1, 2. (1) ¿Tlen tikitaskej axkan? (2) ¿Ken kiteititia Jehová kineki techpaleuis?

 JEHOVÁ techpaleuia matitlaxikokan uan matiyolpakikan ijkuak tiktekichiuiliaj maski titlajyouiaj. Axkan tikitaskej ken techpaleuia Jehová uan tlen uelis tikchiuaskej para ijkon makichiua. ¿Melauak kineki Jehová techpaleuis? Matikitakan.

² Ijkuak apóstol Pablo okinmijkuilili carta tokniuan Hebreos, okijto itlaj tlen miak ipati: “Amo nimawi, amaka weletis itla nechtoktis porke Dios nechpalewia” (Heb. 13:6). Sekimej diccionarios bíblicos kijtoua tlajtoli “nechpalewia” kijtosneki ijkuak ikaj san niman kipaleuia akin tlayouijtok. Matimokuayejyekokan ken Jehová san niman kipaleuia akin tlajyouijtok. Jehová kineki techpaleuis uan kichiua ika nochi iyolo. Titlaxikouaj uan tiyolpakij ijkuak tiktekichiuiliaj Jehová porque ye techpaleuia.

3. ¿Tlen eyi tlamantli techmakatok Jehová para matitlaxikokan uan matiyolpakikan?

³ ¿Ken techpaleuia Jehová matitlaxikokan uan matiyolpakikan?  Non tikitaskej itech amochtli Isaías. Porque miakej profecías tlen okijkuilo Isaías techpaleuiaj. Noijki porque tlen Isaías okijkuilo techpaleuiaj matikajsikamatikan tlen kichiua Jehová. Itech capítulo 30 okijkuilo seki tlamantli kualtsitsintin para matikajsikamatikan ken Jehová kipaleuia ialtepe. Tikitaskej: Se, Jehová techkaki uan technankilia ijkuak tiktlatlaujtiaj, ome, ye techpaleuia uan eyi, ye techteochiua axkan uan satepan. Matikitakan ken techpaleuiaj nin eyi tlamantli.

4. (1) ¿Tlen okinmilui Jehová kinpanoskia judíos uan tleka okika ijkon makinpano? (2) ¿Tlen okinmilui Jehová akinmej okitlakamatkej? (Isaías 30:18, 19).

⁴ Itech amochtli Isaías ijkuak peua capítulo 30, Jehová okinmilui judíos “amo tetlakamatij” uan noijki okinmilui “san okachi tlajtlakolchiuaj”. Satepan okinmilui: “Itech nanmoaltepe amikaj kineki tetlakamatis, [...] amo nankinekij nankikakiskej itlanauatiluan Jehová” (Is. 30:1, 9). Ijkuak yejuan amo okichijkej tlen Jehová okinnauati okachi otlajyouijkej (Is. 30:5, 17; Jer. 25:8-11). Ijkon opanok ijkuak okinuikakej Babilonia. Pero sekimej judíos kema okitlakamatiayaj Jehová ikinon okinmilui ika profeta Isaías satepan kinpaleuiskiaj (xiktlajtolti Isaías 30:18, 19). Jehová ijkon okichi ijkuak judíos oksepa omokopkej inmialtepe pero amo san niman ijkon opanok. “Jehová kichixtok namechpaleuis uan kiteititis namechiknomati”, non kijtosneki judíos omonekiaya mochiaskej para oksepa mokopaskiaj inmialtepe. Opanok 70 xiuitl uan Jehová okinkauili sekimej judíos oksepa mamokopakan Jerusalén (Is. 10:21; Jer. 29:10). Sapanoua oyolpakej uan ayakmo omoyolkokojkej ijkuak ompa oajsitoj.

5. ¿Tlen techilnamiktiaj Isaías 30:19?

⁵ Axkan noijki techpaleuia tlen kijtoua nin texto: “Ye melauak mitspaleuis ijkuak kikakis tiktlatlaujtia mamitspaleui” (Is. 30:19). Isaías okijto Jehová san niman techkakis uan technankilis ijkuak tiktlatlaujtiaj. Ye noijki okijto: “San niman mitsnankilis ijkuak mitskakis”. Tlen okijto techilnamiktiaj toTajtsin Dios kichiua ika nochi iyolo ijkuak technankilia uan techpaleuiaj. Ijkuak ijkon kichiua techpaleuiaj matitlaxikokan uan matiyolpakikan.

6. ¿Ken kiteititia amochtli Isaías Jehová kinkaki sejse itekipanojkauan ijkuak kitlatlaujtiaj?

⁶ Versículo 19 kiteititia Jehová kinkaki sejse itekipanojkauan ijkuak kitlatlaujtiaj. ¿Tleka ijkon tikijtouaj? Porque itech amochtli Isaías ijkuak peua capítulo 30 Jehová kitlapouia nochi ialtepe. Pero itech versículo 19 kintlapouia sejse itekipanojkauan. Isaías kijtoua: “Te amo tichokas” “ye melauak mitspaleuis” “san niman mitsnankilis”. Jehová sapanoua techtlasojtlaj ken se teta kintlasojtla ikoneuan, ijkuak se ikone moyolkokoua amo kiluia: “Ximochijchikaua  ken mokni”. Amo techiluia ijkon porque techtlasojtla uan techkaki ijkuak timotlatlaujtiaj (Sal. 116:1; Is. 57:15).

7. ¿Ken techititia Isaías uan Jesús moneki nochipa matimotlatlaujtikan?

⁷ Xamo Jehová kichiuas itlaj tlen techpaleuis matitlaxikokan ijkuak tikiluiskej tlen techtekipachoua. Pero tla tikitaj amo timoyolseuiaj, ok moneki tikiluijtoskej Jehová matechpaleui para matitlaxikokan uan ye techiluiaj ijkon matikchiuakan. Isaías okijkuilo: “Nochipa xiktlatlaujtikan” (Is. 62:7). Non kijtosneki mojmostla moneki tiktlatlaujtiskej Jehová uan tikneltokaskej ye techpaleuis. Tlen okijkuilo Isaías techilnamiktiaj tlen okijto Jesús itech Lucas 11:8-10, 13. Ye otechilui nochipa matiktlajtlanikan iespíritu santo Jehová uan otechilui tleka moneki ijkon matikchiuakan. Noijki uelis tikiluiskej Jehová matechpaleui ijkuak tikpejpenaskej tlen tikchiuaskej.

8. ¿Ken opanok tlen kijtoua Isaías 30:20, 21?

⁸ (Xiktlajtolti Isaías 30:20, 21). Se xiuitl uan tlajko babilonios okiyaualojkej Jerusalén. Akinmej ompa ochantiayaj sapanoua otlajyouijkej pero itech versículos 20 uan 21, Jehová okinmilui judíos tla yejuan moyolkopaskiaj uan ayakmo kichiuaskia tlen amo kuali, ye kinmakixtiskia. Isaías okijto Jehová “Kuali Tlamachtia” uan okinmilui judíos ye kinmachtiskia makiueyichiuakan ken ye kineki uan ijkon opanok ijkuak judíos omokopkej Jerusalén. Jehová okinmachti judíos makiueyichiuakan ken ye kineki uan yejuan ijkon okichijkej. Axkan noijki tiyolpakij ijkuak Jehová techmachtiaj.

9. ¿Ken techmachtia Jehová?

⁹ Tlen okijto Isaías kiteititiaj Jehová techmachtia uan tejuan tiyolpaki ijkon makichiua, matikitakan ken techmachtia. Isaías okijkuilo: “Ika moixtololouan tikitas akin Kuali Tlamachtia”. Non techititia Jehová techmachtijtok uan axkan sapanoua techpaleuia porque tikitaj ken techmachtiaj ika ialtepe. Sapanoua tiktlasojkamatiliaj porque ijkon kichiua  ijkuak timonechikouaj, ijkuak tiktlajtoltiaj amatlajkuilolmej, ijkuak tiauij ueyi nechikolmej, ijkuak tikitaj JW Broadcasting^® uan okseki tlamantli tlen techpaleuiaj matitlaxikokan uan matiyolpakikan.

10. ¿Ken techtlapouia Jehová?

¹⁰ Isaías okijto ken techmachtia Jehová , ye okijkuilo: “Monakasuan kikakiskej mokuitlapan se tlajtoli”. Profeta Isaías okiteititi Jehová ken akin tlamachtia porque akin tlamachtia kuali tlayekana uan Jehová ijkon kichiua. ¿Ken kichiua axkan? Ijkon kichiua ijkuak tiktlajtoltia iTlajtol, maski yikipia miak xiuitl tlen ompa ijkuilitok ok techpaleuia. Ikinon ijkuak tiktlajtoltia, yetoskia ken Jehová techtlapouijtok (Is. 51:4).

11. ¿Tlen ome tlamantli moneki tikchiuaskej para titlaxikoskej uan tiyolpakiskej?

¹¹ ¿Tlen uelis tikchiuaskej para matechpaleui iTlajtol toTajtsin Dios uan ialtepej? Isaías okijkuilo ome tlamantli: “Nin ojtli” uan “itech xinemikan” (Is. 30:21). Amo san moneki tikixmatiskej ojtli, moneki itech tinemiskej. Jehová techmachtia ika ialtepe uan iTlajtol, ijkon tikmatij tlen kineki matikchiuakan uan noijki techmachtia ken moneki tikchiuaskej. Tla tiknekij titlaxikoskej uan tiyolpakiskej ijkuak tiktekichiuiliaj Jehová, moneki tikchiuaskej non ome tlamantli uan ye techteochiuas.

12. Ijkon ken kijtoua Isaías 30:23-26, ¿ken okiteochi Jehová ialtepe?

¹² (Xiktlajtolti Isaías 30:23-26). ¿Ken omochi non profecía ijkuak judíos omokopkej Jerusalén? ToTajtsin Dios okinmakak miak tlakuali uan okinmachti iTlajtol ijkuak judíos oksepa opejkej kiueyichiuaj ken ye kineki. ¡Jehová sapanoua okiteochi ialtepe! Ijkon ken kijtoua versículo 26 Jehová okichi sapanoua mapetlani ialtepe (Is. 60:2). Ijkon judíos omochijchikauayaj kitekichiuiliskej Jehová uan sapanoua oyolpakiayaj (Is. 65:14).

13. ¿Tlen profecía mochijtok axkan?

¹³ Axkan mochijtok profecía tlen okijto Isaías porque tiitekipanojkauan  toTajtsin Dios tiktekichiuiliaj ken ye kineki. Itech 1919 miakej ayakmo okineltokakej tlen tlamachtia ueyi Babilonia noso religiones tlen tlakajkayauaj. Axkan okachi kuali tikatej uan tiyolpakij tiktekichiuilia Jehová iuan tokniuan (Is. 51:3; 66:8).

14. Xikijto akinmej kiueyichiuaj Jehová ken ye kineki.

¹⁴ Itech 1919 tokniuan tlapejpenalmej opejkej kiueyichiuaj toTajtsin Dios ken ye kineki. Satepan “oksikimeh ichkameh” akinmej chantiskej nikan tlaltikpak noijki opejkej kiueyichiuaj Jehová iuan tlapejpenalmej (Juan 10:16; Is. 25:6; 65:13).

15. ¿Kanin uelis tikueyichiuaskej toTajtsin Dios ken ye kineki?

¹⁵ Itech nochi tlaltikpak katej tokniuan tlen kiueyichiuaj toTajtsin Dios ken ye kineki. Tla tejuan tikueyichiuaj Jehová ken ye kineki, noijki tipouij iuan tokniuan akinmej ijkon kichiuaj maski tlatlamantli toaltepe.

16. ¿Ken moneki tikitaskej ialtepe toTajtsin Dios?

¹⁶ Moneki tikpatioitaskej ialtepe toTajtsin Dios tla tiknekij ok tikueyichijtoskej Jehová inmiuan tokniuan, ikinon amo san moneki tikitaskej tlen amo kuali kichiuaj tokniuan (Juan 17:20, 21). Matimokuayejyekokan kanin kuajyo, tejuan tikmatij katej tlatlamantli kuajmej, ijkon panoua itech ialtepe Jehová katej tokniuan tlen amo san se tlamantli mokuayejyekouaj (Is. 44:4; 61:3). Tejuan tikitaj tlakualtsin kanin kuajyo porque katej tlatlamantli kuajmej. Noijki tikitaj kualtsin ialtepe Jehová porque amo san tikitaj tlen amo kuali kichiua oksekimej tokniuan.

17. ¿Tlen uelis tikchiuaskej para timouikaskej iuan tokniuan?

¹⁷ Moneki nochtin timochijchikauaskej kuali timouikaskej uan timoyolseuiskej inmiuan tokniuan (Mat. 5:9; Rom. 12:18). Tejuan titlapaleuiaj kuali mayeto ialtepe Jehová ijkuak timochijchikauaj kuali timouikaskej iuan nochtin tokniuan porque tikmatij toTajtsin Dios nochtin okinyole makitekichiuilikan (Juan 6:44).  Jehová yolpaki ijkuak kita tejuan timochijchikauaj kuali timouikaskej uan timoyolseuijtoskej iuan oksekimej tokniuan tlen ye kintlasojtla (Is. 26:3; Ageo 2:7).

18. ¿Tlen moneki tikchiuaskej uan tleka?

¹⁸ ¿Tlen uelis tikchiuaskej para toTajtsin Dios matechteochiua? Matimokuayejyekokan tlen techmachtia iTlajtol toTajtsin Dios uan amatlajkuilolmej. Tla ijkon tikchiuaj, techpaleuis matikteititikan melauak tikintlasojtlaj tokniuan (Rom. 12:10). Okachi timouikaskej iuan Jehová tla timokuayejyekouaj ken techteochiua. Tiyolpakiskej tla tikilnamikij tlen tikseliskej satepan uan tiktekichiuiliskej Jehová nochipa.

19. (1) Ijkon ken kijtoua Isaías 30:18, ¿tlen moneki tikneltokaskej? (2) ¿Tlen techpaleuis matitlaxikokan uan matiyolpakikan?

¹⁹ Jehová techpaleuis ijkuak kipojpolos tlen amo kuali (Is. 30:18). ToTajtsin Dios nochipa kichiua tlen kuali ikinon ayakmo kikauilis Satanás makichiua tlen amo kuali (Is. 25:9). Tiknekij Jehová matechmakixti uan ye kineki ijkon kichiuas. Ikinon ok moneki timotlatlaujtiskej, timomachtiskej iTlajtol, tikchiuaskej tlen ompa kijtoua uan timokuayejyekoskej ken techteochijtok Jehová. Tla ijkon tikchiuaj, Jehová techpaleuis matitlaxikokan uan matiyolpakikan ijkuak tiktekichiuiliaj.