1, 2. (1) Xikijto tlen techpaleuia ma titlaxikokan. (2) ¿Tlen timomachtiskej?

IJKUAK yotikixnamikej se ouijkayotl, otikitakej amo uelis titlaxikoskiaj tla amikaj techpaleuiskia. Xamo ijkon otimomachilijkej ijkuak otimokokojkej noso ikaj oixpoliuik akin sapanoa tiktlasojtlaj. Otikitakej nochipa otitlaxikojkej porque otechpaleui iespíritu santo toTajtsin Dios (2 Cor. 4:7-9).

² Noijki tiknekij ma techpaleui iespíritu santo toTajtsin Dios uan ijkon uelis tikixnamikiskej nochi tlen kiyekana Satanás (1 Juan 5:19). Noijki moneki tikinmixnamikiskej “espíritus amokualteh” (Efes. 6:12). Tinochtin tikixnamikij nochi ouijkayotl tlen yotikijtojkej. Ik non, tikitaskej ome tlamantli ken techpaleuia iespíritu santo toTajtsin Dios. Satepan tikitaskej tlen tikchiuaskej tla tiknekij ma techpaleui iespíritu Jehová.

3. ¿Ken techpaleuia iespíritu santo toTajtsin Dios ma titlaxikokan maski tikixnamikij ouijkayotl?

³ Iespíritu santo toTajtsin Dios techpaleuia ma titlaxikokan ijkuak moneki itlaj tikchiuaskej maski tikixnamikij ouijkayotl. Tlatitlanil Pablo okijto kitekichiuiliskia Jehová maski kipiaskia ouijkayotl porque omopaleuiaya ika “iweletilis Cristo” (2 Cor. 12:9). Ma tikitakan ken okipaleui. Ijkuak ome uelta uejka otetlapouito Pablo, okimotlanili tlen ika mopanoltiskia uan amo san omochijchika tetlapouis. Ompa Corinto omokaloti ikalijtik Áquila uan Priscila uan yejuan okinchijchiuayaj “manteadojkalmeh”. Pablo noijki okinchijchiuaya  “manteadojkalmeh” uan otekipanoaya seki tonalmej iuan Áquila uan Priscila (Hech. 18:1-4). Iespíritu santo toTajtsin Dios okipaleui ma tekipano uan ma tetlapoui.

4. Ijkon ken kijtoa 2 Corintios 12:7b-9, NHY, ¿tlen okipanoaya Pablo?

⁴ (Xiktlajtolti 2 Corintios 12:7b-9, Itlajtol totajtzin Dios, [NHY]). ¿Tlen okinekiaya kijtos Pablo ijkuak okijto okixnamikiaya “se tlajyowilistle kej itlaj witztle”? Sapanoa techkokos tla techtsoponiliskej se uitstli. Ik non, Pablo okijto otlajyouijtoka. Ye okijto nin ouijkayotl okitsoponili “itekipanoj” Satanás. Yetoskia ken okixtlajtlatsiniaya noso okiteuiaya. Xamo amo ye Satanás uan amo kuali ejekamej okitsoponilijkej non “witztle”. Nin amo kijtosneki yejuan okitlajyouiltijtokaj. Pero ijkuak okitakej Pablo okipiaya se “witztle”, xamo okachi okitsoponilijkej uan ijkon okachi otlajyoui. ¿Tlen okichi Pablo?

5. ¿Ken okipaleui Jehová ijkuak Pablo omotlatlaujti?

⁵ Pablo okinekiaya kimokixtilis non “witztle”. Okijto: “Eyi welta yoniktlajtlanili n Toteko [Jehová] manechkixtili nin tlaijyowílistli”. Pero maski okitlatlaujti toTajtsin Dios amo okikixtili non tlajyouilistli. ¿Kijtosneki amo okikak? Jehová okikak uan okipaleui ma tlaxiko maski amo okikixtili non tlajyouilistli. Jehová okilui: “Noweletilis okachi motenextia itech non amo chikawakeh” (2 Cor. 12:8, 9). Jehová okipaleui Pablo, ik non, oyolpakiaya uan omoyolseuiaya (Filip. 4:4-7).

6. (1) ¿Ken techpaleuia Jehová ijkuak timotlatlaujtiaj? (2) ¿Tlen textos techpaleuiskej ma timoyolchikauakan?

⁶ ¿Se tonal yotiktlatlaujtijkej Jehová ma techpaleui ken Pablo okichi? Xamo otiktlatlaujtijkej Jehová uan ok otitlajyouijkej. Ik non, otikmachilijkej ayakmo otechseliaya. Tla ijkon techpanoa, ma tikilnamikikan tlen okichi Pablo. Jehová okipaleui ijkuak okitlatlaujti. Axkan noijki xamo Jehová amo techkixtilis ouijkayotl tlen tikixnamikij pero ika iespíritu santo techpaleuis ma titlaxikokan (Sal. 61:3, 4). Xamo sapanoa titlajyouiskej pero Jehová amo keman techkauas toselti (2 Cor. 4:8, 9).

7, 8. (1) ¿Tleka tikijtoaj iespíritu santo toTajtsin Dios yetoskia ken ejekatl? (2) ¿Ken okiyekijto Pedro tlapaleuia iespíritu santo toTajtsin Dios?

⁷ ¿Ken okachi techpaleuia iespíritu santo toTajtsin Dios? Ma tikitakan ken techpaleuia. Iespíritu santo Jehová yetoskia ken ejekatl. Ejekatl uelis kitopejtias se barco uan ajsiti kanin moneki maski panotias ijtik ejekakiauitl. Noijki ijkon iespíritu santo Jehová techpaleuia ma tiktekichiuilikan maski tikixnamikij ouijkayotl uan ijkon tiyetoskej itech xochitlali.

⁸ Pedro okimatiaya ken kiuikaj se barco porque ye omichkitskiaya. Ik non, okitekitilti se tlajtoli tlen kiteititia ken tlapaleuia iespíritu santo Jehová. Ye okijkuilo: “Porke in tiotenejmachtijkeh amo okijtojkeh itla tlen san yejvah okinekeh, sino yejvah otlajtojkeh de toYejwatzi ika itlayakanalis in Tioijyotzintli” noso espíritu santo (2 Ped. 1:21, Itlajtol Totajtzin Dios, [NSU]).

9. ¿Ken okineskayoti Pedro “itlayakanalis” iespíritu santo toTajtsin Dios?

⁹ ¿Tlen okinekiaya kijtos Pedro ijkuak okijto “ika itlayakanalis”? Lucas tlen okijkuilo amochtli Hechos, okitekitilti se tlajtoli ika griego ijkuak okijto se barco kikaua “makiwika n ejekatl” (Hech. 27:15). Ik non, Pedro  okijto akinmej okijkuilojkej Biblia omoyekankej “ika itlayakanalis” iespíritu santo toTajtsin Dios. Noijki se tlakatl tlen momachtia Biblia, okijto ijkuak Pedro okijto “ika itlayakanalis” espíritu santo, ye “okitekitilti se tlajtoli tlen okinpaleui oksekimej ma mokuayejyekokan ken kiuikaj se barco”. Pedro okijto ijkon ken ejekatl kiuika se barco para ma ajsiti kanin yaui, noijki ijkon iespíritu santo toTajtsin Dios okinyekanki akinmej okijkuilojkej Biblia. Tlakatl tlen itech otimotlapouijkej, okijto “akinmej okijkuilojkej Biblia yetoskia ken okiyektlalijkej tsotsoli” tlen ejekatl kitopeuas uan ijkon barco uelis yas. Jehová okinpaleui ika iespíritu santo tlen yetoskia ken ejekatl. Akinmej okijkuilojkej Biblia omoyekankej ika iespíritu santo toTajtsin Dios.

10, 11. ¿Tlen ome tlamantli tikchiuaskej tla tiknekij tikmatiskej kox techpaleuia iespíritu santo toTajtsin Dios?

¹⁰ Axkan Jehová ayakmo kitekitiltia iespíritu santo para ma kijkuilokan Biblia. Pero ika kinyekana itekipanojkauan. Jehová ok techpaleuia ika iespíritu santo. Pero moneki itlaj tikchiuaskej tla tiknekij ika ma techyekana. ¿Tlen uelis tikchiuaskej?

¹¹ Ma tikitakan ken uelis tikchiuaskej. Tla akin kiuika se barco kineki ma kipaleui ejekatl, moneki achto kichiuas ome tlamantli. Achto, moneki kiuikas barco kanin ejeka porque tlamo amo molinis tla kipixtos ompa kanin moketsaj. Okse tlamantli, moneki kiyektlalis tsotsoli tlen kipia barco uan ijkon ejekatl kitopeuas. Tejuan noijki moneki ma tikkauilikan iespíritu santo toTajtsin Dios ma techyekana tla tiknekij tiktekichiuiliskej Jehová. Pero moneki tikchiuaskej ome tlamantli. Achto, moneki timoketsaskej kanin ejeka. Nin kijtosneki tikchiuaskej tlen technauatia iespíritu santo toTajtsin Dios. Okse tlamantli, moneki “tikyektlaliskej tsotsoli tlen kipia se barco”. Nin kijtosneki timochijchikauaskej  tikchiuaskej tlen technauatia iespíritu santo toTajtsin Dios (Sal. 119:32). Tla tikchiuaskej nin tlamantli, iespíritu santo toTajtsin Dios techpaleuis nochipa ma tiktekichiuilikan Jehová maski titlajyouiskej uan techyejyekoskej. Tla titlaxikoskej, tiyetoskej itech xochitlali.

12. ¿Tlen timomachtiskej?

¹² Yotikitakej ome tlamantli ken techpaleuia iespíritu santo toTajtsin Dios. Techpaleuia ma titlaxikokan uan ma tiyetokan tiyolmelajkej ixpan Jehová ijkuak tikixnamikij ouijkayotl. Noijki techpaleuia ma timochijchikauakan ma tiktekichiuilijtokan Jehová uan ma tikilnamiktokan tikseliskej yolilistli tlen amo keman tlamis. Axkan tikitaskej naui tlamantli tlen moneki tikchiuaskej tla tiknekij ma techpaleui iespíritu santo Jehová.

13. (1) Ijkon ken kijtoa 2 Timoteo 3:16, 17, ¿ken techpaleuis tlen kijtoa Biblia? (2) ¿Tlen moneki tikchiuaskej?

¹³ Ma timomachtikan iTlajtol toTajtsin Dios (xiktlajtolti 2 Timoteo 3:16, 17). Tikmatij Biblia iTlajtol toTajtsin Dios. Ik non, Jehová ika iespíritu santo okinyekanki sekimej tlakamej ma kijkuilokan tlen mokuayejyekoa. Ijkuak tiktlajtoltiaj Biblia uan timokuayejyekoaj tlen kijtoa, okachi tikilnamiktokej uan mokaua itech toyolo. Non techpaleuia ma tikpatlakan tonemilis uan ma tikyolpaktikan toTajtsin Dios (Heb. 4:12). Pero tla tiknekij ma techpaleui iespíritu santo toTajtsin Dios, moneki nochipa ma timomachtikan tlen kijtoa Biblia uan ma timokuayejyekokan tlen techmachtia. Ijkon tikteititiskej tiktlakamatij iTlajtol toTajtsin Dios ika tlen tikchiuaj uan ika tlen tikijtoaj.

14. (1) ¿Tleka tikijtoaj ijkuak timonechikoaj yetoskia ken tiauij “kanin ejeka”? (2) ¿Tlen moneki tikchiuaskej tla tiknekij ma techpaleui iespíritu santo Jehová ijkuak timonechikoaj?

¹⁴ Ma tikueyichiuakan toTajtsin Dios iuan tokniuan (Heb. 2:12). Ijkuak timonechikoaj, yetoskia ken tiauij kanin ejeka porque Jehová kinyekana nechikolmej ika iespíritu santo (Apoc. 2:29). ¿Tleka ijkon tikijtoaj? Ijkuak timonechikoaj tikiluiaj toTajtsin Dios ma techyekana ika iespíritu santo, titlakuikaj tlakuikalmej tlen kisaj itech Biblia uan techmachtiaj tokniuan tlen ye okintlali ika iespíritu santo. Iespíritu santo Jehová noijki kinpaleuia tokniuan siuamej ma moyektlalikan uan ijkon kiteititiaj ken uelis titlamachtiskej. Tla tiknekij ma techpaleui iespíritu Jehová, moneki ma timomachtikan ijkuak timonechikoaj uan ma titlanankilikan. Ijkon yetoskia ken “tikyektlaliaj tsotsoli tlen kipia se barco”.

15. ¿Ken techpaleuia iespíritu santo toTajtsin Dios ijkuak titetlapouiaj?

¹⁵ Ma titetlapouikan. Tikkauiliaj iespíritu santo toTajtsin Dios ma techpaleui tla tiktlajtoltiaj Biblia ijkuak titetlapouiaj uan ijkuak titlamachtiaj (Rom. 15:18, 19). Pero moneki nochipa ma titetlapouitij uan ma tiktekitiltikan Biblia. Ijkon techpaleuis iespíritu santo toTajtsin Dios. Kuali titetlapouiskej tla tikchiuaj tlen kijtoa Toteki akinmej tikchiuaj ken Cristo Tlen tiktekitiltiskej itech nechikol.

16. ¿Ken uelis tikseliskej iespíritu santo toTajtsin Dios?

¹⁶ Ma tiktlatlaujtikan Jehová (Mat. 7:7-11; Luc. 11:13). Moneki ma tiktlatlaujtikan toTajtsin Dios tla tiknekij ma techpaleui iespíritu santo. Amitlaj uelis kitsakuilis toTajtsin Dios ma techmaka iespíritu santo. Nin techpaleuis tla techtsakuaskej uan Satanás  amitlaj uelis kichiuas ma tikselikan iespíritu santo toTajtsin Dios (Sant. 1:17). ¿Ken moneki timotlatlaujtiskej tla tiknekij ma techpaleui espíritu santo? Achto, ma tikitakan tlen techmachtia tlen ijkuilitok itech Lucas ijkon okachi tikmatiskej ken timotlatlaujtiskej. *

17. ¿Tlen techmachtia tlen okijto Jesús itech Lucas 11:5-9, 13?

¹⁷ (Xiktlajtolti Lucas 11:5-9, 13). Tlen okijto Jesús techititia ken moneki tiktlajtlaniskej espíritu santo. Tlakatl tlen ompa moijtoa okitlajtlanki tlen okinekiaya uan okimakakej. Amo omomojti oyajki okitato iyolikni itlaj ma kimaka maski okatka tlajko yoak (itech Toteki akinmej tikchiuaj ken Cristo Tlen tiktekitiltiskej itech nechikol julio 2018, xikita nota kanin kijtoa “kitlajtlanilijtok”). ¿Tlen techmachtia tlen okijto Jesús? Okijto: “Xiktlajtlanilikah Dios, iwa Ye nomechmakas; xiktemokah, iwa nonkajsiskeh; xitlakakalatsakah, iwa nomechtlatlapoliskeh”. Nin techmachtia tla tiknekij tikseliskej espíritu santo moneki nochipa ma tiktlajtlanikan.

18. ¿Tleka ma tikneltokakan Jehová techmakas iespíritu santo?

¹⁸ Tlen okijto Jesús noijki techpaleuia ma tikajsikamatikan tleka Jehová techmaka iespíritu santo. Non tlakatl tlen okitlajtlanito itlaj ma kimakakan, okinekiaya kitlamakas akin okikaloti uan yiyoak oajsito. Pero amitlaj okipiaya. Jesús okijto non tlakatl okimakakej pan porque okitlajtlanki ma kimakakan. ¿Tlen techmachtia? Nin tlakatl maski tlajtlakole okimakak tlen okinekiaya iyolikni. ToTajtsin Dios noijki techmakas espíritu santo tla nochipa tiktlajtlaniliskej. Ik non, ma tikneltokakan Jehová techmakas iespíritu santo tla tiktlajtlaniliaj (Sal. 10:17; 66:19).

19. ¿Tleka tikneltokaj nochipa titlatlaniskej?

¹⁹ Satanás nochipa kitemos ken kichiuas ma timosotlauakan pero tikneltokaj nochipa tiktlaniliskej. ¿Tleka? Porque iespíritu santo Jehová techpaleuia ma tikchiuakan ome tlamantli. Achto, techpaleuia ma tikxikokan nochi tlen techpanoa. Noijki techpaleuia ma tiktekichiuilikan Jehová hasta ijkuak tiyetoskej itech xochitlali. Ik non, ma tikkauilikan iespíritu santo ma techpaleui.