1, 2. Xikijto ken uelis tikchiuaskej tlen kijtoua Proverbios 4:25.

MA TIKIJTOKAN eyi tokniuan kinpanoua seki tlamantli. Se tokni tlen yikipia miak xiuitl kilnamiki tlen yiuejkika okipanok. Axkan ayakmo ueli kichiua miak tlamantli pero mochijchikaua kitekichiuilis Jehová (1 Cor. 15:58). Nochipa mokuayejyekojtok yikajki itech xochitlali iuan ifamilia uan iyolikniuan. Okse tokni kilnamiki ijkuak ikaj okiyolkoko pero amo kineki kilnamiktos tlen okichiuilijkej (Col. 3:13, TNM). Okse tokni amo kilkaua yiuejkika otlajtlakolchi pero axkan mochijchikaua kitekichiuilis Jehová (Sal. 51:10).

² ¿Tlen amo kilkauaj eyi tokniuan? Kilnamikij tlen okinpanok pero amo san itech mokuayejyekojtokej. Yejuan kitaj tlen uelis kichiuaskej satepan (xiktlajtolti Proverbios 4:25).

3. ¿Tleka moneki tikilnamiktoskej tlen panos satepan?

³ ¿Tleka moneki tikilnamiktoskej tlen panos satepan? Ijkon ken ikaj amo uelis nejnemis tla san tlachixtok tlakuitlapan, tejuan noijki amo uelis tiktekichiuiliskej Jehová tla san tikilnamiktokej tlen achto otikchijkej (Luc. 9:62).

4. ¿Tlen timomachtiskej?

⁴ Axkan tikitaskej eyi tlamantli tlen uelis kichiuas san ma tikilnamiktokan tlen otikchijkej: * tiknekiskiaj tiyetoskej ken achto, tikilnamiktokej tlen otechchiuilijkej uan tikilnamiktokej otitlajtlakolchijkej. Tikitaskej ken principios  bíblicos techpaleuis ma tikilkauakan “nochi tlan omoka tlakuitlapa” uan ma timochijchikauakan para tikpiaskej tlen kajki “tlayakapa” (Filip. 3:13).

5. ¿Tlen kijtoua Eclesiastés 7:10 amo ma tikchiuakan?

⁵ (Xiktlajtolti Eclesiastés 7:10). Texto amo kijtoua amo ma timokuayejyekokan ken otikatkaj, kiteititia amo kuali tla tikijtouaj yiuejkika okachi kuali otikatkaj. Kuali tikmatij yetoskia ken se tetliokolil tlen otechmakak Jehová ijkuak tikilnamikij tlen kuali otechpanok. Pero amo kuali tla timokuayejyekoskej achto okachi kuali otikatkaj uan axkan san titlajyouiaj.

6. ¿Tleka amo tiixtlamatkej tla timokuayejyekoskej achto okachi kuali otikatkaj?

⁶ Amo tiixtlamatkej tla timokuayejyekoskej achto okachi kuali otikatkaj. Porque tla timoyolkokouaj san tikilnamiktoskej tlen amo kuali otechpanok noso amo tikilnamikiskej ken otitlajyouiayaj. Ma tikilnamikikan tlen okinpanok israelitas. Ijkuak okiskej Egipto, okilkajkej ompa okintlajyouiltiayaj uan san okilnamikiayaj tlen okikuayaj. Okijtouayaj: “¡Tiknekiskiaj tikkuaskej michin tlen otechmakayaj Egipto, otikkuayaj pepinos, sandías, puerros, xonakatl uan ajos!” (Núm. 11:5). ¿Pero san okinmakayaj? Amo. Sapanoua okintekipanoltiayaj uan ijkon okitlaxtlauayaj tlen okinmakayaj (Éx. 1:13, 14; 3:6-9). Opejki kilnamikij tlen okipiayaj uan san niman okilkajkej ken okintlajyouiltijkej. San omokuayejyekojtokaj tlen achto okinpanok uan amo okilnamikiayaj ken okinmakixti Jehová. Ik non, Jehová sapanoua okualanki (Núm. 11:10).

7. ¿Tlen okipaleui se tokni para amo kinekis yetos ken achto?

⁷ ¿Tlen techpaleuis amo san ma tiknekikan tiyetoskej ken achto? Ma tikitakan tlen okipanok se tokni siuatl tlen opejki tlapaleuia Betel ompa Brooklyn  itech 1945. Opanok seki xiuitl uan omonamikti iuan se betelita uan miak xiuitl ompa okitekichiuilijkej Jehová. Itech 1976 inamik omokoko. Tokni siuatl okijto ijkuak inamik yiixpoliuiskia, okilui seki tlamantli tlen omonekiaya kichiuas. Inamik okilui: “Nochipa otiyolpakej, miakej amo ijkon kinpanoua”. Noijki okilui: “Amo san xikilnamikto tlen omitspanok. Satepan ayakmo okachi timoyolkokos. Amo xiyolchichia uan amo xikijto tleka titlajyouijtok. Xiktlasojkamatili Jehová yotechteochi uan otiyolpakej. [...] Yetoskia ken se tetliokolil tlen otechmakak Jehová ijkuak tikilnamikij tlen kuali otechpanok”. ¡Kualtsin okitlapoui!

8. ¿Ken okipaleui Jehová tokni porque okichi tlen okilui inamik?

⁸ Tokni okichi tlen okilui inamik. Nochipa okitekichiuili Jehová hasta ijkuak oixpoliuik, ijkuak okipiaya noventa y dos xiuitl. Seki xiuitl achto okijto: “Ijkuak nimokuayejyekoua yoniktekichiuili Jehová sesenta y tres xiuitl, nikita nochipa oniyolpakik”. ¿Tleka ijkon okijto? Tokni okijto: “Sapanoua niyolpaki porque tikinpiaj miakej tokniuan uan uelis nochipa tiyetoskej inmiuan itech xochitlali. Ompa tinochtin nochipa tiktekichiuiliskej Jehová, akin melauak toTajtsin Dios”. * Kuali okichi tokni porque okilnamiktoka tlen kichiuas Jehová. Tejuan noijki uelis tikchiuaskej ken tokni.

9. Ijkon ken kijtoua Levítico 19:18, ¿keman uelis tikitaskej oui titetlapojpoluiskej?

⁹ (Xiktlajtolti Levítico 19:18). Ijkuak techyolkokoua se tokni, se tofamiliar noso se toyolikni, oui tikitaj tiktlapojpoluiskej.  Ma tikitakan tlen okinpanok sekimej tokniuan. Se tokni siuatl okijto okse tokni okitlachtekili. Pero non amo melauak uan okilui tokni ma kitlapojpolui. Pero tokni tlen okitlajtlakoltijkej amo ueli okilkauaya tlen opanok. Xamo tejuan amo keman ijkon otechpanok pero xamo tikilnamiktokej itlaj tlen otechchiuilijkej.

10. ¿Tlen techpaleuis amo san ma tikilnamiktokan tlen otechchiuilijkej?

¹⁰ ¿Tlen techpaleuis amo san ma tikilnamiktokan tlen otechchiuilijkej? Moneki tikilnamikiskej Jehová kita nochi tlen techpanoua uan ijkuak oksekimej techtlajyouiltiaj (Heb. 4:13). Ye moyolkokoua ijkuak kita titlajyouiaj (Is. 63:9). Yokijto kitlajtlamis nochi tlen techtlajyouiltia (Apoc. 21:3, 4).

11. ¿Ken techpaleuis tla ayakmo tikilnamiktokej tlen otechchiuilijkej?

¹¹ Kuali timomachiliskej tla ayakmo tikilnamiktokej tlen otechchiuilijkej. Ijkon okipanok tokni tlen okitlajtlakoltijkej. Satepan okilka tlen okichiuilijkej. Okajsikamatki Jehová techtlapojpoluia tla tejuan titetlapojpoluiaj (Mat. 6:14). Tokni okimatiaya amo kuali tlen okichiuilijkej pero okijto kilkauaskia. Non okipaleui ma yolpaki uan ma kitekichiuilijto Jehová.

12. ¿Tlen techmachtia tlen kijtoua 1 Juan 3:19, 20?

¹² (Xiktlajtolti 1 Juan 3:19, 20). Ualeua amo kuali timomachiliaj porque san tikilnamiktokej otitlajtlakolchijkej. Xamo otikchijkej seki tlamantli amo kuali ijkuak ayamo otikixmatiayaj Jehová noso ijkuak yotimoapolaktijkej (Rom. 3:23). Pero ma tikilnamiktokan maski timochijchikauaj tikchiuaskej tlen kuali, tinochtin tikchiuaj itlaj tlen amo kuali (Sant. 3:2; Rom. 7:21-23). Uelis timoyolkokoskej ijkuak tikilnamikij tlen amo kuali otikchijkej pero non uelis techpaleuis. ¿Tleka ijkon tikijtouaj? Porque non techpaleuis ayakmo ijkon ma tikchiuakan (Heb. 12:12, 13).

13. ¿Tleka amo techpaleuis tla san timokuayejyekojtokej tlen amo kuali otikchijkej?

¹³ Xamo maski yotimoyolkopkej amo kuali timomachiliaj maski Jehová yotechtlapojpolui. Amo techpaleuis tla san tikilnamiktokej tlen amo kuali otikchijkej (Sal. 31:10; 38:3, 4). ¿Tleka ijkon tikijtouaj? Ma tikitakan tlen okipanok se tokni siuatl. Nochipa omoyolkokouaya porque okilnamikiaya tlen amo kuali okichi. Ye okijto: “Xamo san nenka niktekichiuilia Jehová, xamo amo nimomakixtis”. Uelis tejuan noijki ijkon yotechpanok. Pero amo san ma timokuayejyekojtokan tlen amo kuali otikchijkej. Satanás yolpakis tla ayakmo tiktekichiuiliaj Jehová, maski Jehová yotechtlapojpolui (noijki xikita 2 Corintios 2:5-7, 11).

14. ¿Ken tikmatij Jehová kineki techtlapojpoluis?

¹⁴ Xamo timotlajtlaniaj: “¿Ken nikmati Jehová yonechtlapojpolui?”. Tla ijkon timotlajtlaniaj, tikmatokej Jehová uelis techtlapojpoluis. ¿Tleka ijkon tikijtouaj? Yikipia miak xiuitl revista Akin Tetlapouijtok ijkin okijto: “Xamo ualeua oksepa tikchiuaj tlen amo kuali. Xamo tikitaj oui ayakmo ijkon tikchiuaskej maski yitiktekichiuiliaj toTajtsin Dios”. Uan noijki okijto: “Amo ma timokuayejyekokan Jehová amo keman techtlapojpoluis. Satanás kineki ijkon  ma timokuayejyekokan. Ijkuak oksepa tikchiuaj tlen amo kuali, satepan timoyolkokouaj. Non kiteititia tiyolkualmej uan Jehová uelis techtlapojpoluis. Ma tiyetokan tiyolyamankej uan ma tiktlatlaujtikan ma techtlapojpolui. Ijkon ayakmo timoyolkokoskej uan ayakmo tikchiuaskej tlen amo kuali. Ma tiktlatlaujtikan Jehová ken se chokotsin kiluia itajtsin ma kipaleui maski nochipa kichiua tlen amo kuali. Ik non, ma tikiluikan Jehová ma techpaleui porque ye sapanoua techtlasojtla”. *

15, 16. ¿Ken momachiliaj sekimej tokniuan ijkuak kajsikamatij Jehová kintlapojpoluia uan kintlasojtla?

¹⁵ Miakej tokniuan ayakmo moyolkokouaj porque kimatokej Jehová kintlapojpoluia. Ma tikitakan tlen okipanok se tokni, ye okipakti tlamachtil “Biblia okinpatili innemilis”. Ompa kijtoua se tokni siuatl okimachiliaya Jehová amo uelis kitlasojtlas porque okichi tlen amo kuali. Maski omoapolakti uan opanok miak xiuitl, tokni ok ijkon omokuayejyekouaya. Pero opejki mokuayejyekoua Jehová okitemakak iKone topatka ma mikiki uan non okipaleui kuali ma mokuayejyeko. *

¹⁶ ¿Ken okipaleui tokni tlen okitlajtolti? Ye okijto: “Ijkuak onikatka nitelpochtli onikitaya pornografía pero satepan ayakmo onikitak. Pero yikin oksepa opejki nikita. Onikinmilui tlayekankej ma nechpaleuikan uan axkan ayakmo nikita. Yejuan nechiluiaj Jehová nechtlasojtla uan nechiknomati. Pero ualeua nimokuayejyekoua amitlaj nopati uan Jehová amo uelis nechtlasojtlas”. Tokni okijto okipaleui tlen okitlajtolti. Ye okijto: “Yonikajsikamatki ijkuak nimokuayejyekoua Jehová amo keman nechtlapojpoluis, yetoskia ken amo nikpatioita Jesús topatka omotemakak para Jehová ma techtlapojpolui. Oniktlali nin tlamachtil kanin uelis san niman niktlajtoltis uan itech nimokuayejyekos ijkuak peuas nimoyolkokos”.

17. ¿Tlen okipaleui Pablo amo san ma kilnamikto tlen amo kuali okichi?

 ¹⁷ Tlen kinpanoua sekimej tokniuan techilnamiktia tlen okipanok tlatitlanil Pablo. Ijkuak ayamo okichiuaya ken Cristo okichi miak tlamantli amo kuali. Maski okilnamiktoka okichi tlen amo kuali, amo nochipa san non omokuayejyekojtoka (1 Tim. 1:12-15). Ye okimatiaya Jehová uelis kitlapojpoluiskia porque Jesús topatka omotemakak uan ijkon yetoskia ken Jehová okimakak non tetliokolil (Gál. 2:20). Ijkon amo san okilnamiktoka tlen amo kuali okichi uan ye omochijchika kitekichiuilis Jehová.

18. ¿Tlen otimomachtijkej axkan?

¹⁸ ¿Tlen otimomachtijkej? Achto, otikitakej yetoskia ken se tetliokolil tlen otechmakak Jehová ijkuak tikilnamikij tlen kuali otechpanok. Maski yiuejkika kuali otikatkaj, ijkuak yetos xochitlali okachi kuali tiyetoskej. Ome, maski sekimej itlaj otechchiuilijkej, tla tikintlapojpoluiaj, kuali tiyetoskej. Eyi, tla san tikilnamiktokej tlen amo kuali otikchijkej, ijkuak tiktekichiuiliskej Jehová amo tiyolpakiskej. Ma tikchiuakan ken Pablo, ma tikneltokakan Jehová yotechtlapojpolui.

19. ¿Ken tikmatij itech xochitlali amo keman tikilnamikiskej tlen achto otikchijkej?

¹⁹ Nochipa tiyoltoskej itech xochitlali uan amo keman tikilnamikiskej tlen achto otikchijkej. Biblia kijtoua: “Nochi tlamantli tlen achto opanok ayakmo moilnamikis” (Is. 65:17). Sekimej yiuejkika tiktekichiuilijtokej Jehová uan xamo yitikpiaj miak xiuitl pero itech xochitlali titelpochtiskej uan tiichpochtiskej (Job 33:25). Ik non, amo san ma tikilnamiktokan tlen otikchijkej yiuejkika uan ma tikitakan tlen uelis tikchiuaskej para uelis tiyetoskej itech xochitlali.