1, 2. (1) ¿Tlen tetliokolil tikchiaj tikseliskej akinmej tiktekichiuiliaj Jehová? (2) ¿Tlen techpaleuis amo ma tikpolokan totetliokolil? (Xikita tlaixkopinal tlen ika peua tlamachtil).

IJKON ken tlatitlanil Pablo, tlapejpenalmej noijki kichiaj kiseliskej se tetliokolil ompa iluikak (Filip. 3:14). Yejuan tlanauatiskej iuan Jesús itech Tekiuajkayotl ompa iluikak uan kinpaleuiskej tlaltikpaktlakamej ayakmo ma kipiakan tlajtlakoli (Apoc. 20:6). ¡Melauak se kualtsin chialistli okinmakak Jehová! Uan akinmej moixmatij ken ichkamej kichiaj chantiskej itech Xochitlali, ik non, sapanoa yolpakij (2 Ped. 3:13).

² Pablo okinekiaya kinpaleuis tlapejpenalmej yolmelajkej ma kipiakan non tetliokolil, ik non, okinmilui: “Xiktlalikah nomotlachialis itech tlan onka ilwikak” (Col. 3:2). Omonekiaya kilnamiktoskej kiseliskej non tetliokolil ompa iluikak (Col. 1:4, 5). Maski tichantiskej iluikak noso Tlaltikpak, moneki ma  timokuayejyekokan itech tlen Jehová techiluia techmakas ijkon amo tikilkauaskej totetliokolil (1 Cor. 9:24).

3. ¿Tlen okinnejmachti Pablo tokniuan?

³ Pablo noijki okinnejmachti ikniuan tlen tlamantli uelis kintsakuiliskia para amo ma kiselikan non tetliokolil. Se neskayotl, okintlajkuilili akinmej ochantiayaj Colosas tlen amo melauak okichiuayaj ken Cristo uan okinekiayaj kitlakamatiskej Tlanauatil tlen okimakakej Moisés uan amo otlaneltokayaj itech Cristo (Col. 2:16-18). Noijki okintlapoui itech auilnemilistli, ouijkayotl tlen uelis kipiaskiaj iuan oksekimej tokniuan uan iuan inkalchanejkauan. Axkan ok onka nin ouijkayotl, ik non, tlen okijto Pablo uelis techpaleuis. Ma tikitakan seki tlamantli tlen Pablo okinnejmachti akinmej ochantiayaj Colosas.

4. ¿Tleka uelis techtsakuilis auilnemilistli para amo ma tikselikan totetliokolil?

⁴ Ijkuak Pablo otlanki okinmilnamikti ikniuan tlen tetliokolil kiseliskiaj, okijkuilo: “Xikpojpolokah tlan amo kuali kelewia nomokuerpo. Amaka mamokalakijtinemi iwan se non amo isiwa, nion manemi itech tlan pitsotik, nion mamotemaka imak tlan amokuali kelewia ikuerpo, nion makitlawelneki tomi” (Col. 3:5). Auilnemilistli uelis chikauak techyoltilanas uan uelis kichiuas ayakmo ma timouikakan iuan Jehová uan ayakmo ma tikpiakan se chialistli. Se tokni tlen opejki auilnemi uan satepan oksepa omokuepki itech tlanechikol, okijto sapanoa chikauak okiyoltilanki auilnemilistli uan amo ueli okikauaya hasta sapanoa otlajtlakolchi.

5. ¿Ken uelis timomaluiskej itech tlen amo kuali?

⁵ Moneki okachi timomaluiskej ijkuak tikatej kanin tikixnamikiskej non ouijkayotl uan tikmachiliskej amo uelis tiktlakamatiskej Jehová. Se neskayotl, ijkuak ikaj peua kipia inovio moneki motlapouiskej ken momaluiskej kox momakitskiskej, kox moixpipitsoskej uan tlen moneki kichiuaskej para amo inselti yetoskej (Prov. 22:3). Noijki sekimej tokniuan uelis kixnamikiskej nin ouijkayotl ijkuak yauij uejka tekititiuij iuan siuamej noso tlakamej (Prov. 2:10-12, 16). Tla se tonal ijkon techpanos, san niman ma tikijtokan tejuan tiiTlaixpantijkauan Jehová, ma tikteititikan tikpia kuali toyelis uan ma tikilnamiktokan sapanoa titlajyouiskej tla ikaj tiknonotsaskej. Uan moneki okachi timomaluiskej tla timoyolkokoaj noso tikatej toselti. Ijkuak ijkon tikatej uelis tikmachiliskej oksekimej techpatioitaj uan tiknekiskej inmiuan tiyetoskej. Uelis tiknekiskej ikaj ma techpatioita uan tikinseliskej akinmej ijkon kichiuaj. Tla ijkon techpanos, ma tikiluikan Jehová ma techpaleui uan noijki tokniuan uan ijkon tikseliskej totetliokolil (xiktlajtolti Salmo 34:18; Proverbios 13:20).

6. ¿Tlen moneki tikilnamiktoskej ijkuak tikpejpenaskej tlen ika timoyolpaktiskej?

⁶ Para tikixtopeuaskej auilnemilistli, amo ika ma timoyolpaktikan. Nochi tlen kitlaliaj ika ma timoyolpaktikan kichiuaj ken okichiuayaj itech altepetl Sodoma uan Gomorra (Jud. 7). Akinmej kiyekanaj nin tlamantli kichiuaj ma mota auilnemilistli amo tetlajyouiltia uan amo tlajtlakoli. Tejuan amo timokuayejyekoskej ken yejuan. Tla amo kuali tikpejpenaj tlen ika timoyolpaktiskej, uelis tikpoloskej totetliokolil (Prov. 4:23).

7. ¿Tlen ouijkayotl uelis yetos itech totlanechikol?

⁷ Tinochtin tikpatioitaj tipouij itech se tlanechikol. Ijkuak timonechikoaj, timomachtiaj iTlajtol toTajtsin Dios uan tinochtin timopaleuiaj ika tlasojtlalistli, non techpaleuia amo ma tikpolokan totetliokolil. Pero ualeua onka ouijkayotl tlen kichiua ma timokualanikan. Tla amo tikyektlaliskej non ouijkayotl, san tikilnamiktoskej tlen amo kuali otechchiuilijkej (xiktlajtolti 1 Pedro 3:8, 9).

8, 9. (1) ¿Tlen techpaleuis para tikseliskej totetliokolil? (2) ¿Ken uelis tiyetoskej ika yolseuilistli tla se tokni techyolkokos?

⁸ Tla san tikilnamiktokej tlen otechchiuilijkej, non kichiuas amo ma tikselikan totetliokolil. Ik non, ¿tlen uelis tikchiuaskej? Pablo okinmilui akinmej ochantiayaj Colosas: “Dios nomechtlasojtla iwa yonomechpéjpenki para xikmajmanakah ialtépeu yolchipawak, yika ximokemelokah ika nochi tlan nomechpalewis iwa xiteiknomatikah, xiktechiwilikah tlan kuali, ximotsikitsintilikah, xiyetokah nonyolyamankeh iwa xitexikokah. Xitexikokah iwa ximotlapojpolwikah. Iwa tla se nomokni onomechchiwili itla amo kuali, xiktlapojpolwikah, ijkó kemi Cristo onomechtlapojpolwi. Iwa tlan okachi ipati, iwa weyi kijtosneki: ximotlasojtlakah iwan oksikimeh, porke n tlasojtlálistli, ye tlan techyekseitilia” (Col. 3:12-14).

⁹ Tla timotlasojtlaj, techpaleuis ma timotlapojpoluikan. Se neskayotl, tla techyolkokoa tlen otechchiuilijkej noso itlaj otechiluijkej, ma tikilnamikikan tejuan noijki itlaj otikchijkej noso otikijtojkej tlen oksekimej okinkualani. Tikintlasojkamatiliaj tokniuan porque kilkauaj tlen amo kuali tikinchiuiliaj (xiktlajtolti Eclesiastés 7:21, 22). Noijki tiktlasojkamatiliaj Jesús porque techsetilia akinmej tikueyichiuaj toTajtsin Dios (Col. 3:15). Tinochtin tiktlasojtlaj san se toTajtsin Dios, tinochtin titetlapouiaj itech iTekiuajkayo uan tinochtin tikpiaj ouijkayotl. Tla tikintlasojtlaj tokniuan uan tikintlapojpoluiaj, san sekan tiyetoskej uan tikseliskej yolilistli tlen amo keman tlamis.

10, 11. (1) ¿Tleka amo kuali ma tichauatikan? (2) ¿Tlen uelis tikchiuaskej para amo tichauatiskej uan ijkon tikseliskej totetliokolil?

¹⁰ Uelis tikpoloskej totetliokolil tla tichauatij. Biblia tlajtoa itech akinmej ochauatikej. Caín ochauatiaya, ik non, okimikti ikni tlen omotokayotiaya Abel. Coré, Datán uan Abiram noijki okichauatilijkej Moisés uan okixnamikej. Ueyi tekiua Saúl noijki okichauatili David, ik non, okinekiaya kimiktis. Ik non, Biblia kijtoa: “Kan onka nexikólistli iwa tlanetéwili, ompa xejxelitokeh iwa onka nochi tlan amokuali” (Sant. 3:16).

¹¹ Para amo tichauatiskej moneki titetlasojtlaskej ika nochi toyolo. Ijkon kijtoa iTlajtol toTajtsin Dios: “Akin tetlasojtla, kimati texikoa; semi yolyámanki iwa amo xikojmiki; amo xankuatl” (1 Cor. 13:4). Para amo titenexikolitaskej, moneki timokuayejyekoskej ken Jehová. Moneki ma tikinmajsikamatikan tokniuan akinmej pouij itech tlanechikol. Biblia kijtoa: “Iwa tla se tokxi noso se toma okachi tikmokuitlawiah, nochi tokuerpo mokawa ika pakílistli” (1 Cor. 12:16-18, 26). Ik non, amo ma tichauatikan, okachi kuali, ma tiyolpakikan ijkuak oksekimej itlaj kuali kiseliaj. Ma tikilnamikikan  Jonatán, ikone Saúl. Ye amo ochauatik ijkuak Jehová okipejpenki David para yetoskia ueyi tekiua. Okachi kuali, okipaleui David, okiyolchika uan okitlasojtlaya (1 Sam. 23:16-18). ¿Uelis tikchiuaskej ken Jonatán?

12. ¿Tlen kinpaleuis tokalchanejkauan para ma kiselikan tetliokolil?

¹² Tla timoyekanaj ika principios bíblicos, tokalchanejkauan kipiaskej yolseuilistli, yolpakiskej uan techpaleuis ma tikselikan tetliokolil. ¿Tlen okinmilui Pablo tokniuan tlen ochantiayaj Colosas? Okinmilui: “Siwameh, xiktlakitakah nomookich, porke ijkó moneki kichiwaskeh akimeh kitlakitah Dios. Tlakah, xiktlasojtlakah nomosiwa iwa amo san xikinmajwatokah. Tepilwah, xikintlakitakah nomotajwah porke ijkó kipaktia n Toteko. Tetajmeh, amo xikinkuakualanikah nomopilwah, para amo mamosojsotlawakah” (Col. 3:18-21). Uelis tejuatsin noijki timokuayejyekoa ninmej tlanojnotsalmej kinpaleuia akinmej yomonamiktijkej uan konemej.

13. ¿Ken uelis kichiuas se tokni inamik ma kitekichiuili Jehová?

 ¹³ Tla se tokni inamik amo kitekichiuilia Jehová, ¿tlen kichiuas tla amo kitlakaita ken moneki? ¿Kipaleuis tla iuan mokualanis uan kinanankilis? ¿Kitekichiuilis Jehová tla kichiuas ma kitlakamati inamik? Amo. Okachi kipaleuis tla kitlakamati inamik ye kinyekana ikalchanejkauan. Ikalchanejkauan yetoskej ika yolseuilistli, kiueyichiuas Jehová uan uelis hasta kinekis inamik kitekichiuilis Jehová. Uan non kinpaleuis ma kiselikan intetliokolil (xiktlajtolti 1 Pedro 3:1, 2).

14. ¿Tlen kichiuas se tokni tla isiua amo kitlakaita?

¹⁴ Tla se tokni isiua amo kitekichiuilia Jehová uan amo kitlakaita, ¿kipaleuis tla san kitsatsajtsilia para ma kimati san ye tlanauatia ikalijtik? Amo. Jehová kineki ma kichiua ken Jesús uan ma kitlasojtla inamik (Efes. 5:23). Jesús kinauatia tlanechikol ika tlasojtlalistli uan noijki ye yolyamanki (Luc. 9:46-48). Tla tikchiuas ken Jesús, uelis satepan mosiua noijki kinekis kitekichiuilis Jehová.

15. ¿Ken kiteititia se tokni kitlasojtla isiua?

¹⁵ Jehová ijkin kinmiluia: “Tlakah, xiktlasojtlakah nomosiwa iwa amo san xikinmajwatokah” (Col. 3:19). Akin kitlasojtla isiua kikaki tlen mokuayejyekoa uan kipatioita tlen kijtoa (1 Ped. 3:7). Maski amo nochipa kichiuas tlen tikiluis, xiktlajtlani tlen mokuayejyekoa uan non mitspaleuis kuali xikpejpena tlen tikchiuas (Prov. 15:22). Akin kitlasojtla inamik, amo kiluia ma kitlakaita, okachi kuali, kimotlanilia. Akin kitlasojtla inamik uan ikoneuan, uelis kinekiskej kitekichiuiliskej Jehová ika pakilistli uan kipiaskej yolilistli tlen amo keman tlamis.

16, 17. ¿Tlen uelis tikchiuas para amo timokualanis iuan motatajuan?

¹⁶ Tla motatajuan iTlaixpantijkauan Jehová, uelis timokuayejyekoa amo mitsajsikamatij noso sapanoa mitsmaluiaj. Uelis tikijtos kox melauak okachi kuali tiktekichiuilis Jehová. Pero tla tikkauas Jehová, tikitas san motatajuan uan tokniuan melauak motech motekipachoskej.

¹⁷ Tla motatajuan amo keman itlaj mitsiluiskej, ¿kiteititiskej melauak mitstlasojtlaj? (Heb. 12:8). Motatajuan noijki tlajtlakolejkej pero tla mitsyektlaliaj, non mitspaleuis maski ok titsikitsin. Amo san xikita ken mitsyektlaliaj. Ximokuayejyeko tleka ijkon kichiuaj uan tlen mitsiluiaj uan amo san niman xikualani. ITlajtol toTajtsin Dios kijtoa: “Se tlakatl ixtlamatki amo sapanoa tlajtoa uan akin kuali mokuayejyekoa kipia yolseuilistli” (Prov. 17:27). Ximochijchikaua kuali timokuayejyekos, xikkaki tlen mitsnauatiaj uan amo san xikita ken mitstlapouiaj motatajuan (Prov. 1:8). Amo keman xikilkaua motatajuan kitlasojtlaj Jehová uan kinekij mitspaleuiskej xikpia yolilistli tlen amo keman tlamis.

18. ¿Tleka tikijtoa tikchixtos motetliokolil?

¹⁸ Tinochtin uelis tikseliskej totetliokolil maski tichantiskej iluikak noso Tlaltikpak. Nin melauak mochiuas porque ineuian Jehová okijto. Uan Jehová kijtoa: “Tlaltikpak tentos ika itlamatilis” (Is. 11:9). Nochtin akinmej chantiskej itech Tlaltikpak Jehová kinmachtis. Melauak miak ipati tla timochijchikauaj para tikseliskej totetliokolil. Ik non, amo ma tikilkauakan tlen Jehová yokijto kichiuas. Amo ikaj ma techtsakuili para amo tikseliskej totetliokolil.