1. ¿Tlen okachi tikpatioitaj?

¿TLEN okachi tikpatioitaj? Tejuan okachi tikpatioitaj timouikaskej iuan toTajtsin Dios uan nochipa ijkon tiknekij tikchiuaskej. Noijki tikpatioitaj Biblia porque techpaleuia ma timouikakan iuan Jehová (Col. 1:9, 10).

2. ¿Tlen tlamantli sapanoa tikpatioitaj uan tleka? (Xikinmita dibujos kanin peua tlamachtil).

² Jehová ye okachi kuali techmachtia iTlajtol. Techiluia tlen kijtosneki itoka uan noijki techiluia ken iyelis. Techyekiluia okitemakak iKone porque sapanoa techtlasojtla. Jehová techiluia iKone tlanauatijtok uan kiualtlanauatis tlaltikpak. Noijki techiluia tlapejpenalmej yaskej iluikak uan “oksikimeh ichkameh” nochipa chantiskej tlaltikpak (Juan 10:16). Noijki techiluia ken moneki tikpiaskej tonemilis uan toyelis. Nochi nin tlamantli sapanoa tikpatioitaj porque techpaleuia ma timouikakan iuan toTajtsin Dios uan ma tiyolpakikan.

3. Xikijto kox Jehová itlaj techtlajtlanilia ijkuak techmachtia ika Biblia.

 ³ ToTajtsin Dios kipaktia kitemakas tlen kipia. Okitemakak iKone topatka ma mikiki. Ik non, ye kinpaleuia akinmej kinekij kimatiskej tlen tlamachtia Biblia. Ye amitlaj techtlajtlanilia ijkuak techmachtia ika Biblia. Se tonal, se tlakatl omotokayotiaya Simón okinekiaya kitlaxtlauis tlatitlanil Pedro ma kipanoltili espíritu santo para uelis kinpajtiskia tlen omokokoayaj. Pero Pedro okilui: “Motomi mapojpoliwi mowa, ken tikyejyekolia tlan Dios kitemaka weleti mokoa ika tomi” (Hech. 8:18-20). Ik non, ¿tlen kijtosneki ma tiktemokan tlen tlamachtia Biblia?

4. ¿Tlen timomachtiskej?

⁴ (Xiktlajtolti Proverbios 23:23). Moneki timochijchikauaskej tla tiknekij tikajsikamatiskej tlen tlamachtia Biblia. Pero moneki ayakmo tikchiuaskej seki tlamantli. Tla yitikmatij tlen Biblia tlamachtia, amo keman ma tikkauakan. ¿Ken uelis tiktemoskej tlen tlamachtia Biblia? ¿Moneki itlaj tiktemakaskej? Ijkuak tikinnankiliskej ninmej tlajtlanilmej, okachi tikpatioitaskej tlen tlamachtia Biblia. Noijki techpaleuis amo keman ma tikkauakan. Axkan tikajsikamatiskej tleka moneki tikpatioitaskej tlen tlamachtia Biblia.

5. Xikijto ken uelis tiktemoskej tlen tlamachtia Biblia.

⁵ Ijkuak itlaj techtliokoliaj amo kijtosneki amitlaj tikchiuaskej. Ijkuak Proverbios 23:23 kijtoa “xiktemo” kijtosneki itlaj tiktemoskej uan ijkon tikajsiskej. Nin kijtosneki moneki timochijchikauaskej noso itlaj tikchiuaskej uan ijkon tikpiaskej tlen tiknekij. Ma tikijtokan kanin tlanemakaj okitlalijkej se amatl kanin kijtoa kitetliokoliaj pan. Pero ¿kox techkauilitiuij ipan tomesa? Amo. Maski kitetliokoliaj moneki tikkuitiuij kanin kitetliokoliaj. Ik non, moneki itlaj tikchiuaskej uan timochijchikauaskej tla tiknekij tikmatiskej tlen tlamachtia Biblia.

6. ¿Ken techpaleuis tla tiktemoskej tlen tlamachtia Biblia?

⁶ (Xiktlajtolti Isaías 55:1-3). Ika ninmej textos Jehová techiluia tlen kijtosneki tiktemoskej tlen tlamachtia Biblia. Itech ninmej textos Jehová kijtoa iTlajtol yetoskia ken atl, leche uan vino. Ijkuak tiamikij uan tikonij atl, kuali timomachiliaj. Noijki sapanoa techyolseuia ijkuak tikmatij tlen tlamachtia Biblia. Noijki ijkuak konemej konij leche kinpaleuia ma moskaltikan. ITlajtol Jehová noijki techpaleuia ma tikpiakan chikauak totlaneltokilis. Noijki Jehová kijtoa iTlajtol yetoskia ken vino porque tiyolpakij ijkuak tikonij (Sal. 104:15). Ik non, ijkuak Jehová techiluia ma tiyolpakikan ika vino, kijtosneki ma tikintlakamatikan itlanauatiluan uan ijkon tiyolpakiskej (Sal. 19:8). Jehová okinmijto nin tlajtolmej para ma tikajsikamatikan techpaleuis tlen tlamachtia Biblia uan ma tikchiuakan tlen techiluia. Ik non, ma tikitakan makuili tlamantli tlen ayakmo tikchiuaj porque otiktemojkej tlen tlamachtia Biblia.

7. ¿Tleka moneki timajxiliskej para tiktemoskej tlen tlamachtia Biblia?

⁷ Moneki timajxiliskej. Ijkuak yikin opejki timomachtiaj Biblia omonekiaya timajxiliskej  uan ijkon okachi tikmatiskiaj tlen tlamachtia Biblia. Moneki tinochtin tiktlajtoltiskej Biblia, amatlajkuilolmej uan noijki ma timomachtikan ijkuak timonechikoskej. Pero moneki timajxiliskej tla tiknekij tikchiuaskej nochi nin tlamantli uan ijkon amo tikkauaskej tlen tlamachtia Biblia. Maski ayakmo tikchiuaskej tlen achto okachi otechpaktiaya (xiktlajtolti Efesios 5:15, 16). ¿Keski xiuitl tiuejkauaskej timomachtiskej tlen tlamachtia Biblia? Amo uelis tikijtoskej keski xiuitl porque tlatlamantli timokuayejyekoaj. Pero nochipa uelis timomachtiskej ken iyelis Jehová, tlen okichijchi uan itech ixtlamatilis (Rom. 11:33). Revista Akin Tetlapouijtok tlen achto okiski ika inglés, okijto: “Tlen tlamachtia Biblia kajki ken se xochitsintli”. Noijki okijto: “Amo xiyolpaki san ika se xochitl itech tlen melauak. Nochipa miakej xikintemo uan ok xikintemojto”. Tla san se omonekiaya, toTajtsin Dios amo kitlaliskia okseki xochitl. Axkan ma timotlajtlanikan: “¿Kox yonikololo miak xochitl?”. Noijki nochipa timomachtiskej itech Jehová ijkuak tiyetoskej itech xochitlali. Pero axkan moneki ma timochijchikauakan ma timomachtikan tlen tikpiaj. Ma tikitakan tlen okipanok se ichpochtli.

8. ¿Tlen okichi se ichpochtli uan axkan tlen kichijtok?

⁸ Se ichpochtli itoka Noriko * ochantiaya Japón, satepan ochantito Nueva York (Estados Unidos). Ye ompa omomachtito uan noijki okipiaya ireligión. Se tonal, se precursora okitlapoui Noriko ijkuak okatka ikalijtik. Sapanoa okipakti tlen tlamachtia Biblia uan okilui tokni ma kimachtiti ome uelta chichikometika. San niman opejki monechikoa maski omomachtiaya uan otekipanoaya seki tonalmej. Noijki ayakmo okachi omoyolpaktiaya uan ijkon okachi omajxiliaya momachtis Biblia. Non okipaleui okachi ma kipia chikauak itlaneltokilis. Ayamo okajxitiaya se xiuitl omomachtiaya Biblia uan omoapolakti. Itlajkotia 2006 omochi precursora.

9. ¿Tlen okachi tikpatioitaj ijkuak tiktemoaj tlen tlamachtia Biblia?

⁹ Ayakmo tiktemoskej okseki tlamantli. Ijkuak opejki timomachtiaj Biblia xamo otikkajkej toteki maski sapanoa kuali otechtlaxtlauiayaj. Noijki ma timokuayejyekokan tlen okichi Pedro uan Andrés. Yejuan omichkitskiayaj. Ijkuak Jesús okinmilui ‘kinmichmaskeh tlakah’, okikajkej nochi uan iuan oyajkej (Mat. 4:18-20). Nochtin akinmej kinekij kimatiskej tlen tlamachtia Biblia amo kijtosneki ayakmo tekipanoskej. Moneki kipiaskej tlen ika mopanoltiskej uan noijki moneki kinmaluiskej inkalchanejkauan (1 Tim. 5:8). Pero moneki kipatlaskej seki tlamantli uan noijki ayakmo kitemoskej miak tlamantli. Jesús okijto: “Amo xikoololokah miak tomi itech nin tlaltíkpaktli”. Ye okijto: ‘Matikoololokah itech ilwikak tlan milák ipati’ (Mat. 6:19, 20). Ma tikitakan tlen okichi se ichpochtli.

10. ¿Tlen okichi se ichpochtli uan ken momachilia?

¹⁰ Se ichpochtli itoka María opejki mauiltia golf ijkuak ayamo oyaya escuela. Ijkuak okatka secundaria okiluijkej ma momachtiti universidad uan nochi kitlaxtlauiliskiaj porque kuali omauiltiaya. Sapanoa okipaktiaya  mauiltis, ik non, okinekiaya okachi momachtis uan ijkon kitlaniskia miak tomin. Pero satepan opejki momachtia Biblia uan sapanoa okipakti uan okipatlak inemilis. Okijto: “Okachi opejki niyolpaki ijkuak onikpatlak noyelis uan opejki nikintlakamati itlanauatiluan toTajtsin Dios”. María okajsikamatki amo uelis kitlasojtlaskia toTajtsin Dios uan noijki mauiltiskia (Mat. 6:24). Ik non, ayakmo omauilti. Omochi precursora uan axkan okachi yolpaki.

11. ¿Tleka ualeua ayakmo kuali timouikaj iuan tokalchanejkauan ijkuak peua timomachtiaj Biblia?

¹¹ Ualeua ayakmo kuali timouikaj iuan tokalchanejkauan. Ayakmo kuali timouikaj iuan nochtin tokalchanejkauan ijkuak peua timomachtiaj Biblia. ¿Tleka? Tikajsikamatij tlen okijto Jesús ijkuak otlajto itech imachtijkauan: “Xikintlali ma yekan itech tlan melawak para ma mitztekipanokan san yen tejwatzin. Motlajtol yen yon melawak” (Juan 17:17, Itlajtol totajtzin Dios [NHY]). Ijkuak peua timomachtiaj Biblia ayakmo tikchiuaj tlen oksekimej kichiuaj. Noijki timoyekanaj ika principios bíblicos. Nin tlamantli amo kichiuaj akinmej amo kitekichiuiliaj Jehová. Tiknekij timouikaskej inmiuan tokalchanejkauan pero xamo sekimej ayakmo touan mouikaskej porque amo kinpaktia tlen tikneltokaj. Nin tlamantli amo techtlajtlachialtia porque Jesús okijto: “Nomokokolikniwah yetoskeh non chanchiwah nomowah” (Mat. 10:36). Pero noijki okijto okachi tikseliskej tlateochiualistli tla tiktemoskej tlen tlamachtia Biblia (xiktlajtolti Marcos 10:28-30).

12. ¿Tlen okipanok Aarón ijkuak opejki momachtia Biblia?

¹² Se tlakatl judío tlen itoka Aarón okimachtijkej amo ma kijto itoka toTajtsin Dios. Pero ye okinekiaya kixmatis toTajtsin Dios. Se tonal, se tokni okititi tla kintlaliliskia vocales naui letras tlen motekitiltia para moijtos itoka toTajtsin Dios, motenkixtia “Jehová”. Sapanoa oyolpakik uan oyajki okinmiluito akinmej otlamachtiayaj kanin omonechikoaya pero amo okinpakti. Okixchijchakej uan okikixtijkej porque amo okinpakti ma kimati tlen melauak itech toTajtsin Dios. Noijki ikalchanejkauan amo okinpakti. Pero Aarón amo omosotla. Omoapolakti uan nochipa okitekichiuili toTajtsin Dios. Tejuan noijki ijkon tiknekij tikchiuaskej ken Aarón maski tikkauaskej seki tlamantli noso tokalchanejkauan amo kinpaktis tlen timomachtiaj.

13. ¿Tleka moneki ma tikpatlakan ken timokuayejyekoaj uan tlen tikchiuaj?

¹³ Axkan kuali timokuayejyekoaj uan ayakmo tikchiuaj tlen amo kuali. Moneki tikpatlaskej ken timokuayejyekoaj uan ayakmo tikchiuaskej seki tlamantli tla tiknekij timoyekanaskej ika tlen tlamachtia Biblia. Pedro okijto: “Kemi tepilwah tetlakitakeh, amo xikchijtinemikah tlan achto ononkichiwayah ijkuak ayamó ononkixmatiah Dios”. Noijki okijto: “Xinemikah non yolchipawakeh” (1 Ped. 1:14, 15). Akinmej ochantiayaj Corinto oauilnemiayaj pero ijkuak opejki momachtiaj Biblia okipatlakej innemilis (1 Cor. 6:9-11). Axkan noijki miakej yokipatlakej innemilis porque opejki momachtiaj Biblia. Pedro noijki okinmilui tokniuan: “Miak xiwitl nomejwah ononkichijtinenkeh tlan kiwilitah kichiwaskeh  akimeh amo kitlakitah Dios. Ononmoixpolojtinemiah iwa ononkichiwayah tlan kelewiah nomokuerpo, onontlawantinemiah, ononmopaktijtinemiah itech ilwimeh pitsotikeh. Iwa tlan okachi tetlajyalti, ononkinweyijkatlaliayah diosmeh non san kinmachijchiwah” (1 Ped. 4:3).

14. Xikijto kox uelis tikpatlaskej ken timokuayejyekoaj.

¹⁴ Miak xiuitl Devynn uan Jasmine sapanoa otlauanayaj. Devynn kuali otekipanoaya itech contabilidad pero nochipa okipoloaya iteki porque otlauanaya. Isiua san okualaniaya uan oteuitekiaya. Se tonal, Jasmine sapanoa otlauanki uan ijkuak onejnentiaya, okinamik ipan ojtli se misionero tlen oyaya iuan isiua. Yejuan okiluijkej kimachtitiuij. Chikometika oyajkej inkalijtik pero Devynn uan Jasmine sapanoa otlauankej. Yejuan amo okineltokayaj misioneros intech omotekipachoayaj. Chikometika ayakmo otlauankej. Ijkuakon opejki momachtiaj Biblia uan opejki kichiuaj tlen omomachtiayaj. Opanok eyi metstli ayakmo otlauanayaj uan omonamiktijkej. Kanin ochantiayaj okimatkej okipatlakej innemilis, ik non, miakej noijki opejki momachtiaj Biblia.

15. ¿Tlen tlamantli oui tikkauaskej uan tleka?

¹⁵ Costumbres uan iluimej tlen amo kipaktia toTajtsin Dios. Sekimej san niman kikauaj costumbres uan iluimej ijkuak peuaj momachtiaj Biblia. Pero oksekimej sapanoa oui kikauaskej. Xamo kintekipachoa tlen kijtoskej inkalchanejkauan, akinmej inmiuan tekipanoaj uan akinmej inmiuan mouikaj. Noijki ualeua oui porque kichiuaj mikailuitl noso Todos Santos (Deut. 14:1). ¿Tlen techpaleuis amo ma tikchiuakan tlen toTajtsin Dios amo kipaktia? Ma tikitakan tlen okichijkej tlen ochantiayaj Éfeso.

16. ¿Tlen okichijkej sekimej tlen ochantiayaj Éfeso?

¹⁶ Akinmej ochantiayaj Éfeso sapanoa otetlajchiuiayaj. ¿Tlen okichijkej ijkuak opejki kichiuaj ken Cristo? Biblia kijtoa: “Noiwa miakeh non otetlajchiwiayah, okwalinwikakeh intlajkuilolwah non intech omomachtiayah para tetlajchiwiskeh iwa teixpa okinchichinojkeh. Iwa ijkuak okiyejyekolijkeh kech impati nonteh tlajkuílolteh, okijtojkeh ome póali iwa n májtlaktli mil (50,000) platajtomi. Ijkó itlajtol Totajtsi okachi omoxitiniaya iwa okitenextiaya iweletilis” (Hech. 19:19, 20). Yejuan okintlatijkej inmiamochuan maski okatkaj sapanoa patiojkej pero okiselijkej miak tlateochiualistli.

17. (1) ¿Tlen tlamantli ayakmo tikchiuaj? (2) ¿Tlen tlajtlanilmej timomachtiskej itech okse tlamachtil?

¹⁷ ¿Tlen tlamantli ayakmo tikchiuaj? Tinochtin moneki timajxiliskej tiktemoskej tlen tlamachtia Biblia. Sekimej ayakmo kitemoaj miak tlamantli uan noijki xamo inkalchanejkauan amo kinpaktia tlen momachtiaj. Oksekimej moneki kipatlaskej ken mokuayejyekoaj uan tlen kichiuaj uan noijki ayakmo kichiuaskej costumbres nion iluimej tlen amo kipaktia toTajtsin Dios. Pero yotikajsikamatkej okachi miak ipati tlen tlamachtia Biblia. Noijki techpaleuia ma timouikakan iuan Jehová. Ijkuak timokuayejyekoaj, sapanoa techpaleuia tlen tlamachtia Biblia uan amo tikajsikamatij tleka sekimej kinekij kikauaskej. ¿Tleka ijkon kichiuaj? ¿Tlen techpaleuis amo ijkon ma tikchiuakan? Itech okse tlamachtil tikitaskej tlen techpaleuis.