1. ¿Tlen technauatia Jehová ma tikchiuakan?

JEHOVÁ kipaktia tetlasojtlas ika nochi iyolo (Os. 6:6). Ye kinmiluia itekipanojkauan noijki ijkon ma tetlasojtlakan. Profeta Miqueas okijkuilo toTajtsin Dios technauatia ma tikpatioitakan titetlasojtlaskej ika nochi toyolo (Miq. 6:8, nota). Pero achto moneki tikmatiskej tlen kijtosneki titetlasojtlaskej ika nochi toyolo.

2. ¿Tlen kijtosneki amor leal?

² Tlajtoli “amor leal” ika español ijkuilitok kanaj 230 veces itech La Biblia. Traducción del Nuevo Mundo. Pero, ¿tlen kijtosneki? Itech página 1815 kijtoua: “Kijtosneki ijkuak ikaj nochipa tetlasojtla ika nochi iyolo. Nin tlajtoli miak uelta kiteititia ken Jehová techtlasojtla pero noijki ualeua kijtosneki ijkuak tejuan tikintlasojtlaj oksekimej”. Jehová okachi kiteititia tetlasojtla. Itech nin tlamachtil tikitaskej ye nochipa ijkon techititia uan itech okse tlamachtil tikitaskej tejuan noijki moneki tikintlasojtlaskej oksekimej ijkon ken ye.

3. ¿Tlen okijto Jehová?

³ Seki tonal satepan ijkuak israelitas okiskej Egipto, Jehová okilui Moisés itoka uan tlen kichiua. Okilui: “Jehová, Jehová, se Dios tlen teiknomati uan teajsikamati, amo san niman kualani uan sapanoua tetlasojtla uan kijtoua tlen melauak, ye miakej kintlasojtla, kintlapojpoluia akinmej motlapololtiaj uan ijkuak tlajtlakolchiuaj”  (Éx. 34:6, 7). Ika ninmej kuajkualtsitsintin tlajtolmej, Jehová okijto ken nochipa tetlasojtla ika nochi iyolo. Ma tikitakan ken kichiua.

4, 5. (1) ¿Tlen okijto Jehová? (2) ¿Tlen tlajtlanilmej tikinnankiliskej?

⁴ Jehová amo san okijto tetlasojtla, ye okijto: “Sapanoua tetlasojtla”. Nin tlajtoli ijkuilitok chikome uelta itech Biblia (Núm. 14:18; Neh. 9:17; 13:22; Sal. 86:15; 103:8; Joel 2:13; Jon. 4:2). Tlen ompa ijkuilitok kiteititia san Jehová ijkon kichiua. Jehová kineki ma tikmatikan ye nochipa tetlasojtla ika nochi iyolo. Ijkon ye kiteititia kipaktia ijkon kichiuas. * Ik non, tekiua David okijto: “Jehová te titetlasojtla ika nochi moyolo uan yetoskia ken ajsi hasta iluikak [...]. ¡ToTajtsin Dios sapanoua kualtsin titetlasojtla ika nochi moyolo! Itlampa moajasuan mopaleuiaj inkoneuan tlakamej” (Sal. 36:5, 7). Ijkon ken David, ¿tejuan noijki tikpatioitaj tikmatiskej toTajtsin Dios tetlasojtla ika nochi iyolo?

⁵ Para okachi kuali tikajsikamatiskej ken Jehová tetlasojtla, tikinnankiliskej ome tlajtlanilmej: ¿Akinmej nochipa kintlasojtla Jehová ika nochi iyolo? ¿Ken techpaleuia ijkuak Jehová ijkon techtlasojtla?

6. ¿Akinmej nochipa kintlasojtla Jehová ika nochi iyolo?

⁶ ¿Akinmej nochipa kintlasojtla Jehová ika nochi iyolo? Biblia kijtoua uelis techpaktis miak tlamantli ken vino, aceite, nochi kuali tikchiuaskej, tikmatiskej miak tlamantli uan tiyetoskej tiixtlamatkej (Prov. 12:1; 21:17; 29:3). Pero non tlamantli amo uelis tiktlasojtlaskej ika nochi toyolo. San uelis tikintlasojtlaskej oksekimej. ¿Non kijtosneki Jehová nochtin nochipa kintlasojtla ika nochi iyolo? Amo. Ye kintlasojtla ika nochi iyolo san akinmej iuan mouikaj, ik non, ye nochipa kinpaleuia. ToTajtsin Dios kineki kuali ma yetokan uan amo keman kinkaua.

7. ¿Ken yokiteititi Jehová nochtin kintlasojtla?

⁷ Jehová okiteititi nochtin kintlasojtla. Jesús okilui se tlakatl tlen omotokayotiaya Nicodemo: “Totajtsi Dios saikpanoa okintlasojtlak n tlaltikpaktlakah, yika  okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:1, 16; Mat. 5:44, 45).

8, 9. (1) ¿Tleka Jehová kiteititia kintlasojtla ika nochi iyolo akinmej kitekichiuiliaj? (2) ¿Tlen timomachtiskej?

⁸ Yotikitakej Jehová kintlasojtla ika nochi iyolo san akinmej iuan mouikaj, non kijtosneki akinmej kitekichiuiliaj. Tekiua David uan profeta Daniel ijkon okijtojkej. David okijkuilo: “Akinmej mitsixmatij nochipa xikintlasojtla ika nochi moyolo” uan “Jehová nochipa kintlasojtlas ika nochi iyolo akinmej kitlakamatij”. Daniel okijto: “Jehová akin melauak toTajtsin Dios, te okachi tiueyititok, [...] tikintlasojtla ika nochi moyolo akinmej mitstlasojtlaj ika nochi inyolo uan mitstlakamatij” (Sal. 36:10; 103:17; Dan. 9:4). Nikan tikitaj, Jehová kintlasojtla ika nochi iyolo akinmej kitekichiuiliaj porque yejuan kixmatij, kitlakaitaj, kitlasojtlaj uan kitlakamatij. Ye ijkon kintlasojtlaj akinmej pouij itech ialtepe porque yejuan kiueyichiuaj ken ye kineki.

⁹ Jehová yotechtlasojtlaya maski achto amo otiktekichiuiliayaj (Sal. 104:14). Pero opejki techtlasojtla ika nochi iyolo ijkuak tejuan otipejkej tikueyichiuaj. Ik non, ye techiluia nochipa techtlasojtlas (Is. 54:10). David noijki ijkon okitak: “Jehová kipaleuis akin nochipa kitlasojtla” (Sal. 4:3). ¿Tlen moneki tikchiuaskej ijkuak tikitaj Jehová techtlasojtla? Salmista okijto: “Nochi non kilnamiktos akin ixtlamatki uan kuali mokuayejyekos ken kiteititia Jehová tetlasojtla ika nochi iyolo” (Sal. 107:43). Jehová okichi ma moijkuilo ninmej tlajtolmej, ika eyi tlamantli tikitaskej ken techpaleuia ijkuak Jehová techtlasojtla ika nochi iyolo.

10. ¿Ken techpaleuia tikmatiskej Jehová nochipa tetlasojtla? (Salmo 31:7).

¹⁰ToTajtsin Dios nochipa tetlasojtlas. Itech Salmo 136 ijkuilitok 26 uelta toTajtsin  Dios nochipa tetlasojtlas. Achto versículo kijtoua: “Xiktlasojkamatilikan Jehová porque ye yolkuali; tetlasojtla ika nochi iyolo uan nochipa techtlasojtlas” (Sal. 136:1). Itech versículos 2 hasta 26, oksepa ijkuilitok: “Porque tetlasojtla ika nochi iyolo uan nochipa techtlasojtlas”. Ijkuak tiktlajtoltiaj non salmo, techtlajtlachialtia ken Jehová nochipa techtlasojtla uan kiteititia ika miak tlamantli. Ijkuak Biblia kijtoua: “Porque tetlasojtla ika nochi iyolo uan nochipa techtlasojtlas”, ik non, amo keman techkauas. ¡Techyolchikaua tikmatiskej Jehová nochipa kinpaleuia akinmej kitekichiuiliaj! Ye nochipa inmiuan kajki uan okachi kinpaleuia ijkuak tlajyouiaj. ¿Ken techpaleuia? Tiyolpakij tikmatiskej Jehová touan kajki. Ye techpaleuia ma tiktekichiuilijtokan uan techyolchikaua ijkuak titlajyouiaj (xiktlajtolti Salmo 31:7).

11. Ijkon ken kijtoua Salmo 86:5, ¿tlen kiyolinia Jehová ma tetlapojpolui?

¹¹ToTajtsin Dios tetlapojpoluia porque tetlasojtla ika nochi iyolo. Ijkuak Jehová kita ikaj melauak moyolkopa uan mochijchikaua kipatlas inemilis. David okijto itech se salmo: “Maski otitlajtlakolchijkej, [Jehová] amo techtlajyouiltia ken technamiki uan maski yotikchijkej tlen amo kuali, amo techchiuilia ken technamiki” (Sal. 103:8-11). David kuali okimatiaya ken momachilia ikaj ijkuak tlajtlakolchiua. Pero noijki okajsikamatki Jehová kineki tetlapojpoluis. Ijkuak David omotlatlaujti okijto tlen kiyolinia Jehová ma tetlapojpolui (xiktlajtolti Salmo 86:5). Ye tetlapojpoluia porque kintlasojtla ika nochi iyolo nochtin akinmej kiluiaj ma kintlapojpolui.

12, 13. ¿Tlen techpaleuis ayakmo ma timoyolkokokan tla yiuejkika otitlajtlakolchijkej?

¹² Techpaleuis tla amo kuali timomachiliaj ijkuak titlajtlakolchiuaj porque ijkon timoyolkopaskej uan ayakmo tikchiuaskej tlen amo kuali. Pero sekimej tokniuan moyolkokouaj porque yiuejkika otlajtlakolchijkej. Mokuayejyekouaj Jehová amo keman kintlapojpoluis  maski yomoyolkopkej. Tla tejuatsin ijkon timomachilia, mitspaleuis tikmatis Jehová mitstlasojtla ika nochi iyolo.

¹³¿Ken techpaleuia? Maski titlajtlakolejkej, uelis tiyolpakiskej ijkuak tiktekichiuiliskej Jehová uan amo techkuejsos totlalnamikilis. ¿Tleka? Porque ‘ika iesso n Jesús, iKone n Totajtsi Dios, kichipawa nochi totlajtlakolwah’ (1 Juan 1:7). Tla timoyolkokouaj porque itlaj amo kuali tikchiuaj, ma tikilnamikikan Jehová kineki kintlapojpoluis akinmej moyolkopaj. David okijto akin tetlasojtla ika nochi iyolo kimati tetlapojpoluia. Ye okijkuilo: “Ijkon ken ipan tlaltikpak sapanoua uejka kajki iluikak, ijkon sapanoua kintlasojtla ika nochi iyolo akinmej kitlakamatij. Ijkon ken uejka kajki kanin kisa tonaltsin uan kanin poliuiti, ijkon uejka kintlalia totlajtlakoluan” (Sal. 103:11, 12). Non kiteititia Jehová melauak kineki kintlapojpoluis akinmej moyolkopaj (Is. 55:7).

14. ¿Tlen okiyekijto David?

¹⁴ToTajtsin Dios tetlasojtla ika nochi iyolo, non techpaleuia nochipa iuan ma timouikakan. Se tonal, David okilui Jehová: “Monauak uelis nimotlatis; techmaluia para amo ma nimomojti. Uan ijkuak techmakixtis sapanoua niyolpakis”. Noijki okijto akin kineltoka Jehová kipaleuis, ye kitlasojtlas ika nochi iyolo (Sal. 32:7, 10). Yiuejkika tla se altepetl okipiaya tepamitl, amitlaj okinchiuiliayaj akinmej ompa ochantiayaj. Noijki ijkon, ken Jehová techtlasojtla yetoskia ken se tepamitl tlen techmaluia nochipa ma titlaneltokakan. Jehová tetlasojtla ika nochi iyolo, ik non, techyoltilana iuan ma timouikakan (Jer. 31:3).

15. ¿Tleka tikijtouaj ijkuak Jehová techtlasojtla ken yetoskia ken se “tepamitl chikauak”?

¹⁵ ¿Tlen okse tlamantli okijto David para kiteititis Jehová techmaluia? Ye okijkuilo: “Te titoTajtsin Dios akin melauak techpaleuia, titoTajtsin Dios akin techtlasojtla ika nochi moyolo”. Noijki okijto: “Ye nechititia nechtlasojtla ika nochi iyolo uan nechyolchikaua, ye nechpaleuia uan nechmakixtia, ye noescudo uan yetoskia ken nechtlakentia” (Sal. 59:17; 144:2). David okijto Jehová tetlasojtla ika nochi iyolo uan techyolchikaua. Ijkon okiteititi tla tejuan tiktekichiuiliaj maski san kanin tiyetoskej noso san kanin tichantiskej, Jehová techmaluis uan non techpaleuis nochipa kuali iuan ma timouikakan. Salmo 91 ijkon techiluia. Akin okijkuilo non salmo okijto: “Ne nikiluis Jehová: ‘Te tinopaleuilis uan tinotepamitl chikauak’” (Sal. 91:1-3, 9, 14). Moisés noijki okineskayoti ken techpaleuia Jehová (Sal. 90:1, nota). Ijkuak yiixpoliuiskia okijto tlen noijki techyolchikaua, ye okijkuilo: “ToTajtsin Dios nochipa mitsmaluia; ika imauan mitspaleuia” (Deut. 33:27). ¿Tlen techmachtia tlen okijto Moisés?

16. ¿Ika tlen ome tlamantli techpaleuia Jehová? (Salmo 136:23).

¹⁶ Tla tikneltokaj Jehová techmaluis, amo timomojtiskej. Pero xamo ualeua timoyolkokouaj uan timokuayejyekouaj nochipa ijkon timomachiliskej. Ijkuak ijkon techpanos, ¿ken techpaleuis Jehová? (xiktlajtolti Salmo 136:23). Yetoskia ken ika imauan techpaleuis (Sal. 28:9; 94:18). ¿Ken techpaleuia? Ma tikilnamiktokan toTajtsin Dios nochipa techpaleuis uan ijkon kichiua ika ome tlamantli.  Se, maski san kanin tichantiskej ye nochipa uelis techmaluis. Ome, Jehová kiteititia kitekipachoua tlen techpanoua.

17. ¿Tlen uelis tikneltokaskej? (Salmo 33:18-22).

¹⁷ Yotimomachtijkej, ijkuak titlajyouiskej Jehová techpaleuis uan techyolchikauas para nochipa kuali iuan ma timouikakan (2 Cor. 4:7-9). Profeta Jeremías okijto: “Jehová tetlasojtla ika nochi iyolo, ik non, amo tiixpoliuij porque ye nochipa techititia techiknomati” (Lam. 3:22). Tikneltokaj Jehová nochipa techtlasojtla ika nochi iyolo porque Biblia ijkon kijtoua (xiktlajtolti Salmo 33:18-22).

18, 19. (1) ¿Tlen moneki tikilnamikiskej? (2) ¿Tlen tikitaskej itech okse tlamachtil?

¹⁸ Ik non, ¿tlen moneki tikilnamikiskej? Jehová yotechtlasojtlaya maski ayamo otiktekichiuiliayaj porque ye kiteititia nochtin kintlasojtla. Pero ijkuak opejki kuali iuan timouikaj ye opejki techtlasojtla ika nochi iyolo. Non kiyolinia ma techmalui uan non yetoskia ken ika imauan techpaleuia. Jehová nochipa touan yetos uan noijki kichiuas nochi tlen yotechilui porque kineki kuali ma tiyetokan (Sal. 46:1, 2, 7). Ik non, maski san tlen techpanos, Jehová techyolchikauas uan ijkon tejuan nochipa tiktlakamatiskej.

¹⁹ Axkan yotimomachtijkej ken Jehová nochipa techtlasojtla ika nochi iyolo. Pero noijki kineki ijkon ma titetlasojtlakan. Itech okse tlamachtil non tikitaskej.