1. ¿Tleka akinmej tikchiuaj ken Cristo yetoskia ken kanaj tiauij ijkon ken kijtoua Mateo 7:13, 14?

TINOCHTIN akinmej tikchiuaj ken Cristo yetoskia ken tiauij itech se ojtli. Tiknekij tiyetoskej itech xochitlali ijkuak ualtlanauatis Jehová akin techtlasojtla, ik non, timochijchikauaj tiktekichiuiliskej. Mojmostla timochijchikauaj ijkon tikchiuaskej. Jesús okijto yetoskia ken tiauij itech ojtli pitsauak uan ualeua oui (xiktlajtolti Mateo 7:13, 14). Titlajtlakolejkej, ik non, ualeua itlaj amo kuali tikchiuaj (Gál. 6:1).

2. ¿Tlen timomachtiskej? (Xikita recuadro “ Tla tiyolyamankej, techpaleuis ma tikpatlakan tonemilis”).

² Tla tiknekij tinentoskej itech ojtli pitsauak, moneki tikpatlaskej ken timokuayejyekouaj uan tlen tikchiuaj. Non okinekiaya kijtos tlatitlanil Pablo ijkuak okinmilui tokniuan ma ‘yeknemikahʼ (2 Cor. 13:11). Axkan noijki moneki tikchiuaskej tlen okijto Pablo. Itech nin tlamachtil tikitaskej tlen kijtoua Biblia techpaleuis ma tikpatlakan tonemilis. Tikitaskej tokniuan tlen kipiaj chikauak intlaneltokilis uelis techpaleuiskej ma tinemikan itech ojtli tlen kichiuas ma tiyoltokan nochipa. Timomachtiskej ualeua oui tikchiuaskej tlen kijtoua ialtepe Jehová. Noijki tikitaskej moneki tiyetoskej tiyolyamankej tla tiknekij tikpatlaskej toyelis uan tla tiknekij tiktekichiuiliskej Jehová ika pakilistli.

3. ¿Ken techpaleuia iTlajtol toTajtsin Dios?

³ Ualeua oui tikitaskej tlen timokuayejyekouaj uan tlen tikmachiliaj. Oui tikitaj porque toyolo techkajkayaua, ik non, oui tikitaskej tlen techyolinia ma tikchiuakan (Jer. 17:9). Ualeua san timokajkayauaj ika tlen  timokuayejyekouaj (Sant. 1:22). Ik non, moneki timoyekanaskej ika tlen kijtoua iTlajtol toTajtsin Dios para tikitaskej tlen timokuayejyekouaj. Tlen kijtoua Biblia “techajsikamatiltia tlan kuali iwa tlan amo kuali” uan techpaleuia ma tikitakan tlen onka itech toyolo (Heb. 4:12, 13). Nin yetoskia ken se tepostli tlen kita ken kajki nochi toomio. Pero moneki tiyetoskej tiyolyamankej tla tiknekij ma techpaleui tlen kijtoua Biblia uan tlen techiluiaj tokniuan.

4. ¿Ken tikmatij Saúl opejki moueyineki?

⁴ Tlen okipanok tekiua Saúl, techititia tlen uelis techpanos tla amo tiyolyamankej. Sapanoua omoueyineki, ik non, amo okinek kipatlas tlen omokuayejyekouaya uan tlen okichiuaya (Sal. 36:1, 2; Hab. 2:4). Ijkon omotak ijkuak Jehová okilui tlen omonekiaya kichiuas ijkuak kintlaniliskia amalequitas pero Saúl amo okitlakamatki. Ijkuak profeta Samuel okilui tleka ijkon okichi, Saúl amo okiseli tlen okilui. Ye okijto amo tlajtlakoli tlen okichi uan okintlajtlakolti oksekimej (1 Sam. 15:13-24). Achto Saúl ijkon yokichijka (1 Sam. 13:10-14). Iyolo okikajkaya, ik non, omoueyineki. Amo okipatlak iyelis, ik non, Jehová okajuak uan ayakmo okiseli ken tekiua.

5. ¿Tlen moneki timotlajtlaniskej para tikitaskej kox tikchiuaj ken Saúl?

⁵ Para tikitaskej kox tikchiuaj ken Saúl, moneki timotlajtlaniskej: “¿Nikijtoua san tlen tlamantli para amo nikchiuas tlen kijtoua Biblia? ¿Nikijtoua amitlaj nechpanos tla amo niktlakamati tlen kijtoua Biblia? ¿Nikintlajtlakoltia oksekimej ijkuak nikchiua itlaj amo kuali?”. Tla ijkon tikchiuaj, moneki tikpatlaskej tlen timokuayejyekouaj uan noijki toyelis. Tlamo tikpatlaj tlen timokuayejyekouaj, peuas timoueyinekiskej uan Jehová ayakmo kinekis touan mouikas (Sant. 4:6).

6. ¿Tleka David amo okatka ken Saúl?

⁶ Axkan ma tikitakan tlen okichi David, ye okipatkayoti tekiua Saúl. Biblia kijtoua David okipatioitaya “itlanauatil Jehová” (Sal. 1:1-3). David okimatiaya Jehová kinmakixtia akinmej yolyamankej pero amo kinselia akinmej moueyinekij (2 Sam. 22:28). David okatka yolyamanki, ik non, okikauili iTlajtol toTajtsin Dios ma kipatla tlen omokuayejyekouaya. David okijto: “Nikueyichiuas Jehová porque ye nechyekana. Noijki youak nimokuayejyekoua kox kuali tlen nikchijtok” (Sal. 16:7).

7. ¿Tlen tikchiuaskej tla tiyolyamankej?

⁷ Tla tiyolyamankej, tikkauiliskej Biblia ma kipatla tlen timokuayejyekouaj para amo titlajtlakolchiuaskej. Yetoskia ken iTlajtol toTajtsin Dios techiluia: “Nin ojtli. Itech xinemikan”. Noijki technejmachtis para amo ma tiakan ik toyekma noso ik topochma (Is. 30:21). Kuali tiyetoskej tla tikkakij Jehová (Is. 48:17). Ijkon amikaj techyektlalis uan amo timopinatiskej. Noijki okachi kuali timouikaskej iuan Jehová porque ye techtlasojtla ken se teta kitlasojtla ikone (Heb. 12:7).

8. Ijkon ken kijtoua Santiago 1:22-25, ¿tleka iTlajtol toTajtsin Dios yetoskia ken se espejo?

⁸ ITlajtol toTajtsin Dios yetoskia ken se espejo tlen uelis techpaleuis (Santiago 1:22-25). Mojmostla tinochtin timotaj itech espejo. Ijkon tikitaj kox moneki timoyektlaliskej achto kanaj tiaskej. Noijki ijkon ijkuak mojmostla tiktlajtoltiaj Biblia moneki tikitaskej kox moneki tikpatlaskej tlen timokuayejyekouaj uan tlen tikchiuaj. Miakej kualkan kitlajtoltiaj texto tlen motlajtoltia mojmostla. Kitlajtoltiaj ijkuak ok katej inkalijtik uan non kinpaleuia ma  mokuayejyekokan tlen ompa kijtoua. Satepan kitaj ken kinpaleuis tlen yokitlajtoltijkej. Noijki moneki mojmostla tiktlajtoltiskej Biblia uan timokuayejyekoskej tlen ompa kijtoua. Maski oui, moneki ijkon tikchiuaskej porque non techpaleuis nochipa tiyoltoskej.

9. ¿Keman monekis ikaj ma techilui tlen amo kuali tikchijtokej?

⁹ ¿Se tonal opejki tikchiuaj itlaj tlen kichiuaskia ayakmo ma timouikakan iuan Jehová? Non yetoskia ken tiaskiaj itech okse ojtli (Sal. 73:2, 3). Tla se tokni tlen kipia chikauak itlaneltokilis otechilui amo kuali tlen otikchijkej, ¿otikkakej uan otikchijkej tlen otechilui? Tla otikkakej, xamo otiktlasojkamatilijkej tokni porque otechpaleui (Prov. 1:5).

10. ¿Tlen moneki tikchiuaskej tla se toyolikni techiluia tlen amo tikchiuaj?

¹⁰ ITlajtol toTajtsin Dios kijtoua akin melauak toyolikni techiluia tlen amo kuali tikchijtokej (Prov. 27:6). ¿Tlen kijtosneki non? Ma tikijtokan timochixtokej tikpanouiskej se ojtli kanin yauij miakej carros. Pero san tikitaj toteléfono uan peua tikpanouiaj ojtli. Ijkuakon se toyolikni techajkolkitskia uan amo techkauilia ma tinejnemikan. Xamo toyolikni otechkojko pero tlamo ijkon kichiuaskia, techkuitikisaskia se camión. Xamo techkokojtos toajkol pero amo tikualanij iuan toyolikni. Sapanoua tiktlasojkamatiliskej porque otechpaleui. Noijki ijkon xamo se toyolikni uelis techiluis amo kuali tlen tikijtoua noso tlen tikchiuaj porque kixnamiki tlen kijtoua toTajtsin Dios. Xamo amo techpaktis tlen techiluis pero tla tikualaniskej noso timoyolkokoskej, tiyetoskej tixoxojtin (Ecl. 7:9). Moneki ma tiktlasojkamatilikan porque amo omomojti uan touan omotlapoui.

11. ¿Tleka ikaj amo kinekis kikakis se iyolikni?

¹¹ ¿Tleka ikaj amo kinekis kikakis se iyolikni? Porque moueyineki. Akinmej moueyinekij san kikakij tlen ‘yejwah kimpaktia kikakiskehʼ uan amo kinekij “kikakiskeh tlan milák” (2 Tim. 4:3, 4). Amikaj kikakij porque mokuayejyekouaj okachi ixtlamatkej uan okachi ueyititokej. Pero tlatitlanil Pablo okijto: “Akin kimolia weyijkatitok, iwa amo milák, san ye inewia mokajkayawah” (Gál. 6:3). Uan tekiua Salomón okijto: “Okachi kuali se chokotsin ixtlamatki maski amitlaj ma kipia uan amo se tekiua tlen yikipia miak xiuitl pero xoxo porque amo kineki kikakis tlen kiluiaj” (Ecl. 4:13).

12. Ijkon ken kijtoua Gálatas 2:11-14, ¿tlen techmachtia tlen okichi Pedro?

¹² Ijkuak tlatitlanil Pablo teixpan okiyektlali tlatitlanil Pedro, ye okichi tlen omonekiaya (xiktlajtolti Gálatas 2:11-14). Xamo Pedro kualaniskia iuan Pablo porque teixpan okajuak. Pero Pedro amo okualanki uan okichi tlen ye okilui uan satepan okijto “totlasojikni Pablo” (2 Ped. 3:15).

13. ¿Tlen moneki tikilnamiktoskej tla tiknekij timotlapouiskej iuan se toyolikni?

¹³ Tla se tonal timokuayejyekouaj moneki tikiluiskej se toyolikni itlaj amo kuali kichijtok, ¿tlen moneki tikilnamiktoskej? Ijkuak ayamo iuan timotlapouiaj ma timotlajtlanikan: “¿Timokuayejyekouaj ‘sapanoua tiyolmelauakejʼ?” (Ecl. 7:16). Sekimej mokuayejyekouaj sapanoua yolmelauakej, moyekanaj ika tlen mokuayejyekouaj uan amo tlen Jehová kijtoua uan amo teiknomatij. Tla  yotimokuayejyekojkej uan tikitaj moneki timotlapouiskej iuan toyolikni, kuali iuan ma timotlapouikan, ma tiktlajtlanikan seki tlamantli para ma kita amo kuali tlen kichijtok. Ijkuak tiktlapouiskej ma tikititikan tlen kijtoua Biblia. Ma tikilnamiktokan tejuan amo technamiki tikixkomakaskej toyolikni pero uelis tikpaleuiskej ma kajsikamati ken momachilia Jehová ijkuak kita tlen ye kichijtok (Rom. 14:10, TNM). Ma tiktekitiltikan tlen kijtoua iTlajtol toTajtsin Dios ijkuak ikaj tikiluiaj tlen amo kuali kichijtok uan ma titeiknomatikan ijkon ken Jesús okichi (Prov. 3:5; Mat. 12:20). Ma tikilnamikikan tla tejuan tikinchiuiliaj tlen kuali oksekimej, Jehová techteochiuas (Sant. 2:13).

14. ¿Tlen techmaka ialtepe Jehová?

¹⁴ Jehová kitekitiltia ialtepe para techyekanas itech ojtli tlen kichiuas ma tiyoltokan nochipa. Ialtepe Jehová techmaka videos, amatlajkuilolmej uan nechikolmej tlen techmachtiaj ma tikchiuakan tlen kijtoua Biblia. Tlen techmaka ialtepe Jehová kisa itech Biblia. Noijki tokniuan tlen pouij itech Cuerpo Gobernante moyekanaj ika espíritu santo para kijtoskej ken titetlapouiskej. Pero ualeua kitaj kox kipatlaskej tlen okijtojkej, porque “tlan onka itech nin tlaltíkpaktli” mopatlatok uan ialtepe Jehová kichiua tlen moneki (1 Cor. 7:31).

15. ¿Tlen yokinpanok sekimej tokniuan?

¹⁵ Ijkuak ialtepe Jehová kipatla itlaj tlen achto okse tlamantli otikajsikamatiayaj noso techiluia ken moneki tikpiaskej tonemilis, tejuan san niman tikseliaj. ¿Pero tlen moneki tikchiuaskej ijkuak techiluiaj ma tikpatlakan okseki tlamantli? Axkan okachi patio kisa tikinchijchiuaskej kalmej kanin timonechikouaj uan tikinyektlaliskej. Ik non, Cuerpo Gobernante okijto para okachi kuali ma motekitiltikan kalmej kanin timonechikouaj, okinsetilijkej seki tlanechikolmej . Noijki seki kalmej kanin omonechikouayaj tokniuan okinnemakakej. Ika tomin tlen ompa kisa kitekitiltiaj para kinchijchiuaskej kalmej kanin okachi moneki. Xamo kanin tichantij kinemakatokej kali kanin timonechikouaj uan kinsetiliaj tlanechikolmej, ik non, xamo oui tikitaj tikchiuaskej tlen techiluia ialtepe Jehová. Axkan sekimej tokniuan  moneki yaskej okachi uejka para monechikoskej. Xamo oksekimej tlen okichijchijkej kali kanin omonechikouayaj noso okiyektlaliayaj, motlajtlaniaj tleka kinemakaj. Xamo mokuayejyekouaj san nenka chikauak otekipanojkej para kichijchiuaskej non kali. Pero maski tokniuan ijkon yokinpanok kipaleuiaj ialtepe Jehová, ik non, tiyolpakij.

16. ¿Ken techpaleuis Colosenses 3:23, 24, TNM nochipa ma tiyolpakikan?

¹⁶ Nochipa tiyolpakiskej tla tikilnamikij tiktekichiuiliaj Jehová uan ye kiyekantok ialtepe (xiktlajtolti Colosenses 3:23, 24, TNM). Tekiua David okitemakak miak tomin para oksekimej kichijchiuaskiaj teokali. Ye okijto: “¿Akin ne uan akin noaltepe para amo tiktemakaskej tlamanali ken nin? Porque nochi te moaxka uan itech moma tikonanaj tlen timitsmakaj” (1 Crón. 29:14). Ijkuak tiktemakaj tomin ika nochi toyolo, tikmakaj Jehová tlen iaxka. Jehová yolpaki ijkuak tiktemakaj totomin, tochikaualis uan titlapaleuiaj para ma mochiua tlen ye kineki (2 Cor. 9:7).

17. ¿Tleka amo ma timoyolkokokan tla tikitaj moneki itlaj tikpatlaskej itech tonemilis?

¹⁷ Tla nochipa tiknekij tinemiskej itech ojtli tlen kichiuas ma tiyoltokan nochipa, moneki tikchiuaskej ijkon ken Jesús (1 Ped. 2:21). Tla tikitaj moneki itlaj tikpatlaskej itech tonemilis amo ma timoyolkokokan. Ijkuak tikitaj itlaj moneki tikpatlaskej, kijtosneki tiknekij tikchiuaskej tlen Jehová kijtoua. Jehová kilnamiktok titlajtlakolejkej uan kimati amo uelis tikchiuaskej nochipa ken Jesús.

18. ¿Tlen moneki tikchiuaskej tla tiknekij tiyoltoskej nochipa?

¹⁸ Ma tikilnamiktokan tlen tikseliskej uan ma tikpatlakan tlen timokuayejyekouaj uan tlen tikchiuaj (Prov. 4:25; Luc. 9:62). Nochipa ma tiyetokan tiyolyamankej uan ma tikchiuakan tlen kijtoua 2 Corintios 13:11: “Nokniwah xiyolpakikah, [...] xiyeknemikah”. Tla ijkon tikchiuaskej, “Dios non teyolsewia iwa tetlasojtla” touan yetos. Axkan ye techpaleuia ma tiyolpakikan uan satepan techpaleuis nochipa ma tiyoltokan itech xochitlali.