TLAMACHTIL 48
“Matiijsatokah ika kuali totlalnamikilis” maski san tlen panos
“Matiijsatokah ika kuali totlalnamikilis” (1 TES. 5:6).
TLAKUIKALI 123 Ialtepe Jehová techyekana
XIKILNAMIKTO a
1. ¿Tleka moneki “matiijsatokah ika kuali totlalnamikilis”? (1 Tesalonicenses 5:6).
IJKUAK panoua itlaj tlen techyolkokoua kanin timonechikouaj uelis kichiuas amo matikneltokilikan Jehová uan ialtepe. ¿Tlen techpaleuis para amo ijkon matechpano? Nochipa ‘matiijsatokah’ ‘kuali matitlachixtokah’ uan ‘matitlaneltokakah’ (xiktlajtolti 1 Tesalonicenses 5:6). ¿Tleka moneki “matiijsatokah ika kuali totlalnamikilis”? Porque ijkon timoyolseuijtoskej, kuali timokuayejyekoskej uan timochijchikauaskej timokuayejyekoskej ken Jehová. Tla ijkon tikchiuaj, kuali tikpejpenaskej tlen tikchiuaskej.
2. ¿Tlen tikitaskej?
2 Yotikitakej eyi tlamantli tlen panoua kanin tichantij. Axkan tikitaskej eyi tlamantli tlen uelis panos kanin timonechikouaj uan xamo kichiuas matikkauakan ialtepe Jehová. Se, ijkuak timokuayejyekouaj se tokni otechchiuili tlen amo kuali, ome, ijkuak techyektlaliaj uan eyi, ijkuak tikitaj oui tikchiuaskej tlen technauatia ialtepe Jehová. Tla ijkon techpanoua, tikteititiskej ‘tiijsatoskeh ika kuali totlalnamikilis’ tla nochipa tiktlakamatij Jehová uan ialtepe.
IJKUAK SE TOKNI TECHYOLKOKOUA
3. ¿Tlen uelis timokuayejyekoskej ijkuak se tokni techchiuilia tlen amo kuali?
3 ¿Yotikmachili se tokni tlen techyekana omitschiuili tlen amo kuali? Xamo non tokni amo okinekiaya mitsyolkokos (Rom. 3:23; Sant. 3:2). Pero ok tikilnamikij tlen opanok uan hasta amo ueli tikochij uan timotlajtlaniaj: “¿Nin melauak ialtepe toTajtsin Dios?” (2 Cor. 2:11). Tla ijkon timokuayejyekouaj, uelis kichiuas matikkauakan Jehová uan ialtepe. Ikinon amo matimokuayejyekokan ijkon ken Satanás kineki. Pero tla ijkon techpanotok, ¿tlen techpaleuis amo ijkon matimokuayejyekokan?
4. (1) ¿Ken okiteititi José oijsatoka uan kuali otlalnamikiaya? (Génesis 50:19-21). (2) ¿Tlen techmachtia?
4 Amo san matimoyolkokojtokan. Ijkuak José okatka telpochtli ikniuan okichiuilijkej tlen amo kuali (Gén. 37:4, 18-22). Satepan okinemakakej ken tlakeuali. José sapanoua otlajyoui uan ijkon okipanok kanaj 13 xiuitl. Ye xamo uelis mokuayejyekoskia Jehová ayakmo okitlasojtlaya uan amo okipaleuijtoka. Pero amo san omoyolkokojtoka, okiteititi omoyolseuijtoka uan kuali otlalnamikiaya. Maski uelis momakopaskia amo ijkon okichi, okachi kuali okintlapojpolui uan okintlasojtlak ikniuan (Gén. 45:4, 5). José ijkon okichi porque amo san omokuayejyeko tlen okipanotoka, ye omokuayejyeko tlen okinekiaya Jehová (xiktlajtolti Génesis 50:19-21). Non techmachtiaj tla se tokni techchiuiliaj tlen amo kuali amo matimokuayejyekokan Jehová ayakmo techpaleuis, okachi kuali matimokuayejyekokan ken techpaleuijtok matitlaxikokan. Matitetlapojpoluikan uan matikilnamiktokan “akin milák tetlasojtla, kimati tetlapojpolwia” (1 Ped. 4:8).
5. ¿Ken okiteititi Miqueas oijsatoka uan kuali otlalnamikiaya?
5 Matikitakan tlen okipanok se tlayekanki tlen itoka Miqueas, ye chanti Sudamérica. b Se tonal omokuayejyeko sekimej tlayekankej okichiuilijkej tlen amo kuali. Ye okijto: “Amo keman ijkon onechpanouaya. Sapanoua onimotekipachouaya uan hasta amo ueli onikochiaya”. Maski tokni ijkon okipanok ye kuali otlalnamik uan omochijchika amo mokuayejyekos tlen amo kuali. Okitlatlaujti Jehová makimaka iespíritu santo uan makipaleui matlaxiko, noijki omomachti amatlajkuilolmej. Non techmachtia tla timokuayejyekouaj se tokni otechchiuili tlen amo kuali, matimoyolseuikan uan amo matimokuayejyekokan tlen amo kuali. Xamo tokni tlen ijkon otechchiuili itlaj kipanotok uan tejuan amo tikmatij. Matikiluikan Jehová tlen techpanoua uan noijki matechpaleui matimokuayejyekokan ken ye. Tla ijkon tikchiua, titetlapojpoluiskej (Prov. 19:11). Matikilnamikikan Jehová kimati tlen techpanoua uan ye techpaleuis matitlaxikokan (2 Crón. 16:9; Ecl. 5:8).
IJKUAK TECHYEKTLALIAJ
6. ¿Tleka moneki tikilnamiktoskej Jehová kiteititia techtlasojtla ijkuak techyektlaliaj? (Hebreos 12:5, 6, 11).
6 Xamo techyolkokouaj ijkuak ikaj techyektlaliaj. Pero tla san non timokuayejyekojtokej amo tikpatioitaskej otechyektlalijkej uan xamo hasta tikijtoskej amo omonekiaya ijkon kichiuaskej. Noijki amo tikilnamikiskej Jehová ijkon kiteititia techtlasojtla (xiktlajtolti Hebreos 12:5, 6, 11). Tla san nochipa timokuayejyekojtokej otechyektlalijkej, tikkauiliskej Satanás matechyekana. Ye kineki amo matiksekilikan otechyektlalijkej uan kineki matikkauakan Jehová uan ayakmo matimonechikokan. Tla otechyektlalijkej, ¿tlen techpaleuis matiijsatokan uan matitlalnamiktokan?
Pedro okachi kuali okitekichiuili Jehová ijkuak okiseli Jesús makiyektlali. (Xikita párrafo 7).
7. (1) Ijkon ken tikitaj itech dibujo, ¿tlen okinauati Jehová makichiua Pedro ijkuak okiyektalijke? (2) ¿Tlen techmachtia tlen okipanok Pedro?
7 Matikselikan ijkuak techyektlaliaj uan san niman matikpatlakan tlen tikchiuaj. Jesús okiyektlali Pedro inmixpan oksekimej apóstoles (Mar. 8:33; Luc. 22:31-34). Xamo Pedro opinauak pero amo keman okika Jesús, okiseli ijkuak okiyektlalijkej uan okipatlak tlen amo kuali okichiuaya. Satepan Jehová okiteochi uan okachi otlapaleui itech tlanechikol (Juan 21:15-17; Hech. 10:24-33; 1 Ped. 1:1). Non techmachtia xamo tipinauaskej ijkuak techyektaliskej pero matikselikan ijkuak techyektlaliaj uan san niman matikpatlakan tlen amo kuali tikchiuaj. Tla ijkon tikchiuaj, okachi kuali tikinpaleuiskej tokniuan uan okachi kuali tiktekichiuiliskej Jehová.
8, 9. ¿Ken omomachili tokni Bernardo ijkuak okiyektlalijkej uan tlen okipaleui mamokuayejyeko ken moneki?
8 Matikitakan tlen okipanok tokni Bernardo, ye chanti Mozambique. Ye okatka tlayekanki, ¿ken omomachili ijkuak okiluijkej ayakmo yetos tlayekanki? Ye okijto: “Sapanoua onimoyolkoko porque amo onechpakti ijkuak onechyektlalijkej”. Okitekipachouaya tokniuan makiteneuakan. Tokni okijto: “Opanok miak metstli para nimokuayejyekos ken moneki uan oksepa nikneltokilis Jehová uan ialtepe”. ¿Tlen okipaleui?
9 Bernardo okipatlak ken omokuayejyekouaya uan okijto: “Ijkuak onikinpaleuiaya tokniuan onikintlajtoltiliaya Hebreos 12:7 para nikinmititis Jehová techtlasojtla ijkuak techyektlalia uan onimokuayejyeko nochtin tiitekipanojkauan Jehová moneki tikchiuaskej tlen kijtoua non versículo”. Bernardo noijki okitlajtolti Biblia uan omokuayejyeko tlen ompa kijtoua para okachi kineltokilis Jehová uan ialtepe. Maski ok okitekipachouaya tokniuan xamo kiteneuaskia, ye inmiuan otetlapouiaya uan omonechikouaya. Satepan oksepa opejki tlapaleuia ken tlayekanki. c Tla otechyektlalijkej ijkon ken okipanok tokni Bernardo, amo matipinauakan, matikselikan uan san niman matikpatlakan tlen tikchijtokej (Prov. 8:33; 22:4). Tla ijkon tikchiuaj, amo tikkuaskej Jehová nion ialtepe uan ye techteochiuas.
IJKUAK ITLAJ MOPATLA ITECH IALTEPE JEHOVÁ
10. ¿Tlen uelis kichiuaskia israelitas ayakmo makitlakamatikan Jehová?
10 Tla amo timomaluiaj, xamo tikkauaskej Jehová ijkuak itlaj mopatla itech ialtepe. Matikilnamikikan tlen opanok yiuejkika, ijkuak israelitas omonekiaya kitlakamatiskej tlanauatilmej tlen okijkuilo Moisés. Akinmej okiyekanayaj ikalijtik okichiuaya altares uan ipatka ifamilia okitlamaniliayaj Jehová (Gén. 8:20, 21; 12:7; 26:25; 35:1, 6, 7; Job 1:5). Pero ijkuak opejkej kitlakamatij tlanauatilmej tlen okijkuilo Moisés ayakmo ijkon okichijkej. Jehová okipejpenki tlakamej tlen opouiayaj itech ifamilia Aarón mayetokan teopixkej para makitlamanilikan. Tla akinmej okinyekanayaj ifamilia amo ompa opouiayaj uan okichiuayaj tlen okinnamikiayaj teopixkej, mikiskiaj (Lev. 17:3-6, 8, 9). d ¿Nonmej tlanauatilmej okichijkej Coré, Datán, Abiram uan 250 akinmej okiyekanayaj altepetl, makinmixnamikikan Moisés uan Aarón? (Núm. 16:1-3). Amo tikmatij, pero Coré uan oksekimej tlakamej okixnamikej Jehová uan amo okitlakamatkej. ¿Tlen uelis tikchiuaskej para amo tikkauaskej Jehová tla itlaj mopatla itech ialtepe?
Cohatitas sapanoua oyolpakej ijkuak okinmiluijkej tlapaleuiskiaj ijkuak tlakuikaskiaj, kimaluiskiaj puertas uan almacenes. (Xikita párrafo 11).
11. ¿Tlen techmachtiaj tlen okichijkej sekimej cohatitas?
11 Matitlapaleuikan ijkuak itlaj mopatla itech ialtepe Jehová. Levitas tlen opouiayaj itech ifamilia Cohat otlapaleuiayaj ijkuak israelitas oyayaj kanin tlauaki. Ijkuak israelitas oyayaj oksekan sekimej cohatitas okiuikayaj arca uan miakej okinmitayaj (Núm. 3:29, 31; 10:33; Jos. 3:2-4). ¡Tlen okichiuaya cohatitas sapanoua kualtsin! Pero ijkuak israelitas okalakej itech tlali tlen Jehová okinmakak, ayakmo omonekiaya oksekan kiuikaskej Arca. Ijkuak otlanauatiaya Salomón sekimej cohatitas otlakuikayaj, okimaluiayaj puertas uan almacenes (1 Crón. 6:31-33; 26:1, 24). Biblia amo kijtoua cohatitas okinekiayaj makinmiluikan okachi matlapaleuikan porque yejuan okimatiayaj yotlapaleuijtokaj ijkuak okiuikayaj Arca. Non techmachtia moneki tikpaleuiskej ialtepe Jehová ijkuak itlaj mopatla, maski ayakmo titlapaleuiskej ken otikchiuayaj. Matiyolpakikan ijkuak tiktekichiuiliaj Jehová uan matikilnamiktokan ye okachi kipatioita matiktlakamatikan uan amo ken tiktekichiuiliaj (1 Sam. 15:22).
12. ¿Ken omomachili tokni Zaira ijkuak okiluijkej ayakmo tlapaleuiskia Betel?
12 Matikitakan tlen okipanok tokni Zaira, ye chanti Oriente Medio. Ye okipatioitaya tlapaleuis Betel uan ijkon okichi 23 xiuitl. Pero satepan okiluijkej matlapaleui ken precursora especial. Ye okijto: “Sapanoua onimoyolkoko ijkuak onechiluijkej ayakmo nitlapaleuiskia Betel uan onimokuayejyeko itlaj amo kuali onikchi”. Sekimej tokniuan tlen iuan omonechikouayaj okiyolkokojkej porque okiluijkej: “Tla timochijchikauaskia ok ompa titlapaleuiskia”. Tokni Zaira sapanoua omoyolkokouaya uan nochipa ochokaya. Ye okijto: “Amo onikilka Jehová nechtlasojtla uan noijki tokniuan”. ¿Tlen okipaleui?
13. ¿Tlen okichi Zaira para ayakmo moyolkokoskia?
13 Zaira omomachti itech amatlajkuilolmej tlen okinpanok sekimej itekipanojkauan Jehová ijkon ken ye okipanouaya. Sapanoua okipaleui tlen kijtoua revista Akin Tetlapouijtok 1 de febrero 2001, tlamachtil: “Usted puede afrontar el desánimo”. Ompa kijtoua tlen okipanok apóstol Marcos, xamo ye noijki omomachili ken tokni Zaira ijkuak ayakmo okitekichiuili Jehová ken ye okinekiaya. Zaira okijto: “Tlen okipanok Marcos sapanoua onechpaleui uan ijkon ayakmo onimoyolkoko”. Okiyolchikajkej iyolikniuan, ok omouikaya iuan tokniuan uan amo san omoyolkokojtoka. Okineltokak iespíritu santo Jehová kipaleuia ialtepe uan tokniuan akinmej techyekanaj okitlasojtlaya. Noijki okitak ialtepe Jehová okachi kipatioita matitetlapouikan.
14. ¿Tlen okichi tokni Vlado ijkuak ialtepe Jehová okipatlak seki tlamantli uan tlen okipaleui?
14 Matikitakan tlen okipanok tokni Vlado tlapaleuia ken tlayekanki, kipia kanaj 73 xiuitl uan chanti Eslovenia. Okitak oui ayakmo monechikoskia kanin achto omonechikouaya. Ye okijto: “Amo onikajsikamatiaya tleka omonekiaya kitsakuaskej kali kanin otimonechikouayaj, onikualanki porque yikin otikyektalijka. Ne onikuajximaya uan onikchijchi seki tlamantli, noijki para akinmej yitikpia miak xiuitl otikitakej oui seki tlamantli tlen omopatlak”. ¿Tlen okipaleui tokni makitlakaita tlen okipejpenki ialtepe Jehová? Ye okijto: “Techpaleuia ijkuak tikchiuaj tlen technauatia ialtepe Jehová. Noijki techpaleuis satepan ijkuak itlaj mopatlas”. Xamo oui tikitaj ijkuak ialtepe Jehová kijtoua ayakmo timonechikoskej iuan tokniuan tlen achto inmiuan otimonechikouayaj noso ijkuak techiluia oksekan titlapaleuitiuij. Tla ijkon techpanoua moneki tikilnamiktoskej Jehová techajsikamati uan ye techteochiuas tla tikchiuaj tlen technauatia ialtepe (Sal. 18:25).
“MATIIJSATOKAH IKA KUALI TOTLALNAMIKILIS”
15. ¿Ken uelis tikteititiskej tiijsatoskej uan titlalnamikij kanin timonechikouaj?
15 Axkan tikatej itlamian tonalmej ikinon uelis panos seki tlamantli kanin timonechikouaj tlen kichiuas xamo matikkauakan Jehová. Ikinon moneki kuali matitlalnamikikan. Amo matikualantokaj tla se tokni otechchiuili tlen amo kuali. San niman matikpatlakan tlen tikchiua tla se tokni techyektlalia. Nochipa matikpaleuikan ialtepe Jehová maski ayakmo tiktekichiuilia ken tiknekij porque itlaj mopatla.
16. ¿Tlen moneki tikchiuaskej para tikneltokiliskej Jehová uan ialtepe?
16 Tejuan uelis tikneltokiliskej Jehová uan ialtepe maski techpanos tlen amo kuali. Pero tla tikneki ijkon tikchiuaskej, moneki timoyolseuiskej, kuali timokuayejyekoskej uan timochijchikauaskej timokuayejyekoskej ken Jehová. Ximomachti tlen okinpanok itekipanojkauan Jehová uan ximokuayejyeko tlen okichijkej. Xikilui Jehová mamitspaleui uan ximouika inmiuan tokniuan tlen mouan monechikouaj. Tla ijkon tikchiuas, amo tikkauas Jehová nion ialtepe maski Satanás kineki ijkon xikchiua (Sant. 4:7).
TLAKUIKALI 126 Nitlachixtos, nitlaneltokas uan nimoyolchikauas
a Xamo ualeua oui tikitaj tikneltokiliskej Jehová uan ialtepe ijkuak se tokni kichiua itlaj tlen techyolkokoua. Axkan tikitaskej eyi tlamantli tlen uelis panos kanin timonechikoua uan tlen techpaleuis nochipa matikneltokilikan Jehová.
b Itech nin tlamachtil sekimej otikinpatilijkej intoka.
c Tikajsis okseki tlamantli tlen mitspaleuis itech revista Akin Tetlapouijtok 15 de agosto 2009, itech tlamachtil: “¿Le gustaría recuperar su privilegio de servicio?”.
d Tlanauatil tlen okijkuilo Moisés okijtouaya, tla akinmej okinyekanayaj infamilia okinekiayaj kimiktiskej se yolkatl para kikuaskej, omonekiaya kiuikaskej itech teokali. Pero akinmej uejka ochantiayaj amo okinmiluiayaj ijkon makichiuakan (Deut. 12:21).
