlakamatiskej ialtepe Jehová. Uan Biblia kijtoa tinochtin moneki tikintlakamatiskej tlayekankej (Deuteronomio 30:16; Hebreos 13:7, 17). Tla tiyolmelajkej ixpan Jehová, nochipa titetlakamatiskej uan amo titlananankiliskej ijkuak itlaj technauatiskej. Amo tiknekij tikchiuaskej ken  Diótrefes, akin amo okintlakaitaya tlayekankej (xiktlajtolti 3 Juan 9, 10). Ijkuak titetlakamatij, titlapaleuiaj san sekan ma yeto tlanechikol uan ika yolseuilistli. Ik non, ma timotlajtlanikan: “¿Nikinmiluia tokniuan ma yetokan yolmelajkej ixpan Jehová? ¿San niman niktlakamati ialtepe Jehová?”.

12. ¿Ken kintlaliaj tlayekankej uan siervos ministeriales?

¹² Amo kipia miak xiuitl, Cuerpo Gobernante okipatlak ken kintlaliaj tlayekankej uan siervos ministeriales itech tlanechikol. Revista Akin Tetlapouijtok okiyekijto cuerpo gobernante itech achto siglo okinkauili tlayekankej tlen otetlajpaloayaj ma kintlalikan tlayekankej uan siervos ministeriales (xikita tlamachtil “Preguntas de los lectores” itech La Atalaya [ika náhuatl del centro Akin Tetlapouijtok] 15 de noviembre 2014). Ik non, itech metstli septiembre, xiuitl 2014, tlayekankej itech circuito opejkej kintlaliaj tlayekankej. Ijkuak tlayekankej kijtoaj se tokni uelis yetos tlayekanki noso siervo ministerial, tlayekanki itech circuito kixmati tokni uan ikalchanejkauan. Ik non, iuan tetlapouia (1 Timoteo 3:4, 5). Satepan, tlayekanki itech circuito motlapouia iuan tlayekankej. San sekan oksepa momachtiaj tlaxelolmej kanin kijtoaj tlen moneki kichiuaskej akinmej kinekij yetoskej tlayekankej uan siervos ministeriales (1 Timoteo 3:1-10, 12, 13; 1 Pedro 5:1-3).

13. ¿Ken tikinpaleuiaj tlayekankej?

¹³ Tlayekankej techyekanaj ika Biblia pampa kinekij techmaluiskej uan techpaleuiskej. Ik non, moneki ma tikinpaleuikan uan ma tikintlakamatikan uan ijkon kuali tiyetoskej (1 Timoteo 6:3). Itech achto siglo, sekimej tokniuan okichijtinemiayaj ‘san tlan yejwah okinekiayah’. Amo okinekiayaj tekitiskej uan omokajkalakiayaj kanin amo inteki. Tlayekankej okinyektlalijkej, pero yejuan amo okipatlakej inyelis. Pablo okinmilui tokniuan itech non tlanechikol tlen omonekiaya ma kinchiuilikan akinmej ijkon okichiuayaj. Okinmilui: “Kuali xikitakah akí, iwa ayakmó íwa ximonelokah”. Omonekiaya ayakmo iuan mouikaskiaj, pero amo kikokoliskiaj (2 Tesalonicenses 3:11-15). Axkan, tlayekankej noijki mochijchikauaj kinpaleuiskej akinmej amo kintlakamatij itlanauatiluan Jehová. Se neskayotl, motlapouiskej iuan se tokni tla peua moixmati iuan akin amo iTlaixpantijka Jehová (1 Corintios 7:39). ¿Uan tla tokni amo kineki kipatlas iyelis? Uelis tlayekankej kitemakaskej se tlapoualistli kanin kijtoskej tlen kichijtok tokni kichiuas ma kijtokan tlen amo kuali itech tlanechikol. Tla itech totlanechikol tlayekankej kitemakaskej se tlapoualistli ijkon, ¿tlen tikchiuaskej? Uan tla tikixmatij tokni akin kiluijtokej non tlapoualistli, ¿ayakmo iuan timouikaskej?  Ijkon tikpaleuiskej ma kita amo kuali tlen kichijtok uan amo kipaktia Jehová. Uelis kikauas tlen kichijtok ^[1] (xikita nota kanin tlami tlamachtil).

14. ¿Ken uelis titlapaleuiskej chipauak ma yeto tlanechikol?

¹⁴ ITlajtol toTajtsin Dios kijtoa tlen moneki tikchiuaskej pampa itech tlanechikol amo ikaj ma tlajtlakolchijto. Ma timokuayejyekokan tlen opanok itech altepetl Corinto. Pablo sapanoa okintlasojtlaya tokniuan tlen ompa ochantiayaj. Sekimej ye okinmachti itech Biblia (1 Corintios 1:1, 2). Ma timokuayejyekokan ken omomachili ijkuak okimatki se tlakatl oauilnentoka uan tokniuan amo itlaj okiluiayaj. Ik non, Pablo okinnauati tlayekankej: “Non tlakatl moneki makitemaktikah imak satanás”. Omonekiaya kikixtiskej itech tlanechikol (1 Corintios 5:1, 5-7, 12). Axkan, tlayekankej uelis kikixtiskej itech tlanechikol akin tlajtlakolchiua uan amo moyolkuepa. Tla amo timouikaj inmiuan akinmej okinkixtijkej itech tlanechikol ijkon ken kijtoa Biblia, titlapaleuiskej ma yeto chipauak (xikita recuadro “¿Tlen kijtosneki?”). Uan noijki uelis tikinpaleuiskej ma moyolkuepakan uan ma kiluikan Jehová ma kintlapojpolui.

15. ¿Ken uelis san sekan yetos tlanechikol uan ika yolseuilistli?

¹⁵ Tlanechikol tlen okatka itech altepetl Corinto okipiaya okse ouijkayotl. Sekimej okinuikayaj inmikniuan inmixpan tekiuajkej. Pablo okinmilui: “Okachi kuali xikijyowikah tlan amokuali nomechtoktiah” (1 Corintios 6:1-8). Itech ninmej tonalmej, sekimej tokniuan sepantlanemakaj uan kipoloaj intomin noso kimachiliaj okinkajkayajkej. Ik non, kinteluiaj inmixpan tekiuajkej. Tla ijkon panos, miakej kijtoskej tlen amo kuali itech Jehová uan ialtepe. Noijki yetos ouijkayotl itech tlanechikol. ITlajtol toTajtsin Dios kijtoa ma tikpiakan yolseuilistli iuan tokniuan maski tikpoloskej tomin ^[2] (xikita nota kanin tlami tlamachtil). Jesús okijto ken moneki tikyektlaliskej se ouijkayotl (xiktlajtolti Mateo 5:23, 24 uan 18:15-17). Ma tikchiuakan tlen okijto uan ijkon tlanechikol san sekan yetos uan ika yolseuilistli.

16. ¿Tleka san sekan katej itekipanojkauan toTajtsin Dios?

¹⁶ Biblia kijtoa: “¡Xikitakan! ¡Sapanoa kuali uan teyolpaktia san sekan ma yetokan tokniuan!” (Salmo 133:1). Israelitas san sekan okatkaj  uan otekitiayaj ijkuak okitlakamatiayaj Jehová. Jehová okijto ken yetoskiaj itekipanojkauan: “San sekan nikintlalis ijtik corral ken ichkamej” (Miqueas 2:12). Jehová noijki okijto itekipanojkauan san sekan yetoskiaj pampa momachtiskiaj tlen melauak itech Biblia. Okijto: “Nikinpatilis intlajtol altepemej ika tlajtoli chipauak, uan ijkon nochtin kijtoskej itoka Jehová, pampa san sekan kitekichiuiliskej” (Sofonías 3:9). ¡Melauak timotlasojkamatij pampa san sekan tikueyichiuaj Jehová!

17. ¿Tlen moneki kichiuaskej tlayekankej tla ikaj tlajtlakolchiua?

¹⁷ Tla ikaj tlajtlakolchiua, moneki tlayekankej san niman ma kiyektlalikan ika tlasojtlalistli. Tlayekankej kimatij Jehová kineki ma kinmaluikan tokniuan pampa amo ma kinmijtlakokan akinmej tlajtlakolchiuaj. Ijkon san sekan yetos tlanechikol uan chipauak (Proverbios 15:3). Pablo okintlasojtlaya tokniuan tlen ochantiayaj itech altepetl Corinto. Ik non, okinyektlaliaya ijkuak omonekiaya. Uan tlayekankej san niman okichiuayaj tlen Pablo okinmiluiaya. ¿Ken tikmatij? Seki metstli satepan, Pablo okinmilui kuali okichijkej ijkuak okinmijkuilili okse carta. Ik non, tla se tokni “owalwetski itech tlajtlákoli” uan amo kita tlen kichijtok, tlayekankej moneki kiyektlaliskej ika tlasojtlalistli (Gálatas 6:1).

18. (1) ¿Ken okinpaleui tokniuan itech achto siglo ijkuak okitlakamatkej iTlajtol toTajtsin Dios? (2) ¿Tlen timomachtiskej chikome?

¹⁸ Itech achto siglo, tokniuan okitlakamatkej iTlajtol toTajtsin Dios, ik non, san sekan okatkaj tlanechikolmej, ika yolseuilistli uan chipauakej (1 Corintios 1:10; Efesios 4:11-13; 1 Pedro 3:8). Non okinpaleui tokniuan ma tetlapouikan “itech nochi n tlaltíkpaktli” (Colosenses 1:23). Axkan, tiitekipanojkauan toTajtsin Dios noijki san sekan titekitij uan titetlapouiaj itech nochi Tlaltikpak. Chikome tikitaskej tlen okachi kiteititia tiknekij tikueyichiuaskej akin Ueyi Tekiua Jehová uan tiktlakamatiskej iTlajtol (Salmo 71:15, 16).