1-3. (1) Xikijto tlen amo tikchiuaskej tla tikpatioitaj tlen tlamachtia Biblia. (Xikinmita dibujos kanin peua tlamachtil). (2) ¿Tlen tlajtlanilmej tikinnankiliskej?

AXKAN miakej tlakouaj uan satepan ayakmo kinpaktia uan oksepa yauij kikauatiuij. Noijki akinmej motlakouiaj itech Internet tla amo kinpaktia noijki kikuepaj. Ijkon kichiuaj porque xamo amo kuali okiski noso ayakmo okipakti. Ualeua kitlajtlanij okse tlamantli noso kitlajtlanij ma kinkuepilikan intomin.

² Pero tejuan tiknekij nochipa tikpatioitaskej tlen tlamachtia Biblia uan amo keman tiknekij tikkauaskej (1 Tim. 2:4; xiktlajtolti Proverbios 23:23). Itech okse tlamachtil otikitakej moneki timajxiliskej uan ijkon tikmatiskej tlen tlamachtia Biblia. Xamo sekimej ayakmo omomachtijkej tlen kinpaleuiskia ma kipiakan miak tomin noso inkalchanejkauan amo okinpakti ma momachtikan Biblia. Oksekimej okipatlakej ken omokuayejyekoayaj uan tlen okichiuayaj. Oksekimej ayakmo okichijkej costumbres uan iluimej  tlen amo kipaktia toTajtsin Dios. Tinochtin otikkajkej miak tlamantli pero toTajtsin Dios sapanoa techteochiua.

³ Jesús okiteititi miak ipati tlen tlamachtia Biblia itech Tekiuajkayotl ijkuak otlajto itech se tlasemanki tlen okintemoaya perlas. Ijkuak okitak se perla sapanoa miak ipati, san niman omotlanemaki uan okiko (Mat. 13:45, 46). Noijki tejuan otikkajkej miak tlamantli ijkuak otikmatkej tlen tlamachtia Biblia itech Tekiuajkayotl. Nochipa tiktemoskej porque sapanoa tikpatioitaj nin tlamantli. Miakej itekipanojkauan toTajtsin Dios ayakmo kitemoaj tlen tlamachtia Biblia uan kikauaj. Pero tejuan amo keman ijkon ma tikchiuakan. Nochipa ‘matikmopantikah itlajtol Dios non milák’ (xiktlajtolti 3 Juan 2-4). Nin kijtosneki nochipa tiktlakamatiskej tlen kijtoa iTlajtol toTajtsin Dios uan nochipa tikchiuaskej. Itech nin tlamachtil tikinnankiliskej ninmej tlajtlanilmej: “¿Tleka sekimej okikajkej tlen tlamachtia Biblia uan ken okichijkej? ¿Tlen techpaleuis amo ijkon ma tikchiuakan? ¿Tlen techpaleuis nochipa ma tiktemojtokan tlen tlamachtia Biblia?”.

4. ¿Tleka itech achto siglo sekimej ayakmo okipatioitakej tlen tlamachtia Biblia?

⁴ Itech achto siglo sekimej okiselijkej tlen otlamachtiaya Jesús pero satepan okikajkej. Se tonal, Jesús okichi se milagro ijkuak okintlamakak tlen iuan oyayaj. Satepan, opanokej iuan Jesús itempa aueyatl Galilea. Pero ompa Jesús okintlajtlachialti ijkuak okinmilui: “Tla nomejwah amo nonkikuaskeh nokuerpo, Ne non onimochi ni tlakatl, iwa tla amo nonkoniskeh noesso, amo [nan]kipiah yolílistli”. Amo okitlajtlanijkej tleka ijkon okinmilui uan okijtojkej: “Nin tlamachtílistli kema chikawak, ¿akin weletis kajsikamatis?”. Satepan “miakeh itlamachtijkawah n Jesús okikakajtejkeh iwa ayakmó onemiah íwa” (Juan 6:53-66).

5. ¿Tleka sekimej okikajkej tlen tlamachtia Biblia?

⁵ Axkan sekimej kikauaj tlen tlamachtia Biblia. Sekimej okikajkej porque amo okinpakti ijkuak otechyekiluijkej se texto noso se tokni itlaj amo kuali okichi uan amo okinpakti. Oksekimej omoyolkokojkej porque okinnojnotskej noso omokualanijkej iuan se tokni. Sekimej xamo opejki mouikaj iuan akinmej yomoxelojkej itech Jehová. Nochtin yejuan omoxelojkej itech Jehová uan itech tlanechikol (Heb. 3:12-14). Omonekiaya tlaneltokaskej itech Jesús ken okichi Pedro. Ijkuak Jesús okinmilui kox okinekiayaj yaskej, Pedro okinankili: “Noteko, ¿Akin ok se íwa tiaskeh? Sanwel Tejwatsi tikpia non tlájtoli non kitemaka yolílistli non ayik tlami” (Juan 6:67-69).

6. ¿Tleka sekimej amo kitaj ken kikauaj tlen tlamachtia Biblia?

⁶ Oksekimej yolik kikauaj tlen tlamachtia Biblia uan amo kitaj ken kichiuaj. Biblia kijtoa ken se barco tlen amo kimatij kanin ik kiuikaskej (Heb. 2:1). Akinmej kikauaj tlen tlamachtia Biblia, amo kitaj ayakmo kuali mouikaj iuan Jehová. ¿Tlen tikchiuaskej para amo ijkon techpanos?

7. ¿Tlen techpaleuis amo ma tikkauakan tlen tlamachtia Biblia?

⁷ Moneki ma tikchiuakan nochi tlen Jehová techmachtia uan ma timoyekanakan ika principios bíblicos. Se tonal, David okilui Jehová: “Nikchiuas tlen tikneki” (Sal. 86:11). Tejuan noijki moneki nochipa ma tikchiuakan tlen tlamachtia Biblia ijkon ken David okichi. Tla amo ijkon tikchiuaskej, xamo timokuayejyekoskej otikkajkej miak tlamantli para tiktemoskej tlen tlamachtia Biblia uan oksepa tiknekiskej tikpiaskej tlen otechpaktiaya. Pero amo keman ijkon ma tikchiuakan. Porque amo uelis tikijtoskej tlen kuali uan tlen amo kuali tlamachtia Biblia. Moneki nochipa tiktemoskej “nochi tlan milák” (Juan 16:13). Itech okse tlamachtil otikitakej makuili tlamantli tlen otikkajkej porque opejki timomachtiaj Biblia. Axkan tikitaskej tlen tikchiuaskej para amo oksepa tiktemoskej tlen otikkajkej (Mat. 6:19).

8. Xikijto ken uelis peuas tikkauaskej tlen tlamachtia Biblia.

⁸ Moneki timajxiliskej. Amo san ma timotonalpolokan tla tiknekij nochipa tiktemoskej tlen tlamachtia Biblia. Tla amo timomaluiskej xamo san timoyolpaktiskej, san tiknekiskej tikchiuaskej tlen techpaktia noso san titlachixtoskej itech Internet noso san tikitaskej televisión. Nin tlamantli amo kijtosneki sepa amo ma tikchiuakan. Pero tla san tikchijtoskej non tlamantli ayakmo timajxiliskej timomachtiskej nion titetlapouiskej. Ma tikitakan tlen okipanok se tokni itoka Emma. * Ijkuak okatka takotsin okipaktiaya nemis ipan caballo. Nochipa ijkon okichiuaya ijkuak omajxiliaya. Pero satepan okitak amo kuali tlen okichijtoka uan okipatlak seki tlamantli. Noijki okipaleui tlen okipanok se tokni itoka Cory Wells. Ye noijki onemiaya ipan caballos uan okichiuaya miak tlamantli. * Axkan Emma okachi majxilia kitekichiuilis Jehová uan majxilia yetos iuan ikalchanejkauan uan akinmej iuan mouika. Okachi kuali mouika iuan Jehová uan itlalnamikilis amo kikuejsoa porque kimati kitekichiuilia Jehová.

9. ¿Tleka moneki timomaluiskej amo tiktemoskej miak tlamantli?

⁹ Ayakmo tiktemoskej okseki tlamantli. Amo ma tiktemokan miak tlamantli tla tiknekij tiktemojtoskej tlen tlamachtia Biblia. Ijkuak opejki timomachtiaj Biblia ayakmo otikpatioitayaj tikpiaskej miak tlamantli. Otikkajkej non tlamantli porque otikajsikamatkej okachi miak ipati tiktekichiuiliskej Jehová. Pero xamo tikitaj miakej kimokouiaj tlen okachi yankuik uan xamo timokuayejyekoaj tejuan noijki uelis ijkon tikchiuaskej. Tikkauaskej tlen tlamachtia Biblia tla ayakmo tiyolpakij ika tlen tikpiaj. Ijkon okipanok Demas. Ye okachi “okiyoltilanki tlan onka itech nin tlaltíkpaktli” uan ayakmo oyajki otetlapouito iuan Pablo (2 Tim. 4:10). Biblia amo kijtoa kox Demas  amo okipatioitaya kitekichiuilis toTajtsin Dios noso ayakmo okinek yas iuan Pablo. Amo ma tikijtokan oksepa tiktemoskej tikpiaskej miak tlamantli porque tlamo ayakmo tikpatioitaskej tlen tlamachtia Biblia.

10. ¿Tleka amo ma tikchiuakan tlen oksekimej kinekij?

¹⁰ Ualeua ayakmo kuali timouikaj iuan tokalchanejkauan. Amo ma tikchiuakan tlen oksekimej kinekij ma tikchiuakan porque tlamo ayakmo tiktemoskej tlen tlamachtia Biblia. Ik non, ayakmo kuali timouikaj iuan tokalchanejkauan uan toyolikniuan ijkuak opejki timomachtiaj Biblia porque amo okinpakti. Sekimej kitlakaitaj tlen tikneltokaj pero oksekimej amo (1 Ped. 4:4). Timochijchikauaj kuali timouikaskej iuan tokalchanejkauan. Pero moneki tiktlakamatiskej Jehová uan amo tikchiuaskej tlen tokalchanejkauan kinekij. Porque 1 Corintios 15:33 kijtoa amo ma timouikakan iuan akinmej amo kitlasojtlaj Jehová.

11. ¿Tlen techpaleuis amo oksepa ma timokuayejyekokan tlen amo kuali nion tlen achto otikchiuayaj?

¹¹ Axkan kuali timokuayejyekoaj uan ayakmo tikchiuaj tlen amo kuali. Moneki yetoskej santos akinmej kitemoaj tlen tlamachtia Biblia (Is. 35:8; xiktlajtolti 1 Pedro 1:14-16). Tinochtin otikpatlakej miak tlamantli ijkuak opejki timomachtiaj Biblia. Sekimej sepa omopatlak innemilis. Pero amo oksepa ma tikchiuakan tlen amo kuali otikchiuayaj. ¿Tlen techpaleuis amo oksepa ijkon ma tikchiuakan? Ma tikilnamikikan Jehová okitemakak iKone para ma tiyetokan tisantos (1 Ped. 1:18, 19). Nochipa ma tikilnamiktokan sapanoa miak ipati Jesús omotemakak para ma tiyetokan tichipauakej ixpan Jehová.

12. ¿Tleka miak ipati ma tikilnamiktokan tlen mokuayejyekoaj Jehová?

¹² Costumbres uan iluimej tlen amo kipaktia toTajtsin Dios. Xamo tokalchanejkauan noso akinmej inmiuan titekipanoaj techiluiskej inmiuan ma tiiluichiuakan. ¿Tlen techpaleuis amo ma tikchiuakan tlen toTajtsin Dios amo kipaktia? Ma tikilnamiktokan tleka Jehová amo kipaktia. Noijki moneki ma tikinmojpauikan amatlajkuilolmej kanin kijtoaj kanin kisaj iluimej. Non techpaleuis ma tikilnamiktokan tleka amo tiiluichiuaj uan noijki techpaleuis ma tikchiuakan tlen kipaktia toTajtsin Dios (Efes. 5:10). Noijki amo timomojtiskej tla titlaneltokaj itech Jehová uan itech iTlajtol (Prov. 29:25).

13. ¿Tlen okseki timomachtiskej?

¹³ Nochipa tiknekij tiktemoskej tlen tlamachtia Biblia. Pero ¿tlen techpaleuis nochipa ma tiktemokan tlen tlamachtia Biblia? Ma tikitakan eyi tlamantli.

14. (1) ¿Tleka techpaleuia nochipa ma timomachtikan Biblia? (2) ¿Tleka moneki ma tiyetokan ‘tiixtlamatkej, ma tiktekauilikan ma techyektlalikan uan ma tiktemokan ajsikamatilistli’?

¹⁴ Se tlamantli, nochipa ma timajxilikan ma timomachtikan iTlajtol toTajtsin Dios uan nochipa itech ma timokuayejyekokan. Nin tlamantli techpaleuis okachi ma tikpatioitakan tlen tlamachtia Biblia  uan amo keman tikkauaskej. Pero moneki itlaj tikchiuaskej uan amo san tikpiaskej tlamatilistli. Proverbios 23:23 kijtoa ma tiyetokan ‘tiixtlamatkej, ma tiktekauilikan ma techyektlalikan uan ma tiktemokan ajsikamatilistli’. Ijkuak nin texto kijtoa ma tiyetokan ixtlamatkej kijtosneki tikchiuaskej tlen timomachtiaj. Ijkuak tiktemoaj ajsikamatilistli kijtosneki kuali tikajsikamatij tlen yitikmatij iuan tlen yikin timomachtiaj. Noijki ualeua moneki techyektlaliskej para ma tikpatlakan toyelis. San niman ma tikselikan ijkuak techyektlaliaj porque Biblia kijtoa sapanoa miak ipati ijkon ma tikchiuakan (Prov. 8:10).

15. ¿Ken techpaleuia tlen tlamachtia Biblia?

¹⁵ Ome tlamantli, nochipa ma tikchiuakan tlen tlamachtia Biblia. Nin yetoskia ken se kuetlaxtli tlen ika timotlajkoilpiaj (Efes. 6:14). Yiuejkika soldados omotlajkoilpiayaj ika se kuetlaxtli para amitlaj kipanoskia intlajko uan inmijtik. Omonekiaya ika motlajkotiliniskiaj porque tlamo amo kinpaleuiskia. Tlen tlamachtia Biblia yetoskia ken non kuetlaxtli. Tla kuali timotlajkotiliniskej, amo tikneltokaskej tlen kixnamiki Biblia uan techpaleuis kuali ma tikpejpenakan tlen tikchiuaskej. Noijki techpaleuis ma tikchiuakan tlen kuali ijkuak techyejyekoskej. Se soldado amo yaskia moteuiti tla amo motlajkoilpiskia ika kuetlaxtli. Noijki tejuan amo keman ma tikmokixtilikan noso ma tikkexanikan tokuetlax. Ma yeto ken titlajkoilpitokej ika tlen tlamachtia Biblia. Noijki yiuejkika soldados itech inkuetlax okinkalakiayaj inmiespadas. Ma tikitakan ken uelis ijkon tikchiuaskej.

16. ¿Ken techpaleuia ijkuak tikinmachtiaj oksekimej?

¹⁶ Eyi tlamantli, ma timochijchikauakan ma titlamachtikan tlen kijtoa Biblia. Ma tikchiuakan ken soldado ijkuak chikauak kikitskijtok iespada. Tejuan noijki ‘matikpiakah itlajtol Dios kemi se espada’ (Efes. 6:17). Tinochtin uelis timochijchikauaskej kuali titlamachtiskej uan ‘tikyektekitiltiskeh n kualitlájtoli non techmatiltia tlan milák’ (2 Tim. 2:15). Ijkuak tikinmachtiaj ika Biblia oksekimej, okachi tikmatij tlen tlamachtia Biblia uan okachi tikpatioitaj. Nin tlamantli techpaleuia nochipa ma tiktemokan tlen tlamachtia Biblia.

17. ¿Tleka tikpatioitaj tlen tlamachtia Biblia?

¹⁷ ToTajtsin Dios otechtliokoli tlen tlamachtia Biblia. Nin sapanoa miak ipati porque techpaleuia ma timouikakan iuan toTajtsin Dios. Jehová yotechmachti miak tlamantli pero ok poliui techmachtis miak tlamantli itech xochitlali. Ik non, ma tikpatioitakan tlen tlamachtia Biblia ken se perla. Nochipa ma tiktemokan tlen tlamachtia Biblia uan amo keman ma tikkauakan. Ijkon tikchiuaskej ken David nochipa okitemo tlen melauak noso okichi tlen kineki toTajtsin Dios (Sal. 86:11).