1, 2. Xikijto tlen tikajsikamatij ijkuak okachi mochikajti totlaneltokilis.

IJKUAK se chokotsin itlaj kitliokoliaj, itatajuan kiluiaj ma motlasojkamati uan chokotsin motlasojkamatilia maski amo okinekiaya. Ijkuak moskaltijti kajsikamati tleka moneki motlasojkamatis. Noijki ayakmo moneki ikaj kiluis ma motlasojkamati porque yikimati itech iyolo kisas ma motlasojkamati. ¿Tleka okipatlak iyelis? Porque yikichiua tlen okimachtijkej itatajuan.

² Noijki ijkon techpanoa ijkuak peua timomachtiaj Biblia uan tikajsikamatij miak ipati tikintlakamatiskej itlanauatiluan Jehová. Ijkuak okachi mochikajti totlaneltokilis tikajsikamatij ken mokuayejyekoa toTajtsin Dios. Noijki tikmatij tlen kipaktia uan tlen amo kipaktia. Tikchiuaj nochi tlen kipaktia Jehová uan noijki kuali tikpejpenaj tlen tikchiuaj. Ijkon tikteititiaj timokuayejyekoaj ken toTajtsin Dios.

3. ¿Tleka ualeua oui timokuayejyekoskej ken Jehová?

³ Techpaktia timokuayejyekoskej ken Jehová pero ualeua oui porque titlajtlakolejkej. Ualeua amo kuali  tikajsikamatij tleka toTajtsin Dios techiluia amo ma tikchiuakan tlen amo kuali uan amo ma tiktemokan miak tlamantli. Noijki tleka miak ipati titetlapouiskej uan ken moneki tiktekitiltiskej estli. ¿Tlen techpaleuis ma timokuayejyekojtokan ken toTajtsin Dios? ¿Ken techpaleuis axkan uan satepan?

4. ¿Tlen kijtosneki tikpatlaskej ken timokuayejyekoaj?

⁴ (Xiktlajtolti Romanos 12:2). Tlatitlanil Pablo okijto tlen moneki tikchiuaskej tla tiknekij timokuayejyekoskej ken toTajtsin Dios. Itech okse tlamachtil otikitakej tlen tikchiuaskej para ayakmo timokuayejyekoskej ken akinmej amo kitekichiuiliaj Jehová. Noijki otikitakej ken uelis tikpatlaskej tlen timokuayejyekoaj. Pero tla tiknekij timokuayejyekoskej ken toTajtsin Dios, moneki timomachtiskej Biblia uan ijkon tikmatiskej tlen mokuayejyekoa.

5. ¿Tlen kijtosneki timomachtiskej?

⁵ Pero ijkuak timomachtiskej, amo san moneki totoka tiktlajtoltiskej uan tiktlapaluiskej tlen titlanankiliskej. Moneki kuali tikitaskej tlen techmachtia itech Jehová, ken mokuayejyekoa uan tlen kichiua. Ma tikajsikamatikan tleka techiluia ma tikchiuakan seki tlamantli uan tleka okseki tlamantli amo kipaktia. Noijki moneki ma tikitakan tlen okachi kuali timokuayejyekoskej uan tlen tikpatlaskej itech tonemilis. Xamo amo uelis nochi timokuayejyekoskej. Pero ijkuak timomachtiskej moneki okachi timokuayejyekoskej (Sal. 119:97; 1 Tim. 4:15).

6. ¿Ken techpaleuis tla timokuayejyekoskej itech iTlajtol toTajtsin Dios?

⁶ Sapanoa techpaleuis tla timokuayejyekoskej itech iTlajtol toTajtsin Dios. Toneuian tikitaskej Jehová sapanoa kuali mokuayejyekoa porque ye amo tlajtlakole. Ijkon timokuayejyekoskej ken ye uan tikchiuaskej tlen ye kineki. Non techpaleuis ayakmo ma timokuayejyekokan ken akinmej amo kitekichiuiliaj Jehová. Yolik timokuayejyekojtiaskej ken Jehová.

7. ¿Tlen okachi kipatioita Jehová?

⁷ Tlen timokuayejyekoaj mota ika tlen tikchiuaj (Mar. 7:21-23; Sant. 2:17). Ma tikitakan seki tlamantli uan ijkon tikajsikamatiskej tleka ijkon tikijtoaj. Jehová okipejpenki María uan José para ma kiskaltikan iKone maski ye okimatiaya amo okipiayaj tomin. Nin techititia Jehová amo kitekipachoa tomin (Lev. 12:8; Luc. 2:24). Biblia kijtoa ijkuak oneski Jesús, María “okitekak itech se kajo non okipiaya sakatl non ompa otlakuayah n yolkameh. Ompa otlákatki n konetl porke ayakmó [okatka] lojar itech kali kan tekalotiah” (Luc. 2:7). Tla Jehová kinekiskia uelis kichiuaskia ma nesi iKone itech se kali kuajkualtsin. Pero Jehová okinekiaya ma moskalti kanin okipatioitayaj kitekichiuiliskej.

8. ¿Tlen okachi tikpatioitaskej tla timokuayejyekoaj ken Jehová?

⁸ Nin tlamantli techititia Jehová  amo kitekipachoa tomin. Sekimej tetajmej kinekij inkoneuan ma kipiakan miak tlamantli maski amo okachi ma kitekichiuilikan Jehová. Pero Jehová okachi kipatioita iuan ma timouikakan. Pero ¿tejuan timokuayejyekoaj ken toTajtsin Dios? ¿Tikteititiaj ika tlen tikchiuaj? (Xiktlajtolti Hebreos 13:5).

9, 10. ¿Ken tikteititiskej amo tikchiuaj ma tlajtlakolchiuakan oksekimej noso ayakmo ma kitekichiuilikan Jehová?

⁹ Ma tikitakan okse tlamantli. Ijkuak tikchiuaj ma tlajtlakolchiuakan oksekimej noso ayakmo ma kitekichiuilikan Jehová. Jesús okijto: “Akin kitoktis matlajtlakolchiwa se akin nechneltoka, okachi kuali makikechilpilikah se weyi tetl iwa makontlamotlakah ijtik weyi atl” (Mar. 9:42). Jesús amo kajauilmati nin tlamantli. Jesús kiteititia iyelis iTajtsin, ik non, Jehová noijki amo kuali kita ijkuak tikchiuaj ikaj ma tlajtlakolchiua noso ayakmo ma kitekichiuili (Juan 14:9).

¹⁰ ¿Noijki timokuayejyekoaj ken Jehová uan Jesús? ¿Tlen kiteititia tlen tikchiuaj? Ma tikijtokan timotlakentiaj ken tejuan techpaktia. Pero ¿tlen tikchiuaskej tla tokniuan amo kinpaktia noso mokuayejyekoaj tlen pitsotik? ¿Ayakmo ijkon timotlakentiskej tla tikintlasojtlaj? (1 Tim. 2:9, 10, TNM).

11, 12. ¿Ken techpaleuis tla kitaskej tlajtlakoli ken Jehová kita?

¹¹ Ma tikitakan okse tlamantli. Jehová amo kipaktia ma tikchiuakan tlen amo kuali (Is. 61:8). Jehová kimati titlajtlakolejkej pero technauatia ma tikixtopeuakan tlen amo kuali porque ye amo kipaktia (xiktlajtolti Salmo 97:10). Ma timokuayejyekokan tleka Jehová amo kipaktia tlen amo kuali. Non techpaleuis ma timokuayejyekokan ken ye uan techpaleuis ma tikixtopeuakan tlen amo kuali.

¹² Tla timokuayejyekoskej ken Jehová, techpaleuis kuali ma tikitakan okseki tlamantli. Techpaleuis kuali tikitakan okseki tlamantli tlen amo moijtoa itech Biblia. Axkan okachi miakej mijtotiaj lap dancing. Miakej kijtoaj amo tlajtlakoli ijkon mijtotiskej porque amo auilnemij. * Pero ¿ken kita Jehová? Ma tikilnamiktokan Jehová amo kipaktia tlen amo kuali. Ik non, ma tikixtopeuakan nin tlamantli (Rom. 12:9).

13. ¿Tleka moneki axkan ma timokuayejyekokan tlen tikchiuaskej ijkuak tikixnamikiskej ouijkayotl?

¹³ Ijkuak timomachtiskej, ma timokuayejyekokan ken kita seki tlamantli Jehová porque non techpaleuis kuali ma tikpejpenakan tlen tikchiuaskej. Non techpaleuis san niman ma tikmatikan tlen tikchiuaskej ijkuak tikixnamikiskej ouijkayotl (Prov. 22:3). Ma tikitakan tlen okichijkej itekipanojkauan toTajtsin Dios.

14. ¿Tlen techmachtia tlen okichi José?

¹⁴ Ma tikitakan tlen okipanok José. Isiua Potifar okinekiaya motekas iuan José.  Pero san niman ocholo. Ijkon okichi porque ye yokimatiaya toTajtsin Dios amo kipaktia ma mokajkayauakan akinmej yomonamiktijkej (xiktlajtolti Génesis 39:8, 9). Ma tikitakan tlen okilui isiua Potifar: “¿Ken uelis nikchiuas nin tlamantli sapanoa amo kuali uan nitlajtlakolchiuas ixpan toTajtsin Dios?”. Nin kiteititia José omokuayejyekoaya ken Jehová. Axkan ma tikijtokan se tlakatl tlen iuan titekipanoaj techuelita uan techtitlanilia mensajes noso fotos kanin mota auilnemij. * Tikmatiskej tlen tikchiuaskej tla yotimokuayejyekojkej ken kita Jehová auilnemilistli. Ijkon tikteititiskej timokuayejyekoaj ken ye.

15. ¿Ken uelis tiyetoskej tiyolmelajkej ixpan Jehová ken Sadrac, Mesac uan Abednego?

¹⁵ Ma tikitakan tlen okichi Sadrac, Mesac uan Abednego. Tekiua Nabucodonosor otlanauati ma kichijchiuakan se imagen ika oro uan otlanauati ixpan ma motlankuaketsakan. Pero ninmej eyi telpokamej amo ijkon okichijkej. Yejuan okimatiayaj tlen kijtosneki yetoskej yolmelajkej ixpan Jehová (Éx. 20:4, 5; Dan. 3:4-6, 12, 16-18). Ma tikijtokan kanin titekipanoaj techtlajtlaniliaj tomin para iluichiuaskej. ¿Tlen tikchiuaskej? Moneki axkan ma timokuayejyekokan tlen tikchiuaskej tla ijkon techpanos. Non techpaleuis ma tikmatikan tlen tikchiuaskej ijkon ken okichi Sadrac, Mesac uan Abednego.

16. ¿Tlen moneki achto tikchiuaskej tla itlaj techpanos uan monekis techuikaskej hospital?

¹⁶ Tla timokuayejyekoaj ken Jehová, noijki techpaleuis ijkuak itlaj techpanos uan monekis techuikaskej hospital. Yitikmatij amo tikseliaj estli nion naui tlamantli tlen kipia estli (Hech. 15:28, 29). Pero moneki tikpejpenaskej kox tikinkauiliskej tepajtijkej ma kitekitiltikan toeso. Ik non, moneki timoyekanaskej ika principios bíblicos tlen kiteititiaj  ken mokuayejyekoa Jehová. Pero axkan moneki tikpejpenaskej tlen tikchiuaskej, amo ijkuak tiyetoskej hospital. Axkan moneki tikintemoskej amatlajkuilolmej tlen tlajtoaj itech estli uan ma tiktemitikan amatl (DPA) tlen kitlajtlanij tekiuajkej uan kanin tikijtoaj amo tikseliaj estli. *

17-19. Xikijto ken techpaleuia tla axkan tikitaskej ken mokuayejyekoa Jehová.

¹⁷ Axkan ma timokuayejyekokan tleka Pedro okilui Jesús: “¡Noteko, amo Dios makimonekilti! ¡Ayik ijkó ximochiwa!”. Jesús yokimatiaya ken mokuayejyekoa toTajtsin Dios uan yokimatiaya tlen profecías mochiuaskiaj ijkuak yetoskia nikan tlaltikpak uan ijkuak kimiktiskiaj. Nin okipaleui ma yeto yolmelajki ixpan Jehová uan topatka omotemakak (xiktlajtolti Mateo 16:21-23).

¹⁸ ToTajtsin Dios kineki iuan ma timouikakan uan okachi ma titetlapouikan (Mat. 6:33; 28:19, 20; Sant. 4:8). Pero xamo sekimej techiluiaj ken Pedro okilui Jesús. Ma tikijtokan kanin titekipanoaj, kinekij techmakaskej okse tekitl uan okachi techtlaxtlauiskej. Pero nin amo techkauilis ma tiktekichiuilikan Jehová. Noso tla titelpochtli noso tiichpochtli xamo mitsiluiaj okachi ximomachti pero moneki oksekan tichantiti. ¿Tikitaskej tlen tikchiuaskej ijkuak ijkon techpanos? Moneki axkan tikitaskej ken mokuayejyekoa toTajtsin Dios itech non tlamantli. Ijkon tikmatiskej tlen tikchiuaskej ijkuak ijkon techpanos. Porque yitikmatij ken mokuayejyekoa Jehová uan tikilnamiktoskej ye tiktekichiuiliskej.

¹⁹ Ualeua itlaj tikixnamikij uan moneki tikteititiskej kox tiyolmelajkej ixpan Jehová. Amo nochi uelis tikmatiskej. Pero tla timomachtiaj uan timokuayejyekoaj ken Jehová, tikilnamiktoskej tlen timomachtiaj uan tikmatiskej tlen tikchiuaskej ijkuak itlaj techpanos. Ik non, ma timochijchikauakan ma tikmatikan ken mokuayejyekoa Jehová uan ma tikchiuakan ken ye. Nin techpaleuis ma tikpejpenakan tlen tikchiuaskej axkan uan satepan.

20, 21. (1) ¿Tleka amo tikchiuaskej nochi tlen tiknekiskej ijkuak tiyetoskej itech xochitlali? (2) ¿Tleka uelis axkan tiyolpakiskej?

²⁰ Akinmej tichantiskej itech tlaltikpak, yitiknekij tiyetoskej itech xochitlali. ITekiuajkayo toTajtsin Dios kichiuas ayakmo ma titlajyouikan. Pero ijkuak tiyetoskej itech xochitlali ok tikpejpenaskej tlen tikchiuaskej uan noijki tlen techpaktia.

²¹ Pero nin amo kijtosneki tikchiuaskej nochi tlen tejuan tiknekiskej. Yolkualmej tlen chantiskej itech xochitlali ok kintlakamatiskej itlanauatiluan Jehová uan ok mokuayejyekoskej ken ye ijkuak kipejpenaskej tlen kichiuaskej. Ik non, sapanoa yolpakiskej uan kipiaskej yolseuilistli (Sal. 37:11). Pero tiyolpakiskej tla axkan timokuayejyekoskej ken Jehová.