1. ¿Tlen tikmatij akinmej tikchiuaj ken Cristo?

 TIKMATIJ miakej tokniuan amo kinkakij ijkuak tetlapouiaj uan xamo satepan okachi miakej ayakmo kinekiskej techkakiskej (Dan. 11:44; 2 Tim. 3:12; Apoc. 16:21). Ijkuak ijkon panos, tikmatij Jehová techpaleuis porque nochipa kinpaleuia itekipanojkauan makichiuakan tlen kinnauatia. Matikitakan ken okipaleui profeta Ezequiel ijkuak okintlapoui judíos.

2. (1) ¿Ken okipiayaj innemilis akinmej kintlapouiskia Ezequiel? (Ezequiel 2:3-6). (2) ¿Tlen tikitaskej?.

² ¿Ken okipiayaj innemilis akinmej kintlapouiskia Ezequiel? Jehová okijto teixnamikiskiaj, amo kinekiskiaj tetlakamatiskej uan moueyinekiskiaj. Sapanoua amo yolkualmej okatkaj ikinon Jehová miak uelta okilui Ezequiel amo mamomojti (xiktlajtolti Ezequiel 2:3-6). Ezequiel ueli otetlapoui porque (1) Jehová okinauati matetlapoui (2) Iespíritu santo Jehová okipaleui (3) Okitlajtolti iTlajtol toTajtsin Dios. Ezequiel okipaleui non eyi tlamantli, ¿ken uelis tejuan noijki techpaleuis?

3. ¿Tlen okiyolchika Ezequiel uan tlen okipaleui makineltoka Jehová kipaleuiskia?

³ Jehová okilui Ezequiel “Nimitstitlani” (Ezeq. 2:3, 4). Tlen okilui Jehová sapanoua okiyolchika. Xamo okilnamik noijki ijkon okinmilui Moisés uan Isaías ijkuak okinpejpenki para mayetokan iprofetas (Éx. 3:10; Is. 6:8). Ezequiel noijki okimatiaya okseki profetas oui okitakej kitekichiuiliskej toTajtsin Dios, pero Jehová okinpaleui. Ikinon ijkuak okilui: “Nimitstitlani” okimatiaya noijki kipaleuiskia. Itech amochtli Ezequiel miak uelta kijtoua: “Jehová onechilui ninmej tlajtolmej” (Ezeq. 3:16; 6:1). Profeta Ezequiel okineltokaya Jehová okititlanki. Itajtsin okatka teopixki ye okimachti Jehová okinmiluiaya kinpaleuiskia iprofetas. Jehová okinmilui Isaac, Jacob uan Jeremías “mouan nika” (Gén. 26:24; 28:15; Jer. 1:8).

4. ¿Ken Jehová okiyolchika Ezequiel?

⁴ ¿Tlen kichiuaskiaj judíos ijkuak Ezequiel kinmatiltiskia tlen Jehová okilui? Jehová okijto: “Akinmej pouij ichan Israel amo kinekiskej mitskakiskej porque ne noijki amo kinekij nechkakiskej” (Ezeq. 3:7). Ijkuak judíos amo okikakilijkej tlen okinmilui Ezequiel, okiteititijkej amo okikakilijkej Jehová. Noijki tlen okilui okititi kuali otekipano ken profeta maski judíos amo okikakilijkej, ijkuakon yejuan kimatiskiaj akin ijkon okinmilui okatka profeta (Ezeq. 2:5; 33:33). Sapanoua okiyolchika  Ezequiel tlen Jehová okilui uan ijkon ueli okitekichiuili.

5. ¿Tleka techyolchikaua tlen kijtoua Isaías 44:8?

⁵ Tejuan noijki techyolchikaua tikmatiskej Jehová techtitlani matitetlapouikan uan techkauilia matiyetokan tiiTlaixpantijkauan (Is. 43:10). Ijkon ken Jehová okilui Ezequiel amo mamomojti, tejuan noijki techiluia amo matimomojtikan. Ikinon amo techmomojtiaj akinmej teixnamikij porque tikmatij Jehová techtitlani matitetlapouikan uan ye techpaleuia (xiktlajtolti Isaías 44:8).

6. (1) ¿Tleka tikneltokaj Jehová techpaleuia? (2) ¿Tlen techyolchikaua?

⁶ Jehová techiluia techpaleuis. Ye kijtoua: “Namejuan notlaixpantijkauan” noijki ijkin kijtoua: “Ijkuak tipanos ijtik atl melauak nimitspaleuis uan amo tiapolakis ijtik aueyatl. Ijkuak tipanos ijtik tlitl amo timotlatis nion timochichinos” (Is. 43:2). Ijkuak titetlapouiaj uelis techpanos seki tlamantli tlen yetoskia ken aueyatl uan tlitl (Is. 41:13). Ijkon ken okipanok Ezequiel, miakej amo kinekij techkakiskej. Pero non amo kijtosneki tejuan amo kuali titetlapouiaj. Techyolchikaua tikmatiskej Jehová yolpakij ijkuak titetlapouiaj. Pablo okijto: “Dios kintlaxtlawis ijkó kemi otekitikeh” (1 Cor. 3:8; 4:1, 2). Se tokni tlen yikipia miak xiuitl tlen tlapaleuijtok ken precursora, okijto: “Niyolpaki porque nikmati Jehová techteochiua tla timochijchikauaj tiktekichiuiliaj”.

7. ¿Ken omomachiliaya Ezequiel ijkuak omokuayejyekouaya tlen okitak? (Xikita dibujo tlen kajki itech página 1).

⁷ Ezequiel okitak ken tlapaleuia iespíritu santo Jehová, okitak ken okinpaleui ángeles uan ken okoliniaya icarro Jehová (Ezeq. 1:20, 21). Ye okijto: “Onimoixtlapacho”, hasta ouetski ipan tlali (Ezeq. 1:28). Xamo ijkuak omokuayejyekouaya tlen okitak, okachi okineltokaya iespíritu santo Jehová kipaleuiskia.

8, 9. (1) ¿Tlen okilui Jehová makichiua Ezequiel? (2) ¿Ken Jehová okipaleui Ezequiel?

⁸ Jehová okilui Ezequiel: “Ikone tlakatl, ximoketsa para mouan nimotlapouis”. Tlen okilui uan iespíritu santo Jehová okiyolchika, ikinon okijkuilo: “Espíritu santo notech okalak uan okichi manimoketsa” (Ezeq. 2:1, 2). Ijkuakon iespíritu santo Jehová okiyekanki (Ezeq. 3:22; 8:1; 33:22; 37:1; 40:1). Ijkon Ezequiel kuali okintlapoui judíos akinmej amo okinekiayaj tetlakamatiskej (Ezeq. 3:7). Jehová okilui: “Onikchi moixko mamochiua tlakuauak ijkon ken yejuan inmixko uan moixkuak mayeto tlakuauak ijkon ken yejuan inmixkuak. Moixkuak onikchi mayeto chikauak ken se diamante, nin okachi chikauak amo ken se tetl. Amo xikinmauili uan inmixko amo mamitsmomojtikan” (Ezeq. 3:8, 9). Yetoskia ken Jehová okilui: “Maski yejuan amo kinekij tetlakamatiskej, te amo ximosotlaua”.

 ⁹ Satepan iespíritu santo toTajtsin Dios okiyekanki Ezequiel para matetlapouiti. Ye okijkuilo: “Ima Jehová nopan chikauak okatka”. Kanaj se semana Ezequiel omokuayejyeko tlen omonekiaya kijtos (Ezeq. 3:14, 15). Satepan Jehová okilui omonekiaya yas kanin amikaj kikuejsoskia, ijkuakon iespíritu santo toTajtsin Dios opejki kipaleuia (Ezeq. 3:23, 24). Satepan Ezequiel yiuelis tetlapouiskia.

10. ¿Tlen techpaleuia matitetlapouikan uan tleka?

¹⁰ Tejuan noijki techpaleuia Jehová ijkon ken okipaleui Ezequiel. Iespíritu santo Jehová okiyolchika para kuali tetlapouis. Tejuan noijki amo kuali titetlapouiskiaj tla iespíritu santo Jehová amo techpaleuiskia. Satanás amo kineki matitetlapouikan (Apoc. 12:17). Maski tikmatij Satanás chikauak, tejuan tiktlaniliaj ijkuak titetlapouiaj (Apoc. 12:9-11). Ijkuak ijkon tikchiuaj tikteititiaj amo techmomojtiaj. Noijki ijkuak titetlapouiaj maski techtlajyouiltiaj tikteititiaj techpaleuia iespíritu santo Jehová uan ye techselia (Mat. 5:10-12; 1 Ped. 4:14).

11. ¿Ken techpaleuia iespíritu santo Jehová uan tlen moneki tikchiuaskej para tikseliskej?

¹¹ Ijkuak Jehová okiyolchika Ezequiel techmachtia iespíritu santo Jehová techpaleuis matitetlapouikan maski san tlen panos (2 Cor. 4:7-9). Tla tiknekij tikseliskej iespíritu santo Jehová, moneki tiktlajtlaniliskej uan tikneltokaskej ye techmakas. Jesús okinmilui imachtijkauan: “Xiktlajtlanilikah” “Xiktemokah” “Xitlakakalatsakah” uan Jehová “nomechmakas n Espíritu Santo tla nonkitlajtlaniliskeh” (Luc. 11:9, 13; Hech. 1:14; 2:4).

12. Ijkon ken kijtoua Ezequiel 2:9-3:3, ¿kanin okiski rollo uan tlen okijtouaya?

¹² Ezequiel okiseli iespíritu santo Jehová uan noijki omomachti iTlajtol, yetoskia ken okikua iTlajtol toTajtsin Dios. Ezequiel okitak ikaj okikitskijtoka se rollo (xiktlajtolti Ezequiel 2:9–3:3). ¿Kanin okiski rollo? ¿Tlen okijtouaya? ¿Ken omomachti Ezequiel? Rollo okiski itech itrono Jehová. Xamo toTajtsin Dios okipejpenki se ángel tlen okitak Ezequiel para kitemaktilis rollo (Ezeq. 1:8; 10:7, 20). Rollo okipiaya iTlajtol toTajtsin Dios. Ezequiel omonekiaya kinmiluis tlen oijkuilitoka itech rollo judíos tlen amo otetlakamatiayaj (Ezeq. 2:7). Oijkuilitoka ixko rollo uan ikuitlapan.

13. ¿Tlen okilui Jehová makichiua Ezequiel uan ye tlen okimachili?

¹³ Jehová okilui iprofeta: “Xikkua rollo [...] hasta matemi moijtik”. Ezequiel okichi tlen okilui. ¿Tlen kijtosneki tlen okitak Ezequiel? Ezequiel omonekiaya kajsikamatis tlen kinmatiltiskia judíos. Ikinon omonekiaya kuali mokuayejyekos tlen okitak. Satepan Ezequiel okimachili rollo “tsopelik ijkon ken neujtli” (Ezeq. 3:3). Ijkon okimachili porque Ezequiel oyolpakiaya yetos iprofeta Jehová (Sal. 19:8-11). Noijki okitlasojkamatili Jehová porque okipejpenki makitekichiuili.

14. ¿Tlen okipaleui Ezequiel makichiua tlen Jehová okinauati?

¹⁴ Satepan Jehová okilui Ezequiel: “Xikkaki nochi tlen nimitsiluia uan xikseli itech moyolo” (Ezeq. 3:10). Jehová okilui makilnamiki tlen okijtouaya rollo uan itech mamokuayejyeko. Ijkon Ezequiel okachi kineltokiliskia Jehová uan okachi kajsikamatiskia tlen omonekiaya kinmiluis judíos (Ezeq. 3:11). Ijkuak Ezequiel okajsikamatki tlen kitematiltiskia, okipaleui makichiua tlen Jehová okinauati (noijki xikita Salmo 19:14).

15. ¿Tlen moneki tikchiuaskej para nochipa titetlapouiskej?

¹⁵ Tla tiknekij nochipa titetlapouiskej, matimomachtikan iTlajtol toTajtsin Dios. Moneki tikajsikamatiskej ika nochi toyolo tlen Jehová techiluia. Axkan Jehová techmachtia ika iTlajtol. ¿Tlen moneki tikchiuaskej para timoyekanaskej ika iTlajtol toTajtsin Dios?

16. ¿Tlen moneki tikchiuaskej ijkuak tiktlajtoltia iTlajtol toTajtsin Dios uan ken uelis ijkon tikchiuaskej?

¹⁶ Tejuan techpaleuiaj tlen tikkuaj. Noijki tla tiktlajtoltiaj iTlajtol toTajtsin Dios, techpaleuis okachi matitlaneltokakan, non techmachtia tlen okitak Ezequiel. Jehová kineki matimomachtikan iTlajtol uan matikajsikamatikan, ijkon tikchiuaskej tla tiktlajtoltiaj, timokuayejyekouaj tlen ompa kijtoua uan timotlatlaujtiaj. Porque ijkuak timotlatlaujtiaj timoyektlaliaj para timomachtiskej iTlajtol toTajtsin Dios, satepan tiktlajtoltiaj uan timokuayejyekouaj tlen ompa kijtoua. Tla ijkon tikchiuaj, tlen timomachtiskej  uan timokuayejyekoskej ajsis itech toyolo.

17. ¿Tleka moneki matiktlajtoltikan Biblia uan itech matimokuayejyekokan?

¹⁷ ¿Tleka moneki matiktlajtoltikan Biblia uan itech matimokuayejyekokan? Porque ijkuak ijkon tikchiuaj techpaleuia matiyetokan tiyolchikauakej, ijkon kuali titetlapouiskej uan noijki techyolchikauas satepan ijkuak xamo tiktematiltiskej toTajtsin Dios kipojpolos nochi tlen amo kuali. Okachi tiktlasojtlaj Jehová uan iuan timouikaj ijkuak timokuayejyekouaj tlen kichiua. Tla ijkon tikchiua, timoyolseuiskej uan tiyolpakiskej (Sal. 119:103).

18. ¿Tlen moneki kajsikamatiskej akinmej tikintlapouiaj uan tleka?

¹⁸ Tejuan titetlapouiaj tlen Jehová kineki maski amo tiprofetas ken Ezequiel. Yotikijtojkej ijkon tikchiuaskej hasta Jehová makijto ayakmo matitetlapouikan. Ijkuak Jehová kinmixkomakas akinmej tikintlapouiaj, yejuan amo uelis kijtoskej amikaj okinmilui tlen panoskia (Ezeq. 3:19; 18:23). Ijkuakon moneki kajsikamatiskej Jehová otechnauati tlen otikintlapouijkej.

19. ¿Tlen techyolchikauas matitetlapouikan?

¹⁹ ¿Tlen techyolchikauas matitetlapouikan? Techpaleuiaj eyi tlamantli tlen okipaleui Ezequiel. Titetlapouiaj porque Jehová technauatia, iespíritu santo techyolchikaua uan timomachtiaj iTlajtol. Tikmati Jehová techpaleuis matitetlapouikan uan matitlaxikokan hasta matlami nochi tlen amo kuali (Mat. 24:13).